大川敵討：本文 久手堅親雲上作
村原のひや
出（でぃ）よおちゃる者（むぬ）や、大川（おおかわ）ぬ按司（あじ）ぬ頭役（かしらやく）村原（むらばる）ぬ輩（ひゃあ）、今帰仁（なきじん）ぬ城（ぐすぃく）御使（うつぃけ）え行（い）ち遣（や）り、戻（むどぅ）る道（みち）過（すぃ）がら聞（ち）きば腹立（はらだ）ちや、谷茶暴者（たんちゃあまやあ）が野心事（やしんぐとぅ）企（たく）でぃ、何（ぬ）ぬ事（くとぅ）ん思（うま）ん大川（おおかわ）ぬ按司（あじ）ぬ、国々（くにぐに）ぬ按司部（あじび）討（う）たんてぃやり為（しゅ）んでぃ、島々（しまじま）ゆ巡（みぐ）てぃ段々（だんだん）に言成（いな）ち、加勢（かしい）頼（たぬ）み入（い）り軍（いくさ）押（う）し寄（ゆ）してぃ、大川（おおかわ）ぬ城（ぐすぃく）七重八重（なないやい）、取（とぅ）り囲（かく）み囲（かく）てぃ俄（にわ）か事（くとぅ）有（や）りば、分別（ぶんびち）ん成（な）らん大勢（てえすぃい）に無勢（ぶずぃい）、力（ちから）及（うゆ）ばらん按司（あんじ）や討（う）ち死（じ）に、思（う）みん子（ぐぁ）ぬ事（くとぅ）や嗚呼（ああ）口惜（くちう）しや、敵（てぃ）ちぬ生（い）ち捕（どぅ）遣（や）り、按司（あじ）ぬ跡（あとぅ）継（つぃ）がち御育（うすだ）てぃゆてぃやり、欲悪（ゆくあく）な輩（やから）慈悲（じふぃ）ぬ肝（ちむ）飾（かざ）てぃ、此（く）ぬ村原（むらばる）が有難（ありがた）さ思（うむ）てぃ、降参（こおさん）ゆ為（すぃ）らば、思（う）み子（ぐぁ）諸共（むるとぅむ）に、討（う）ち果（は）たさんでぃぬ計（はから）いどぅ有（や）ゆる、嗚呼（ああ）、心得（くくるい）や為（し）がな思（う）み子（ぐぁ）取（とぅ）り戻（むどぅ）ちからに、時節（じしつぃ）待（ま）ち受（う）きてぃ敵（てぃち）討（う）たんとぅ思（む）てぃ、村原（むらばる）が命（いぬち）長（なが）れえてぃ居（うぅ）ゆん、嗚呼（ああ）尊（とお）とぅ神仏（かみふとぅき）揃（する）てぃ助（たすぃ）き遣（や）り給（たぼ）り。嗚呼（ああ）此（く）ぬ仕度（したく）為（し）ちや大事（でじ）有（あ）らん為（しゅ）むぬ、忍（しぬ）ぶ編（あ）み笠（がさ）に深（ふか）く顔（かう）隠（かく）ち、我（わ）が頼（たゆ）い島（しま）や茶谷（ちゃたん）屋良村（やらむら）に忍（しぬ）び隠（かく）りとぅてぃ月（つぃち）ゆ待（ま）たに。
歌
誠（まくとぅ）かや実（じつぃ）か我肝（わぢむ）惚（ふ）惚（ぶ）りとぅ
寝覚（にさ）み驚（うどぅる）ちぬ夢（いみ）ぬ心（くくる）
乙樽
三人（みちゃい）ぬ者（むぬ）や大川（おおかわ）ぬ按司（あじ）ぬ、頭役（かしらやく）
村原（むらばる）が母（ふぁふぁ）や妻（とぅじ）生（な）し子（ぐぁ）、谷茶暴者（たんちゃあまやあ）が野心事（やしんぐとぅ）企（たく）でぃ、何（ぬ）ぬ事（くとぅ）ん思（うま）ん大川（おおかわ）ぬ按司（あじ）ぬ、国々（くにぐに）ぬ按司部（あじび）討（う）たんてぃやり為（しゅ）んでぃ、島々（しまじま）ゆ巡（みぐ）てぃ色々（いるいる）に言成（いな）ち、加勢（かしい）頼（たぬ）み入（い）り軍（いくさ）押（う）し寄（ゆ）してぃ、按司添（あじすい）とぅ共（とぅむ）に村原（むらばる）ぬ輩（ひゃあ）ん、討（う）ち死（じ）にゆてぃやり知（し）らし部（び）ぬ有（あ）りば、夢現（いみうつぃつぃ）心（ぐくる）肝（ちむ）ん肝（ちむ）成（な）らん、無情（むじょ）ぬ此（く）ぬ世界（しけ）や斯（か）にん有（あ）るい、やあ、母前（あやあめえ）ゆ泣（な）く涙（なだ）とぅ共（とぅむ）に、成（な）り欲（ぶ）しゃどぅ有（あ）すぃが、忍（しぬ）び隠（かく）りとぅてぃ、一人子（ちゅいぐぁ）乙松（うとぅまつぃ）や取（とぅ）り育（すぃだ）てぃ育（すぃだ）てぃ、人（ちゅ）に成（な）ちからに親父祖（うやふじ）ぬ跡（あとぅ）や継（つぃ）がし欲（ぶ）しゃぬ、とおとお、落（う）てぃる露涙（つぃゆなだ）ん押（う）し払（はら）い払（はら）い、御気張（うちば）りゆ召（み）しょり御供（うとぅむ）為侍（しゃび）ら。
母
要（い）らん年寄（とぅしゆ）りぬ長生（ながい）ちわ為（し）ちゅてぃ、あきよ、此（く）ぬ憂（う）ち目（み）見（み）るが心気（しんち）、迚（とぅてぃ）ん諸共（むるとぅむ）に成（な）らんてぃやり為（すぃ）ば、朝夕（あさゆ）手放（てぃばな）さん玉（たま）ぬ乙松（うとぅまつぃ）が、花（はな）ぬ面影（うむかじ）ぬ名残（なぐ）り立（た）ち勝（まさ）てぃ、如何（いちゃ）し忘（わすぃ）りゆが彼（あ）ぬ世（ゆ）迄（までぃ）ん。
乙樽
要（い）らん事（くとぅ）召（み）しょな遅（うく）りてぃや済（すぃ）まん、気（ち）に任（まか）ち三人（みちゃい）諸共（むるとぅむ）に成（な）らば、乙松（うとぅまつぃ）ゆ育（すぃだ）てぃ程々（ふどぅふどぅ）に成（な）さば、君親（きみうや）ぬ事（くとぅ）ん為（すぃ）らな置（う）ちゅみ、とおとお、御気張（うちば）りゆ召（み）しょり御供（うとぅむ）為侍（しゃび）ら。
歌
惜（あた）ら人間（にんぢん）に生（う）まり遣（や）り居（うぅ）すぃが
安々（やすぃやすぃ）とぅ暮（く）らす暇（ふぃま）ん無（ね）らん
乙樽
何（ぬ）ぬ罪（つぃみ）ぬ有（あ）たが連（つぃ）り無（な）さや三人（みちゃい）。
母
あきよ、忍（しぬ）ばらん心（くくる）暗闇（くらやみ）に。
歌
行（い）ち迷（まゆ）い迷（まゆ）い。
乙樽
行（い）く先（さち）ん知（し）らん野山（ぬやま）坂平（さくふぃら）ん。
歌
唯（ただ）足（あし）に任（まか）ち
乙樽
掛（か）かる方（かた）無（ね）らん行（ゆ）く末（すぃ）白玉（しらたま）ぬ。
母
露涙（つぃゆなみだ）や霰雪（あらりゆち）ん降（ふ）り勝（まさ）てぃ
歌
冬（ふゆ）ぬ山嵐（やまあり）や足元（あしむとぅ）ん詰（つぃ）まてぃ
肝（ちむ）ん肝（ちむ）成（な）らんあきよ如何（いちゃ）成（な）ゆが
乙樽
御気張（うちば）りゆ召（み）しょり軈（やが）てぃ夜（ゆ）ん明（あ）きら。
母
肝（ちむ）覆（うす）てぃ行（い）ちゅん、暫（しば）し休（やすぃ）ま。
乙樽
やあ、母前（あやあめえ）ゆ。母前（あやあめえ）ゆ。此（く）ぬ子（くぁ）抱（だ）ち居（うぅ）りば姑親（すぃとぅうや）ぬ事（くとぅ）や、肝（ちむ）ぬ儘（まま）成（な）らん急（いす）ぢ急（いす）がらん、迂闊（うかあっ）とぅ為（し）ち居（うぅ）てぃ敵（てぃち）に追（うぃ）い付（つぃ）かり、三人共（みちゃいとぅむ）浮（う）ち目（み）見（ん）だんゆりわ迚（とぅてぃ）ん、此（く）ぬ子（くぁ）共（どぅむ）捨（すぃ）てぃてぃ身（み）過（すぃ）がらに成（な）りば、姑（すぃとぅ）一人（ちゅい）が事（くとぅ）や自由（じゆ）に成（な）ゆん。義理（ぢり）ぬ道（みち）でむぬ、思（う）み切（ち）らな成（な）ゆみ、やあ、乙松（うとぅまつぃ）ゆ乙松（うとぅまつぃ）ゆ吾（わん）如（ぐと）る親（うや）に生（な）さったる因果（いんぐぁ）、是（くり）までぃでゆむぬ、母（ふぁふぁ）ぬ面影（うむかぢ）ん、夢現（いみうつぃつぃ）心（ぐくる）起（う）きてぃ見（ん）でぃゆ。あきよ、貴（あてぃ）無（な）しぬ何（ぬ）ぬ事（くとぅ）ん思（う）まん、哀（あわ）り楽々（らくらく）とぅ眠（にぶ）るが心気（しんち）。やあ、乙松（うとぅまつぃ）ゆ実（まく）とぅ後生（ぐしょ）有（あ）らば、父親（ちちうや）ぬ側（すば）に先（さ）ち立（だ）ちゃい行（い）ぢゅてぃ、待（ま）ちゃい居（うぅ）りゆ。やあ、乙松（うとぅまつぃ）。天（てぃん）ぬ引会（ふぃちゃわ）しに情（なさ）き有（あ）る人（ふぃとぅ）ぬ、育（すだ）てぃ遣（や）り呉（くぃ）らば、主人（しゅじん）親父祖（うやぶち）ぬ跡方（あとぅかた）や頼（たん）でぃ尋（たづぃ）に遣（や）り呉（くぃ）りゆ。嗚呼（ああ）尊（とお）とぅ、神仏（かみふとぅき）揃（する）てぃ見守（みまむ）遣（や）り給（たぼ）り。思（う）み切（ち）ちゃい居（うぅ）すぃが、実（まく）とぅ面（つぃら）見（ん）でぃわ、我肝（わぢむ）忍（しぬ）ばらん闇（やみ）に成（な）ゆさ。
歌
ああき、我肝（わぢむ）忍（しぬ）ばらん闇（やみ）に成（な）ゆさ。
乙樽
やあ、母前（あやあめえ）ゆ、軈（やが）てぃ喜納村（ちなむら）や便（たゆ）り島（しま）でむぬ、御気張（うちば）りゆ召（み）しょり、御供（うとぅむ）為侍（しゃび）ら。やあ、母前（あやあめえ）ゆ、母前（あやあめえ）ゆ。
母
肝（ちむ）ん肝（ちむ）ん成（な）らん暫（しば）し休（やすぃ）ま。
村原のひや
是（くり）や村原（むらばる）ぬ輩（ひゃあ）。義理（ぢり）ぬ竹垣（ましがち）に囲（かく）まりてぃ我身（わみ）ぬ、浅（あさ）ましや露（つぃゆ）ぬ命（いぬち）有（や）すぃが、思（う）み子（っくぁ）取（とぅ）い戻（むどぅ）す念願（にんぐぁん）ぬ有（あ）とぅてぃ、眠（にぶ）る夜（ゆ）ん寝（に）らん忍（しぬ）でぃ廻（まわ）る、斯（く）にや夜更（ゆふう）きに童（わらび）泣（な）ち声（ぐぃ）や、如何（いちゃ）為（し）ちゃる事（ぐとぅ）が立（た）ち寄（ゆ）遣（や）り見（ん）だに。やあ、乙松（うとぅまつぃ）、嗚呼（ああ）身（み）に替（け）えてぃ朝夕（あさゆ）撫（な）でぃ育（すだ）てぃ為（しゅ）たる、此（く）ぬ一人子（ちゅいぐぁ）有（や）すぃが乱（みだ）り世（ゆ）に成（な）りば、哀（あわ）り此（く）ぬ態（なり）に成（な）すぃが心気（しんち）。母（ふぁふぁ）とぅ乙樽（うとぅだる）行方（ゆくい）白玉（しらたま）ぬ、露霜（つぃゆしむ）とぅ共（とぅむ）に成（な）たらとぅ思（み）ば、嗚呼（ああ）浅（あさ）ましや。いや、無情（むじょ）ぬ此（く）ぬ世界（しけ）ぬ習（なれ）や知（し）らに、遅（うく）りてぃや済（すぃ）まん先（さち）に掛（か）かち。
乙樽
やあ、母前（あやあめえ）ゆ母前（あやあめえ）ゆ。
村原のひや
やあやあ、斯（か）にゃる霜降（しむふ）りに此（く）が遠（とぅ）山道（やまみち）に、如何（いちゃ）為（し）ちゃる事（くとぅ）か二人（たい）ぬ者（むん）や。
乙樽
首里（しゅり）からどぅ有（や）すぃが旅（たび）ぬ上（ぅうぃ）ぬ習（なれ）や。
村原のひや
やあ、母親（ふぁふぁうや）、やあ、乙樽（うとぅたる）。
母
やあ、村原（むらばる）、按司添（あじすい）とぅ共（とぅむ）に成（な）る筈（はじ）ぬ者（むぬ）ぬ、主（しゅう）ぬ恩（うん）忘（わすぃ）り孝（こお）ぬ道（みち）知（し）らん、何（ぬ）ぬ面（つぃら）ぬ有（あ）とぅてぃ尋（とぅ）めてぃ来（ち）ちゃが、浅（あさ）ましや村原（むらばる）命（ぬち）ぬ惜（あたら）しゃい、妻子（とぅじっくぁ）ぬ情（なさ）き忍（しぬ）ばらん有（あ）たみ。
村原のひや
ああ、召（み）しぇえる如（ぐとぅ）、按司添（あじすい）とぅ共（とぅむ）に成（な）る筈（はじ）どぅ有（や）すぃが、思（う）みん子（ぐぁ）ぬ事（くとぅ）や敵（てぃち）ぬ生（い）ち捕（とぅ）遣（や）り、村原（むらばる）ん共（とぅむ）に討（う）ち果（は）たさんでぃぬ分別（ぶんびち）わ出（ぃん）じゃち、云言葉（いくとぅば）わ飾（かざ）てぃ過（すぃ）ぢし按司愛（あじがな）し、跡継（あとぅつぃ）ぢぬ思（う）み子（ぐぁ）御育（うすだ）てぃゆ遣（や）り、語（かた）れ部（び）ぬ有（あ）りば如何（いちゃ）しがな思（う）み子（ぐぁ）引（ふぃ）ち取（とぅ）らんとぅ思（む）てぃ村原（むらばる）が命（いぬち）長（なが）れえてぃ居（うぅ）ゆん。
母
今（なま）ぬ如（ぐとぅ）有（や）りば誇（ふく）らしゃどぅ有（あ）ゆる、肝（ちむ）に肝（ちむ）添（すぃ）いてぃ念（にん）に入（い）りゆ。
村原のひや
村原（むらばる）が生（い）ちち此（く）ぬ世界（しけ）に居（うぅ）とぅてぃ、思（う）み子（ぐぁ）取（とぅ）り戻（むどぅ）ち敵（てぃち）討（う）たな置（う）ちゅみ、嗚呼（ああ）、思（うむ）い世（ゆ）に残（ぬく）ち死（し）にや成（な）有侍（やび）らん。やあ、乙樽（うとぅたる）、如何（いちゃ）し乙松（うとぅまつぃ）や捨（すぃ）てぃてぃ有（あ）たが。
母
咲（さ）ち出（ぃん）ぢゅる花（はな）わ我身（わみ）に思（う）み返（けえ）ち、何（ぬ）ぬ肝（ちむ）ぬ有（あ）とぅてぃ捨（すぃ）てぃてぃ有（あ）たが。
乙樽
大川（おおかわ）ぬ城（ぐすぃく）幸（しやわ）しぬ時（とぅち）に、按司添（あじすい）とぅ共（とぅむ）に討（う）ち死（じ）にゆてぃやり、語（かた）れ部（び）ぬ有（あ）りば沙汰（さた）ゆ聞（ち）ち及（うゆ）でぃ、三人（みちゃい）逃（に）ぢ忍（しぬ）でぃ此処（くま）迄（までぃ）や来（ちゃ）すぃが、親愛（うやがな）し事（くとぅ）や馴（な）りぬ山道（やまみち）ぬ、坂平（さくふぃら）ぬ疲（つぃか）り足元（あしむとぅ）ん詰（つぃ）まてぃ、急（いす）ぢ急（いす）がらん迂闊（うかあっ）とぅ為（し）ち居（うぅ）てぃ、敵（てぃち）に追（うぃ）い付（つぃ）かり三人共（みちゃいとぅむ）憂（う）ち目（み）、見（ん）だんゆりか迚（とぅてぃ）哀（あわ）り泣（な）く泣（な）
くん、姑親（すぃとぅうや）ぬ為（たみ）に捨（すぃ）てぃ有（あ）たん。
村原のひや
嗚呼（ああ）、此（く）ぬ上（ぅうぃい）どぅ有（や）すぃが誇（ふく）らしゃどぅ有（あ）ゆる、又（また）ん世（ゆ）に出（ぃん）ぢる運（うん）ぬ巡（みぐ）り。
乙樽
やあやあ、思（う）みん子（ぐぁ）ぬ事（くとぅ）や御格護（うかくぐ）ゆてぃやり、聞（ち）ちば嬉（うり）しさや幸（しやわ）しどぅ有（や）ゆる、我身（わみ）に思（う）み付（つぃ）ちゃる事（くとぅ）ぬ又（また）有（あ）すぃや、母親（あんめえ）に名付（なづぃ）き忍（しぬ）でぃ行（い）ぢからに、命（ぬち）救（すく）てぃ給（たぼ）りてぃやり実（まく）とぅ段々（だんだん）とぅ、色々（いるいる）に言（い）やば欲悪（ゆくあく）な谷茶（たんちゃ）、企（たく）でぃ居（うぅ）る事（くとぅ）ぬ便（たゆ）り端（ばし）とぅ思（む）てぃ、疑（うたが）いや無（ね）らん掛（か）かい置（う）く積（つぃ）むり、我肝（わじむ）落（う）てぃ付（つぃ）ちゅてぃ心（くくる）ぬ許（ゆる）さし遣（や）り、思（う）み子（ぐぁ）守（む）り名付（なづぃ）き引（ふぃ）ち取（とぅ）遣（や）り来（ちゃ）侍（び）ら。
村原のひや
思（う）み子（ぐぁ）為（たみ）てぃやり女身（うぃなぐみ）わ独（ふぃちゅ）い、敵（てぃち）ぬ手（てぃ）に遣（や）らす事（くとぅ）や成（な）らん。
乙樽
女（うぃなぐ）又（また）有（や）てぃん男（うぃきが）又（また）有（や）てぃん、思（う）みん子（ぐぁ）ぬ為（たみ）に肝（ちむ）や一（ふぃとぅ）つぃ。
村原のひや
肝（ちむ）ぬ上（ぅうぃ）ぬ事（くとぅ）や其（う）ぬ筈（はじ）どぅ有（や）すぃが、気（ち）に任（まか）ち済（すぃ）みゅみ義理（ぢり）ぬ習（なれ）え。
乙樽
義理（ぢり）ぬ道（みち）てぃすぃん君親（きみうや）ぬ為（たみ）に、肝（ちむ）尽（つぃく）すぃ他（ふか）ぬ事（くとぅ）や無（ね）さみ。
村原のひや
村上（むらばる）が生（い）ちち此（く）ぬ世界（しけ）に居（うぅ）とぅてぃ、思（う）み子（ぐぁ）為（たみ）てぃやり義理（ぢり）ぬ道（みち）曲（ま）ぎてぃ、女（うぃなぐ）貴（あてぃ）無（な）しわ敵（てぃち）ぬ手（てぃ）に遣（や）らち、末代（まつぃでえ）ぬ恥辱（ちじゅく）面目（みんむく）や如何（ちゃ）為（しゅ）が、勝手（かってぃ）ぬ事（くとぅ）や許（ゆる）す事（くとぅ）成（な）らん。
乙樽
言（い）ちん役（やく）立（た）たん事（くとぅ）為（すぃ）又（また）有（や）らば、吾（わ）ね女（うぃなぐ）有（や）てぃん谷茶暴（たんちゃあまやあ）に、一刀（ちゅかたな）ん掛（か）きてぃ討（う）ち死（じ）にわ為（すぃ）らに徒（いたづぃら）に命（いぬち）、長（なが）れえてぃ何（ぬ）為（しゅ）が、とおとお、許（ゆる）ち給（たぼ）り。
母
嗚呼（ああ）、事（くとぅ）荒（あら）く為（すぃ）るな、やあ、乙樽（うとぅたる）、思（う）み子（ぐぁ）為（たみ）有（や）りば、其（う）ぬ筈（はじ）どぅ有（や）すぃが、事（くとぅ）荒（あら）く為（し）ちや仕損（しすん）じぬ基（むとぅい）、思（う）み子（ぐぁ）迄（までぃ）掛（か）きてぃ大事（でじ）有（あ）らん為（しゅ）むぬ、細々（くまぐま）とぅ全（また）く計（はか）ら遣（や）り呉（くぃ）りゆ。
乙樽
思（うむ）た事（くとぅ）叶（かな）てぃ誇（ふく）らしゃどぅ有（あ）ゆる、命（ぬち）ぬ有（あ）る限（かぢ）り心（くくる）尽（つぃく）さ。
母
やあ、乙樽（うとぅたる）、思（う）み子（ぐぁ）為（たみ）てぃやり命（いぬち）振（ふ）り捨（すぃ）てぃてぃ今（なま）ぬ事（くとぅ）言（ぃゆ）すぃや誇（ふく）らしゃどぅ有（あ）すぃが、行（い）く先（さち）ぬ定（さだ）み定（さだ）まらん有（あ）りば、あきよ思（う）み尽（つぃく）す方（かた）ん無（ね）らん。
乙樽
人（ふぃとぅ）ぬ願事（にげぐとぅ）ぬ徒（あだ）に又（また）成（な）ゆみ、心（くくる）安々（やすぃやすぃ）とぅ御待（うま）ち召（み）しょり。
村原のひや
やあ、乙樽（うとぅたる）、荒（あら）く掛（か）ち引（ふぃ）ちん有（あ）る積（つぃ）むりでむぬ、腹立（はらだ）たぬ如（ぐとぅ）に心（くくる）静（しずぃ）みとぅてぃ、云言葉（いくとぅば）に応（おお）じ取（とぅ）い回（まわ）し、受（う）き返答（ふぃんとお）良（ゆ）う了見（りょおきん）ゆ為（すぃ）りゆ。
乙樽
我胸（わあむに）に留（とぅ）みてぃ我肝（わあちむ）に染（す）みてぃ仰（うゆ）す事（くとぅ）儘（まま）に、念（ねん）に入（い）らに。
村原のひや
若（む）しか事（くとぅ）漏（む）りてぃ成（な）らん其（う）ぬ際（ちわ）や、別（びつぃ）に計（はか）らとぅる手段（てぃだん）又（また）有（あ）むぬ、遅（うく）りらん如（ぐとぅ）に企（たく）でぃ居（うぅ）る次第（しでえ）、親子（うやく）此（く）ぬ三人（みちゃい）隠（かく）りとぅる談（だん）、一々（いちいち）細々（くまぐま）白状（はくじゅ）ゆ為（すぃ）り、嗚呼（ああ）、繰（く）い返（けえ）し返（けえ）し又事（またくぅとぅ）どぅ有（や）すぃが、互（たげ）に面目（みんむく）や失（うし）なわん如（ぐとぅ）に、思（う）み子（ぐぁ）引（ふぃ）ち取（とぅ）ゆる要所（かなみどぅくる）。ええ、ええ、良（ゆ）く良（ゆ）く分別（ぶんびつぃ）題目（でえむく）どぅ有（や）ゆ
る、やあ、乙樽（うとぅだる）役立（やくた）たん我身（わみ）ぬ、妻（とぅじ）成（な）たる因果（いんぐぁ）、嗚呼（ああ）、口惜（くちうし）や。
乙樽
喩（たとぅ）い事（くとぅ）漏（む）りてぃ生殺（なまくる）し為（さ）りてぃてぃやり、思（う）み子（ぐぁ）為（たみ）有（や）りば残（ぬく）る事（くとぅ）無（ね）らん。心（くくる）安々（やすぃやすぃ）とぅ極楽（ぐくらく）どぅ有（や）ゆる。
村原のひや
嗚呼（ああ）、言（ぃゆ）る事（くとぅ）ゆ聞（ち）きば肝（ちむ）ぬ犇々（ふぃしふぃし）とぅ昔（んかし）物語（むぬがらり）聞（ち）ちゅる如（ぐとぅ）に、世（ゆ）ぬ中（なか）ぬ手本（てぃふん）沙汰（さた）どぅ残（ぬく）る。
乙樽
此（く）ぬ子（くぁ）乙松（うとぅまつぃ）ぬ御育（うすだ）てぃゆ召（み）しょち、人（ふぃとぅ）成（な）ゆる如（ぐとぅ）に計（はか）り給（たぼ）り。念使（にんづぃけ）え為（すぃ）るな其（う）ぬ育（すだ）てぃ為（しゅ）むん、姑（すぃとう）子（っくぁ）ぬ事（くとぅ）や気使（きづぃけ）為（すぃ）るな。
乙樽
やあ、母前（あやあめえ）ゆ、軈（やが）てぃ我（わ）が思（う）み子（ぐぁ）拝（うぅが）でぃ来（く）ん為（しゅ）むぬ、肝（ちむ）願（にげ）ゆ為（し）ちゅてぃ御待（うま）ち召（み）しょり。
母
義理（ぢり）ぬ道（みち）でむぬ、止（とぅ）みや成（な）らん。
歌
義理（ぢり）ぬ道（みち）でむぬ止（とぅ）みてぃ止（とぅ）みららん
乙樽
他所（ゆす）知（し）りてぃからや大事（でじ）有（あ）らん為（しゅ）むぬ、急（いす）ぢ立（た）ち戻（むどぅ）てぃ待（ま）ちゃい居参（いも）り。
歌
何（ぬ）が為（すぃ）届（とぅどぅ）く斯如（かにゃ）る夢（いみ）ぬ世界（しけ）や
胸（むに）に物（むぬ）思（うみ）ば歩（あゆ）む道（みち）程（ふどぅ）ん
覚（うび）らずぃに着（つぃ）ちゃさ元（むとぅ）ぬ城（ぐすぃく）
乙樽
覚（うび）らずぃに谷茶（たんちゃ）城元（ぐすぃくむとぅ）着（つぃ）ちゃん、物（むぬ）見詰（みつぃ）み為（し）ちゅてぃ案内（あんねえ）ゆ為（すぃ）らに、やあやあ、御取次（うとぅりつぃ）ぢ頼（たぬ）ま物（むぬ）知（し）らり為侍（しゃび）ら。
門番
はあはあ、無作法（ぶさふう）無作法（ぶさふう）、内原（うちばる）に行（い）ちゃい御取次（うとぅりつぃ）ぢ為（しょ）おり
乙樽
やあやあ、我身（わみ）や大川（おおかわ）ぬ思（う）み子（ぐぁ）虎千代（とぅらちゆ）が乳親（ちいうや）どぅ有（や）ゆる守（む）り母（あむ）どぅ有（や）ゆる、大川（おおかわ）ぬ城（ぐすぃく）幸（しやわ）しぬ時（とぅち）に、慌（あわ）てぃ様（さま）逃（に）ぎてぃ隠（かく）り遣（や）り居（うぅ）たん、掛（か）かる方（かた）無（ね）らん縋（すぃが）る方（かた）無（ね）らん、聞（ち）きば御慈悲（ぐじふぃ）有（あ）てぃ守（む）り育（すぃだ）てぃ思（う）み子（ぐぁ）、御育（うすだ）てぃぬ有（あ）んでぃ音連（うとぅづぃ）りゆ拝（うぅが）でぃ、思（う）み子（ぐぁ）諸共（むるとぅむ）に命（ぬち）継（つぃ）がんとぅ思（む）てぃ、寄（ゆ）しり遣（や）り居（うぅ）むぬ頼（たん）でぃ御情（うなさ）きに、御取次（うとぅりつぃ）ぢ召（み）しょち助（たすぃ）き遣（や）り給（たぼ）り。
門番
拝（うぅが）まりゆ召（み）しょい彼（あ）りに居（い）より
谷茶
やあやあ、大川（おおかわ）ぬ生（な）し子（ぐぁ）乳母（ちふぁふぁ）てぃる女（うぃなぐ）、如何（ちゃ）有（あ）りば済（すぃ）みゆが考（かんげ）てぃ召（みょ）り。
満納
然（さ）り、按司愛（あじがな）し、、大川（おおかわ）ぬ生（な）し子（ぐぁ）引（ふぃ）ち取（とぅ）らんてぃやり、村原（むらばる）ぬ輩（ひゃあ）が計（はか）れえどぅ有（や）ゆる、はあ、彼（あ）り程（ふどぅ）ぬ村原（むらばる）ん運（うん）ぬ末（すぃい）成（な）りば、輪縄掛（わなが）きぬ内（うち）に首（くび）入（い）りる仕方（しかた）、此処（くま）や楽々（らくらく）とぅ足（ふぃしゃ）畳（たく）でぃ居（うぅ）とぅてぃ、村原（むらばる）ぬ輩（ひゃあ）が謀（はか）り事（ぐとぅ）頼（たゆ）てぃ、村原（むらばる）搦（から）みゅる時節（じしつぃ）来（ちゃ）あ侍（び）たん。扨（さ）てぃ扨（さ）てぃ御果報（ぐかふう）良（い）い事（くとぅ）でえ侍（び）る。
谷茶
一段（いちだん）な事（くとぅ）一段（いちだん）な事（くとぅ）、やあ、石川（いしちゃあ）ぬ輩（ひゃあ）や別（びつぃ）に料簡（りょおきん）ぬ有（あ）りが為（しゅ）ゆら。
石川のひや
満納（まんな）言（い）遣（や）りる事（ぐとぅ）、一々（いちいち）尤（むっとぅ）む
同意（どぅうい）で侍（び）る。
谷茶
扨（さ）てぃむ扨（さ）てぃむ、分際（ぶんせえ）ん知（し）らん、此（く）ぬ按司（あじ）に向（ん）かてぃ推参（すぃいさん）な輩（やから）、許（ゆる）す事（くとぅ）無（ね）らん急（いす）ぢ引（ふぃ）ち出（ぃん）じゃち、責（し）みぬ有（あ）る限（かぢ）り、責（し）みてぃ有（あ）り筋（すぃじ）ぬ白状（はくじゅう）ゆ為（し）みり。
石川のひや
拝（うぅが）ん留（とぅ）み有侍（やび）てぃ、やあ、寄（ゆ）しりとぅる女（うぃなぐ）出（ぃん）ぢゃし出（ぃん）ぢゃし。
下部
さあさあ、御前（うめえ）寄（ゆ）てぃ拝（うぅが）み御側（うすば）寄（ゆ）てぃ拝（うぅが）み。とおとお、其（う）まに居寄（いよお）り居寄（いよお）り。
満納
やあ、女（うぃなぐ）、篤（とぅく）と肝（ちむ）居（いぃ）すぃてぃ確（たし）かに聞（ち）ち。己達（うぅがたち）が企（たく）でぃ企（たく）でぃ居（うぅ）る事（くとぅ）や、尋（たずぃ）にらぬ先（さち）に合点（がてぃん）どぅ有（や）ゆる、直（すぃ）ぐに其（う）ぬ科（とぅが）に当（あ）たる筈（はじ）有（や）すぃが、科（とぅが）ん被（かん）しらん女々（みみ）しさぬ如（ぐとぅ）ぬ御慈悲（ぐじふぃ）有（あ）る天（てぃん）ぬ御情（うなさ）きぬ有（あ）とぅてぃ、村原（むらばる）が行方（ゆくい）御宣（うんにゅ）きる成（な）らば、企（たく）でぃ居（うぅ）る事（くとぅ）ぬ其（う）ぬ科（とぅが）ん許（ゆる）ち、島知行（しまちぎゅ）ん取（とぅ）らち引（ふぃ）ち同胞（はろぢ）迄（までぃ）ん、其（う）ぬ肝苦（ちむちや）さや有（あ）る筈（はじ）ゆでむぬ御情（うなさ）きぬ御肝（うちむ）細（みすぃ）く取（とぅ）い受（う）きてぃ、肝（ちむ）割（わ）りてぃ実（じつぃ）に御宣（うんにゅ）きょおり。
乙樽
・・・・・・・・
満納
はあ、好（くぬ）でぃ好（くぬ）まらん、天運（てぃんうん）ぬ巡（みぐ）り、勘違（かんちげ）え為（すぃ）るな為（すぃ）るな。
乙樽
村原（むらばる）が事（くとぅ）や討（う）ち死（じ）にが為（し）ちゃら、音連（うとぅづぃ）りん無（ね）らん沙汰（さた）ん聞（ち）かん、女（うぃなぐ）貴（あてぃ）無（な）し何（ぬ）ぬ思（う）みぬ有（あ）ゆが、命（ぬち）ぬ連（つぃ）り無（な）さに按司愛（あじがな）し天（てぃん）ぬ、十百歳（とぅひゃくさ）ぬ果報（かふう）神願（かみにげ）ゆ為（し）ちゅてぃ、御情（うなさ）きに我身（わみ）ぬ露（つぃゆ）程（ふどぅ）ぬ命（いぬち）、如何（いちゃ）しがなとぅ思（む）てぃ寄（ゆ）しり遣（や）り居（うぅ）むぬ色（いる）分（わ）かち給（たぼ）り天（てぃん）ぬ御肝（うぢむ）。
満納
いやいや、隠（かく）しゅらば隠（かく）し、包（つぃつぃ）みゅらば包（つぃつぃ）み、肝（ちむ）ぬ飽（あ）く儘（まま）や責（し）みぬ有（あ）る限（かぢ）り、其（う）ぬ責（し）みに当（あ）てぃてぃ聞（ち）く筈（はじ）どぅ有（や）すぃが、責（し）みらりてぃからに御宣（うんにゅ）きる有（や）らば、科（とぅが）ぬ上（ぅうぃ）に科（とぅが）や重（かさ）にらん為（しゅ）むぬ、責（し）みららん内（うち）に御宣（うんにゅ）きより。
乙樽
何（ぬ）ぬ事（くとぅ）ん思（う）まん、女（うぃなぐ）貴（あてぃ）無（な）しに、罪科（つぃみとぅが）ゆ掛（か）きてぃ憂（う）ち苦（くり）しゃ為（し）みゆすぃや、村原（むらばる）が仕業（しわざ）恨（うら）みてぃどぅ居（うぅ）ゆる、何故（ぬゆ）でぃ身（み）に替（けえ）えてぃ実（じつぃ）ゆ隠（かく）しゃ侍（び）が、此（く）ぬ事（くとぅ）や熟（つぃくづぃ）くとぅ思（うむ）てぃ給（たぼ）り。
満納
勘違（かんちげ）え為（すぃ）るな不勘（ふかん）どぅん為（すぃ）るな、殺（くる）さりる科（とぅが）ん兼（か）にてぃ知（し）り乍（なぎ）な、責（し）みぬ上（ぅうぃ）に向（ん）かてぃ偽（いつぃわ）りや成（な）らん、有（あ）り筋（すぃじ）に言（い）ちゅてぃ殺（くる）さりる者（むぬ）ん昔（んかし）から今（なま）に数（かずぃ）や知（し）らん。
乙樽
村原（むらばる）ぬ行方（ゆくい）夢（いみ）程（ふどぅ）ん知（し）らば、御尋（うたずぃ）ぬ先（さち）に御宣（うんにゅ）きる積（つぃ）むり、何（ぬ）ぬ思（う）みぬ有（あ）ゆが我（わ）が命（ぬち）ぬ他（ふか）に何（ぬ）ぬ思（う）みぬ有（あ）とぅてぃ隠（かく）ち居（うぅ）ゆが、御言葉（うくとぅば）に応（うぅ）じる事（くとぅ）ん無（ね）らん、御返事（ぐふぃじ）御返答（ぐふぃんとぅ）に詰（つぃ）まてぃ居（うぅ）ゆん。
石川のひや
はあ、勘違（かんちげ）え為（すぃ）るな、鈍（どぅん）な事（くとぅ）言（い）うな、譬（たとぅ）い命（ぬち）限（かぢ）り現（あらわ）すなてぃやり、堅（かた）く談合（だんごお）ん為有（しちゃ）たんてぃやりか、満名（まな）言（い）やりる如（ぐとぅ）責（し）みぬ耐（にじ）らりみ、とおとお、今（なま）ぬ如（ぐとぅ）細（くま）く、真実（しんじつぃ）に言（ぃや）りすぃ百（むむ）次第（しで）や有（あ）らに、御拝（みふぇ）拝（うぅが）でぃからに、細（みすぃ）く取（とぅ）り受（う）きてぃ、包（つぃつぃ）まじに言（い）より、嗚呼（ああ）百果報（むむかふ）や目（み）ぬ前（め）引（ふぃ）ち寄（ゆ）してぃ居（うぅ）とぅてぃ、人（ちゅ）ぬ為（たみ）に惜（あた）ら命（ぬち）取（とぅ）てぃや済（すぃ）まん、人間（にんぢん）ぬ願（にげ）ぬ何（ぬ）ぬ思（う）みぬ有（あ）ゆが、思（うむ）てぃ役（やく）立（た）たん、村原（むらばる）ん捨（すぃ）てぃてぃ天道（てぃんみち）ぬ生（な）し子（ぐぁ）真肝（まちむ）打（う）ち割（わ）りてぃ、生（う）まりたる印（しるし）楽（らく）ゆ為（すぃ）りゆ、為（すぃ）りゆ。
乙樽
・・・・・・・・・・
石川のひや
さあさあ、御宣（うんにゅ）きょおり、きょおり。
乙樽
村原（むらばる）が何（なん）とぅ輩者（やからむぬ）有（や）てぃん、網（あみ）ぬ魚（いゆ）心（ぐくる）唯（ただ）一人者（ふぃちゅいむぬ）ぬ、此大（くふぃ）な御城（うぐすぃく）に弓引（ゆみふぃ）ちぬ成（な）ゆみ。仮令（たとぅい）生（い）ち残（ぬく）てぃ片隅（かたすぃみ）に居（うぅ）てぃん、天（てぃん）ぬ御定（うさだ）みぬ来（ちゃ）る間（うぇだ）ぬ命（いぬち）、海山（うみやま）に掛（か）かてぃ尽（つぃ）く迄（までぃ）どぅ有（や）ゆる、嗚呼（ああ）、按司愛（あんじがな）し初（はじ）み石川（いしかわ）とぅ満納（まんな）、島国（しまぐに）ゆ鳴響（とぅゆ）む人々（ふぃとびとぅ）どぅ有（や）すぃが、村原（むらばる）ぬ輩（ひゃあ）や鬼（うに）ぬ如（ぐとぅ）召（み）しょち、如何（いちゃ）し其（う）り程（ふどぅ）ん恐（うとぅる）しゃゆ召（み）しぇが。
谷茶
むむ、尤（むっとぅ）むな不審（ふしん）、尤（むっとぅ）むな事（くとぅ）、やあ、女（うぃなぐ）、慈悲（じふぃ）情（なさ）き尽（つぃく）ち大川（おおかわ）ぬ生（な）し子（ぐぁ）、育（すぃだ）てぃ遣（や）り有（あ）すぃが、若（む）しか村原（むらばる）が、要（い）らぬ義理（ぢり）立（た）てぃてぃ謀叛（むふん）企（くわだ）たば、大川（おおかわ）ぬ生（な）し子（ぐぁ）生（い）ちてぃ置（う）ち成（な）らん、誠（まくとぅ）真実（しんじつぃ）ん徒（あだ）に成（な）る有（や）りば村原（むらばる）ん共（とぅむ）に育（すぃだ）てぃ欲（ぶ）しゃ有（あ）てぃどぅ細（くま）く問（とぅ）い尋（たずぃ）に為（しゅ）る事（くとぅ）ゆでむぬ、守（む）り子（ぐぁ）為（たみ）とぅ隠（かく）さずぃに語（かた）り。
満納
いや、此（く）ぬ上（ぅうぃい）に又（また）ん隠（かく）しどぅん為（しゅ）らば、又事（またくとぅ）ん要（い）らん、直（すぃ）ぐに引（ふぃ）ち立（た）てぃてぃ、脛（すぃに）ぬ砕（くだ）きらば胸腹（んにばら）ゆ迄（までぃ）ん命（ぬち）ぬ有（あ）る限（かぢ）り挟（はさ）み切（ち）らしゅむん、とおとお、其（う）ぬ心得（くくり）為（し）ちゅてぃ、御宣（うんにゅ）きょおり、きょおり。
乙樽
・・・・・・・・・・
下部
遅（うく）りてぃや済（すぃ）まん急（いす）じ御宣（うんにゅ）きょり。
満納
いや、御宥（うなだ）みん知（し）らん括（くく）てぃ居（うぅ）ゆみ。
乙樽
何（ぬ）ぬ事（くとぅ）ん知（し）らん女（うぃなぐ）貴（あてぃ）無（な）しに、段々（だだ）ぬ御問（うとぅ）い事（ぐとぅ）御難儀（うなんぢ）どぅ有（や）ゆる。言（い）ちん役（やく）立（た）たん是非（じふぃ）に及（うゆ）ばらん。誠（まくとぅ）正直（しょおじき）ぬ我（わ）が胸（んに）ぬ内（うち）や、責（し）みてぃ責（し）み殺（くる）ち後（あとぅ）に御目（うみ）掛（か）きり、近（ちか）さ拝（うぅが）まりる天（てぃん）ぬ下（しちゃ）居（うぅ）とぅてぃ、偽（いつぃわ）りぬ成（な）ゆみ人（ふぃとぅ）ぬ肝（ちむ）ぬ。
満納
はあ、面付（つぃらつぃ）ちん変（か）わてぃ悪魔（あくま）嫌（や）な女（うぃなぐ）、夫（うぅとぅ）咥（くわ）ゆる悪生（あくしょ）切支丹（きりしたん）。鬼（うに）見（ん）ちゃる人（ふぃとぅ）ぬ此（く）ぬ世界（しけ）に居（うぅ）ゆみ。是（くり）どぅ鬼（うに）有（や）ゆる、さあさあ、屹度（きっとぅ）縊（く）ん締（し）みり。
下部
責（し）みらりる業（ごお）ぬ深（ふか）さ有（あ）る女（うぃなぐ）、如何（いちゃ）が、如何（いちゃ）が。
乙樽
塵芥（ちりあくた）心（ぐくる）数（かずぃ）無（ね）らん我身（わみ）ぬ、殺（くる）さりる事（くとぅ）や露（つぃゆ）程（ふどぅ）ん思（うま）ん思（う）み切（ち）やり居（うぅ）すぃが何（ぬ）ぬ事（くとぅ）ん知（し）らん、女（うぃなぐ）貴（あてぃ）無（な）しわ鬼（うに）無理（むり）に責（し）みてぃ、責（し）み殺（くる）す罪（つぃみ）ぬ我（わ）が為（たみ）に巡（みぐ）てぃ、按司愛（あじがな）し上（ぅうぃい）に行（い）ち寄（ゆ）らてぃやりとぅ思（み）ば、死（し）にゅ死（じ）にゅん是（くり）や気（ち）に掛（か）かてぃ行（い）ちゅん。
谷茶
はあ、言（ぃゆ）る事（くとぅ）ゆ聞（ち）きば、理（くとぅわり）どぅ有（や）ゆる、縄（なわ）ん掛（か）きらずぃに責（し）みん為（さ）ぬ如（ぐとぅ）に、義理（ぢり）ぬ上（ぅうぃ）ぬ椿（ちばき）有（あ）らん為（しゅ）むぬ、とおとお、締（し）みてぃ有（あ）る縄（なわ）ん急（いす）ぢ解（とぅ）ち許（ゆる）す。
乙樽
嗚呼（ああ）、尊（とお）と、此（く）ぬ御恩（ぐうん）尊（とぅうとぅ）さや女（うぃなぐ）身（み）ぬ我身（わみ）ん寄（ゆ）しり遣（や）り居（うぅ）りば、若（む）しか村原（むらばる）が生（い）ち残（ぬく）てぃ居（うく）とぅてぃ、思（う）み子（ぐぁ）御育（うすだ）てぃぬ事（くとぅ）どぅゆん聞（ち）かば、吾（わぬ）ゆりん勝（まさ）てぃ時日（とぅちふぃ）移（うつぃ）さずぃに、打（う）ち笑（われ）い笑（われ）い寄（ゆ）しりなら置（う）ちゅみ、人（ちゅ）ぬ肝（ちむ）ぬ御慈悲（うじふぃ）御情（うなさ）きどぅ我御主愛（わうしゅがな）し、百年（むむとぅ）迄（までぃ）御座（ちゅわ）り拝（うぅが）でぃ巣出（すでぃ）ら。
満納
いや、烏（からすぃ）ゆん女（うぃな）ぐ人（ふぃちゅ）や騙（だま）すとぅん如何（いちゃ）し此（く）ぬ満納（まんな）、騙（だま）しぬ成（な）ゆが素引（すん）ち行（い）ぢ牢（るう）に叩（たた）ち持（む）ち置（う）き。
谷茶
いやいや、頭（あたま）居（うぅ）てぃ物（むぬ）や念（にん）入（い）らな為（し）ちゅてぃ仕損（しすん）じてぃからや悔（く）やでぃ役（やく）立（た）たん、思案（しあん）ゆり他（ふか）ぬ事（くとぅ）や無（ね）さみ、とおとお、事（くとぅ）急（いす）ぢ為（すぃ）るな短気（たんち）為（すぃ）るな。
谷茶（独語）
扨（さ）てぃむ扨（さ）てぃむ、丈程（たきふどぅ）ん置（う）ちゃてぃ目口（みくち）柔々（やわやま）とぅ、雪（ゆち）ぬ白歯口（しらはぐち）物言差（むぬいざ）し聞（ち）きば、五音（ぐいん）から変（か）わてぃ花（はな）ぬ清（ちゅ）ら女（うぃなぐ）、見（み）りば見（み）る毎（ぐとぅ）に思（う）みどぅ増（まさ）る、我（わ）が側（すば）に置（う）ちゃり互（たげ）に楽々（らくらく）とぅ、夢（いみ）ぬ此（く）ぬ浮世（うちゆ）暮（く）らし欲（ぶ）しゃぬ、誠（まくとぅ）真実（しんじつぃ）ぬ我肝（わぢむ）どぅん呉（くぃ）らば、村原（むらばる）が事（くとぅ）ん言（い）やな置（う）ちゅみ。石川（いしちゃあ）とぅ満納（まんな）追（う）い退（ぬ）きてぃからに、我肝（わぢむ）明（あ）き明（あ）きとぅ談合（だんごお）ゆ為（すぃ）らに。
谷茶
やあやあ、此（く）ぬ事（くとぅ）や互（たげ）に迂闊（うか）とぅ為（し）ち済（すぃ）まん、今日（ちゅう）や立（た）ち別（わか）てぃ思案（しあん）為（し）ちからに、思（うむ）い極（きわ）まらば、呼（ゆ）ばす筈（はじ）でむぬ、戻（むどぅ）てぃ行（い）ぢ篤（とぅく）と考（かんげ）えてぃ召（みょ）おり。
満納
召（み）しぇえる如（ぐとぅ）物（むぬ）や一方（ふぃとぅかた）に、迂闊（うか）とぅ為（し）ち済（すぃ）まん彼（あ）ぬ女（うぃなぐ）てぃすぃや、村原（むらばる）が妻（とぅじ）ぬ乙樽（うとぅたる）ゆてぃやり、唯（ただ）成（な）らん輩（やから）女（うぃなぐ）てゃり迂闊（うか）とぅ、許（ゆる）ち置（う）ち成（な）らん、責（し）みらずぃに何（なん）とぅ尋（たずぃ）にたんてゃりか、愚痴（ぐち）ぬ上（ぅうぃ）に愚痴（ぐち）や固（かた）まゆる積（つぃ）むり牢（るう）に籠（く）み置（う）ちゅてぃ其（う）ぬ苦（くつぃ）さ為（し）みてぃ引（ふぃ）ち出（ぃん）ぢゃし出（ぃん）ぢゃし其（う）ぬ責（し）みゆ当（あ）てぃてぃ。漸々（ずぃんずぃん）とぅ根気（くんち）疲（つぃか）りゆる時（とぅち）どぅ、有（あ）り筋（すぃじ）に白状（はくじゅ）為（しゅ）る積（つぃ）むり有（や）りば、先（ま）ずぃ思案（しあん）ぬ内（うち）家籠（やく）みてぃ置（う）ちゃ侍（び）ら。
石川のひや
満納（まんな）思案（しあん）む尤（むっとぅ）むどぅ有（や）すぃが、牢籠（るうく）みん要（い）らん責（し）みん為（さ）ぬ事（ぐとぅ）ぬ、御慈悲（ぐじふぃ）御情（うなさ）きぬ按司（あじ）ぬ御計（うはか）れや、如何（いか）な悪欲（あくゆく）な愚痴（ぐち）な者（むぬ）有（や）てぃん、背（すむ）く事（くとぅ）無（ね）さみ義理（ぢり）ぬ上（ぅうぃい）に、とおとお、先（ま）ずぃ牢籠（るうく）みいや許（ゆる）ち置（う）かに。
満納
いやいや、村原（むらばる）ぬ輩（ひゃあ）に並（なら）ぶ者（むぬ）居（うぅ）らん、企（たく）でぃ居（うぅ）る事（くとぅ）や如何（いか）程（ふどぅ）が有（や）ゆら、迂闊（うか）とぅ為（し）ち済（すぃ）まん女（うぃなぐ）童（わらび）。
石川のひや
我々（わりわり）ぬ一事（ちゅくとぅ）計（はか）ら遣（や）り居（うぅ）りば、按司（あじ）や百事（むむくとぅ）ぬ御計（うはか）れぬ有（あ）ゆん。
満納
はあ、主人（しゅじん）身（み）ぬ上（ぅうぃい）ぬ浮（う）ち沈（しづぃ）み有（や）りば、肝（ちむ）ぬ飽（あ）く儘（まま）や命限（いぬちかじ）り、嗚呼（ああ）、恐（うとぅる）しゃん知（し）らん美御宣（みゅんにゅ）き有侍（やび）すぃが、責（し）みさ為（しゅ）る事（くとぅ）ぬ御肝（うぢむ）苦（ちゃ）さ有（あ）らば、大川（おおかわ）ぬ生（な）し子（ぐぁ）彼（あ）ぬ輩者（やからむぬ）とぅ、姿（すぃがた）から形（かたち）似（に）ちゅる者（むぬ）選（いら）でぃ、大川（おおかわ）ぬ生（な）し子（ぐぁ）てぃやり取（とぅ）り沙汰（さた）ゆ為（し）みてぃ、外（ふか）ぬ出（ぃん）ぢ入（い）りい許（ゆる）ち有（あ）んてぃやり村原（むらばる）が聞（ち）かば疑（うたげ）えや無（ね）らん、奪（ば）い取（とぅ）らんとぅ思（む）てぃ忍（しぬ）でぃ来（く）る積（つぃ）むり、其（う）ぬ手組（てぃぐみ）為（し）ちゅてぃ搦（から）み取（とぅ）い有侍（やび）ら。
谷茶
細々（くまぐま）ぬ類（たぐい）聞（ち）ちちゃくん無（ね）らん。
満納
嗚呼（ああ）、按司愛（あじがな）し天（てぃん）ぬ栄（さけ）え衰（うとぅれ）えぬ、此（く）ぬ際（ちわ）どぅ有（や）りば包（つぃつぃ）でぃ包（つぃつぃ）まらん、恐（うとぅる）しゃん知（し）らん繰（く）い返（けえ）し返（けえ）し、美御宣（みゅんち）事（ぐとぅ）返（けえ）す科（とぅが）や、仰（うう）し召（み）しょち是非（じふぃ）共（とぅむ）に牢屋（るうや）御入為（ういすぃ）召（み）しょり。
谷茶
推参（すぃいさん）な輩（やから）愚口（ぐち）に固（かたま）とぅみ、又事（またくとぅ）ん要（い）らん投（な）ぎ捨（すぃ）てぃてぃ取（とぅ）らさ。
石川のひや
此（く）ぬ際（ちわ）ゆでむぬ御堪忍（ぐかんにん）召（み）しょり。
谷茶
やあ、石川（いしちゃあ）我（わ）が下知（ぎち）ぬ背（すむ）く、気任（ちまか）しぬ輩（やから）急（いす）ぢ引（ふぃ）ち立（た）てぃてぃ素引（すん）ち行（い）き。
石川のひや
やあ、満納（まんな）、御意（ぎゅい）背（すむ）く道（みち）ぬ此（く）ぬ世界（しけ）に有（あ）ゆみ、其（う）り此（く）りん按司（あじ）ぬ御計（うはか）れに任（まか）ち、仰（うう）す事（ぐとぅ）儘（まま）に急（いす）ぢ戻（むどぅ）ら。
谷茶
やあやあ、振合（ふやわ）しに袖（すでぃ）に縁（いん）ぬ糸（いとぅ）結（むす）でぃ、夢（いみ）ぬ間（ま）ぬ浮世（うちゆ）語（かた）れ欲（ぶ）しゃん、我（わ）が側（すば）に居（うぅ）とぅてぃ楽（らく）ゆ為（すぃ）りゆ為（すぃ）りゆ。
乙樽
御情（うなさ）きに御側（うすば）居（うぅ）らんてゃり為（すぃ）りば、御畏（うやぐみ）さ有（あ）むぬ御許（うゆる）しゆ召（み）しょり。
谷茶
いやいや、畏（やぐみ）さん要（い）らん斟酌（しんしゃく）ん為（すぃ）るな、我側（わすば）どぅん居（うぅ）らば花（はな）に増（ま）す姿（すぃがた）、其（う）ぬ飾（かざ）り締（し）みてぃ女按司（うぅなじゃら）ん為（さ）りん、島国（しまぐに）ゆ揃（する）てぃ崇（あが）みらん為（しゅ）むぬ、とおとお、側（すば）に居（うぅ）りゆ、側（すば）に居（うぅ）りゆ。
乙樽
按司（あじ）ん吾（わ）ね好（すぃ）かん楽（らく）ん又（また）好（すぃ）かん、我達（わした）限（ぢ）り有（や）てぃん女身（うぃなぐみ）ぬ習（なれ）ぬ、義理（ぢり）曲（ま）ぎてぃ成（な）りる道（みち）ぬ有（あ）ゆみ。
谷茶
いやいや、今（なま）ぬ如（ぐとぅ）愚口（ぐち）に固（かたま）とぅる下女（んざ）や、巣立（すだ）てぃん成（な）らん急（いす）ぢ戻（むどぅ）よおり。
乙樽
細（くま）かかてぃ命（ぬち）や継（つぃ）がなりば死（し）ぬみ、物乞（むぬぐ）いに成（な）てぃん命（ぬち）や継（つぃ）ぢゅん、とおとお、許（ゆる）ち給（たぼ）り。
谷茶
いやいや。
乙樽
義理（ぢり）どぅ按司（あじ）有（や）ゆる無理（むり）な事（くとぅ）召（み）しょな。
谷茶
いや、此（く）ぬ按司（あじ）ぬ言葉（くとぅば）聞（ち）かならば其方（すなた）、一刀（ちゅかたな）に命（いぬち）潰（つぃぶ）ち取（とぅ）らさ。
乙樽
殺（くる）しゅらば殺（くる）し恐（うとぅる）しゃや無（ね）らん、生々（なまなま）ぬ命（ぬち）ぬ死（し）にん死（し）なりらん、恥（はじ）ん振（ふ）り捨（すぃ）てぃてぃ此（く）ぬ態（なり）に成（な）とる。露（つぃゆ）程（ふどぅ）ん命（いぬち）惜（う）しむ事（くとぅ）無（ね）らん、幸（しやわ）しどぅ有（や）ゆる殺（くる）し殺（くる）し。
谷茶
はあ、肝（ちむ）触（ふ）りてぃ居（うぅ）たら今（なま）ぬ事（ぐとぅ）為（しゃ）すぃや不調法（ぶちゅうふう）至極（しぐく）許（ゆる）ち給（たぼ）り、神仏（かみふとぅき）てぃすぃん人（ふぃちゅ）ぬ肝（ちむ）尽（つぃく）ち、祈（いぬ）る願事（にげぐとぅ）や御助（うたすぃ）きぬ有（あ）むぬ、細（みすぃ）く聞（ち）ち分（わ）きてぃ肝（ちむ）ん肝（ちむ）添（すぃい）てぃ、頼（たん）でぃ御情（うなさ）きに成（な）りてぃ給（たぼ）り。
乙樽
御恥（うは）じかしゃ有（あ）てぃん言（い）やな又（また）成（な）ゆみ、我（わ）が夫（うぅとぅ）や此（く）ぬ世（ゆ）隠（かく）り遣（や）り居（うぅ）らん、遺言（いぐ）為（し）ち有（あ）すぃかや三年（みとぅ）ぬ内（うち）に夫（うぅとぅ）持（む）たなてぃやり云言葉（いくとぅば）ぬ有（あ）ゆん、三年（みとぅ）やでえすぃ女身（うぃなぐみ）ぬ習（なれ）ぬ、夫二人（うぅとふたり）持（む）ちゅる道（みち）ぬ有（あ）るい。
谷茶
昔（んかし）触（ふ）り者（むん）ぬ言（い）ちゃる事（くとぅ）守（まむ）てぃ浮世（うちゆ）暮（く）らさりみ按司（あじ）ん下司（ぎすぃ）ん、恋忍（くいしぬ）ぶ道（みち）ぬ有（あ）る合間（えま）ぬ浮世（うちゆ）、辛（つぃら）さ身（み）に受（う）きてぃ思（うむ）い焦（く）がり遣（や）り、恋（くい）死（し）なば報（むく）い誰（たる）に行（い）ちゅが、とおとお、其（う）り此（く）りゆ思（うむ）てぃ、死（し）にゅる我（わ）が命（いぬち）頼（たん）でぃ御情（うなさ）きに救（すく）てぃ給（たぼ）り。
乙樽
思（うむ）い極（きわ）みとぅる吾（わぬ）どぅ又（また）有（や）すぃが、按司（あじ）ぬ御言葉（うくとぅば）や梓弓（あずぃさゆみ）心（ぐくる）、引（ふぃ）かさりてぃ行（い）ちゅる我（わ）みぬ肝（ちむ）や。
谷茶
はあ、果報（かふ）ん付（つぃ）ちゅすぃがどぅ付（つぃ）ちん付（つぃ）ち清（ぢゅ）らさ、俄（あた）果報（がふ）どぅ付（つぃ）ちゃる果報（かふ）な我身（わみ）や、はあ、為（し）たり為（し）たり。
乙樽
来（ちゅう）る二月（にんぐぁつぃ）に過（すぃ）ぢし我（わ）が夫（うぅとぅ）ぬ、三年忌（さんにんち）でむぬ弔（とぅむれ）えや済（すぃ）まち、良（ゆ）し悪（あ）しぬ御返事（ぐふぃじ）御差上（うしゃぎ）らん為（しゅ）むぬ、其（う）ぬ内（うち）や是非（じふぃ）ゆ御待（うま）ち召（み）しょり。
谷茶
いやいや、此（く）りや成（な）らん、成（な）らん。
乙樽
其（う）り此（く）りん許（ゆる）し成（な）らん事（くとぅ）有（や）らば、迚（とぅてぃ）ん一刀（ちゅかたな）に殺（くる）ち給（たぼ）り。
谷茶
はあ、其（う）り此（く）りん良（ゆ）たしゃ何時（いつぃ）迄（までぃ）ん待（ま）ちゅん、言（ぃや）りる如（ぐとぅ）済（すぃ）みゅん良（ゆ）たしゃ良（ゆ）たしゃ。
乙樽
嗚呼（ああ）、尊（とお）と、御情（うなさ）きぬ光（ふぃかり）、照（てぃ）り勝（まさ）り勝（まさ）り百年（むむとぅ）何時（いつぃ）迄（までぃ）ん拝（うぅが）でぃ巣出（すぃでぃ）有侍（やび）ら。
谷茶（独白）
嗚呼（ああ）、我身（わみ）ん誇（ふく）らしゃぬ物（むぬ）に譬（たてぃ）ららん。此（く）ぬ丈（たき）に吾（わぬ）ん成（な）や上（が）成（な）り居（うぅ）すぃが、気（き）に適（かの）お女（うぃなぐ）側（すば）に又（また）居（うぅ）らん、是（くり）どぅ我（わ）が不足（ふすぃく）心（くくる）暗闇（くらやみ）に成遣（なや）り居（うぅ）たん、今月（くんつぃち）ん過（すぃ）ぢてぃ二月（にんぐぁつぃ）ん軈（やが）てぃ、其（う）りからや互（たげ）に枕（まくら）打（う）ち並（なら）び、浮世（うちゆ）楽々（らくらく）とぅ暮（く）らすとぅ思（み）ば、待（ま）ちどぅ嬉（うり）し事（ぐとぅ）喜（ゆるく）びん多（うふぃ）さ、天（てぃん）に飛（とぅ）び昇（ぬぶ）る我身（わみ）ぬ心地（くくち）、引（ふぃ）ち寄（ゆ）してぃ給（たぼ）り御月（うつぃち）御太陽（うてぃだ）、吾（わ）自由（じゆ）為（し）ち浮世（うちゆ）遊（あすぃ）でぃ暮（く）らさ。
谷茶
やあやあ、此（く）ぬ間（えだ）や兎角（とぅかく）苦（くつぃ）さ為（し）ち居（うぅ）たら、心（くくる）晴（は）り晴（ば）りとぅ打（う）ち晴（は）りてぃ踊（うどぅ）てぃ、此（く）ぬ間（えだ）ぬ苦（くつぃ）さ思（うむ）い忘（わすぃ）り。
歌
御慈悲（ぐじふぃ）有（あ）る故（ゆい）どぅ御真人（うまんちゅ）ぬ間切（まぢり）
上下（かみしむ）ん揃（する）てぃ仰（うう）ぢ拝（うぅが）む
谷茶
はあ、清（ちゅ）らさ、清（ちゅ）らさ。
乙樽
今日（ちゅう）や思（う）みん子（ぐぁ）ぬ御側（うすば）出（ん）ぢ拝（うぅが）でぃ、明日（あちゃ）が日（ふぃ）に又（また）ん拝（うぅが）でぃ巣出（すぃでぃ）ら。
谷茶
とおとお、今日（ちゅう）や道中（どぅうちゅう）ぬ草臥（くたんでぃ）ん有（あ）らでむぬ、若按司（わかあじ）ぬ側（すば）に出（ん）ぢ休息（ゆくい）ゆ為（すぃ）り。
歌
思（う）み子（ぐぁ）取（とぅ）り戻（むどぅ）ち敵（てぃち）討（う）たんとぅ思（む）
てぃ哀（あわ）り商人（あきんどぅ）に窶（やつぃ）り出（ぃん）ぢる。
村原のひや
此（く）りや村原（むらばる）ぬ輩（ひゃあ）思（う）み子（ぐぁ）取（とぅ）り戻（むどぅ）す、詰（つぃ）まり分別（ぶんびつぃ）に乙樽（うとぅだる）が事（くとぅ）や、母前（あんめえ）に名付（なづぃ）き敵（てぃち）ぬ城元（ぐすぃくむとぅ）、唯（ただ）一人（ふぃちゅい）遣（や）らち、嗚呼（ああ）、心（くくる）元無（むとぅな）さぬ、我肝（わあちむ）休（やすぃ）まぬ物売（むぬう）りに窶（やつぃ）り忍（しぬ）でぃ出（ぃん）ぢる。
歌
唐（とお）大和（やまとぅ）ぬ珍（みずぃら）し物（むん）匂（にう）い鬢付（びんつぃ）き香（かば）しゃ物（むぬ） 丁子（ちょおじ）白檀（びゃくだん）甘生姜（あましょおが） 刻（きざ）み煙草（たばく）ん持（む）ちゃびいん 煙管（きしる）ん宝蔵（ほおぞお）ん持（む）ちゃびいん 其（う）ぬ他（ふか）色々（いるいる）持（む）ちゃびいん 代（でえ）ん安（やすぃ）みてぃ上（あ）ぎ有侍（やび）ら 米（くみ）とぅん粟（あわ）とぅん替（け）え有侍（やび）ん 御望（うぬず）みぬ物（むぬ）や買（こ）お遣（や）り給（た）ぼおり
村原のひや
先（ま）ずぃ、物売（むぬう）りに名付（なづぃ）き、此（ぬ）辺（ふぃん）に居（うぅ）とぅてぃ、往来（おおれえ）ぬ人（ふぃとぅ）ぬ沙汰（さた）ゆ聞（ち）かに。
泊
飛（とぅ）出（ん）ぢたる者（むぬ）や村原（むらばる）ぬ母（あや）とぅ御神一（んちゃんてぃい）つぃぬ近（ちか）や御同胞（うんぱだん）、大川（おおかわ）ぬ思（う）み子（ぐぁ）引（ふぃ）ち取（とぅ）らんでぃ、村原（むらばる）ぬ母（あや）や、谷茶城（たちゃぐすぃく）忍（しぬ）でぃ、今（いま）討（う）ち様（よお）すぃが夫（うとぅ）ぬ村原（むらばる）、等（ねえ）斯様（かにょお）な物（むん）言遣（いや）り頼（たぬ）ってぃ居（うぅ）ん、先（ま）ずぃ一足（ちゅふぃしゃ）ん急（いす）ごお。
村原のひや
然（さ）り然（さ）り、万（ゆるづぃ）ぬ小間物（くまむぬ）持（む）っち居（うぅ）有侍（やび）ん、此（く）り此（く）り、御望（うぬず）みぬ物（むぬ）や売（う）り上（あ）ぎ有侍（やび）ら。
泊
ああ、是（くり）や幸（しやわ）しな事（くとぅ）。
村原のひや
田舎（いなか）に御通（うと）りぬ御仕度（うしたく）ぬ御様子（ぐよすぃ）、御中途（うちゅうとぅ）ぬ御用（ぐよお）、此（く）り此（く）り、又（また）此（く）りん上（あ）ぎ有侍（やび）ら。
泊
此（く）りや心（くくる）入（い）りどぅ有（や）ゆる、言（い）遣（や）りる如（ぐとぅ）北谷（ちゃたん）屋良村（やらむら）んかい越（く）しゅん、道中（みちなか）ぬ重宝（ちょおふ）幸（しやわ）しな事（くとぅ）、主（しゅう）や何処（まあ）から何処（まあ）んかい行参（いめ）が。
村原のひや
吾（わぬ）や那覇（なふぁ）若狭町（わかさまち）から、今度（くどぅ）初（はじ）みてぃ旅（たび）ぬ者（むぬ）、御急（ういす）ぢん有（や）ゆら御無心（ぐむしん）ん知（し）らん、取（とぅ）り付（つぃ）きん成（な）らん望（ぬず）み事（ぐとぅ）有（や）すぃが、旅（たび）ぬ上（ぅうぃ）ぬ御縁（ぐいん）拝（うぅが）む御情（うなさ）きに、珍（みずぃら）しい事（くとぅ）ぬ此（く）ぬ頃（ぐる）に有（あ）らば、御休（うやすぃ）みぬ内（うち）に聞（ち）かち給（たぼ）り、宿元（やどぅむとぅ）ぬ土産（みやぎ）物語（むぬがた）い為侍（しゃび）ら。
泊（独語）
儘（まま）でぃ言（い）しん様（ざあ）人（ちゅ）に急（いす）ぎば、百（むむ）確（たし）かに村原（むらばる）ぬ輩（ひゃあ）有（や）すぃが確（しか）いとぅ見覚（みうぶ）いぬ無（ね）らん、先（ま）ずぃ口（くち）振（ふ）てぃ探（さぐ）てぃ見（ん）だな。
泊
ああ、行会（いちゃ）りば兄弟（ちょおでえ）何（ぬ）ち隔（ふぃだ）てぃぬ有（あ）が、是（くり）や余り固（くわ）返事（ふぃんじ）やっさあ、有（や）すぃが、斯（か）ん、何（ぬう）ん珍（みずぃら）しい事（くとぅ）や無（ね）らん。むむ、ああ、満納（まんな）ぬ子（くぁ）や打（う）ち殺（くる）さってぃああ、労（いたわ）し事（くとぅ）。
村原のひや
惜（あたら）しが満納（まんな）如何（いちゃ）為（し）ちゃる事（くとぅ）が。
泊
むむ、其（う）ぬ事（くとぅ）てぃわ、とお細々（くまぐま）ぬ次第（しでえ）根（にっ）から話（はな）ち聞（ち）かそ、彼（あ）ぬ城（ぐすぃく）家元（やむとぅ）今帰仁（なきじん）ぬ別（わか）り、大川（おおかわ）ぬ按司（あじ）ぬ城（ぐすぃく）有（や）たすぃが百姓（ひゃくしょお）上（あ）がりぬ按司部（あじび）谷茶（たんちゃ）ぬ御前（うめ）打（う）ち滅（ふる）ぶち、今（なま）や谷茶城（たんちゃぐすぃく）んでぃ言（い）ゆん、先（ま）ずぃ事（くとぅ）ぬ起（う）くりや、谷茶（たんちゃ）が野心（やしん）企（たく）でぃ大川（おおかわ）ぬ按司（あじ）ぬ国々（くにぐく）ぬ按司部（あじび）討（う）たんでぃ、有（あ）らざらん事（くとぅ）わ色々（いるいる）に言立（いた）てぃ、加勢（かしい）頼（たぬ）でぃ軍（いくさ）押（う）し寄（ゆ）したん、だあ、大川城（おおかわぐすぃく）や女按司（うぃなぐあじ）ぬ御弔（うとぅむれ）えぬ日（ふぃ）に当（あ）たてぃ、御取込（うとぅりく）みぬ最中（せえちゅう）以（む）ってぃぬ外（ふか）、火急（かちゅう）な事（くとぅ）分別（ぶんびち）成（な）らん、按司（あじ）ん大将（てえしょお）ん諸共（いくる）討（う）ち死（じ）に、大勢（てえぜえ）に無勢（ぶぜえ）力（ちから）及（うゆ）ばらん、終（つぃい）にや思（う）み子（ぐぁ）や生（い）ち捕（とぅ）らり、大将（てえしょお）村原（むらばる）ぬ輩（ひゃあ）や逃（に）ぢ済（すぃ）まち、行方（ゆくい）知（し）らん。世界（しけ）ぬ一人者（ふぃちゅいむん）、良（い）い武士（ぶし）や素引（すんつぃ）てぃや、生（い）ち捕（とぅ）てぃ有（あ）る幼（いに）き子（ぐぁ）餌種（むんだに）子（ぐぁ）に為（し）ち、取（とぅ）り付（つぃ）てぃ降参（こおさん）為（し）みらんでぃ、其（う）ぬ思（う）み子（ぐぁ）養（な）てぃ有（あ）ん、其（う）ぬ段（だん）村原（むらばる）が聞（ち）ち付（つぃ）きてぃ、思（う）み子（ぐぁ）引（ふぃ）ち取（とぅ）らんでぃ、村原（むらばる）ぬ母上（あや）や乳母（あんめえ）んでぃ言（い）ち、共（とぅむ）養（つぃかな）てぃ給（たぼ）おり給（たぼ）おりんでぃ、谷茶城（たんちゃぐすぃく）寄（ゆ）しりたん、ああ無茶（むちゃ）、満納（まんな）ぬ子（くぁ）泣（な）ち喰（くぁ）い物（むん）替（けえ）い人（ちゅ）、村原（むらばる）が計（はから）んでぃ、抜（ぬ）ぢゃでぃ削（ふぃ）ぢでぃ知（し）っち、此（く）ぬ際（ちわ）取（とぅ）っ付（つぃ）きゆんでぃ、幸（さいうぇ）えとぅ為（し）ち問（とぅ）い尋（だん）に掛（か）ち引（ふぃ）ち段々（だんだん）、村原（むらばる）妻（とぅじ）ん相（ええ）ん劣（うとぅ）らん抜（に）ぎた女（うぃなぐ）、言（い）ちい為（し）ちゃい色々（いるいる）様々（さまざま）ぬ返事返答（ふぃじふぃんとぅう）、扨（さ）てぃむ扨（さ）てぃむ妙（みょお）な物（むん）聞（ち）ち事（ぐとぅ）有（や）たん、為（しゅ）たすぃが村原（むらばる）妻（とぅじ）や目口（みくち）柔々（やわやわ）とぅ小萎（くしゅう）らしい顔（かあぎ）、本（ふん）ぬ無茶（むちゃ）武者（むしゃ）者（むぬ）有（や）すぃん付（つぃ）いてぃや、だあ按司（あじ）や調度（ちゃんとぅ）打（う）ち惚（ふ）りてぃ、目色（みいる）わ折（う）り布（し）ち晒（さ）ら晒（ざ）らとぅ瘴気（しょおき）や無（ね）らん、終（つぃい）にや石川（いしちゃあ）満納（まんな）ん追（う）い退（ぬ）きてぃ、颯（さっ）たる仕方（しかた）ぬ可笑（うか）しゃや、やあやあ、我（わ）が側（すば）に居（うぅ）らば女按司（うなじゃら）ん為（さ）りん、とおとお、側（すば）に居（うぅ）りゆ居（うぅ）りゆ。でぃ言（い）ちゃりば、村原（むらばる）ぬ母（あや）や、按司（あじ）ん好（すぃ）かん楽（らく）ん好（すぃ）かんんでぃ、突（つぃ）ん撥（ぱ）にん撥（ぱ）しゃん、谷茶（たんちゃ）や腹（わた）切（ち）り分（わ）ち。此（く）ぬ按司（あじ）ぬ言葉（くとぅば）。聞（ち）かならば、其方（すなた）一刀（ちゅかたな）に命（いぬち）潰（つぃ）ぶち取（とぅ）らさ。んでぃ為（しゅ）てぃ脅（うどぅ）ちゃん、腹（わた）ぬ底（すく）迄（までぃ）見済（んすぃ）まさってぃ居（うぅ）すぃや、以（む）ってぃぬ外（ふか）、村原（むらばる）ぬ母（あや）や災（じゃあ）ん無（ね）らん、殺（くる）す殺（くる）すでぃ詰（すぃい）ち掛（か）かたさ、だあ、殺（くる）しゅる意地（いじ）や少（すっとぅ）ん無（ね）らん、苦笑（にがわれ）え為（し）ち戻（むどぅ）ゆたる仕方（しかた）や、本（ふん）ぬ可笑（うかしゃ）どぅ多（うう）さる。あはは・・・・・。立場（たちば）失（うし）なてぃ咄嗟（どぅっ）とぅ散々（さんざん）な事（くとぅ）、彼（あ）んし其（う）りからや大首（ううくび）垂（た）りてぃ細（みすぃ）く聞（ち）ち分（わ）きてぃ、肝（ちむ）出（ぃん）ぢゃち死（し）ぢ行（い）ちゅる命（いぬち）救（すく）てぃ給（たぼ）おり、給（たぼ）おり、んでぃ、段々（だんだん）折（う）り倒（とお）り為（し）やつぃ時（とぅち）んや、村原（むらばる）ぬ妻（とぅじ）や下女（んざ）ぬ、夫（うぅとぅ）ぬ仏事（ぶつぃじ）打（う）ち成（な）ち御返事（うふぃじ）上（あ）ぎらぬ何（ぬ）ぬ是（くぃ）ぬんでぃ、段々（だんだん）とぅ言（い）い回（まわ）ち遣（や）りば、ああ無蔵（んぞ）再縁（せえいん）ぬ片頭（かたかしら）、明（あか）さ暗（くら）さ分（わ）からん、本（ふん）ぬ実（まくとぅ）二反（にたん）精（しい）切（ち）っち。待（ま）ちどぅ嬉（うり）し事（ぐとぅ）喜（ゆるく）びん多（うふぃ）さ俄（あた）果報（かふ）どぅ付（つぃ）ちゃる果報（かふ）な我身（わみ）や。泣（な）ち食（くぁ）い為（し）ち笑（われ）え為（し）い為（じ）い踊（うぅどぅ）り跳（は）に為（し）ち、夜（ゆ）ぬ寝（に）うしん寝（に）んだん、足（ふぃしゃ）ぬ指（ゆび）迄（まで）折（う）り返（けえ）し返（げえ）し為（しゅ）てぃ、空待（んなま）ち為（しゅ）らんでぃ思（うむ）りば、本（ふん）ぬ可笑（うか）しゃどぅ多（うふ）さる、彼（あ）んし又（また）満納（まんな）ぬ子（し）ぬ度々（たびたび）御意見（ぐいきん）御宣（うんにゅ）きらんでぃ、何目（ぬみ）ん見（ん）すぃらん掛（け）え放下（ほおか）たん、やっさ、人（ちゅ）ぬ命（いぬち）てぃらむん言（ぃゆ）んでぃどぅ為（しゅ）る、水（みずぃ）漬（つぃ）かゆすぃゆか浅（あさ）まっさ、恐（うとぅ）るしい畜生人（ちくしょおにん）、又（また）満納（まんな）ぬ子（しい）ん満納（まんな）ぬ子（しい）、思慮（あてぃしょお）ん無（ねえ）らん、何（ぬう）んでぃ其（う）り程（ふどぅ）為（しゃ）が、己（い）が身（み）からどぅ有（や）いん為（しゅ）すぃが、篤（とぅく）とぅ思（む）てぃ見（ん）でぃわ、主（しゅう）、愛々（かながな）しい肝（ちむ）ぬ厚（あつぃ）しゃ所（とぅくる）から実（まくとぅ）に満納（まんな）ぬ子（しい）どぅ有（や）ゆる。
村原のひや
むむ、士族（さむれえ）ぬ本意（ふんい）世（ゆ）ぬ中（なか）ぬ手本（てぃふん）、誠（だんじゅ）島国（しまぐに）ん沙汰（さた）ゆ為（しゅ）たる、やあやあ、大川（おおかわ）ぬ生（な）し子（ぐぁ）乳母（あんめえ）とぅ二人（たい）や、如何（いちゃ）る生（い）ち成（な）りに成（な）遣（や）り居（うぅ）ゆが。
泊
やっさ主（しゅう）、家付（やあづぃ）かん犬（いん）ぬ綱（つぃな）切（ち）ちゃ様（よ）な物（むぬ）、一方（いっぷう）引（ふぃ）ち成（な）てぃ段極（だんぢや）まてぃ居（うぅ）すぃん付（つぃ）いてぃや、軈（やが）てぃ逃（に）ぎ済（すぃ）まち、討（う）ち返（けえ）さりる筈（はじ）ふぇえ話（はなし）に惚（ふ）りてぃ、日（ふぃい）や下（さ）がたり、とおっさ主（しゅう）、戻（むどぅ）てぃ来（ちゅ）る迄（までぃ）此処（くま）ん参（めえ）らば、又（また）話（はな）そおやあ、とお主（しゅう）。
村原のひや
やあやあ、日（ふぃ）ん暮（く）りてぃ居（うぅ）すぃが。彼（あ）が遠（と）屋良村（やらむら）い行（い）ちゃる事（くとぅ）やとぅてぃ急（いす）ぢ行参（いめ）が。
泊
汝（なあ）や何（ぬう）しゃる人（ちゅ）が、人（ちゅ）ぬ用事（ゆじ）問（とぅ）う由（ゆすぃ）や何処（まあ）かい行（い）かあん、彼向（かむ）てぃい。
村原のひや
細々（くまぐま）ぬ次第（しでえ）聞（ち）ち欲（ぶ）しゃゆ有（あ）すぃが、汝（ぃやあ）や何処（まあ）村（むら）ぬ何某（ぬうがし）が有（や）ゆら。
泊
其（ん）まや何処（まあ）だ有侍（やび）るが。
村原のひや
吾（わぬ）や村原（むらばる）ぬ輩（ひゃあ）どぅ有（や）ゆる。
泊
ああ、迚（ぞお）い拝（うぅが）ん知（し）有侍（やび）らん。御母上（あやあめえ）ぬ御使（うつぃけ）え西村（にしむら）ぬ泊（とぅまり）だ有侍（やび）る、細々（くまぐま）ぬ次第（しで）御宣（うんにゅ）き有侍（やび）ら、来（ちゅう）る十日（とぅうか）や思（う）みん子（ぐぁ）引（ふぃ）ち取（とぅ）てぃ、北面（にしむてぃ）ぬ山路（やまじ）逃（に）ぢ召（み）しぇえる筈（はじ）、其（う）ぬ御心得（うくくるい）召（み）しょおりんでぃぬ御使（うつぃけ）えだ有侍（やび）る。
村原のひや
ああ、天（てぃん）ぬ引合（ふぃちゃわ）しか、神（かみ）ぬ御助（うたすぃ）きか、とおとお、今日（ちゅう）からや互（たげ）に心（くくる）打（う）ち合（あ）わち、身（み）ぬ上（ぅうぃい）ぬ如（ぐとぅ）に気張（ちば）てぃ呉（くぃい）り、思（う）み子（ぐぁ）取（とぅ）り戻（むどぅ）ち敵（かたち）討（う）ち取（とぅ）らば、其（う）ぬ御取（うとぅ）り立（た）てぃや有（あ）らん為（しゅ）むぬ、とおとお、気張（ちば）てぃ呉（くぃ）りゆ。むむ、此（く）りに思（う）み付（つぃ）ちゃる事（くとぅ）ぬ又（また）有（あ）ゆん、乙樽（うとぅたる）が思（う）み子（ぐぁ）取（とぅ）り戻（むどぅ）ちからに、逃（に）ぢ忍（しぬ）ぶ時（とぅち）や疑（うたげ）え無（ね）らん、谷茶暴者（たんちゃあまやあ）や用心（ゆうじん）ん為（すぃ）らん、慌（あわ）てぃ様（さま）出（ぃん）ぢてぃ追（うぃ）い掛（か）きる積（つぃ）むり、其（う）ぬ時（とぅち）に任（まか）ち其（う）ぬ時（とぅち）に出（ぃん）ぢてぃ討（う）ち返（けえ）す御恩（ぐうん）是（くり）に極（きわ）またん、はあ斯様（かよ）な時節（じしつぃ）遅（うく）りてぃや済（すぃ）まん、急（いす）ぢ立（た）ち戻（むどぅ）てぃ手組（てぃく）み為（すぃ）らに。
原国兄弟
今（なま）出（ぃん）ぢる二人（たい）や大川（おおかわ）ぬ按司（あじ）ぬ、頭役（かしらやく）為（しゅ）たる原国（はらくに）ぬ輩（ひゃあ）が兄（すぃいざ）子（ぐぁ）松千代（まつぃちゆ）、弟子（うとぅぐぁ）金松（かにまつぃ）ゆ、父親（ちちうや）ぬ事（くとぅ）どぅ、按司添前御腰立（あじすいめみくしだ）ち討（う）ち死（じ）にゆてぃやり予（か）にてぃ聞（ち）ち及（うゆ）でぃ、君親（きむうや）ぬ敵（かたち）討（う）ち取（とぅ）らんとぅ思（む）てぃ、二人（たい）命（いぬち）張（は）まてぃ出（ぃん）ぢ立（た）ちゅる内（うち）に、思（う）みん子（ぐぁ）ぬ前（めえ）どぅ敵（てぃち）ぬ生（い）ち捕（とぅ）やり、村原（むらばる）ぬ輩（ひゃあ）釣（つぃ）ゆる謀（はかれ）えぬ有（あ）とぅてぃ、御育（うすだ）てぃゆてぃやり語（かた）り部（び）ぬ有（あ）りば、此（く）ぬ事（くとぅ）や急（いす）ぢ村原（むらばる）ぬ告（つぃ）ぎてぃ、思（う）み子（ぐぁ）ぬ前（めえ）取（とぅ）り返（けえ）ち、敵（てぃち）討（う）たんとぅ思（む）てぃ肝（ちむ）勇（いさ）み勇（いさ）でぃ出（ぃん）ぢて行（い）ちゅん。
歌
家（いい）ぬ譲（ゆず）りぬ長刀（なぎなた）うぅ 打（う）っ取（とぅ）り直（のお） しくるくるとぅ くるりくるりとぅ振（ふ）り立（た）てぃてぃ 唯（ただ）切（ち）り開（ふぃら）ち割（わ）ってぃ入（い）り 水（みずぃ）ん漏（む）らさん谷茶（たんちゃ）が首（くび）打（う）ち落（う）とぅす其（す）ぬ手並（てぃな）み 当（あ）たる者（むぬ）無（な）き其（す）ぬ威勢（いすぃい）扨（さ）てぃむ扨（さ）てぃむとぅ一声（ふぃとぅくぃい）に 敵（てぃち）や味方（みかた）ぬ目（み）うぅ覚（さ）ます
松千代
やあ、金松（かにまつぃ）ゆ、急（いす）ぢ内（うち）入（い）やり村原（むらばる）ぬ輩（ひゃあ）拝（うぅが）ま。
金松
とおとお、急（いす）ぢ拝（うぅが）ま。
村原のひや
出（でぃ）よお来（ちゃ）る者（むぬ）や村原（むらばる）ぬ輩（ひゃあ）。ああ、実（まく）とぅ是非（じふぃ）無（な）さや我（わ）が按司（あじ）ぬ報（むく）い、天（てぃん）ぬ引合（ふぃちゃわ）しか神（かみ）ぬ御助（うたすぃ）きか、思（うむ）わずぃに武運（ぶうん）重（かさ）に重（かさ）に、散（ち）り散（ぢ）りに成（な）とぅる人々（ふぃとぅびとぅ）ん揃（する）てぃ、願（にが）た事（くとぅ）叶（かな）てぃ、誇（ふく）らしゃどぅ有（あ）ゆる、やあやあ、揃（する）てぃ居（うぅ）る人数（にんず）出（でぃ）よおり出（でぃ）よおり、やあやあ、乙樽（うとぅたる）が予（か）にてぃ内通（ねえつう）が如（ぐとぅ）に、敵（かたち）討（う）ち取（とぅ）ゆる御運（ぐうん）巡（みぐ）り来（ち）てぃ、今日（ちゅう）ぬ良（ゆ）かる日（ふぃ）に立（た）ちゆ出（ぃん）ぢら。
原国兄弟
屈強（くっきゅう）な時節（じしつぃ）遅（うく）りてぃや済（すぃ）まん、片時（かたとぅち）ん急（いす）ぢ御供（うとぅむ）為有侍（しゃび）ら。
村原のひや
とおとお、手賦（てぃふ）ぬ次第（しでえ）事付（とぅづぃ）き渡（わた）さ、やあ喜瀬（きし）ぬ大屋子（ううやしい）敵（てぃち）ぬ城元（ぐすぃくむとぅ）、忍（しぬ）でぃ出（ぃん）ぢ居（うぅ）とぅてぃ、乙樽（うとぅたる）が思（う）み子（ぐぁ）奪（ば）い取（とず）やり逃（に）じる御中途（うちゅうとぅ）ぬ警護（きいぐ）念（にん）ぬ入（い）り、又（また）西川（にしちゃ）ぬ子（し）や頼（たぬ）でぃ加勢（かしい）今日（ちゅう）ぬ真夜中（まゆなか）に御城（うぐすぃく）ぬ後（うら）ぬ、山（やま）に伏（ふ）し隠（かく）り谷茶暴者（たんちゃあまやあ）が、城（ぐすぃく）立（た）ち出（ぃん）ぢてぃ城（ぐすぃく）ぬ門（じょ）閉（み）ちてぃ、大川（おおかわ）ぬ印（しるし）旗（はた）差（さ）し立（た）てぃ置（う）き、やあ瀬底（しすく）下手（しむでぃ）居（うぅ）りゃ北（にし）ぬ山道（やまみち）ぬ先（さち）に隠（かく）りとぅてぃ、谷茶（たんちゃ）ぬ暴者（あまや）が走（は）い通（とぅう）る後（あとぅ）に、道（みち）ぬ口（くち）塞（ふさ）ぢ山道（やまちみ）真（ま）ん中（なか）、走（は）い通（とぅう）る時分（じぶん）法螺（ふら）や石火矢（いしびいや）、打（う）ち鳴（な）らし鳴（な）らし島国（しまぐに）ん崩（くず）すぃ、気（ち）うぅ立（た）てぃてぃ若（む）しか谷茶暴者（たんちゃあまやあ）が、逃（に）ぢ戻（むどぅ）る時分（じぶん）唯（ただ）嘗（な）み切（ぢ）りに、討（う）ちゆ留（とぅ）みり、原国（はらくに）ぬ兄弟（ちょで）や山道（やまみち）ぬ中（なか）に、伏（ふ）しゆ隠（かく）りとぅてぃ先（ま）ずぃ、石火矢（いしびいや）法螺（ふら）うぅ、合図（えず）に躍（うどぅ）出（ぃん）ぢてぃ双方（すうふう）ぬ険阻（きんす）、中（なか）に引（ふぃ）ち包（つぃつぃ）でぃ余（あま）すな漏（む）らすな討（う）ちゆ留（とぅ）みり、やあ、泊（とぅまり）や先立（さちだ）ち遣（や）り忍（しぬ）でぃ行（い）ぢ居（うぅ）とぅてぃ、乙樽（うとぅたる）が思（う）み子（ぐぁ）引（ふぃ）ち取（とぅ）やり逃（に）ぢてぃ、半里（はんり）程（ふどぅ）行（い）かば城（ぐすぃく）走（は）い登（ぬぶ）てぃ、逃（に）ぢ忍（しぬ）ぢ行（い）ちゅすぃ見付（んつぃ）きたんてぃやり、実（まく）とぅ段々（だんだん）とぅ高（たか）らかに告（つぃ）ぎてぃ、谷茶（たんちゃ）石川（いしちゃあ）誘（さす）出（ぃん）ぢゃちからに、北（にし）ぬ山道（やまみち）に案内者（あねえむん）為居（しょお）り。やあやあ、揃（する）てぃ居（うぅ）る人数（にんず）確（たし）かに聞（ち）ち。朋輩（ほおべえ）ぬ仲（なあか）不和（ふわ）にどぅん成（な）らば、怪我事（きがぐとぅ）ぬ基（むうとぅ）事障（くとぅさわ）りでむぬ、腹（はら）ぬ立（た）つ儘（まま）に短気（たんち）為（すぃ）るな、栄欲（ええゆく）栄欲（ええゆく）、堪忍（かんにん）題目（でえむく）どぅ有（や）ゆる。
惣人数
拝（うぅが）ん留（とぅ）み有侍（やび）てぃ。
村原のひや
はあ、揃（する）てぃ居（うぅ）る人数（にんず）肝（ちむ）合（あ）わち居（うぅ）りば、実（まく）とう勝（か）ち戦（いくさ）疑（うたげ）えや無（ね）らん、とおとお、手配（てぃくば）りぬ通（とお）り油断（ゆだん）為（すぃ）るな、さあさあ、急（いす）ぢ立（た）ち向（ん）から、急（いす）ぢ打（う）ち立（た）たに。
歌
押（う）す風（かじ）ん涼（すぃだ）しゃ風車（かじまや）とぅ共（とぅむ）に
押（う）し連（つぃ）りてぃ互（たげ）に遊（あすぃ）ぶ嬉（うり）しゃ
乙樽
思（う）み子（ぐぁ）取（とぅ）り戻（むどぅ）ち空（あ）ち間（ま）計（はか）れ遣（や）り出（ぃん）ぢ入（い）りぬ人（ふぃちゅ）に紛（まぢ）り出（ぃん）じる。
喜瀬の大屋子
喜瀬（きし）だ有侍（やび）る、御供（うとぅむ）為侍（しゃび）ら。
泊
むむにや、時分（じぶん）でえろ、城（ぐすぃく）走（は）い登（ぬぶ）てぃ谷茶（たんちゃ）誘（さすぃ）出（ぃん）ぢゃそ、然（さ）り然（さ）り大川（おおかわ）ぬ乳母（あんめえ）や思（う）み子（ぐぁ）引（ふぃ）ち取（とぅ）てぃ、北面（にしむてぃ）ぬ山道（やまみち）逃（に）ぎ召（み）しぇえ侍（び）たん。
谷茶
ああ、扨（さ）てぃん扨（さ）てぃん、やあ、石川（いしちゃあ）ぬ輩（ひゃあ）輩（ひゃあ）。
石川のひや
ふう。
谷茶
大川（おおかわ）ぬ生（な）し子（ぐぁ）盗（ぬす）でぃ取（とぅ）てぃ逃（に）ぢる。急（いす）ぢ追（う）い付（つぃ）きてぃ奪（うば）い取（とぅ）らに、さあさあ、急（いす）ぢ急（いす）ぢ。
石川のひや
やあやあ、大川（おおかわ）ぬ生（な）し子（ぐぁ）盗（ぬす）ぢ取（とぅ）てぃ逃（に）ぢる、急（いす）ぢ立（た）ち出（ぃん）ぢてぃ御供（うとぅむ）為（しょお）り。
谷茶
いや、供連（とぅむつぃ）りん要（い）らん、急（いす）ぢ急（いす）ぢ。彼（あ）りゆ彼（あ）りゆ、恩義（うんぢ）忘却（ぼおちゃく）情（なさ）き切（ち）り輩（やから）。
乙樽
やあやあ、村原（むらばる）ゆ初（はじ）み原国（はらぐに）が生（な）し子（ぐぁ）、思（う）み子（ぐぁ）御迎（うむけ）けに忍（しぬ）でぃ来（ち）い居（うぅ）ゆん、此（く）ぬ間（めえ）ぬ恩（うん）に告（つぃ）ぎる事（くとぅ）でむぬ、急（いす）ぢ立（た）ち戻（むどぅ）てぃ命（いのち）取（とぅ）るな。
谷茶
いや、幸（しやわ）しどぅ有（や）ゆる、村原（むらばる）とぅ共（とぅむ）に。
乙樽
寄（ゆ）しゆらば寄（ゆ）しり、切（ち）り果（は）たち取（とぅ）らさ。
村原のひや
やあ、谷茶（たんちゃ）、欲悪（ゆくあく）ぬ報（むく）い武運（ぶうん）尽（つぃ）ち果（は）てぃてぃ、村原（むらばる）が前（めえ）に巡（みぐ）てぃ来（ち）ちゃみ。いや、逃（ぬ）がすまい。
原国兄弟
やあ、谷茶（たんちゃ）、原国（はらぐに）兄弟（ちょおでえ）が待（ま）ち受（う）きてぃ居（うぅ）すぃ知（し）っち居（うぅ）たみ。
谷茶
いや、一束（ちゅつぃか）ぬん足（た）らん推参（すぃいさん）な童（わらび）。
原国兄弟
ひゃああい。
谷茶（たんちゃ）暴者（あまやあ）や、原国兄弟（はらぐにちょおでえ）が打（う）ち取（とぅ）有侍（やび）たん。
村原のひや
兄弟（ちょおでえ）ぬ手柄（てぃがら）並（なら）ぶ者（むぬ）居（うぅ）らん。
瀬底下ごおり
神妙（しんみょお）な事（くとぅ）、神妙（しんみょお）な事（くとぅ）。
若按司
やあ、村原（むらばる）ゆ。
村原のひや
やあ、思（う）み子（ぐぁ）。
歌
ああき、夢（いみ）が有（や）ゆら
村原のひや
ああ、拝（うぅが）でぃ泣（な）く事（くとぅ）や夢（いみ）が有（や）や侍（びい）ら、過（すぃ）ぢし按司添（あじすい）ん嬉（うり）しゃ召（み）しぇら。
乙樽
やあやあ、敵（てぃち）ぬ島国（しまぐに）や花（はな）ぬ鳥心（とぅいぐくる）、思（うむ）てぃ自由（じゆ）成（な）らん、待（ま）ち兼（か）にる今日（ちゅう）や、谷茶（たんちゃ）暴者（あまやあ）が生（う）まり日（ふぃ）ゆてぃやり、世話（しわ）に取（とぅ）り掛（か）かてぃ気（き）ぬ付（つぃ）かん有（あ）りば、思（う）み子（ぐぁ）守（む）り名付（なづぃ）き逃（に）ぢ忍（しぬ）ぶ後（あとぅ）に谷茶（たんちゃ）追（う）い掛（か）きてぃ退（ぬ）がる方（かた）無（ね）らん、是（くり）迄（までぃ）ゆとぅ思（み）ば、御迎（うむけ）えに行参（いも）ち、今日（ちゅう）拝（うぅが）む事（くとぅ）や夢（いみ）が有（や）ゆら。
村原のひや
思（うむ）わずぃに予（か）にてぃ内通（ねえつう）ぬ有（あ）りば、其（う）ぬ手組（てぃぐみ）為（し）ちゅてぃ美御迎（みうんけ）え為（し）ちゃん。やあ、乙樽（うとぅたる）、女身（うぃなぐみ）ぬ上（ぅうぃい）に命（いぬち）振（ふ）り捨（すぃ）てぃてぃ、敵（てぃち）ぬ手（てぃ）に渡（わた）る思（う）み子（ぐぁ）取（とぅ）り戻（むどぅ）ち、ああ、末代（まつぃでえ）ぬ手本（てぃふん）沙汰（さた）どぅ残（ぬく）る。
西川の子使
然（さ）り、西川（にしかわ）ぬ子（し）、使（つぃけ）えだ有侍（やびい）る、城（ぐすぃく）乗（ぬ）っ取（とぅ）り遣（や）り、其（う）り其（う）りぬ用意（よおい）美御迎（みうんけ）だ有侍（やび）る。
村原のひや
一段（いちだん）な事（くとぅ）一段（いちだん）な事（くとぅ）。ああ、思（う）みん子（ぐぁ）ん拝（うぅが）でぃ敵（てぃち）ん討（う）ち済（すぃ）まち、斯有（かにゃ）る誇（ふく）らしゃや物（むぬ）に譬（たてぃ）ららん、とおとお、元（むとぅ）ぬ御城（うぐすぃく）に美御遣（みうんつぃけ）え拝（うぅが）み有侍（やび）ら。
若按司
嬉（うり）しさ互（たげ）に踊（うぅどぅ）てぃ戻（むどぅ）ら。
村原のひや
嬉（うり）しさや踊（うぅどぅ）り跳（は）に御供（うとぅむ）為侍（しゃび）ら。やあ、喜瀬（きし）ぬ大屋子（ううやくう）、長刀（なぎなた）ゆ上（あ）げてぃ御先走（うさちば）い為（すぃ）りゆ。
歌
御世継（うゆつぃ）ぢゆ召（み）しょち元（むとぅ）ぬ御城（うぐすぃく）に
御駆（うか）き欲（ぶ）しゃ召（み）しょり玉（たま）ぬ思（う）み子（ぐぁ）