大城崩：本文 田里朝直作
外間の子
是（くり）や大城（ううぐすぃく）若按司（わかあじ）ぬ輩（やかあ）外間（ふかま）ぬ子（しい）。ああ、島添（しますい）大里（おおざとぅ）ぬ按司（あじ）や、財欲（ざいゆく）に耽（ふ）きてぃ、銭金（じんかに）ぬ欲（ふ）しゃに、大城城（ううぐすぃくぐすぃく）軍（いくさ）押（う）し寄（ゆ）してぃ、七重八重（なないやい）攻（し）み囲（かく）でぃ居（うぅ）りば、水（みずぃ）や無（ね）ん城（ぐすぃく）六日（むいか）に成（な）りば、水（みずぃ）渇（かつぃ）に及（うゆ）でぃ大按司（ううあじ）や出（ぃん）ぢてぃ、討（う）ち死（じ）にゆ召（み）しょち女按司（うなじゃら）とぅ若按司（わかあじ）や、我（わ）が生（ぅん）まり島（しま）東（あがり）垣花（かちぬはな）に隠（かく）し置（う）ち有（あ）たん。極（ぐく）田舎（いなか）有（や）りば敵（てぃち）討（う）ちゅる働（はたら）ちや無（ね）らん、儀間（ぎま）とぅ湖城（くぐすぃく）や我（わ）が舅姑（すぃとぅ）島（しま）ゆ有（や）りば、那覇（なふぁ）近（ちか）き彼（あ）り此（く）りぬ頼（たゆ）い良（ゆ）たしゃ有（あ）てぃ、又（また）儀間（ぎま）湖城（くぐすぃく）んかい引（ふぃ）っ越（く）しゃい、仇（かたち）討（う）たんちゃい節（しつぃ）待（ま）ちゅる内（うち）に、鮫川（さみかあ）ぬ按司（あじ）ぬ軈（やが）てぃ大里（ううざとぅ）ぬ按司（あじ）、討（う）ち召（み）しぇん與呼（てぃやい）神（かみ）ぬ御硯・御託宣（みすぃずぃり）ぬ有（あ）りば、急（いす）ぢ思（う）み子（ぐぁ）御供（うとぅむ）勤（がらみ）ちゃい、鮫川（さみがあ）ぬ按司（あじ）とぅ打（う）ち連（つぃ）りてぃ、我（わ）が按司（あじ）ぬ仇（かたち）大里（ううざとぅ）ぬ按司（あじ）や討（う）ち取（とぅ）たん。女按司（うなぢゃら）と思（う）みん子（ぐぁ）や逃（に）ぢ走（ふぇえ）てぃ居（うぅ）らん、下（しむ）ぬ七間切（まぢり）野山（ぬやま）から手分（てぃわ）き、村々（むらむら）ゆ探（さが）しゅすぃが此（く）ぬ二月（たつぃち）成（な）る迄（ぎゃでぃ）ん、音連（うとぅづぃ）りん無（ね）らん。聞（ち）きば兄（すぃざ）思（う）み子（ぐぁ）乳母（ちいあん）や中城（なかぐすぃく）間切（まぢり）荻堂（おんぢょお）生（ぅん）まり、てぃやい有（あ）りば、急（いす）ぢ立（た）ち越（く）しゃい、搦（から）み出（だ）ち来（く）らに、やあやあ、供（とぅむ）ぬ達
（ちゃあ）、荻堂村（おんぢょおむら）来（ちゃ）ん。忍（しぬ）び隠（かく）りとぅてぃ尋（たずぃ）にやい見（ん）だに。
供
疑（うたげ）えや無（ね）らん荻堂（おんぢょお）大城（ううぐすぃく）、二村（たむら）ぬ内（うち）から探（さが）し出（ぃん）ぢゃ為侍（しゃ）びん。
歌
風車（かじまや）や凪（とぅ）りば 風（かじ）連（つぃ）りてぃ回（みぐ）る
吾（わん）や友（どぅし）尋（とぅ）めてぃ 遊（あすぃ）び欲（ぶ）しゃぬ
金松
よっよっよっ。
乳母
やあ、思（う）みん子（ぐぁ）。急（いす）ぢ入（い）り召（み）しょり。大道（うふみち）に出（ぃん）ぢてぃ今（なま）ぬ如（ぐとぅ）召（み）しょち、他所（ゆす）ぬ目（み）に掛（か）から時（とぅち）や如何（いちゃ）が召（み）しぇら。
外間の子
やあ、供（とぅむ）ぬ達（ちゃあ）、彼（あ）ぬ童（わらび）二人（たい）や肝（ちむ）不思議（ふしぢ）でむぬ、行（い）ち擦（ずぃ）りぬ如（ぐとぅ）出（ぃん）ぢてぃ道（みち）ぬ人（ちゅ）に、屋戸主（やどぅぬし）ぬ名字（みょおじ）尋（たずぃ）にやい来（ちょお）り。
供
拝（うぅが）ん留（とぅ）み有侍（やび）てぃ。
歌
勝連（かつぃりん）ぬ島（しま）や 通（かゆ）い欲（ぶ）しゃ有（あ）すぃが
和仁屋（わにゃ）真門（まじょ）ぬ潮（うしゅ）ぬ 蹴遣（きや）い倦（あぐ）でぃ
供
やあ、草切（くさち）りゆ。彼（あ）ぬ屋戸（やどぅ）ぬ主（ぬし）や如何（いちゃ）為（し）ちゃる人（ふぃとぅ）か。
草切
此（く）ぬ村（むら）ぬ頭取（かしらどぅ）い泊（とぅまい）ぬ輩（ひゃあ）屋戸（やどぅ）でえ侍（び）る。
供
又（また）此（く）ぬ頃（ぐる）、首里方（しゅいかた）ぬ人（ちゅ）ぬ宿（やどぅ）借（か）やい居（うぅ）んでぃ言（ぃゆ）すぃが、聞（ち）ち欲（ぶ）しゃ有（あ）むぬ語（かた）てぃ呉（くぃ）りゆ。
草切
屋戸（やどぅ）ん人（ちゅ）や女（うぃなぐ）童（わらび）三四人（さんゆにん）でえ侍（び）る。
供
士族（ゆかっちゅ）か百姓（ひゃくしょお）か。
草切
百姓（ひゃくしょお）や有（あ）や侍（び）らん士族（ゆかっちゅ）ぬ如（ぐとぅ）どぅ有（あ）や侍（び）いる。先（ま）ずぃ、通（とぅ）う有侍（やび）ら。
供
問（とぅ）い尋（たずぃ）にやい来（ちゃ）あ侍（び）たん。此（く）ぬ村（むら）ぬ頭取（かしらどぅ）い泊（とぅまい）ぬ輩（ひゃあ）屋戸（やどぅ）でえ侍（び）る。又（また）屋戸（やどぅ）ん人（ちゅ）や女（うぃなぐ）童（わらび）三四人（さんゆにん）、士族（ゆかっちゅ）どぅ有（や）るてぃやい、草切（くさち）りぬ言（い）や侍（び）たん。
外間の子
ああ、思（うむ）た事（くとぅ）叶（かな）てぃ、良（いぃ）い事（くとぅ）や聞（ち）ちゃん。大里（ううざとぅ）ぬ体（かんだ）忍（しぬ）でぃ隠（かく）りとぅすぃ疑（うたげ）えや無（ね）らん。とおとお、屋敷（やしち）取（とぅ）り囲（かく）でぃ、踏（ふ）み入（い）やい唯（ただ）に、込（く）ん締（し）みてぃ来居（ちょお）り。
供
うう。いや、逃（ぬが）さん。
虎千代
あいつあいつ。
供
いや、逃（ぬが）さん。
金松
あいつあいつ。
乳母
やあやあ、如何（いちゃ）る事（くとぅ）有（や）とぅてぃ今（なま）ぬ如（ぐとぅ）召（み）しぇが。
供
いや、推参（すぃいさん）な事（くとぅ）言（い）うな。急（いす）ぢ立（た）ち退（ぬ）きゆ。
おなぢゃら
あきよお、玉黄金（たまくがに）。
金松
やあ、母親（ふぁふぁうや）ゆ、明日（あちゃ）からや兄弟前（やちめ）とぅ二人（たい）。風車（かじまや）舞（め）え有侍（やび）らん。犬（いん）舞（め）え有侍（やび）らん。
殿地（とぅんち）から外（ふか）や庭（なあ）ん出（ぃん）ぢてぃ見（み）や侍（び）らん。何（ぬ）がすぃ済（すぃ）まらしゅる許（ゆる）ち給（たぼ）り。
乳母
あきよお、貴無（あてぃな）しぬ、其（う）ぬ科（とぅが）や有（あ）らん。やあ、思（う）みん子（ぐぁ）、敵（てぃち）に捕（とぅ）りらりてぃ如何（いちゃ）が成（な）い召（み）しぇら。
おなぢゃら
やあやあ、何（ぬ）ぬ由（ゆし）ぬ有（あ）とぅてぃ、今（なま）ぬ如（ぐとぅ）召（み）しぇが。罪科（つぃみとぅが）や無（ね）らん許（ゆる）ち給（たぼ）り。
外間の子
やあやあ、鮫川（さみがあ）ぬ按司（あじ）ぬ悪行（あくぎょ）知（し）らに、語（かた）てぃ聞（ち）かさ。先（ま）ずぃ、大城（ううぐすぃく）ぬ世（ゆ）ぬ按司（あじ）や大
慈悲（でえじふぃ）な者（むぬ）、世間（しきん）鳴響（とぅゆ）まりる福人（ふくじん）ゆ有（や）りば、城内（ぐすぃくうち）なかい山（やま）ゆりん積（つぃ）でぃ有（あ）たる宝（たから）、其（う）ぬ外（ふか）ぬ諸道具（しょどぐ）迄（までぃ）拾（ふぃ）ら取（とぅ）てぃ、軈（やが）てぃ石垣（いしがち）ぬ石（いし）ん手渡（てぃわた）しに持（む）ちゃい、大里（ううざとぅ）ぬ城（ぐすぃく）石垣（いしがち）ん清（ちゅ）らく積（つぃ）みゆ改（あらた）みてぃ、八尋殿（やふぃらどぅん）十尋殿（とぅふぃらどぅん）高二階（たかにけえ）ん造（つぃく）てぃ、高枕（たかまくら）据（すぃ）きてぃ近方（ちかかた）ぬ百姓（ひゃくしょお）ぬ、妻子（とぅじっくぁ）ぬ面（つぃら）ぬ清（ちゅ）らさすぃや呼（ゆ）び寄（ゆ）してぃ犯（うぅか）ち、又（また）百姓（ひゃくしょお）ぬ財物（ぜえぶつぃ）掠（かすぃ）み取（とぅ）てぃ、悪欲（あくゆく）ゆ尽（つぃく）ちゃりば世（ゆ）ぬ中（なか）ぬ障（さわ）い、生（い）かち置（う）ち済（すぃ）まん討（う）ち果（は）たち有（あ）ん。悪欲（あくゆく）ぬ蔓（かんだ）根葉（にふぁ）刈（か）やい捨（すぃ）てぃら與呼（てぃやい）、搦（から）み取（とぅ）てぃ行（い）ちゅん。やあ、供（とぅむ）ぬ達（ちゃあ）、急（いす）ぢ引（ふぃ）ち立（た）てぃり。
供
うう、いや、急（いす）ぢ立（た）てぃ。
おなぢゃら
やあやあ、生（な）し子（ぐぁ）振分（ふや）かりてぃ生（い）ちち居（うぅ）らりゆみ、吾（わぬ）ん諸共（むるとぅむ）に縛（しま）てぃ連（つぃ）りてぃ給（たぼ）り。
供
いや、要（い）らん事（くとぅ）言（い）うな。
虎千代
やあ、母親（ふぁふぁうや）ゆ何時（いつぃ）迄（までぃ）ん名残（なぐ）り、頼（たん）でぃ思（う）み切（ち）やい涙（なみだ）押（う）し拭（ぬぐ）てぃ内（うち）に入（い）り召（み）しょり。やあ、乳母（あんめえ）ゆ、敵（てぃち）ぬ手（てぃ）に掛（か）かてぃ、出（ぃん）ぢ立（た）ちゅる際（ちわ）に只（ただ）泣（な）ちん済（すぃ）まん、頼（たん）でぃ母親（ふぁふぁうや）や内（うち）に御遣（うんつぃけ）え為（すぃ）りゆ。
供両人
うう、急（いす）ぢ立（た）てぃ。
歌
あきよ神仏（かみふとぅき） 有（あ）る者（むぬ）ゆ有（や）らば
哀（あわ）り此（く）ぬ憂（う）ち目（み） 救（すく）てぃ給（たぼ）り
外間の子
やあやあ、思（う）みん子（ぐぁ）、大里（ううざとぅ）ぬ蔓（かんだ）搦（から）み出（ぢゃ）ち来（ちゃ）あ侍（び）たん。
若按司
やあ、輩（やかあ）、搦（から）み出（ぢゃ）ち来（ちゃ）あみ。
外間の子
うう、荻堂村（うぉんぢょおむら）なかい忍（しぬ）び隠（かく）りやい居（うぅ）すぃ、搦（から）み出（ぢゃ）ち来（ちゃ）あ侍（び）たん。
若按司
ああ、出来（でぃき）た出来（でぃき）た。やあ、輩（やかあ）、今日（ちゅう）や夜（ゆ）ん暮（く）りてぃ居（うぅ）むぬ、態（ゆう）格護（かくぐ）為（し）みてぃ置（う）ちゅてぃ、明日（あちゃ）や馬天浜（ばてぃんはま）出（ぃん）ぢゃち切（ち）り捨（すぃ）てぃてぃ来（く）うに。
外間の子
拝（うぅが）ん留（とぅ）み有侍（やび）てぃ。
歌
あきよ玉黄金（たまくがに）情（なさ）き無（ね）ん武士（ぶし）ぬ 百威（むむうどぅ）ち威（うどぅ）ち行（い）ちゅら與呼（ちゃい）とぅ思（み）ば 肝（ちむ）ん肝（ちむ）成（な）らん吾（わん）や此処（くま）居（うぅ）とぅてぃ 一人（ふぃちゅい）徒（いたずぃ）らに焦（く）がり死（し）なゆりか 無常（むじょ）ぬ世（ゆ）ぬ中（なか）や 稲妻（いなづぃま）ぬ光（ふぃちゃい）水（みずぃ）ぬ泡（あわ）心（ぐくる） 残（ぬく）る人（ふぃとぅ）無（ね）さみ 軈（やが）てぃ消（ち）い果（は）てぃる露（つぃゆ）ぬ身（み）ゆ有（や）りば 玉黄金（たまくがに）尋（とぅ）めてぃ一道（ちゅみち）成（な）ゆん。
おなぢゃら
大里（ううざとぅ）ぬ按司（あじ）ぬ女按司（うなじゃら）どぅ有（や）ゆる。玉黄金（たまくがに）二人（ふたい）、敵（てぃち）に捕（とぅ）りらりてぃ情（なさ）き無（ね）ん武士（ぶし）ぬ百威（むむうどぅ）ち威（うどぅ）ち、連（つぃ）り行（い）ぢゃらとぅ思（み）ば、肝（ちむ）ん肝（ちむ）成（な）らん、此処（くま）居（うぅ）とぅてぃ一人（ふぃちゅい）焦（く）がり死（し）なゆりか、玉黄金（たまくがに）追（うぃ）い付（つぃ）ちゃい一道（ちゅみち）成（な）ゆん。やあやあ、畑（はる）ん人（ちゅ）ゆ、玉黄金（たまくがに）ん子（ぐぁ）や此（く）ぬ道（みち）が行（い）ぢゃら。此（く）ぬ道（みち）や行（い）かに。何（ぬ）がすぃ玉黄金（たまくがに）行（い）く先（さち）ん知（し）らん。
歌
我謝（がじゃ）とぅ与那原（ゆなばる）ぬ浜（はま）に鳴（な）く千鳥（ちどぅい） 聞（ち）きば態（ゆく）勝（まさ）てぃ二人（たい）が面影（うむかぢ）ぬ 我（わ）が袖（すでぃ）に縋（すぃが）てぃ離（はな）ち離（はな）さらん 住（すぃ）み馴（な）りし城（ぐすぃく） 見（ん）だんちゃい為（すぃ）りば 夏雨（なちぐり）る涙（なみだ）掻（か）ち曇（くむ）てぃ見（ん）らん 急（いす）ぢ玉黄金（たまくがに）追（うぃ）い付（つぃ）かん為（すぃ）りば 歩（あゆ）まらん浜地（はまじ）後（あとぅ）に立（た）ち戻（むどぅ）る 目元（みむとぅ）暗々（くらぐら）とぅ成（な）るが心気（しんち）
乳母
やあ、女按司（うなぢゃら）ぬ前（めえ）ゆ。此処（くま）や馬天浜（ばてぃんはま）此処（くま）居（うぅ）てぃや済（すぃ）まん、とおとお、急（いす）ぢ御立（うた）ち召（み）しょおり。
おなぢゃら
肝（ちむ）苦（くり）てぃ行（い）ちゅん、暫（しば）し休（やすぃ）ま。
若按司
出様（でぃよお）来（ちゃ）る者（むぬ）や大城（ううぐすぃく）若按司（わかあじ）。按司添（あじすい）が仇（かたち）大里（ううざとぅ）ぬ生（な）し子（ぐぁ）、馬天浜（ばてぃんはま）出（ぃん）ぢゃち殺（くる）さしが行（い）ちゅん。
外間の子
馬天浜（ばてぃんはま）来（ちゃ）あ侍（び）たん。
若按司
やあ、輩（やかあ）、急（いす）ぢ切（ち）り捨（すぃ）てぃらすぃゆ。
外間の子
拝（うぅが）ん留（とぅ）み有侍（やび）てぃ。
おなぢゃら
やあやあ、其（う）ぬ童（わらび）二人（たい）や何（ぬ）ぬ由（ゆし）ぬ有（あ）とぅてぃ、如何（いちゃ）が召（み）しぇら。
外間の子
此（く）ぬ二人（たい）や大里（ううざとぅ）ぬ生（な）し子（ぐぁ）、大城（ううぐすぃく）若按司（わかあじ）ぬ敵仇（てぃちかたち）有（や）とぅてぃ、許（ゆる）ち置（う）ち成（な）らん。殺（くる）ち棄（すぃ）てぃらしゅん。
おなぢゃら
やあやあ、大里（ううざとぅ）ぬ按司（あじ）や如何（いちゃ）為（し）ちゃる科（とぅが）に殺（くる）さりてぃ居参（いめ）が。
外間の子
大城（ううぐすぃく）世（ゆ）ぬ按司（あじ）殺（くる）ち有（あ）る科（とぅが）に殺（くる）さりてぃ居参（いめ）ん。
おなぢゃら
人（ちゅ）殺（くる）ち有（あ）る報（むく）い又（また）殺（くる）さりてぃ居（うぅ）りば、何故（ぬゆ）でぃ罪（つぃみ）尽（つぃく）ち生（な）し子（ぐぁ）迄（までぃ）殺（くる）す。
外間の子
いや、推参（すぃいさん）な事（くとぅ）言（い）うな、急（いす）ぢ立（た）ち退（ぬ）き。
おなぢゃら
やあやあ、吾（わん）や大里（ううざとぅ）ぬ按司（あじ）ぬ女按司（うなじゃら）どぅ有（や）ゆる。我（わ）が按司（あじ）や殺（くる）ちゃりば、敵討（てぃちう）ちや済（すぃ）だん。何（ぬ）ぬ罪（つぃみ）ん無（ね）らん童（わらび）貴無（あてぃな）しに要（い）らん罪（つぃみ）掛（か）きてぃ、殺（くる）さしゆ召（み）しぇが慈悲（じふぃ）ゆ御情（うなさ）きに助（たすぃ）きやい給（たぼ）り。
外間の子
いやいや、極（きわ）またる事（くとぅ）ぬ凌（しぬ）ぢ凌（しぬ）がりみ。とおとお、急（いす）ぢ戻（むどぅ）てぃ行参（いも）り。
おなぢゃら
やあやあ、願（にが）てぃ自由（じゆ）成（な）らん事（くとぅ）ゆ又（また）有（や）らば、此（く）ぬ母（ふぁふぁ）ぬ苦（くり）しゃ哀（あわ）り知（し）り召（み）しょち、責（し）めてぃ兄子（すぃいざぐぁ）や許（ゆる）ち給（たぼ）り。
外間の子
やあ、思（う）みん子（ぐぁ）、女按司（うなじゃら）ぬ御願（うにげ）今（なま）ぬ如（ぐとぅ）有（や）りば、二人共（たいとぅむ）に殺（くる）しゅすぃや忍（しぬ）ばらん有（あ）や侍（び）むぬ、弟（うっとぅ）思（う）みん子（ぐぁ）今（なま）童（わらび）有（や）りば、母（ふぁふぁ）添（すぃ）いてぃ津堅島（つぃきんしま）に御流（うなが）しゆ召（み）しょち、片時（かたとぅち）ん急（いす）ぢ兄（すぃざ）思（う）み子（ぐぁ）殺（くる）しゃ侍（び）ら。
おなぢゃら
やあやあ、願（にげ）ぬ如（ぐとぅ）一人（ふぃちゅい）御助（うたすぃ）きぬ有（あ）らば、是非共（じふぃとぅむ）に兄子（すぃざぐぁ）や許（ゆる）ち給（たぼ）り。
外間の子
いやいや、殺（くる）しゅらば、迚（とぅてぃ）ん兄（すぃざ）思（う）み子（ぐぁ）殺（くる）ち、弟（うっとぅ）思（う）み子（ぐぁ）や先（ま）ずぃ残（ぬく）ち置（う）ちゃ侍（び）ら。
若按司
とおとお、言（ぃゆ）る事（ぐとぅ）に急（いす）ぢ兄（すぃざ）ん子（ぐぁ）ゆ殺（くる）す。
おなぢゃら
やあやあ、此（く）ぬ際（ちわ）ゆ有（や）りば何（ぬ）ぬ御恥（うは）じかしゃが。隠（かく）ち居（うぅ）てぃ済（すぃ）まん言（い）やな又（また）成（な）ゆみ。彼（あ）ぬ兄子（すぃいざぐぁ）虎千代（とぅらちゆ）や継子（ままっくぁ）どぅ有（や）ゆる、彼（あ）りが母親（ふぁふぁうや）や草（くさ）ぬ葉（ふぁ）ぬ露（つぃゆ）とぅ消（ち）い果（は）てぃてぃ、此（く）ぬ世（ゆ）ぬや居（うぅ）らん孤児（みなしぐぁ）どぅ有（や）ゆる。弟子（うっとぐぁ）金松（かにまつぃ）や直（じき）ん子（ぐぁ）どぅ有（や）ゆる、片親（かたうや）や残（ぬく）てぃ居（うぅ）りば弟子（うっとぅぐぁ）や殺（くる）ち、慈悲（じふぃ）ゆ、兄（すぃざ）ん子（ぐぁ）や生（い）かち給（たぼ）り。
若按司
云言葉（いくとぅば）ぬ色（いる）に義理情（ぢりなさ）き含（ふく）でぃ、聞（ち）ちゅる袖（すでぃ）迄（までぃ）ん、匂（にう）いぬ萎（しゅう）らしゃ。
外間の子
召（み）しぇる如（ぐとぅ）、聞（ち）ちゃる袖（すでぃ）迄（までぃ）ん露（つぃゆ）ぬ繁（しぢ）さ。
若按司
やあ、供（とぅむ）ぬ達（ちゃあ）、急（いす）ぢ虎千代金（とぅらちゆがに）解（とぅ）ち許（ゆる）すぃ。やあ、輩（やかあ）、女按司（うなじゃら）ぬ御志（うくくるざし）今（なま）ぬ如（ぐとぅ）有（や）りば、虎千代（とぅらちゆ）や許（ゆる）ち、金松（かにまつぃ）や殺（くる）すぃ。
虎千代
やあ、母親（ふぁふぁうや）ゆ、吾（わん）や年月（とぅしつぃち）ぬ頭（かしら）踏（くだみ）てぃどぅ、先（さち）や生（う）まりたる。弟（うっとぅ）先（さち）成（な）しゅみ、金松（かにまつぃ）や生（い）ちてぃ、吾（わん）殺（くる）ち給（たぼ）り。
おなぢゃら
やあ、虎千代（とぅらちゆ）、後先（あとぅさち）どぅ成（な）ゆる、吾（わぬ）ん後生（ぐしょ）行（い）かば、按司添（あじすい）とぅ母親（ふぁふぁうや）に面（うむてぃ）打（う）ち向（ん）かてぃ、云言葉（いくとぅば）ん無（ね）らん今（なま）ぬ如（ぐとぅ）でむぬ、頼（たん）でぃ玉黄金（たまくがに）義理（ぢり）ゆ聞（ち）ち留（とぅ）みり。やあ、金松（かにまつぃ）ゆ、継子（ままっくぁ）ゆでんすぃ吾（わん）や憎（にく）まにば、何故（ぬゆ）でぃ直（じき）ん子（ぐぁ）ゆ憎（にく）さちゃい思（うま）ん。義理（ぢり）ぬ重（うむ）さ有（あ）てぃ今（なま）ぬ如（ぐとぅ）有（や）りば、肝（ちむ）ぬ思（う）み染（す）みてぃ母（ふぁふぁ）うぅ恨（うら）みるな、真（まく）とぅ後生（ぐしょ）有（あ）らば過（すぃ）ぢし按司添（あじすい）とぅ、虎千代（とぅらちゆ）が母（ふぁふぁ）拝（うぅ）がでぃ細（みすぃ）く御宣（うんみゅ）きりゆ。
金松
やあ、母親（ふぁふぁうや）ゆ、此（く）ぬ事（くとぅ）や肝（ちむ）に思（う）み染（す）みてぃ居（うぅ）むぬ、後生（ぐしょ）行（い）かば今（なま）ぬ様（よお）御宣（うんみゅ）き有侍（やび）ら。
若按司
やあ、輩（やかあ）、彼（あ）ぬ二人（たい）とぅ吾（わん）や互（たげ）に敵仇（てぃちかたち）有（や）てぃん、女按司（うなじゃら）ぬ御志（うくくるざし）今（なま）ぬ如（ぐとぅ）有（や）りば、許（ゆる）ち置（う）ち有（あ）てぃん気遣（きづぃけ）えや無（ね）らん、とおとお、二人（たい）共（とぅむ）に許（ゆる）ち遣（やら）すぃ。
外間の子
拝（うぅが）ん留（とぅ）み有侍（やび）てぃ。やあ、女按司（うなじゃら）ぬ前（めえ）ゆ。御志（うくくるざし）若按司（わかあじ）や感（かん）じやい、二人（たち）共（とぅむ）に御助（うたすぃ）きゆ召（み）しぇん、とおとお、押（う）し連（つぃ）りてぃ御戻（うむどぅ）りゆ召（み）しょり。
おなぢゃら
やあ、若按司（わかあじ）ゆ、今日（ちゅう）ぬ御恩（ぐうん）尊（とぅうとぅ）さや長浜（ながはま）ぬ真砂（まさぐ）読（ゆ）みや尽（つぃく）すとぅん、云言葉（いくとぅば）に出（ぃん）ぢゃち言（い）ちや尽（つぃく）さらん。若按司（わかあじ）ぬ十百歳（とぅひゃくさ）ぬ願（にげ）や朝夕（あさゆ）胸内（んにうち）に願（にげ）てぃ居（うぅ）らに、やあ、生（な）し子（ぐぁ）、今日（ちゅう）からぬ先（さち）や敵仇（てぃちかたち）とぅ思（む）な、行（ゆ）く末（すぃ）寄（ゆ）しり遣（や）い御友（うとぅむ）為（すぃ）りゆ。
虎千代
此（く）ぬ御恩（ぐうん）尊（とぅうとぅ）さや何時（いつぃ）し忘（わし）りゆが、互（たげ）に行（ゆ）く末（すぃい）や御友（うとぅむ）為（すぃ）りゆ。
若按司
やあ、虎千代金（とぅらちゆがに）、やあ、金松金（かにまつぃがに）ゆ、互（たげ）に敵仇（てぃちかたち）とぅ思（む）な、友（どぅし）に為（すぃ）らに、とおとお、今日（ちゅう）や誇（ふく）らしゃぬ、押（う）し連（つぃ）りてぃ互（たげ）に踊（うどぅ）てぃ別（わか）ら。
虎千代
とおとお、押（う）し連（つぃ）りてぃ踊（うどぅ）てぃ別（わか）や侍（び）ら。
歌
今日（ちゅう）ぬ誇（ふく）らしゃや 木草（きくさ）色（いる）変（か）わてぃ
旱（ふぃでぃり）為（しゅ）る頃（くる）ぬ 雨（あみ）来合（ちゃ）た如（ぐとぅ）