万歳敵討：本文 田里朝直作
謝名の子
是（くり）や大謝名（おおじゃな）ぬ輩（ひゃあ）嫡子（ちゃくし）謝名（じゃな）ぬ子（しい）。ああ、父親（ちちうや）とぅ高平（たかでえら）御鎖（うざすぃ）とぅ、馬遺恨（ぅんまいくん）故（ゆい）、父親（ちちうや）や闇討（やみう）ちに為（さ）りてぃ、朝夕（あさゆ）忘（わすぃ）りらん親（うや）ぬ敵仇（てぃちかたち）討（う）たんちゃいとぅ思（む）てぃ、眠（にぶ）る目（み）ん寝（に）らん、夜々（ゆゆ）毎（ぐとぅ）に忍（しぬ）でぃ、一人（ふぃちゅい）寝（に）らゆすぃが、仇（かたち）や用心（よおじん）怠（うくた）らん、夜回（ゆまわ）い常灯（じょおとお）付（つぃ）き明（あ）かち居（うぅ）りば、屋敷（やしち）に忍（しぬ）び入（い）る事（くとぅ）や我身（わみ）一人（ちゅい）が働（はたら）ちや力（ちから）及（うゆ）ばらん。次男（じなん）慶運（きいうん）や普天間（ふてぃんま）ぬ法印（ほおいん）ぬ弟子（でぃし）に成（な）ち有（あ）てぃん、急（いす）ぢ立（た）ち寄（ゆ）やい、仇（かたち）討（う）ち取（とぅ）ゆる談合（だんごお）ゆ為（すぃ）らに。やあやあ、慶運（きいうん）ゆ。
慶運
やあやあ、母（ふぁふぁ）拝（うぅが）み欲（ぶ）しゃ有（あ）てぃん今月（くんつぃち）や我身（わみ）ん行（ぎょお）に取（とぅ）い掛（か）かてぃ、御見舞（うみめ）えん為（すぃ）らん。
謝名の子
先（ま）ずぃ母親（ふぁふぁうや）ん此（く）ぬ頃（ぐる）や勧請（かんじょお）どぅ有（や）ゆる、ああ、至極（しぐく）差（さ）し詰（つぃ）まてぃ居（うぅ）る事（くとぅ）ぬ有（あ）てぃどぅ尋（とぅ）めてぃ来（ちゃあ）る。
慶運
ああ、何事（ぬうぐとぅ）が急（いす）ぢ語（かた）てぃ給（たぼ）り。
謝名の子
朝夕（あさゆ）忘（わすぃ）りらん親（うや）ぬ敵仇（てぃちかたち）討（う）たんちゃいとぅ思（む）てぃ、眠（にぶ）る目（み）ん寝（に）らん、夜々（ゆゆ）毎（ぐとぅ）に忍（しぬ）でぃ、一人（ふぃちゅい）寝（に）らゆすぃが、仇（かたち）や用心（よおじん）怠（うくた）らん、夜回（ゆまわ）い常灯（じょおとお）付（つぃ）き明（あ）かち居（うぅ）りば、屋敷（やしち）に忍（しぬ）び入（い）る事（くとぅ）や我身（わん）一人（ちゅい）が働（はたら）ちや力（ちから）及（うゆ）ばらん。出家長袖（しゅっきながすでぃ）に成（な）てぃ居（うぅ）てぃん、親（うや）ぬ事（くとぅ）有（や）りば、互（たげ）に孝行（こおこお）ぬ念力（にんりき）ぬ太刀（たち）ぬ、敵（てぃち）ぬ首骨（くびふに）に立（た）たな置（う）ちゅみ。とおとお、打（う）ち連（つぃ）りてぃ仇（かたち）討（う）たに。
慶運
親（うや）ぬ敵（てぃち）有（や）りば討（う）ち欲（ぶ）しゃや有（あ）すぃが、長袖（ながすでぃ）に成（な）とぅる我身（わみ）とぅ打（う）ち連（つぃ）りてぃ、敵仇（てぃちかたち）討（う）たば、武士（ぶし）ぬ身（み）ぬ名折（なう）り、他所（ゆす）ぬ物笑（むぬわれ）に成（な）らば如何（ちゃ）為（しゅ）が。
謝名の子
やあ、慶運（きいうん）、実（だに）ゆ聞（ち）ち留（とぅ）みり、先（ま）ずぃ父母恩重経（ぶむうんじゅうきょお）にん、父母（ふぶ）ぬ恩（うん）うぅ討論（とおろん）為（すぃ）るに、高天（こおてぃん）計（はか）り無（な）し旻天（びんてぃん）極（きわま）い無（な）し、又（また）童子経（どおしきょお）にん、父母（ふぶ）ぬ恩（うん）や須弥山（しゅみせん）ゆり高（たか）く、滄海（そうかい）帰（けえ）てぃ浅（あさ）してぃやい居（うぅ）りば、親（うや）ぬ恩（うん）忘（わすぃ）てぃ出家（しゅっき）遂（とぅ）ぎらりる仏（ふとぅき）ぬ道（みち）や又（また）有（あ）らん。他所（ゆす）他人（たにん）有（や）とぅてぃ仇討（かたちう）ち有（や）らば、武士（ぶし）ぬ身（み）ぬ名折（なう）り、黒染（くるず）みぬ長袖（ながすでぃ）成（な）てぃん兄弟（ちょおでえ）や有（あ）らん。又（また）仇（かたち）見残（みぬく）しゃい後（うし）る指（ゆび）為（さ）りてぃや、此（く）ぬ天（てぃん）ぬ下（しちゃ）に敵（てぃち）とぅ諸共（むるとぅむ）に生（い）ちち居（うぅ）い成（な）らん、とおとお、急（いす）ぢ思（うむ）い究（きわ）みりゆ。
慶運
ああ、理（くとぅわり）どぅ有（や）ゆる、今（なま）ぬ云言葉（いくとぅば）や許（ゆる）ち給（たぼ）り、互（たげ）に打（う）ち連（つぃ）りてぃ仇（かたち）討（う）たに。
謝名の子
ああ、今（なま）ぬ如（ぐとぅ）言（ぃゆ）すぃどぅ、孝（こお）ぬ道（みち）有（や）ゆる。抑々（すむすむ）、高平（たかでえら）御鎖（うざすぃ）や時（とぅち）得（うぃ）とぅる勢（いちう）い者（むぬ）有（や）りば、自由（じゆ）に討（う）ち取（とぅ）ゆる敵（てぃち）や又（また）有（あ）らん。互（たげ）に打（う）ち窶（やつぃ）り、万歳（まんぜえ）に成（な）やい、忍（しぬ）ぶ編（あ）み笠（がさ）に深（ふか）く顔（かう）隠（かく）ち、袋（ふくる）担（かた）み棒（ぼお）とぅ杖（つぃい）とぅに太刀（たち）仕込（しく）でぃ、出（ぃん）ぢてぃからや、二、三十日（にさんじゅうにち）ぬ内（うち）に敵（てぃち）討（う）たん為（しゅ）むぬ。
慶運
ああ、此（く）ぬ謀（はか）れ有（や）りば、仇（かたち）討（う）ち取（とぅ）ゆすぃ十日（とぅか）迄（までぃ）ん待（ま）たん。さあさあ、急（いす）ぢ打（う）ち立（た）たに。
謝名の子
やあ、慶運（きいうん）、母親（ふぁふぁうや）や此（く）ぬ頃（ぐる）気（ち）ぬ驚（うどぅる）ちば、乱心（らんしん）ぬ如（ぐとぅ）成（な）ゆん。敵（てぃち）討（う）たんてぃやい、暇乞（いとぅまぐぃ）ゆ為（すぃ）らば、打（う）ちゆ驚（うどぅる）ちゃい、乱心（らんしん）に成（な）る積（つぃ）むい、久米村（くにんだ）に下（う）りてぃ物（むぬ）ぬ本（ふん）講釈（こおしゃく）ゆ聞（ち）ちが行（い）ちゅんちゃい十（とぅう）とぅ四五日（しぐにち）ぬ暇（いとぅま）乞（くぃ）てぃ出（ぃん）ぢら。
慶運
今（なま）ぬ如（ぐとぅ）有（や）りば、気遣（きづぃけ）えや無（ね）らん、とおとお、急（いす）ぢ暇乞（いとぅまぐぃ）ゆ為（すぃ）らに。
高平良御鎖
出様（でぃよお）来（ちゃ）る者（むぬ）や、高平良御鎖（たかでえらうざすぃ）、ああ、無情（むじょ）ぬ世（ゆ）ぬ中（なか）や水（みずぃ）ぬ泡（あわ）心（ぐくる）、消（ち）いてぃ跡（あとぅ）無（ね）らん、露（つぃゆ）ぬ身（み）ゆ有（や）りば、誰（た）ぬ厄（やく）が有（や）ゆら、昨日（ちぬう）今日（ちゅう）二日（ふつぃか）、打（う）ち続（つぃづぃ）ちから鳩（はとぅ）ぬ飛（とぅ）び入（い）やい、仏壇（ぶつぃだん）に居（いぃ）ち居（うぅ）たん。妻子（とぅじっくぁ）や肝心（ちむぐくる）砕（くだ）ち、驚（うどぅる）ちどぅ居（うぅ）ゆる、山鳥（やまどぅい）ぬ入（い）りば、浜下（はまう）りゆ為（し）ゆる浮世（うちゆ）習（なら）わしに、妻子（とぅじくぁ）引（ふぃ）ち連（つぃ）りてぃ、小湾（くわん）かい浜下（はまう）りに行（い）ちゅん。やあ、供（とぅむ）ぬ達（ちゃあ）、小湾村（くわんむら）行（い）かば、宿（やどぅ）ゆ借（か）ゆらわん我（わ）が名（な）どぅん言（い）うな。只（ただ）首里方（しゅいがた）ぬ歴々りきりき）ぬ宿（やどぅ）借（か）ゆんてぃやい言（い）よおり。仇（かたち）持（む）ちゃい居（うぅ）る身（み）ぬ用心（よおぢん）どぅ有（や）ゆる。
供
拝（うぅが）ん留（とぅ）み有侍（やび）てぃ。
高平良御鎖
とおとお、小湾村（くわんむら）着（つぃ）ちゃん、やあ、供（とぅむ）ぬ達（ちゃあ）、日中（ふぃなか）や浜（はま）居（うぅ）とぅてぃ遊（あすぃ）ば、夜付（ゆうづぃ）ち成（な）らば村（むら）んかい行（い）ちゅん。急（いす）ぢ宿拵（やどぅぐしれ）え為（し）みり。
供
拝（うぅが）ん留（とぅ）み有侍（やび）てぃ。
高平良御鎖
やあ、真鍋樽（まなびだる）、今日（ちゅう）や浜辺（はまび）吹（ふ）く風（かぢ）ぬ涼（すぃだ）しゃ。真帆（まふ）掛（か）きてぃ走（はし）る船（ふに）ん一目（ちゅみ）どぅ見（みゅ）る、又（また）歌（うた）に書（か）かゆる彼（あ）ぬ小湾小松（くわんくまつぃ）や清（ちゅ）ら松（まつぃ）や有（あ）らに。
妻
うう。今日（ちゅう）や浜風（はまかぢ）ん涼（すぃだ）しゃ斯（か）ん嬉（うり）しゃ有（あ）むぬ、やあ、童（わらび）ぬ達（ちゃあ）、心（くくる）晴（は）り晴（ば）りとぅ芸能（ぬふぁ）為（し）ち遊（あすぃ）び。
子供達
うう。
歌
打（う）ち鳴（な）らし鳴（な）らし 四（ゆ）つぃ竹（だき）わ鳴（な）らち
今日（ちゅう）や浜（はま）出（ぃん）ぢてぃ 遊（あすぃ）ぶ嬉（うり）しゃ
細波（さざなみ）ぬ立（た）てぃば 何（ぬ）がすぃ浜千鳥（はまちどぅい）
恨（うら）み鳴・無（な）く無蔵（んぞ）や 分（わ）かてぃ居（うぅ）らん
高平良御鎖
ああ、出来（でぃき）た出来（でぃき）た。とおとお、良（い）い物（むぬ）ゆ思（う）び出（ぢゃ）ちゃん。寄（ゆ）らてぃ石（いし）な子（ぐ）ゆ取（とぅ）てぃ遊（あすぃ）び。
謝名の子
やあ、慶運（きいうん）、母親（ふぁふぁうや）ん拝（うぅが）でぃ、残（ぬく）る事（くとぅ）無（ね）らん、さあさあ、急（いす）ぢ打（う）っ立（た）たに。
慶運
とおとお、急（いす）が急（いす）が。
歌
親（うや）ぬ仇（かたち）うぅ討（う）たんてぃやい万歳（まんざい）姿（すぃがた）に打（う）ち窶（やつぃ）り、棒（ぼお）とぅ杖（つぃい）とぅに太刀（たち）仕込（しく）でぃ、編（あ）み笠（がさ）深（ふか）く顔（かう）隠（かく）ち、忍（しぬ）び忍（しぬ）びてぃ立（た）ち出（ぃん）ぢてぃ、村々（むらむら）里々（さとぅさとぅ）超（くぃ）い来（く）りば、平良（てえら）や忍（しぬ）ぶ敵（てぃち）ぬ門（むん）、兄弟（ちょおでえ）後目（しりみ）に見過（みすぐ）しち、後（うし）るぬ道（みち）に巡（みぐ）い来（ち）てぃ、行（い）く末吉（すぃいゆし）ぬ御神（うんかみ）に、祈（いぬ）る心（くくる）は我（わ）が敵（てぃち）に、急（いす）ぢ引合（ふぃちゃ）わち給（たぼ）りてぃやい、登（ぬぶ）てぃ社壇（しゃだん）に願（ぐぁん）立（た）てぃてぃ、真南（まふぇ）に向（む）かいてぃ眺（なが）んりば、四方（ゆむ）ぬ景色（きしき）わ面白（うむしる）や、計伊（きい）とぅ慶良間（きらま）ぬ渡中（とぅなか）には海士（あま）ぬ釣（つぃ）り舟（ぶに）浮（う）ち連（つぃ）りてぃ、沖（うち）ぬ鴎（かむみ）とぅ見違（みまごお）や、其（す）りから下（くだ）い来（ち）てぃ、エイ、御寺（うてぃら）御門（ぐむん）に立（た）ち寄（ゆ）やい、休（やすぃ）む姿（すぃがた）や他所（ゆす）知（し）らん。
道行人
やあやあ、万歳（まんざい）、首里方（しゅいかた）ぬ者（むぬ）有（や）すぃが、今日（ちゅう）や高平良御鎖（たかでえらうざすぃ）ぬ小湾（くわん）浜下（はまう）いゆ有（や）りば、踊（うどぅ）い臼太鼓（うすぃでえく）ぬ有（あ）んてぃやい聞（ち）ち、見物（きんぶつぃ）に行（い）ちゅん。道（みち）知（し）らん有（あ）むぬ寄（ゆ）すぃてぃ呉（くぃ）りゆ。
謝名の子
うう、此（く）ぬ末吉（すぃいゆし）からや勢理客（じっちゃく）んかい大道（ううみち）どぅ有（や）ゆる。是（くり）から真（ま）っ直（すぃ）ぐ御通（うとお）り召（み）しょり。
道行人
心（くくる）得（うぃ）てぃどぅ居（うぅ）ゆる、先（ま）ずぃ急（いす）ぢ行（い）かに。
謝名の子
ああ、願（にが）た事（くとぅ）叶（かな）てぃ、神（かみ）ぬ引合（ふぃちゃ）わしに今（なま）ぬ告（つぃ）ぎ有（や）りば、油断（ゆだん）すぃや成（な）らん、とおとお、急（いす）ぢ行（い）かに。
慶運
今日（ちゅう）討（う）たん仇（かたち）何時（いつぃ）し又（また）討（う）ちゅが、さあさあ、急（いす）ぢ通（とぅう）ら。
謝名の子
やあ、慶運（きいうん）ゆ、物（むぬ）思（うむ）う色（いる）や外（ふか）に現（あらわ）すな。互（たげ）に見合（みあ）ちどぅ敵（てぃち）に掛（か）から。
慶運
油断（ゆだん）為（さ）ん如（ぐとぅ）に物思（むぬみ）詰（つぃ）みてぃ。彼（あ）り彼（あ）り、幕（まく）や桟敷（さんしき）打（う）ち回（まわ）ち、慰（なぐさ）みゆる最中（さいちゅう）どぅ有（や）ゆる。
謝名の子
やあ、慶運（きいうん）ゆ、万歳（まんざい）行者（ごおすぃ）ゆ擬態（みかき）てぃ行（い）ちゃい、空（あ）き間（ま）窺（うかが）てぃどぅ討（う）たん為（しゅ）むぬ。
慶運
心得（くくるうぃ）てぃどぅ居（うぅ）ゆる。
歌
京太郎行者（やんざいごおすぃ）や万歳行者（まんざいごおすぃ）や 二月（にんぐぁつぃ）御穂立（うふだ）てぃ穂祭（ふうまつぃい）や 何（ぬう）ぬ日取（ふぃどぅ）りや良（ゆ）い日取（ふぃどぅ）り 米（めえ）や重（うむ）さい石（いし）や軽（かっ）さい 天（てぃん）ゆり下（くだ）いぬ布織（ぬぬう）い上手（じょおずぃ）ぬ 綾織（あやう）い男（うぃきが）ぬ錦（にしち）ぬ金襴（ちんらん） 唐苧（からうぅ）ぬ金襴（ちんらん） 男（うぃきが）ぬ長者（ちょおじゃ）ぬ 荷馬（にうま）ぬ長者（ちょうじゃ）ぬ 荷負（にいう）いゆ張（は）りてぃ京太郎（やんざあ）ゆ晴（は）りてぃ、京太郎（やんざあ）京太郎（やんざ）とぅ馬（ぅんま）乗（ぬ）てぃ通（とぅう）りば 一段（いちだ）とぅ褒（ふ）みらり 今日（ちゅう）ん明日（あちゃ）ん御祝事（うゆうぇぐとぅ）ゆ。
供
やあやあ、万歳（まんざい）、此処（くま）や高平良（たかでえら）、、、、あい、御鎖（うざすぃ）や有（あ）らん。首里方（しゅいかた）ぬ歴々（りきりき）ぬ御慰（うなぐさ）みどぅ有（や）ゆる。とおとお、村（むら）んかい行（い）ちょおり。
謝名の子
此（く）ぬ二人（たい）や京太郎（ちょんだらあ）頭（かしら）どぅ有（や）ゆる、御慰（うなぐさ）み事（ぐとぅ）有（や）らば御目覚（うみさ）まし勤（がらみ）かに。
子供
やあ、供（とぅむ）ぬ達（ちゃあ）、目覚（みざ）ましぬ有（あ）らば、呼（ゆ）でぃ踊（うどぅ）ら為居（しょお）り。
供
拝（うぅが）ん留（とぅ）み有侍（やび）てぃ。とおとお、御目覚（うみさ）まし勤（がらみ）きゆ。
供
拝（うぅが）ん留（とぅ）み有侍（やび）てぃ。
歌
隣（とぅな）いぬ耳切（みみち）り 鼻欠（はなか）き跛（ぐに）引（ふぃ）ち、汝（みゃあ）が目剥（みいは）ぎ首白（くびしる）親（うや）ん人（ちゅ）に 荒項（あらかじ）食（く）わりてぃ 喚（あび）らし叫（うらば）し 跳（とぅぬ）がし思（う）み入（い）や 里（さとぅ）一人（ちゅい）通（とぅう）やい里（さとぅ）が物言（むぬい）い苦（ぐり）しゃや 何（ぬう）に譬（たてぃ）るが、ええ、ふたのちやげなや（この句不明）。
子供
ああ、出来（でぃき）た出来（でぃき）た、詰（つぃ）みてぃ踊（うどぅ）ら為居（しょ）り。
高平良御鎖
やあ、真鍋樽（まなびだる）。夜（ゆ）ん暮（く）りてぃ居（うぅ）りば、此処（くま）居（うぅ）てぃ休（やすぃ）まに。急（いす）ぢ屋戸（やどぅ）行（い）ぢゅてぃ待（ま）てぃ。我身（わみ）ん軈（やが）てぃ来（く）ん為（しゅ）むぬ。
歌
京（きょお）ぬ小太郎（くたるう）が作（つぃ）くてんべえ、尻穿（つぃびふ）ぎやい手籠（てぃる）緒（うぅ）挿（すぃ）ぎてぃ 板切（いたぢり）目貫（みいぬ）ち乗（ぬ）い木（き）なる 目（みい）竹蜻蛉（ふぁあふぁあ）とぅ 為（し）い来居（ちょお）ん来居（ちょお）ん 京太郎（やんざい）行者（ごおすぃ）や馬舞（ぅんまめえ）しや 行者（ごおすぃ）舞（もお）た獅子（しし）舞（もお）た 斯有（かにゃ）る物（むぬ）御目掛（うみか）きたみ 可笑（うか）しゃ許（ばかり） 為（し）たりが来居（ちょお）ん来居（ちょお）ん やあ来居（ちょお）ん来居（ちょお）ん。
謝名の子
大謝名（おおじゃな）ぬ輩（ひゃあ）嫡子（ちゃくし）、大謝名（おおじゃな）ぬ子（しい）、我（わ）が親（うや）ぬ仇（かたち）今日（ちゅう）どぅ討（う）ちゅる。
慶運
次男（じなん）普天間（ふてぃんま）ぬ慶運坊（きいうんぼお）、いや逃（ぬが）さん。
謝名の子
やあ、慶運（きいうん）、親（うや）ぬ敵仇（てぃちかたち）討（う）ち取（とぅ）たる今日（ちゅう）や、過（すぃ）ぢし父親（ちちうや）ん態（ゆ）くどぅ誇（ふく）らりら。
慶運
仇（かたち）討（う）ち取（とぅ）たる今日（ちゅう）ぬ誇（ふく）らしゃや、急（いす）ぢ立（た）ち戻（むどぅ）てぃ母（ふぁふぁ）に語（かた）ら。
謝名の子
刀（かたな）や棒杖（ぼおつぃい）に納（うさ）みやい、踊（うどぅ）てぃ戻（むどぅ）ら。
慶運
とおとお、踊（うどぅ）てぃ戻（むどぅ）ら。
歌
仇（かたち）討（う）ち取（とぅ）たる 今日（ちゅう）や父親（ちちうや）ん
草（くさ）ぬ蔭（かぎ）居（うぅ）とぅてぃ 誇（ふく）り召（み）しぇら