忠臣身替:本文 摩文仁親方 作
八重瀬の按司
出(でぃ)よお来(ちゃ)る者(むぬ)や、島尻(しまじり)ぬ世(ゆ)ぬ主(しゅ)、八重瀬(いぇえし)ぬ按司(あじ)。はあ、大里(うふざとぅ)ぬ主(あるじ)玉村(たまむら)ぬ女按司(うぅなじゃら)や、世間(しきん)鳴響(とぅゆ)まりる清(ちゅ)ら女(うぃなぐ)有(や)りば浮世(うちゆ)習(なら)わしぬ恋心(くいぐくる)起(う)くち、如何(いちゃ)しがな按司(あじ)ぬ命(ぬち)謀(はか)てぃからに、女按司(うぅなじゃら)ゆ引(ふぃ)ち取(とぅ)やり我側(わすば)に置(う)ち遣(や)り、夢(いみ)ぬ間(ま)ぬ浮世(うちゆ)生(い)ち楽(らく)ゆ為(すぃ)らん與呼(てぃや)り、去年(くず)ぬ八月(はちぐぁつぃ)に軍(いくさ)打(う)ち寄(ゆ)してぃ、思(うむ)た事(くとぅ)按司(あじ)や、討(う)ち済(すぃ)まち有(あ)すぃが、女按司(うぅなじゃら)に我(わ)が企(たく)み、知(し)らし部(び)ぬ有(あ)たら、按司(あじ)とぅ諸共(むるとぅむ)に玉(たま)ぬ緒(うぅ)ゆ切(ち)らち、はあ、我(わ)が願(にげ)や適(かな)ん気(ち)ぬ毒(どぅく)どぅ有(や)ゆる、又(また)嫡子(ちゃくし)若按司(わかあじ)ん逃(に)ぢ走(はし)てぃ居(うぅ)らん、朝夕(あさゆ)此(く)ぬ事(くとぅ)どぅ気(ち)に掛(か)かてぃ居(うぅ)たる。はあ、聞(ち)きば勝連(かつぃりん)ぬ平安名(ふぃんな)ぬ大主(うぬし)ぬ、隠(かく)ち有(あ)ん與呼(てぃや)り知(し)らし部(び)ぬ有(あ)むぬ、今日(ちゅう)明(あ)きてぃ明後日(あさてぃ)舟路(ふなじ)漕(く)ぢ渡(わた)てぃ、憎(にく)い生(い)ち輩(やから)嘗(な)み殺(くる)し為(しゅ)ん、やあ、国吉(くにし)ぬ子(し)渡橋名(とぅふぁしな)ぬ輩(ひゃあ)。
国吉の子
渡橋名のひや
ふう。
八重瀬の按司
やあ、玉村(たまむら)ぬ若按司(わかあじ)取(とぅ)り逃(ぬが)ち居(うぅ)らん、眠(にぶ)る目(み)ん寝(に)らん気(ち)ぬ毒(どぅく)どぅ有(や)たる、聞(ち)きば勝連(かつぃりん)ぬ平安名(ふぃんな)大主(ううぬし)ぬ、隠(かく)ち有(あ)ん與呼(てぃや)り、語(かた)り部(び)ぬ有(あ)とぅてぃ、船軍(ふないくさ)寄(ゆ)してぃ討(う)ち取(とぅ)らん為(しゅ)むぬ、やあ、渡橋名(とぅふぁしな)ぬ輩(ひゃあ)や片時(かたとぅち)ん急(いす)ぢ、与那原(ゆなばる)に行(い)ちゃり乗船(ぬりふに)数(かずぃ)十艘(じっすう)用意(よおい)為(し)みさ為居(しょお)り。
渡橋名のひや
拝(うぅが)ん留(とぅ)み有侍(やび)てぃ。
八重瀬の按司
やあ、国吉(くにし)ぬ子(し)、己(うが)や島々(しまじま)ぬ、頭(かしら)呼(ゆ)び寄(ゆ)してぃ勝(すぃぐ)りとぅる若者(わかむ)、五六百人(ぐるっぴゃくにん)今日(ちゅう)明(あ)きてぃ明後日(あさてぃ)、六(む)つぃ鐘(がに)とぅ共(とぅむ)に与那原(ゆなばる)ぬ浜(はま)に、勢揃(すぃいずる)い為(すぃ)り與呼(てぃや)り、強(ちゅう)く細々(くまぐま)とぅ事付(とぅづぃ)き渡(わた)しょおり。
国吉の子
拝(うぅが)ん留(とぅ)み有侍(やび)てぃ。
八重瀬の按司
とおとお、油断(ゆだん)為(すぃ)るな。
渡橋名のひや
国吉の子
拝(うぅが)ん留(とぅ)み有侍(やび)てぃ。
歌
徒(あだ)し世(ゆ)ぬ中(なか)に長(なが)れえてぃ居(とぅ)とぅてぃ
朝夕(あさゆ)血(ち)ぬ涙(なみだ)袖(すでぃ)ゆ濡(ぬ)らち
亀千代
今(なま)出(ぃん)じる我身(わみ)や大里(うふざとぅ)ぬ城主(ぐすぃくぬし)、玉村(たまむら)ぬ按司(あじ)ぬ頭役(かしらやく)為(しゅ)たる、里川(さとぅかわ)ぬ輩(ひゃあ)兄子(すぃざぐぁ)亀千代(かみちゆ)どぅ有(や)ゆる、玉村(たまむら)ぬ按司(あじ)や罪科(つぃみとぅが)ん無(ね)らん、八重瀬(いぇえし)大主(うふぬし)に殺(くる)さりゆ召(み)しょち、父親(ちちうや)ん共(とぅむ)に討(う)ち死(じ)にゆ為(さ)りてぃ、哀(あわ)り若按司(わかあじ)や勝連(かつぃりん)ぬ島(しま)ぬ、平安名(ふぃんな)大主(ううぬし)に隠(かく)さりてぃ居参(いめ)ん、憎(にく)さる八重瀬(いぇえし)が悪欲(あくゆく)や止(や)まな、若按司(わかあじ)ぬ御行方(うゆくぃ)聞(ち)ちゆ定(さだ)み遣(や)り、要(い)らん罪(つぃみ)作(つぃく)てぃ根葉(にふぁ)刈(か)らんてぃやり、船路(ふなじ)から軍(いくさ)寄(ゆ)しゆんでぃ有(あ)りば、油断(ゆだん)しや済(すぃ)まん事(くとぅ)や急(ちゅう)成(な)とぅり、勝連(かつぃりん)ぬ島(しま)に忍(しぬ)でぃ行(い)ぢからに、我命(わいぬち)とぅ替(け)えてぃ若按司(わかあじ)助(たすぃ)き欲(ぶ)しゃ有(あ)むぬ、母親(ふぁふぁうや)に死出(しでぃ)ぬ暇乞(いとぅまぐ)い語(かた)てぃ、片時(かたとぅち)ん急(いす)ぢ忍(しぬ)でぃ行(い)ちゅん。やあ、母親(ふぁふぁうや)ゆ。やあ、金松(かにまつぃ)ゆ。
歌
何(ぬ)がすぃ玉黄金(たまくがに)物思顔(むぬみがう)為(し)ちゅる
夕(ゆ)び見(ん)ちゃる夢(いみ)ぬ我肝(わぢむ)掛かてぃ
亀千代
母(ふぁふぁ)ん金松(かにまつぃ)ん聞(ち)ち留(とぅ)めてぃ給(たぼ)り、憎(にく)さる八重瀬(いぇえし)が悪欲(あくゆく)や止(や)まな、若按司(わかあじ)ぬ御行方(うゆくぃ)聞(ち)ちゆ定(さだ)み遣(や)り、船路(ふなじ)から軍(いくさ)寄(ゆ)しゆんでぃ有(あ)りば、勢(いちゅ)い有(あ)る者(むぬ)に弓(ゆみ)引(ふぃ)ちや成(な)らん、徒(いたづぃ)らに此(く)ぬ身(み)長(なが)れえてぃ居(うぅ)とぅてぃ、敵(てぃち)ぬ手(てぃ)に掛(か)かてぃ殺(くる)さらずぃ従(ゆ)いや、有(あ)りし様(さま)替(け)えてぃ若按司(わかあじ)どぅ有(や)ゆるてぃやり、敵(てぃち)ぬ手(てぃ)に行(い)ちゃり身替(みがわ)りに立(た)てぃば、御主人(ぐしゅじん)ぬ御為(うたみ)国(くに)ぬ為(たみ)でむぬ、是非(じふぃ)ゆ知(し)り召(み)しょち暇(いとぅま)呉(くぃ)い給(たぼ)り。
母
やあ、生(な)し子(ぐぁ)、主人(しゅじん)此(く)ぬ際(ちわ)に成(な)り召(み)しょちてぃやり、忠節(ちゅうしつぃ)ぬ誠(まくとぅ)忘(わすぃ)りらん有(あ)すぃや、女身(うぃなぐみ)ゆ有(や)てぃん誇(ふく)らしゃどぅ有(あ)すぃが、此(く)り迄(までぃ)ゆとぅ思(み)ば肝(ちむ)ん肝(ちむ)成(な)らん、如何(いちゃ)しがな別(びつぃ)に計(はかれ)えや成(な)らに。
亀千代
やあ、母親(ふぁふぁうや)ゆ、世界(しけ)や敵仇(てぃちかたち)助(たすぃ)き部(び)ん居(うぅ)らん、哀(あわ)り成(な)り果(は)てぃてぃ、此(く)ぬ際(ちわ)ゆ有(や)りば、猶又(にゃまた)分別(ふんびつぃ)ん絶(て)え果(は)てぃてぃ居(うぅ)むぬ、尽々(つぃくづぃく)とぅ此(く)ぬ事(くとぅ)や思(うむ)てぃ給(たぼ)り。
母
止(とぅ)みてぃ止(とぅ)みららん哀(あわ)り振分(ふや)かりてぃ、荒(あ)らし声(ぐぃ)ぬ有(あ)らば我身(わみ)や如何(ちゃ)為(しゅ)が。
亀千代
やあ、母親(ふぁふぁうや)ゆ、天(てぃん)とぅ地(ぢ)ぬ中(なか)に君親(きみうや)ぬ敵(てぃち)や、共(とぅむ)に天(てぃん)上(かみ)てぃ地(ぢ)や踏(ふ)まにてぃやり、親(うや)ぬ里川(さとぅがわ)ぬ生(い)ちち居(うぅ)る間(えだ)、他所事(ゆすくとぅ)や朝夕(あさゆ)聞(ち)ち投(な)ぎな我身(わみ)ぬ、我(わ)が命(いぬち)惜(う)しでぃ義理背(ぢりすむ)ち済(すぃ)みゅみ、是非(じふぃ)ゆ御情(うなさ)きに許(ゆる)ち給(たぼ)り。
母
言(いう)る事(くとぅ)聞(ち)きば、理(くとぅわり)どぅ有(や)ゆる、愛(かな)し子(ぐぁ)に迷(まゆ)てぃ義理背(ぢりすむ)ち成(な)ゆみ、泣(な)く泣(な)くん生(な)し子(ぐぁ)暇乞(いとぅまぐ)い取(とぅ)らしゅむぬ、命(いぬち)振(ふ)り捨(すぃ)てぃてぃ御腰立(みくした)ち為(すぃ)りゆ。
亀千代
母親(ふぁふぁうや)ぬ御志(うくくるざし)今(なま)ぬ事(ぐとぅ)有(や)りば、左京(さちょ)ぬ橋(はし)広(ふぃる)く極楽(ぐくらく)どぅ為侍(しゃび)る。やあ、金松(かにまつぃ)ゆ、捨(すぃ)てぃる身(み)が命(いぬち)露(つぃゆ)程(ふどぅ)ん思(うま)ん、二所(たとぅくる)ぬ事(くとぅ)どぅ気(ち)に掛(か)かてぃ居(うぅ)むぬ、友(どぅし)ん連(つぃ)り為(すぃ)るな遊(あすぃ)び惚(ぶ)り為(すぃ)るな、片時(かたとぅち)ん御側(うすば)離(はな)りらん如(ぐとぅ)に、朝夕(あさゆ)母親(ふぁふぁうや)に孝(こお)ぬ道(みち)尽(つぃく)す。
金松
やあ、貴前(やちめえ)ゆ、別(わか)りゆる際(ちわ)ぬ御情(うなさ)きぬ言葉(くとぅば)、何故(ぬゆ)でぃ背(すむ)ちゃ侍(び)が御気遣(うきづけ)ゆ召(み)しょな、是迄(くりまでぃ)ゆ有(や)りば互(たげ)に泣(な)ち別(わか)てぃ、如何(いちゃ)し暮(く)ら為侍(しゃび)が母(ふぁふぁ)とぅ我身(わみ)や。
亀千代
やあ、母親(ふぁふぁうや)ゆ、やあ、金松(かにまつぃ)ゆ、哀(あわり振分(ふや)かりや何時(いつぃ)迄(までぃ)ん名残(なぐ)り、時(とぅち)移(うつぃ)ち済(すぃ)みゃ侍(び)らん御暇(ういとぅま)ゆ為侍(しゃび)ら。
歌
義理(ぢり)とぅ思(む)てぃ互(たげ)に思(う)み切遣(ちや)り居(うぅ)すぃが
実(まく)とぅ此(く)れ迄(までぃ)ぬ別(わか)りとぅ思(み)ば
母
生(な)し子(ぐぁ)見送(みうく)りに此(く)り迄(までぃ)ゆ来(ちゃ)すぃが、哀(あわ)り連(つぃ)りなさや後影(あとぅかぢ)ん見(ん)らん、目元(みむとぅ)暗々(くらぐら)とぅ成(な)るが心気(しんち)。
金松
やあ、母親(ふぁふぁうや)ゆ、大原(おおばる)どぅ有(や)ゆる道中(みちなか)どぅ有(や)りば、此処(くま)に足(ふぃしゃ)淀(ゆどぅ)でぃ他所(ゆす)知(し)りてぃからや、貴前(やちめえ)ぬ御為(うたみ)成(な)らん事(くとぅ)でむぬ、御気張(うちば)りゆ召(み)しょり屋戸(やどぅ)に戻(むどぅ)有侍(やび)ら。とおとお、御立(うた)ち召(み)しょり。
歌
生(な)し子(ぐぁ)云言葉(いくとぅば)に引(ふぃ)かさりてぃ我身(わみ)や
泣(な)く泣(な)くん屋戸(やどぅ)に戻(むどぅ)る心気(しんち)
亀千代
母(ふぁふぁ)ぬ露涙(つぃゆなみだ)思(う)み流(なが)し兼(か)にてぃ、太陽(てぃだ)や布丈(ぬぬだき)に日(ふぃ)ん暮(く)りてぃ居(うぅ)むぬ、片時(かたとぅち)ん急(いす)ぢ忍(しぬ)でぃ行(い)ちゅん。
歌
御主人(ぐしゅじん)ぬ御為(うたみ)島国(しまぐに)ぬ為(たみ)に 思切遣(う
みちや)り出(ぃん)じる義理立(ぢりだ)てぃゆ有(や)てぃん、此(く)り迄(ま
でぃ)ゆとぅ思(み)ば振分(ふや)かりる袖(すでぃ)に 落(う)てぃる白玉(し
らたま)や包(つぃつぃ)でぃ包(つぃつぃ)まらん 母(ふぁふぁ)とぅ金松(かに
まつぃ)が馴(な)りし面影(うむかぢ)に後(うし)る髪(かみ)引(ふぃ)かり歩
(あゆ)でぃ歩(あゆ)まらん 今(なま)どぅ勝連(かつぃりん)に忍(しぬ)でぃ
着(ち)ちゃる
亀千代
然(さ)り、若按司(わかあじ)ぬ前(めえ)、やあ、大主(ううぬし)ゆ。
若按司
やあ、亀千代(かみちゆ)。
平安名大主
やあ、亀千代(かみちゆ)、如何(いちゃ)る事(くとぅ)有(あ)とぅてぃ夜深(ゆぶか)くに着(つぃ)ちゃが。
亀千代
憎(にく)い八重瀬(いぇえしい)が悪欲(あくゆく)や止(や)まん、大主(ううぬし)ゆ頼(たぬ)でぃ行参(いめ)んてぃやり聞(ち)ち遣(や)り、吾(わあ)が生(う)まり島(しま)与那原(ゆなばる)ぬ村(むら)に、島々(しまじま)の強者(つぃわむ)呼(ゆ)びゆ集(あつぃ)み遣(や)り、船路(ふなじ)から軍(いくさ)寄(ゆ)しゆんでぃ有(あ)とぅてぃ、夜(ゆ)ぬ目(みい)ゆ隠(かく)り寄(ゆ)しり遣(や)り来(ちゃあ)侍(び)たる。やあ、大主(ううぬし)ゆ、事(くとぅ)や急(ちゅう)成(な)とぅり時(とぅち)移(うつぃ)ち済(すぃ)まん、急(いす)ぢ此(く)ぬ事(くとぅ)や計(はかれ)えゆ召(み)しょり。
平安名大主
はあ、一大事(いちでじ)な事(くとぅ)ゆ事(くとぅ)ゆ、勢(いちゅ)い有(あ)る者(むぬ)や壁(かび)ん耳(みみ)ざらみ、やあ、思(う)み子(ぐぁ)、吉田(ゆしだ)、森川(むいかわ)、崎枝(さちいだ)ぬ輩(ひゃあ)呼(ゆ)び遣(や)り、此(く)ぬ事(くとぅ)や急(いす)ぢ談合(だんごお)ゆ為侍(しゃび)ら。
若按司
良(ゆ)たしゃ有(あ)る様(よお)に計(はか)れ遣(や)り給(たぼ)り。
平安名大主
やあ、吉田(ゆしだ)、森川(むいかあ)、崎枝(さちいだ)ぬ輩(ひゃあ)。
三人
ふう。
平安名大主
やあ、思(う)みん子(ぐぁ)ぬ此処(くま)に隠(かく)り遣(や)り居参(いめ)す、憎(にく)い八重瀬(いぇえしい)に知(し)らし部(び)ぬ有(あ)とぅてぃ、与那原(ゆなばる)ぬ村(むら)に勢揃(すぃいずる)い為(し)みてぃ、今日(ちゅう)明後日(あちゃ)ぬ内(うち)に船軍(ふないくさ)寄(ゆ)しゆんでぃ聞(ち)き付(つぃ)きてぃ来(ちゃ)ん、はあ、此(く)ぬ際(ちわ)に成(な)りば、思(うむ)い自由(じゆ)成(な)らん、敵(てぃち)防(ふし)ぐ計(はか)れ差(さ)し迫(すぃま)てぃ居(うぅ)むぬ、肝心(ちむくくる)砕(くだ)ち計(はか)れ遣(や)り呉(くぃ)りゆ。
三人
拝(うぅが)ん留(とぅ)み有侍(やび)てぃ。
崎枝のひや
やあ、大主(ううぬし)、上(あ)がり太陽(てぃだ)拝(うぅが)む人心(ふぃちゅぐくる)有(や)りば、大主(ううぬし)ぬ御屋戸(うやどぅ)立(た)ち出(ぃん)ぢてぃてぃやり世界(しけ)や敵仇(てぃちかたち)、誰(た)が隠(かく)ち置(う)ちゅが又(また)思(うむ)い芯(しん)切(ち)りてぃ、果(は)てぃ戦(いくさ)為(し)ちん思(う)み子(ぐぁ)御初(うはじ)みに、討(う)ち死(じ)にどぅ召(み)しぇる。僅(わずぃ)か四五人(しぐにん)ぬ島国(しまぐに)に向(ん)かてぃ、如何(いか)な働(はたら)ちん力(ちから)及(うゆ)ばりみ。やあ、大主(ううぬし)、是非(じふぃ)無(な)さに我身(わみ)ぬ思(う)み付(つぃ)ちゃる事(くとぅ)や、暫(しば)し八重瀬(いぇえしい)に降参(こおさん)ゆ召(み)しょち、時節(じしつぃ)計(はか)れ遣(や)り敵(てぃち)ゆ討(う)ち取(とぅ)らば、玉村(たまむら)ぬ御恩(ぐうん)又(また)開(ふぃら)く然(さ)らみ、急(いす)ぢ降参(こおさん)ゆ究(きわ)みゆ召(み)しょおり。
森川の子
やあ、崎枝(さちいだ)ぬ輩(ひゃあ)、武士(ぶし)ぬ身(み)ぬ余(あま)り臆病(うくびょお)な事(くとぅ)言(い)うな、やあ、大主(ううぬし)、崎枝(さちいだ)ぬ輩(ひゃあ)が今(なま)ぬ云言葉(いくとぅば)や、思(う)みん子(ぐぁ)ぬ御為(うたみ)事寄(くとぅゆ)してぃ言(ぃゆ)すぃが、実(じつぃ)や妻子(とぅじっくぁ)に思(うむ)い引(ふぃ)かさりてぃ、命惜(ぬちう)しさ有(あ)てぃどぅ今(なま)ぬ如(ぐとぅ)言(ぃや)侍(び)る、実(まく)とぅ思(うみ)ん子(ぐぁ)に忠節(ちゅうしつぃ)ゆ有(や)らば、御元祖(うぐぁんす)ぬ光(ふぃちゃい)継(つぃ)ぢ照(てぃ)らす如(ぐとぅ)に、命(いぬち)振(ふ)り捨(すぃ)てぃてぃ御腰立(みくしだ)ち為(しゅ)すぃどぅ、主人(しゅじん)ぬ御為(うたみ)国(くに)ぬ為(たみ)然(さ)らみ、ああ、仮令(たとぅい)身(み)や死出(しでぃ)ぬ土(ちち)に成(な)てぃてぃやり、此(く)ぬ身(み)穢(きが)らしゃい主人(しゅじん)二人(たい)持(む)ちゅみ、降参(こおさん)ぬ事(くとぅ)や取(とぅ)り止(や)みに為侍(しゃび)ら。
吉田の子
森川(むいかわ)が言(ぃや)りる事(ぐとぅ)、やあ、大主(ううぬし)、仮令(たとぅい)此(く)ぬ首(くび)や地(ぢい)に落(う)てぃるとぅん、敵(てぃち)に首(くび)曲(ま)ぎてぃ降参(こおさん)ゆ為(すぃ)らば、武士(ぶし)ぬ身(み)ぬ名折(なうぅ)り島国(しまぐに)ぬ人(ふぃちゅ)に、後(うし)る指(ゆび)指(さ)さり浮(う)ち名(な)流(なが)さゆり、快(くくるゆ)く敵(てぃち)とぅ討(う)ち死(じ)にゆ為(すぃ)らば、此(く)ぬ世界(しけ)に名残(なぐ)り露(つぃゆ)程(ふどぅ)ん無(ね)らん、はあ、降参(こおさん)ぬ事(くとぅ)や嘗(かつぃ)てぃ無(ね)有侍(やび)らん。
亀千代
然(さ)り、若按司(わかあじ)ぬ前(めえ)、やあ、大主(ううぬし)、降参(こおさん)ゆ為(しゅ)すぃん討(う)ち死(じ)にゆ為(しゅ)すぃん、猶又(にゃまた)如何(ちゃ)ん無(ね)らん是非(じふぃ)無(な)さゆ有(や)りば、我(わ)が願(にげ)ぬ有(あ)むぬ御宣(うんにゅ)かてぃ給(たぼ)り。昔(んかし)今帰仁(なきじん)ぬ城(ぐすぃく)本部(むとぅぶ)大原(おおばる)に取(とぅ)りゆ囲(かく)まりてぃ、滅(ふる)ぶ際(ちわ)有(や)たすぃ御臣下(ぐしんくぁ)ぬ一人(ふぃちゅい)、身替(みがわ)りに出(ぃん)ぢてぃ七重八重(なないやい)囲(かく)み、引(ふぃ)ち取(とぅ)たんてぃやり昔物語(んかしむぬがたり)、聞(ち)ちゃる事(くとぅ)有(あ)むぬ此(く)ぬ事(くとぅ)ゆ倣(なら)てぃ、身替(みがわ)りに立(た)ちゃい片時(かたとぅち)ん急(いす)ぢ、助(たすぃ)き上(あ)ぎ有侍(やび)ら思(う)みん子(ぐぁ)とぅ我身(わみ)や、互(たげ)に二八頃(にはちぐる)味方(みかた)ゆり他(ふか)に、誰(た)が知(し)ゆら有(や)りば敵(てぃち)ゆ騙(だま)しゅすぃや、手(てぃ)ぬ内(うち)どぅ有(や)ゆる、急(いす)ぢ我(わ)が願(にげ)に御極(うきわ)みゆ召(み)しょり。
若按司
やあ、亀千代、哀(あわ)り此(く)ぬ丈(たき)に成(な)り果(は)てぃてぃ居(うぅ)すぃが、頼(たぬ)むしや元(むとぅ)の誠(まくとぅ)忘(わし)りらん、命(いぬち)振(ふ)り捨(すぃ)てぃてぃ今(なま)ぬ真実(しんじつぃ)や、云言葉(いくとぅば)に出(ぃん)ぢゃち言(い)ちや尽(つぃく)さらん、汝(ぃやあ)敵(てぃち)に渡(わた)ち後(あとぅ)に生(い)ち残(ぬく)てぃ、露(つぃゆ)ぬ身(み)ぬ命(いぬち)長(なが)れえてぃ與呼(てぃや)り、巣(すぃ)無(な)き鳥(とぅい)心(ぐくる)宿(やどぅ)る木(き)ん無(ね)らん、朝夕(あさゆ)血(ち)ぬ涙(なみだ)袖(すでぃ)濡(ぬ)らさゆりか、死出(しでぃ)ぬ山(やま)迄(までぃ)ん諸共(むるとぅむ)どぅ有(や)ゆる、復(ま)たとぅ此(く)ぬ事(くとぅ)や沙汰(さた)ん為(すぃ)るな。
亀千代
然(さ)り、若按司(わかあじ)ぬ前(めえ)、元祖(ぐぁんす)から被(こおむ)たる御恩(ぐうん)、徒(あだ)に成(な)ち此(く)ぬ身(み)長(なが)れえてぃ居(うぅ)とぅてぃ仮令(たとぅい)御腰立(みくしだ)ち討(う)ち死(じ)にゆ為(し)ちん、思(う)みん子(ぐぁ)ぬ御為(うたみ)何(ぬ)ぬ役(やく)が立(た)ちゅが迚(とぅてぃ)ん我(わ)が願(にげ)に御許(うゆる)しぬ有(あ)りば、御主人(ぐしゅじん)ぬ御為(うたみ)身替(みがわ)りに立(た)ちゃい、義理(ぢり)ぬ道筋(みちすぃじ)に安(やすぃ)く死(し)ぢてぃやり、島国(しまぐく)ゆ轟(とぅどぅ)み取(とぅ)り沙汰(さた)ゆ為(さ)りてぃ、過(すぃ)ぢし親父祖(うやふじ)ぬ名(な)ん揚(あ)ぎてぃからや、百歳(ひゃくさ)ゆり勝(まさ)てぃ極楽(ぐくらく)ゆ為侍(しゃび)る、是非(じふぃ)ゆ御情(うなさ)きに許(ゆる)ち給(たぼ)り。
若按司
理(くとぅわり)ゆ尽(つぃく)ち様々(さまざま)ゆ言(い)ちん、絶(て)えてぃ此(く)ぬ事(くとぅ)や聞(ち)ちや成(な)らん。
亀千代
思(うむ)い極(ちわ)みやり御宣(うんにゅ)きる許(ばか)り、仮令(たとぅい)御気(うち)逆(さか)てぃ御腹立(うはらだ)ち有(や)てぃん絶(て)えてぃ此(く)ぬ事(くとぅ)や止(や)みや成有侍(なやび)らん。浅(あさ)ましや軈(やが)てぃ敵(てぃち)ぬ手(てぃ)に掛(か)かてぃ殺(く)るさりゆ召(み)しぇすぃ如何(いちゃ)し拝(うぅが)みゃ侍(び)が、迚(とぅてぃ)ん此(く)ぬ際(ちわ)に我胴(わどぅ)や計(はか)ら。
平安名大主
はあはあ、暫(しば)し待(ま)てぃ、やあ、亀千代(かみちゆ)、身替(みがわ)りに立(た)ちゅる義理立(ぢりだ)てぃゆ為(し)ちゅてぃ、此(く)りからに死(し)なば犬死(いぬじ)にや有(あ)らに、とおとお、心(くくる)静(しずぃ)みとぅてぃ願(にげ)ゆ御宣(うんにゅ)きり。然(さ)り、人(ふぃちゅ)ぬ御主人(ぐしゅじん)ぬ御万人(うまんちゅ)ぬ為(たみ)に、御慈悲(ぐじふぃ)御情(うなさき)や召(み)しぇる如(ぐとぅ)有(や)すぃが、忠節(ちゅうしつぃ)ぬ心(くくる)胸(んに)に湧(わ)ち出(ぃん)ぢてぃ、流(なが)りゆる泉(いずぃみ)止(とぅ)みてぃ止(とぅ)みらりみ、迚(とぅてぃ)ん此(く)ぬ際(ちわ)に御許(うゆる)しゆ召(み)しょち、御主人(ぐしゅじん)ぬ御為(うたみ)身替(みがわ)りに立(た)たば、忠節(ちゅうしつぃ)ぬ光(ふぃちゃい)世々(ゆゆ)に照(てぃ)り移(うつぃ)ち過(すぃ)ぢし親祖父(うやふじ)ぬ名(な)ん揚(あ)ぎてぃからや、人(ふぃちゅ)に生(う)まりたる印(しるし)だ有侍(やび)むぬ、泣(な)く泣(な)くん亀千代(かみちゆ)願(にげ)に任(まか)し有侍(やび)ら。
若按司
義理(ぢり)ぬ思(う)み切(ち)りや梓弓(あずぃさゆみ)心(ぐくる)、引(ふぃ)ち良(ゆ)かい為(さ)らに此(く)り迄(までぃ)ぬ別(わか)り、運足(うんた)らん我身(わみ)ぬ頼(たぬ)でぃ居(うぅ)んてぃやり、此(く)ぬ難(なん)に掛(か)かてぃ敵(てぃち)ぬ手(てぃ)に行(い)ちゃい、哀(あわ)り生殺(なまぐる)し為(さ)りらとぅ思(み)ば。やあ、亀千代(かみちゆ)、願事(にげぐとぅ)ぬ叶(かな)てぃ敵(てぃち)ゆ討(う)ち取(とぅ)らば、母(ふぁふぁ)とぅ金松(かにまつぃ)や親兄弟(うやちょで)とぅ頼(たぬ)でぃ、二人(たい)が行(ゆ)く末(すぃい)や見守(みまむ)らん為(しゅ)むぬ、此(く)ぬ事(くとぅ)ゆ思(うむ)てぃ気(ち)に掛(か)かてぃ行(い)くな。
亀千代
親兄弟(うやちょで)ぬ他(ふか)に思事(うむくとぅ)や有(あ)や侍(び)らん、左京(さちょ)ぬ橋(はし)広(ふぃる)く極楽(ぐくらく)どぅ為侍(しゃび)る、此(く)ぬ御恩(ぐうん)美拝(みふぇ)や胸(んに)に思(う)み留(とぅ)みてぃ、過(すぃ)ぢし親父祖(うやふじ)に語(かた)てぃ聞(ち)か為侍(しゃび)ら。やあ、大主(ううぬし)、此(く)ぬ太刀(たち)や朝夕(あさゆ)過(すぃ)ぢし父親(ちちうや)ぬ、秘蔵(ふぃず)に為(し)ち有(あ)むぬ弟金松(うっとぅかねまつぃ)に親兄(うやすぃざ)ぬ形見(かたみ)てぃやり、渡(わた)ち給(たぼ)り。
平安名大主
とおとお、此(く)ぬ様(よ)金松(かにまつぃ)に語(かた)てぃ取(とぅ)らさ。やあ、吉田(ゆしだ)、亀千代(かみぢゅ)縄(なわ)掛(か)きてぃ敵方(てぃちかた)に行(い)ちゃり、御触(うふ)り事(ぐとぅ)に玉村(たまむら)ぬ若按司(わかあじ)搦(から)み遣(や)り降参(こおさん)に寄(ゆ)しりたん與呼(てぃや)り、色々(いるいる)に言(い)い回(まわ)ち落着(らくちゃく)ゆ為(し)みてぃ、文(ふみ)ぬ通(かゆ)わしに内通(ねえつう)ゆ為(すぃ)りゆ。
吉田の子
拝(うぅが)ん留(とぅ)み有侍(やび)てぃ。やあ、亀千代金(かみちゆがに)、義理(ぢり)てぃやり如何(いちゃ)し縄(なわ)掛(か)きてぃ行(い)ちゅが。
亀千代
浅(あさ)ましや、吉田(ゆしだ)、武士(ぶし)ぬ身(み)わ遣(や)とぅてぃ此(く)ぬ際(ちわ)に何故(ぬゆ)でぃ今(なま)ぬ如(ぐとぅ)言(ぃや)りが、命(いぬち)添(せえ)我身(わみ)ぬ振(ふ)り捨(すぃ)てぃてぃ行(い)ちゅい、縄(なわ)掛(か)かる苦(くり)しゃ露(つぃゆ)程(ふどぅ)ん思(うま)ん、時(とぅち)移(うつぃ)ち済(すぃ)まん急(いす)ぢ給(たぼ)り。
平安名大主
やあ、吉田(ゆしだ)、物(むぬ)思(うみ)ば色(いる)に現(あらわ)りる試(たみ)し、事(くとぅ)漏(む)りてぃからや仕損(しすん)じぬ有(あ)むぬ、目眉(みまゆ)打(う)ち笑(われ)てぃ百勇(むむいさ)み勇(いさ)でぃ、露(つぃゆ)程(ふどぅ)ん敵(てぃち)ぬ知(し)らん如(ぐとぅ)に。
吉田の子
拝(うぅが)ん留(とぅ)み有侍(やび)てぃ。
若按司
やあ、亀千代(かみちゆ)、止(とぅ)みてぃ止(とぅ)みららん思(う)み切(ち)らん為(すぃ)りば、あきよお、身(み)が心(くくる)闇(やみ)に成(な)ゆさ。
亀千代
立(た)ち別(わか)り兼(か)にてぃ何時(いつぃ)迄(までぃ)ん名残(なぐ)り、時(とぅち)移(うつぃ)ち済(すぃ)みゃ侍(び)らん、御暇乞(ういとぅまぐ)いゆ為侍(しゃび)ら。
歌
何(ぬ)ぬ罪(つぃみ)ん無(ね)らん徒(あだ)し身(み)に替(かわ)てぃ
哀(あわ)り生殺(なまぐる)し為(さ)りらとぅ思(み)ば
吉田の子
とおとお、八重瀬(いぇえしい)ぬ城(ぐすぃく)元(むとぅ)に着(ち)ちゃん、此(く)りに控(ふぃけ)てぃ居(うぅ)り。御門番衆(うむんばんしゅう)御取次(うとぅりつぃぢ)頼(たぬ)み有侍(やび)ら。
門番
誰(たる)が有(や)ゆら。
吉田の子
我身(わみ)や玉村(たまむら)ぬ按司(あじ)ぬ内(うち)、吉田(ゆしだ)ぬ子(し)御触(うふ)りゆ拝(うぅが)でぃ、悪按司(あくあじ)ぬ生(な)し子(ぐぁ)生(い)ち捕(とぅ)りに取(とぅ)遣(や)り、寄(ゆ)しり遣(や)り居(うぅ)むぬ良(ゆ)たしゃ有(あ)る様(よお)に、御宣(うんにゅ)きてぃ給(たぼ)り。
門番
此(く)ぬ様(よお)御取次(うとぅりつぃぢ)為侍(しゃび)ら。
八重瀬の按司
玉村(たまむら)ぬ若按司(わかあじ)添(そお)てぃ来(く)り、やあ、吉田(ゆしだ)、回文(かいぶん)うぅ通(とぅう)ち此(く)ぬ六月(むつぃち)成(な)る迄(までぃ)ん、如何(いちゃ)る企(たく)み有(あ)てぃ隠(かく)し置(う)ち有(あ)たが。
吉田の子
やあ、按司愛(あじがな)し、玉村(たまむら)ぬ按司(あじ)や悪欲(あくゆく)ぬ深(ふか)さ、天(てぃん)ぬ時(とぅち)知(し)らん馬鹿男(ばかうぃきが)有(や)とぅてぃ按司愛(あじがな)し御気(うち)逆(さか)てぃ、刀刃(かたなば)に死(し)ぢゃる悪按司(あくあじ)ぬ生(な)し子(ぐぁ)、親(うや)に似(に)ち然(さ)らみ生口(なまぐち)な輩(やから)、驕(うぐ)り者(むぬ)有(や)とぅてぃ御触(ううふ)りぬ如(ぐとぅ)に、搦(から)み出(ぃん)ぢゃさてぃやり此(く)ぬ六月(むつぃち)成(な)る迄(までぃ)、様々(さまざま)に為(しゃ)すぃが、平安名大主(ふぃんなううぬし)とぅ森川(むいかわ)ぬ子(しい)が百隠(むむかく)し隠(かく)ち、自由(じゆ)成(な)らん有(あ)たすぃ謀(はか)り事(ぐとぅ)謀(たばか)やり、二人(たい)共(とぅむ)に殺(くる)ち括(く)ん締(し)みてぃからに添(そお)てぃ来(ちゃあ)侍(び)たん。
亀千代
やあやあ、義理(ぢり)ぬ道(みち)知(し)らん野心(やしん)な僕輩(やつぃばら)。
吉田の子
いや、此辺(くふぃ)な按司添(あじすい)ぬ御前(うめ)に寄(ゆ)しり遣(や)り、恐(やぐみ)さん知(し)らん物言(むぬい)憎(にく)さ。
八重瀬の按司
やあ、天(てぃん)ん恨(うら)みるな我身(わみ)ん恨(うら)みるな、己(うが)が愚(ゆ)む親(うや)ぬ驕(うぐ)り者(むん)有(や)てぃどぅ、積(つぃむ)る悪欲(あくゆく)ぬ罪(つぃみ)報(むく)い有(あ)てぃどぅ、天(てぃん)ぬ御咎(うとぅが)みぬ巡(みぐ)るがな巡(みぐ)てぃ刀刃(かたなば)に掛(か)かてぃ殺(くる)さりん為(し)ちゃる、やあ、外間(ふかま)、急(いす)ぢ引(ふぃ)ち立(た)てぃてぃ殺(くる)し来居(ちょお)り。
外間の子
拝(うぅが)ん留(とぅ)み有侍(やび)てぃ。
亀千代
やあやあ、無(ね)らん事(くとぅ)作(つぃく)てぃ云言葉(いくとぅば)に飾(かざ)てぃ、己(うが)が悪欲(あくゆく)や按司添(あじすい)に言成(いな)ち、按司添(あじすい)前(め)御掛(うか)き島(しま)奪(ば)い取(とぅ)やり居(うぅ)とぅてぃ、百姓(ひゃくしょ)虐(したぎ)やり生(い)ち楽(らく)ゆ好(くぬ)でぃ、悪(あく)積(つぃむ)てぃ軈(やが)てぃ殺(くる)さりる時(とぅち)や、死出(しでぃ)に待(ま)ち受(う)きてぃ寸々(すぃんずぃん)に切(ち)やり、此(く)ぬ世(ゆ)でぃぬ恨(うら)み濯(すす)ぢ取(とぅ)らさ。
八重瀬の按司
いや、生(なま)賢(さか)し下人(んざ)ぬ言(ぃゆ)る事(くとぅ)ぬ憎(にく)さ、一刀(ちゅかたな)に為(し)ちや罪(つぃみ)浅(あさ)さ有(あ)むぬ、籠舎(るうしゃ)締(し)み置(う)ちょてぃ生(い)ち責(し)み為(しょ)り。
外間の子
拝(うぅが)ん留(とぅ)み有侍(やび)てぃ。さあさあ、立(た)ちょおり立(た)ちょおり。
亀千代
やあやあ。
外間の子
いや、物事(むぬぐとぅ)ぬ多(うふ)さ。
八重瀬の按司
やあ、吉田(ゆしだ)、若按司(わかあじ)ぬ生(な)し子(ぐぁ)取(とぅ)り逃(ぬが)ち居(うぅ)らん、此(く)ぬ事(くと)お一期(いちぐ)気(ち)に掛(か)かてぃ居(うぅ)たる、聞(ち)きば勝連(かつぃりん)ぬ平安名大主(ふぃんなううぬし)ぬ隠(かく)ち有(あ)んてぃやり知(し)らし部(び)ぬ有(あ)とぅてぃ、明日(あちゃ)が日(ふぃ)に成(な)らば軍(いくさ)押(う)し寄(ゆ)してぃ、討(う)ち取(とぅ)ゆる手組(てぃぐ)み為(しゅ)る内(うち)どぅ有(や)たる、いや我(あ)が働(はたら)ちに搦(から)み出(ぃん)ぢゃち有(あ)りば、今日(ちゅう)からや朝夕(あさゆ)高枕(たかまくら)据(すぃ)きてぃ、浮世(うちゆ)楽々(らくらく)とぅ暮(く)らす嬉(うり)しゃ、やあやあ、願事(にげぐとぅ)ぬ有(あ)らば隠(かく)さずぃに語(かた)り、島里(しまざとぅ)ん位(くれ)ん望(ぬず)み儘(まま)呉(くぃ)ゆん。
吉田の子
恐(やぐみ)さど有(あ)すぃが願(にげ)ゆ美御宣(みゅんにゅ)きら、按司愛(がな)し御奉公(みゃでり)我楽鳴(がらみ)ちん為(すぃ)らん、惜(あたら)寄(ゆ)しり遣(や)り御褒美(ぐほび)すぃでぃ由(ゆし)や我(わ)が身(み)とぅん似合(にあ)ん怖(うとぅら)しゃゆ有(あ)むぬ、夜昼(ゆるふぃる)ん御奉公(みゃでり)肝(ちむ)ん肝(ちむ)尽(つぃく)ち、旨(あま)く働(はたら)ちゃい行(い)ち積(つぃむ)る年(とぅし)に、島里(しまさとぅ)ん拝(うぅが)でぃ取位(とぅりくれ)ん巣出(すぃでぃ)てぃ、御掛(うか)き栄(ぶ)せ御世(みゆ)に楽(らく)ゆ誇(ふく)有侍(やび)ら。
八重瀬の按司
やあ、吉田(ゆしだ)、云言葉(いくとぅば)や実(まく)とぅ胸内(んにうち)ぬ割符(わいふ)、忠節(ちゅうしつぃ)ぬ心(くくる)外(すとぅ)に現(あらわ)りてぃ、果報(かふ)ぬ有(あ)てぃ然(さ)らみ今(なま)ぬ引合(ふぃちゃ)わしや、此(く)りからや朝夕(あさゆ)我側(わすば)離(はな)りるな、夜昼(ゆるふぃる)ん奉公(ふうく)働(はたら)ち遣(や)り呉(くぃ)り。
吉田の子
御慈悲(ぐじふぃ)尊(とおとぅ)さや美拝(みふぇ)どぅ拝(うぅ)がみゃ侍(び)る、百年(むむとぅ)在(わ)り千代(ちゅ)在(わ)り拝(うぅが)でぃ巣出(すぃでぃ)有侍(やび)ら。
八重瀬の按司
やあやあ、今日(ちゅう)ぬ嬉(うり)しさぬ物(むぬ)に譬(たとぅ)らりみ、内(うち)に入(い)り互(たげ)に祝(ゆわ)い遊(あすぃ)ば。
吉田の子
召(み)しぇる如(ぐとぅ)居(うぅ)とぅてぃ御祝(ういうぇ)為侍(しゃび)ら。
波平大主
出(でぃ)よお来(ちゃ)る者(むぬ)や、玉村(たまむら)ぬ按司(あじ)ぬ頭役(かしらやく)波平大主(はんじゃううぬし)、主人(しゅじん)若按司(わかあじ)や勝連(かつぃりん)ぬ島(しま)ぬ、平安名大主(ふぃんなううぬし)ぬ屋戸(やどぅ)に隠(かく)り遣(や)り居参(いめ)ん、如何(いちゃ)しがな我身(わみ)や味方(みかた)集(あつぃ)み遣(や)り、片時(かたとぅち)ん急(いす)ぢ按司愛(なじがな)し仇(かたち)、討(う)ち取(とぅ)らんとぅ思(む)てぃ他所目(ゆすみ)隠(かく)り遣(や)り、島(しま)ぬ島々(しまじま)里々(さとぅざとぅ)ゆ忍(しぬ)でぃ、散(ち)り散(ぢ)りに成(な)とぅる人数(にんず)集(あつぃ)みゆん、ああ、移(うつぃ)りば替(か)わる人心(ふぃちゅぐくる)有(や)りば、平安名大主(ふぃんなううぬし)、吉田(ゆしだ)ぬ子(し)二人(たい)謀叛事(むふんぐとぅ)企(たく)でぃ、今月(くんつぃち)ぬ初(はじ)み頃(ぐる)若按司(わかあじ)ゆ搦(から)み、敵(てぃち)に降(くだ)たんでぃ語(かた)り部(び)ぬ有(あ)とぅてぃ、今日(ちゅう)どぅ吾(わ)ね聞(ち)ちゅる、ああ、口惜(くちう)しゃ残念(ざんにん)斯如(かにゃ)る世(ゆ)ぬ中(なか)に、長(なげ)えりてぃ居(うぅ)とぅてぃ、朝夕(あさゆ)胸内(んにうち)に煙(ちむり)集(たか)ゆりか急(いす)ぢ勝連(かつぃりん)ぬ島(しま)に走(は)い寄(ゆ)やり、実(じつぃ)不実(ふじつぃ)尋(たずぃ)に実(まくとぅ)どぅん有(や)らば、先(ま)ずぃ平安名大主(ふぃんなううぬし)切(ち)り殺(くる)ち捨(すぃ)てぃてぃ、勝連(かつぃりん)ぬ戻(むどぅ)い直(すぃ)ぐに八重瀬(いぇえしい)ぬ城(ぐすぃく)に立(た)ち越(く)し遣(や)り悪按司(あくあじ)とぅ吉田(ゆしだ)、寸々(すぃんすぃん)に切(ち)やり城(ぐすぃく)ぬ人々(ふぃとぅびとぅ)に、我(わ)が名(な)打(う)ち名乗(なぬ)てぃ快(くくるゆ)く我腹(わはら)、縦横(たてぃゆく)に切(ち)やり主人(しゅじん)二人(たい)頼(たぬ)でぃ二心(ふたぐくる)持(む)ちゅる生(い)ち逆(さか)し下人(んざ)ぬ、戒(いましみ)に為(しゅ)ん。
歌
扨(さ)てぃむ移(うつぃ)りば 変(か)わり行(ゆ)く人(ふぃちゅ)ぬ心(くるる)ず浅(あさ)ましや 去来(いざ)や最期(さいぐ)の出(ぃん)ぢ立(た)ちに 有(あ)りし様(さま)変(け)え編(あ)み笠(がさ)に 深(ふか)く面(うむてぃ)うぅ隠(かく)してぃず 行(い)きば程(ふど)なく我謝(がじゃ)安室(あむる) 浜(はま)に千鳥(ちどぅ)りぬ友(とぅむ)呼(ゆ)ぶや 聞(ち)くに付(つぃ)きてぃん哀(あわ)りなり 登(ぬぶ)り登(ぬぶ)りてぃ中城(なかぐすぃく) 暫(しば)し休(やす)れえ真南(まふぃ)見(ん)りば 故郷(くちょ)ぬ名残(なぐ)りん有明(ありあき)ぬ月(つぃち)に 思(う)みず勝(まさ)るなり 東表(あがりうむてぃ)うぅ見渡(みわた)しば 波(なみ)ぬ濡(ぬ)り路(じ)ぬ津堅島(つぃきんじま)下(う)りてぃ渡口(とぅぐち)ぬ村(むら)過(すぃ)ぢてぃ 和仁屋(わにゃ)潮路(しうじ)に分(わ)き入(い)りば 急(いす)ぢ歩(あゆ)でぃん歩(あゆ)まらん、ええ、今(なま)どぅ勝連(かつぃりん)南風原(ふぇえばる)に急(いす)ぢ急(いす)いでぃ忍(しぬ)でぃ来(ちゃ)る。
波平大主
やあやあ、平安名大主(ふぃんなううぬし)大主(ううぬし)。
平安名大主
やあ、波平大主(はんじゃううぬし)。
波平大主
主人(しゅじん)若按司(わかあじ)や吉田(ゆしだ)ぬ子(し)が、生(い)ち捕(どぅ)りに取(とぅ)やり敵(てぃち)に降(くだ)たんでぃ、耳(みみ)ぬ元(むとぅ)頼(たぬ)でぃ知(し)らし部(び)ぬ有(あ)すぃが、真(まくとぅ)偽(いつぃわ)り隠(かく)さずぃに語(かた)り。
平安名大主
似(に)た事(くとぅ)や有(あ)たん聞(ち)ち留(とぅ)みてぃ給(たぼ)り、若按司(わかあじ)ぬ此処(くま)に隠(かく)り遣(や)り居参(いめ)す、聞(ち)ち付(つぃ)きてぃ軍(いくさ)寄(ゆ)しゆんでぃ有(あ)りば、武士(ぶし)ぬ身(み)ゆ有(や)てぃん此(く)ぬ際(ちわ)に成(な)てぃや敵(てぃち)防(ふし)ぐ術(じちぇ)え差(さ)し迫(しま)てぃ居(うぅ)たすぃ、里川(さとぅかわ)ぬ輩(ひゃあ)兄子(すぃざぐぁ)亀千代(かみちゆ)が、命(いぬち)振(ふ)り捨(すぃ)てぃてぃ身替(みがわ)いに立(た)ちゃい哀(あわ)り此(く)ぬ難(なん)や凌(しぬ)ぢ居参(いめ)ん。
波平大主
実(じつぃ)見(ん)ちゃる人(ふぃちゅ)ぬ告(つぃ)ぎ知(し)らしでむぬ、偽(いつぃわ)てぃや済(すぃ)まん隠(かく)さじに語(かた)り。
平安名大主
やあ、波平大主(はんじゃううぬし)御主人(ぐしゅじん)ぬ御恩(ぐうん)、海(うみ)ゆりん深(ふか)く山(やま)ゆりん高(たか)さ、思(うみ)てぃ居(うぅ)る我身(わみ)ぬ何故(ぬゆ)でぃ悪(あく)企(たく)でぃ、謀叛(むふん)企(くわた)ちゅが、神仏(かみふとぅき)掛(か)きてぃ偽(いつぃわ)りや有(あ)らん、其(う)り此(く)りん言(い)ちん実(だ)に為(すぃ)らん有(あ)らば、内(うち)に若按司(わかあんじ)隠(かく)り遣(や)り居参(いめ)ん、拝(うぅが)でぃ我(わ)が言葉(くとぅば)真(まくとぅ)とぅ思(む)らりり。やあ、大主(ううぬし)此処(くま)や人(ちゅ)繁(しぢ)さ他所(ゆす)知(し)りてぃ済(すぃ)まん、内(うち)に入(い)り細(くま)く語(かた)ち聞(ち)かさ。
波平大主
今(なま)ぬ如(ぐとぅ)有(や)りば誇(ふく)らしゃどぅ有(あ)ゆる、急(いす)ぢ内(うち)入(い)、やり若按司(わかあじ)ゆ拝(うぅが)ま。
若按司
夕(ゆう)び吉田(ゆしだ)から内通(ねえつう)ぬ文(ふみ)に、亀千代(かみちゆ)が事(くとぅ)や殺(くる)さしん為(すぃ)らん、生(い)ち責(じ)みぬ巧(たく)い為(すぃ)らんちゃり企(たく)でぃ、籠舎(るうしゃ)為(し)ち有(あ)すぃが天(てぃん)ぬ御助(うたすぃ)きに、責(し)みん又(また)為(すぃ)らん心(くくる)打(う)ち許(ゆる)ち、夜昼(ゆるふぃる)ん寝座(にざ)に引(ふぃ)ち籠(くま)てぃ居(うぅ)とぅてぃ、酒(さち)とぅ色好(いるぐぬ)み驕(うぐ)り日(ふぃ)に勝(まさ)てぃ、諫(いさ)み事(ぐとぅ)為(しゅ)すぃや一刀(ちゅかたな)に殺(くる)ち、同(いぃ)に気(ち)さゆ多(うふぃ)さ歯(は)噛(が)み為(し)ち居(うぅ)むぬ、此(く)ぬ際(ちわ)に軍(いくさ)押(う)し寄(ゆ)してぃ、此(く)ぬ間(ええ)ぬ恨(うら)み濯(すす)ぢ取(とぅ)らさ、やあ、波平大主(はんじゃううぬし)、平安名大主(ふぃんなううぬし)、言合(いあ)わちゃる如(ぐとぅ)に味方(みかた)呼(ゆ)び出(ぃん)ぢゃち、其(う)り其(う)りぬ手組(てぃぐみ)言(い)い渡(わた)ち給(たぼ)り。
大主両人
拝(うぅが)ん留(とぅ)み有侍(やび)てぃ。
波平大主
やあ、森川(むいかわ)、屋部(やぶ)下庫裡(しちゃぐい)、崎枝(さちいだ)ぬ輩(ひゃあ)。
主人
ふう。
波平大主
やあ、明日(あちゃ)ぬ良(ゆ)かる日(ふぃ)に御旗(うはた)挙(あ)ぎ召(み)しょち按司愛(あじがな)し仇(かたち)討(う)ち取(とぅ)らん為(しゅ)むぬ、肝(ちむ)勇(いさ)でぃ勇(いさ)でぃ御腰立(うくしだ)ち為(すぃ)りゆ。
森川の子
やあ、大主(ううぬし)、寝(に)てぃ覚(さ)みてぃ思(うむ)い忘(わし)りらん仇(かたち)、討(う)ち取(とぅ)らんとぅ思(む)てぃ身震(みぶる)いどぅ為(し)ちゅる命(いぬち)振(ふ)り捨(すぃ)てぃてぃ御腰立(うくしだ)ち為侍(しゃび)ら。
若按司
とおとお、急(いす)ぢ手配(てぃくば)りゆ為(さ)りり。
波平大主
拝(うぅが)ん留(とぅ)み有侍(やび)てぃ。やあ、崎枝(さちいだ)ぬ輩(ひゃあ)や表(うむてぃ)ぬ門(むん)に押(う)し寄(ゆ)してぃ鬨(とぅち)ぬ声(くぃ)ゆ挙(あ)ぎてぃ敵(てぃち)ゆ呼(ゆ)び出(ぃん)ぢゃち暫(しば)し戦(たたか)やり負(ま)き色(いる)ぬ見(ん)してぃ、二三町(にさんちょお)許(ばか)り引(ふぃ)ち寄(ゆ)しりず来遣(ちゃ)り、合図(ええずぃ)ぬ鼓(つぃぢん)とぅ一時(ふぃとぅとぅち)に後(あとぅ)に取(とぅ)り返(けえ)ち急(いす)ぢ攻(し)み掛(か)きり。
崎枝のひや
拝(うぅが)ん留(とぅ)み有侍(やび)てぃ。
波平大主
やあ、森川(むいかわ)ぬ子(しい)や城(ぐすぃく)ぬ南(ふぇえ)、小林(くばやし)に深(ふか)く伏(ふ)しゆ隠(かく)りとぅてぃ、崎枝(さちいだ)が軍勢(ぐんじい)ぬ後(あとぅ)に引(ふぃ)ち返(けえ)ち、攻(し)み掛(か)から時(とぅち)や、敵(てぃち)ぬ後(うし)るから平(ふぃら)攻(し)みに攻(し)みり。
森川の子
拝(うぅが)ん留(とぅ)み有侍(やび)てぃ。
波平の大主
やあ、屋部(やぶ)下庫裡(しちゃぐい)や森川(むいかわ)ぬ子(しい)崎枝(さちいだ)ぬ輩(ひゃあ)が、敵(てぃち)に入(い)り乱(みだ)り戦(たたか)ゆる内(うち)に、架(か)き橋(はし)ゆ架(か)きてぃ城(ぐすぃく)踏(ふ)み登(ぬぶ)てぃ、敵(てぃ)ぬ妻(とぅじ)生(な)し子(ぐぁ)殺(くる)ち捨(すぃ)てぃり、亀千代(かみちゆ)が格護(かくぐ)油断(ゆだん)為(すぃ)るな。
屋部下庫裡
拝(うぅが)ん留(とぅ)み有侍(やび)てぃ。
波平大主
又(また)大主(ううぬし)とぅ我身(わみ)や若按司(わかあじ)ぬ前(めえ)ぬ、御供(うとぅむ)搦(から)み来遣(ちゃ)り森川(むいかわ)が勢(ずぃい)ぬ、後(あとぅ)に引(ふぃ)ち継(つぃづぃ)ち若(む)しか八重瀬(いぇえしい)ぬ、逃(に)ぢゆ走(は)い寄(ゆ)らば旗印(はたしるし)挙(あ)ぎてぃ、打(う)ち招(まに)く方(かた)に三手(みてぃ)ぬ軍勢(ぐんずぃ)、馳(は)しゆ集(あつぃ)まやい中(なか)に取(とぅ)い込(く)みてぃ殺(くる)ち捨(すぃ)てぃら。
惣人数
拝(うぅが)ん留(とぅ)み有侍(やび)てぃ。
森川・崎枝・屋部の三人
やあ、大主(ううぬし)、如何(いか)な八重瀬(いぇえしい)が鬼神(うにがみ)ゆ有(や)てぃん、此(く)ぬ謀(はか)り事(ぐとぅ)に漏(む)りや無(ね)有侍(やび)らん。
若按司
やあやあ、此(く)ぬ間(ええ)ぬ思(うむ)い明日(あちゃ)ぬ日(ふぃ)とぅ限(かぢ)り、肝(ちむ)騒(さわ)ぢ為(し)ちや怪我(きが)ぬ本(むとぅ)でむぬ、心(くくる)静(しずぃ)みとぅてぃ敵(てぃち)に掛(か)かり。
惣人数
拝(うぅが)ん留(とぅ)み有侍(やび)てぃ。
若按司
やあ、大主(ううぬし)、手配(てぃくば)りん済(すぃ)まち誇(ふく)らしゃどぅ有(あ)ゆる、明雲(あきぐむ)とぅ連(つぃ)りてぃ、御供(うとぅむ)為侍(しゃび)ら。
若按司
やあやあ、時(とぅち)移(うつぃ)ち済(すぃ)まん、急(いす)が急(いす)が。
大主両人
御急(ういす)ぢゆ召(み)しょり。
波平大主
やあ、八重瀬(いぇえしい)、要(い)らん罪(つぃみ)作(つぃく)てぃ共連(とぅむづぃ)りや要(い)らん、出(ぃん)ぢゆらば出(ぃん)ぢり今日(ちゅう)迄(までぃ)ぬ命(いぬち)、薄(すぃすぃき)葉(ば)ぬ露(つぃゆ)心(ぐくる)成(な)さん為(しゅ)むぬ。
八重瀬の按司
はあ、口惜(くちう)しゃ残念(ざんにん)、此辺(くふぃ)な城内(ぐすぃくうち)に供(とぅむ)一人(ちゅい)ん居(うぅ)らん。
波平大主
やあ、思(う)みん子(ぐぁ)、如何(いちゃ)し犬猫(いんまや)ぬ虎(とぅら)ぬ前(め)に寄(ゆ)ゆが、急(いす)ぢ踏(ふ)み入(い)やり嘗(な)み殺(ぐる)し為侍(しゃび)ら。
惣人数
ひゃあ、えぃい。
若按司
やあやあ、残(ぬく)てぃ居(うぅ)る者(むぬ)や居(うぅ)らに居(うぅ)らに。
惣人数
妻子(とぅじくぁ)片屑等(かたくじら)残(ぬく)らずぃに殺(くる)ち、味方(みかた)に怪我(きが)や一人(ちゅい)ん居(うぅ)有侍(やび)らん。
若按司
やあやあ、亀千代(かみちゆ)が事(くとぅ)や如何(いちゃ)が如何(いちゃ)が。
亀千代
やあ、若按司(わかあじ)ぬ前(めえ)。
若按司
やあ、亀千代(かみちゆ)。
歌
ああき、夢(いみ)が有(や)ゆら。
若按司
やあ、亀千代(かみちゆ)、哀(あわ)り行(い)ち迫(すぃま)てぃ際(ちわ)に成(な)てぃ居(うぅ)たすぃ、百情(むむなさ)き故(ゆい)に敵(てぃち)ん討(う)ち済(すぃ)まち、斯如(かにゃ)る引合(ふぃちゃ)わしや夢(いみ)が有(や)ゆら。
亀千代
やあ、若按司(わかあじ)ぬ前(めえ)ゆ、敵(てぃち)ぬ手(てぃ)に行(い)ちゃい籠(く)みらりてぃ居(うぅ)てぃん、寝(に)てぃ覚(さ)みてぃ思(うむ)い忘(わすぃ)りらん仇(かたち)、心(くくる)安々(やすぃやすぃ)とぅ討(う)ち済(すぃ)まち我身(わみ)ん、鬼(うに)ぬ口(くち)逃(ぬが)てぃ虎(とぅら)ぬ口(くち)出(ぃん)ぢてぃ、若按司(わかあじ)ゆ拝(うぅが)みゆすぃや夢(いみ)が有(や)や侍(びい)ら。
吉田の子
やあ、思(う)みん子(ぐぁ)、やあ、大主(ううぬし)、敵(てぃち)ぬ手(てぃ)に行(い)ちゃい亀千代(かみちゆ)とぅ二人(ふたい)、胸内(んにうち)に煙(ちむり)立(た)ちゃい居(うぅ)有侍(やび)たん、ああ、御代(みゆ)ぬ御光(うふぃかり)ぬ今日(ちゅう)や現(あらわ)りてぃ、誇(ふく)てぃ拝(うぅが)みゅすぃや夢(いみ)が有(や)ゆら。
波平大主
やあ、亀千代(かみちゆ)、やあ、吉田(ゆしだ)、誠(まくとぅ)忠節(ちゅうしつぃ)ぬ深(ふか)さ有(あ)る故(ゆい)に、天(てぃん)ぬ御助(うたすぃ)きに神(かみ)ぬ引合(ふぃちゃ)わしに、鬼虎(うにとぅら)ぬ口(くち)や凌(しぬ)でぃ来(ち)ちゃる。
若按司
やあやあ、嬉(うり)しさに嬉(うり)しゃ百重(むむいい)種々(さにざに)、互(たげ)に打(う)ち揃(する)てぃ働(はたら)ちゃる故(ゆい)に、敵(てぃち)ん討(う)ち済(すぃ)まち斯如(かにゃ)る引合(ふぃちゃ)わしや実(まく)とぅ彼(あ)ぬ世界(しけ)ぬ此(く)ぬ世(ゆ)如(ぐとぅ)有(あ)らば、過(すぃ)ぢし父母(ちちふぁふぁ)ん嬉(うり)しゃ召(み)しぇら。
波平大主
やあ、思(う)みん子(ぐぁ)、一包(ちゅつぃつぃ)みに仇(かたち)討(う)ち取(とぅ)たる事(くとぅ)や我達(わした)供連(とぅむづぃ)りぬ、働(はたら)ちん有(あ)や侍(び)らん、慈悲(じふぃ)ぬ御心(みくくる)ぬ天(てぃん)迄(までぃ)ん知(し)りてぃ、玉村(たまむら)ぬ御恩(ぐうん)御守(うまむ)りぬ有(あ)てぃどぅ、味方(みかた)に一人(ふぃちゅい)ん怪我(きが)や有(あ)や侍(び)らん、今日(ちゅう)ぬ誇(ふく)らしゃや物(むぬ)に譬(たてぃ)らりみ、踊(うぅどぅ)り跳(は)に遊(あすぃ)び御祝(ういうぇ)為侍(しゃび)ら。
若按司
とおとお、押(う)し連(つぃ)りてぃ互(たげ)に踊(うどぅ)てぃ戻(むどぅ)ら。
歌
仇(かたち)討(う)ち取(とぅ)たる今日(ちゅう)ぬ誇(ふく)らしゃや
過(すぃ)ぢし父母(ちちふぁふぁ)ん嬉(うり)しゃ召(み)しぇら
今日(きう)ぬ誇(ふく)らしゃや何(な)うぅ似(に)じゃな譬(たてぃ)る
莟(つぃぶ)でぃ居(うぅ)る花(はな)ぬ露(つぃゆ)来会(ちゃ)た如(ぐとぅ)