姉妹敵討:本文 摩文仁親方作
謝名の大主
出(でぃ)よお来(ちゃ)る者(むぬ)や、宜野湾(ぎぬわん)ぬ城主(ぐすぃくぬし)神山(かみやま)ぬ按司(あじ)頭役(かしらやく)謝名(じゃな)ぬ大主(ううぬし)、今日(ちゅう)や名(な)に立(た)ちゅる秋(あち)ぬ十三夜(じゅうさんや)、月見(つぃちみ)為(さ)んとぅ思(む)てぃ伊佐浜(いさはま)に行(い)ちゅん、やあ、宇地泊(うちどぅまり)ぬ輩(ひゃあ)、識名(しきな)に立(た)ちゅる秋(あち)ぬ今宵(くゆい)とぅてぃ、雲(くむ)晴(は)りてぃ照(てぃ)らす月(つぃち)ぬ清(ちゅ)らさ。
宇地泊のひや
召(み)しぇる如(ぐとぅ)空(すら)や雲霧(くむちり)ん晴(は)りてぃ、名(な)に立(た)ちゅる月(つぃち)ぬ影(かぎ)ぬ清(ちゅ)らさ。然(さ)り、此処(くま)に御座(うざ)召(み)しょち御眺(うなが)みゆ召(み)しょり。
謝名の大主
彼(あ)りや牧港(まちみなとぅ)此(く)りや砂辺村(すぃなびむら)、越(くぃ)いてぃ湾渡具知(わんとぅぐち)残波岬(ざんぱみさち)迄(までぃ)見渡(んわた)しぬ広(ふぃる)さ浦々(うらうら)ぬ釣(つぃ)り船(ぶに)、漁火(いざりび)ぬ影(かぎ)ん目(み)ぬ前(め)引(ふぃ)ち寄(ゆ)してぃ、眺(なが)みてぃん飽(あ)かん伊佐(いさ)ぬ浜辺(はまび)。
喜友名の子
召(み)しぇえる如(ぐとぅ)、数々(かずぃかずぃ)ぬ景色(きしち)面白(うむしる)さ有(あ)や侍(び)むぬ、御肝(うちむ)晴(は)り晴(ば)りとぅ御眺(うなが)みゆ召(み)しょり。
宇地泊のひや
やあ、喜友名の子、御酒(うさき)上(あ)ぎり。
謝名の大主
とおとお、一(てぃい)つぃ注(つぃ)ぎ。
喜友名の子
御加(うくうぇ)え召(み)しょおり。
謝名の子
盃(さかずぃち)に映(うつぃ)る月影(つぃちかぢ)ぬ清(ちゅ)らさ、嬉(うり)しさや今宵(くゆい)飲(ぬ)みゃい明(あ)かさ。宇地泊(うちどぅまり)ぬ輩(ひゃあ)一(てぃい)つぃ持(む)た、加(くうぇ)えてぃ飲(ぬ)み。
喜友名の子
然(さ)り上(あ)ぎ有侍(やび)ら。
歌
照(てぃ)る月(つぃち)ぬ清(ちゅ)らさ潮(しゅう)汲(く)まんてぃやり
押(う)し連(つぃ)りてぃ浜(はま)に出(ぃん)ぢてぃ行(い)ちゅん
謝名の大主
彼(あ)りゆ彼(あ)りゆ、二人(ふたい)押(う)し連(つぃ)りてぃ潮(しゅう)汲(く)みゅる童(わらび)、成(な)り風儀(ふぢ)ぬ清(ちゅ)らさ、此処(くま)に呼(ゆ)び。
喜友名の子
拝(うぅが)ん留(とぅ)み有侍(やび)てぃ。ええ童(わらび)、謝名(じゃな)ぬ大主(ううぬし)の御用(ぐよ)、寄(ゆ)しりやい拝(うぅが)み。
亀松
彼程(あふぃ)な大主(ううぬし)ぬ御前(うめ)に寄(ゆ)しりゆすぃ恐(やぐみ)さゆ有(あ)むぬ許(ゆる)ち給(たぼ)り。
喜友名の子
いや恐(やぐみ)さん無(ね)らん、急(いす)ぢ拝(うぅが)み。
亀松
やあ、乙鶴(うとぅづぃる)、大主(ううぬし)ぬ御用(ぐよお)御断(うくとぅわ)り成(な)ゆみ、畏(うとぅる)しゃや有(あ)てぃん寄(ゆ)しりやい拝(うぅが)ま。
謝名の大主
やあ、童(わらび)、二人(たい)が父親(ちちうや)や誰(たる)が有(や)ゆら。
亀松
此(く)ぬ二人(たい)や伊佐(いさ)ぬ村頭(むらがしら)為侍(しゃび)る、大山(おおやま)下庫裡(しちゃぐい)ぬ生(な)し子(ぐぁ)だ有(や)侍(びい)る。
謝名の大主
二人(たい)が年(とぅし)今年(くとぅし)幾(いく)つぃ成(な)ゆが。
亀松
我身(わみ)や十七(じゅうしち)此(く)りや十六(じゅうるく)に成(な)や侍(びい)ん。
謝名の大主
はあ、目眉(みまゆ)色清(いるぢゅ)らさ物言声(むぬいぐぃ)ん萎(しゅら)しゃ、やあ、童(わらび)、此(く)り此(く)り一(ふぃとぅ)つぃ持(む)た。
喜友名の子
とおとお、御前(うめ)に寄(ゆ)てぃ集(すぃでぃ)り。
謝名の大主
今少(にゃふぃ)ん近(ちか)く寄(ゆ)り。
宇地泊のひや
とおとお、上(あ)ぎてぃ巣出(すぃでぃ)り。
謝名の大主
一(ふぃとぅ)つぃ注(つぃ)ぎ、恋(くい)しさや童(わらび)花(はな)に増(ま)す姿(すぃがた)、持(む)ちゅる盃(さかずぃち)ぬ匂(にう)いぬ萎(しゅうら)しゃ。
宇地泊のひや
汝(ぃやあ)ん御前(うめえ)寄(ゆ)てぃ御盃(うさかずぃち)巣出(すぃでぃ)り。
謝名の大主
ええ、童(わらび)一(ふぃとぅ)つぃ持(む)た。
宇地泊のひや
とおとお、上(あ)ぎてぃ巣出(すぃでぃ)り。やあ、童(わらび)迚(とぅてぃ)ん御酌(うしゃく)取(とぅ)てぃ上(あ)ぎり。
謝名の大主
はあ、出来(でぃき)た出来(でぃき)た一(ふぃとぅ)つぃ注(つぃ)ぎ、やあ、宇地泊(うちどぅまり)ぬ輩(ひゃあ)、此(く)りゆ梅(うみ)ぬ花(はな)彼(あ)りゆ桜花(さくらばな)、見(ん)りば見(み)る程(ふどぅ)に思(うむ)い増(ま)す姿(すぃがた)、酌(しゃく)取(とぅ)ゆる袖(すでぃ)ぬ匂(にう)いぬ萎(しゅうら)しゃ。やあ、宇地泊(うちどぅまり)ぬ輩(ひゃあ)、此(く)ぬ二人(たい)に一踊(ふぃとぅうぅどぅ)い踊(ぅうどぅ)らしゃい見(んん)り。
宇地泊のひや
とおとお、踊(うどぅ)てぃ御目(うみ)覚(さ)まし勤(がら)みき。
亀松
潮(しゅう)汲(く)い暮(く)らす百姓(ひゃくしょお)ぬ習(なれ)ぬ、如何(いちゃ)し踊(うぅどぅ)有侍(やび)が許(ゆる)ち給(たぼ)り。
宇地泊のひや
恥(は)ずぃかしゃん思(うむ)な、斟酌(しんしゃく)ん為(すぃ)るな、急(いす)ぢ一踊(ふぃとぅうぅどぅ)い踊(うぅどぅ)てぃ御目掛(うみか)きり。
亀松
やあ、乙鶴ゆ、押(う)し返(けえ)し今(なま)ぬ如(ぐとぅ)有(や)りば、御断(うくとぅわ)り成(な)ゆみ踊(うぅどぅ)てぃ御目掛(うみか)きら。
謝名の大主
とおとお、急(いす)ぢ踊(うぅどぅ)り踊(うぅどぅ)り。
歌
薄風(うすかぢ)ん今日(ちゅう)や心(くくる)有(あ)てぃ然(さ)らみ
雲(くむ)晴(は)りてぃ照(てぃ)らす月(つぃち)ぬ清(ちゅ)らさ
謝名の大主
ああ、清(ちゅ)らさ清(ちゅ)らさ、やあ、宇地泊(うちどぅまり)ぬ輩(ひゃあ)、今日(ちゅう)ぬ振合(ふや)わしや糸(いとぅ)ぬ縁(いぃん)然(さ)らみ、此(く)ぬ童(わらび)二人(ふたい)我(わ)が側(すば)に置(う)ちゃい、夢(いみ)ぬ間(ま)ぬ浮世(うちゆ)暮(く)らし欲(ぶ)しゃ有(あ)むぬ、押(う)し連(つぃ)りてぃ今宵(くゆい)屋戸(やどぅ)に戻(むどぅ)ら。
宇地泊のひや
やあ、思(う)み童(わらび)、今(なま)ぬ仰(う)し事(ぐとぅ)や百巣出(むむすぃでぃ)や有(あ)らに、とおとお、有難(ありがた)さ思(うむ)てぃ御供(うとぅむ)勤(がら)みき。
亀松
今(なま)ぬ仰(うう)し事(ぐとぅ)百巣出(むむすぃでぃ)どぅ有(や)や侍(び)しが、乙鶴(うとづぃる)とぅ二人(ふたい)水潮(みずぃしゅ)汲(く)み薪(たちぢ)採(とぅ)てぃ、一人(ちゅい)居(うぅ)る父親(ちちうや)養(やし)ね居(うぅ)有侍(やび)むぬ、此(く)ぬ仰(うう)し事(ぐとぅ)や許(ゆる)ち給(たぼ)り。
宇地泊のひや
やあ、父親(ちちうや)ぬ事(くとぅ)や気遣(きづぃか)わし為(すぃ)るな、其(う)り其(う)りぬ御心付(うくくるづぃ)き召(み)しぇる筈(はじ)でむぬ、打(う)ち誇(ふく)てぃ二人(ふたい)御請(うう)き勤(がらみ)き。
亀松
仮令(たとぅい)身(み)に余(あま)る御助(うたすぃ)きぬ有(あ)てぃん、親(うや)捨(すぃ)てぃてぃ御供(うとぅむ)勤(がらみ)ちや成(な)らん、夜(ゆ)ん更(ふ)きてぃ行(い)ちゅい急(いす)ぢ戻(むどぅ)有侍(やび)ら。
喜友名の子
やあやあ、御暇(ういとぅま)ぬ済(すぃ)まん内(うち)戻(むどぅ)ゆらば戻(むどぅ)り、一大事(いちでじ)ぬ沙汰(さた)に及(うゆ)ぶ筈(はじ)有(や)すぃが。
謝名の大主
やあ、喜友名(きゅうな)ぬ子(し)、親(うや)呼(ゆ)ばち直(ただ)ちに談合(だんごお)ゆ為(すぃ)らば、如何(いちゃ)し我(わ)が望(ぬず)み断(くとぅわ)りぬ成(な)ゆが、二人(たい)や先(さち)許(ゆる)ち遣(や)らし。
亀松
出(でぃ)かよ乙鶴(うとぅづぃる)、急(いす)ぢ戻(むどぅ)ら。
謝名の大主
やあ、宇地泊(うちどぅまり)ぬ輩(ひゃあ)、急(いす)ぢ親(うや)呼(ゆ)ばし、談合(だんごお)ゆ為(しゅ)ん。
宇地泊のひや
月(つぃち)や西(いり)下(さ)がてぃ夜(ゆ)ん更(ふ)きてぃ行(い)ちゅり、今日(ちゅう)や先(さち)御戻(うむどぅ)りゆ召(み)しょち、明日(あちゃ)に成(な)ち呼(ゆ)ばち談合(だんごお)ゆ為侍(しゃび)ら。
謝名の大主
二人(たい)が面影(うむかぢ)ぬ我目(わみ)ぬ緒(うぅ)に下(さ)がてぃ、如何(いちゃ)し屋戸(やどぅ)戻(むどぅ)てぃ今宵(くゆい)明(あ)かさりが、頼(たん)でぃ我(わ)が苦(くつぃ)さ思(うむ)てぃ呉(くぃ)りゆ。
喜友名の子
召(み)しぇえる如(ぐとぅ)、思(う)み立(た)ちとぅ吉日(きちび)事(くとぅ)延(ぬ)びてぃ済(すぃ)まん、急(いす)ぢ大山下庫裡(おおやましちゃぐい)連(つぃ)りてぃ来(ちゃ)びら。
謝名の大主
待(ま)ち兼(か)にてぃ居(うぅ)むぬ、気張(ちば)てぃ呉(くぃ)り。
喜友名の子
やあやあ、大山下庫裡(おおやましちゃぐい)。
大山下庫裡
やあ、喜友名(きゅうな)ぬ子(し)、夜(ゆ)深(ふか)くに御尋(うたずぃ)に何事(ぬぐとぅ)が有(や)ゆら。
喜友名の子
大主(ううぬし)ぬ今宵(くゆい)浜遊(はまあすぃ)び召(み)しぇん、御急用(ぐきゅうゆ)ぬ有(あ)むぬ寄(ゆ)しり遣(や)い拝(うぅが)まりり。
大山下庫裡
追々(ういうい)寄(ゆ)しりらん為(しゅ)むぬ、先(ま)ずぃ其(う)ぬ様(よお)御宣(うんにゅ)きてぃ給(たぼ)り。
喜友名の子
連(つぃ)り立(た)ちゃい来(く)うてぃやりぬ仰(うう)し事(ぐとぅ)でむぬ、とおとお、急(いす)ぢ同心(どぅうしん)ゆ為(さ)りり。
大山下庫裡
御急用(うきゅうゆう)有(や)らば急(いす)ぢ出(ぃん)ぢ拝(うぅが)ま。
喜友名の子
大山下庫裡(おおやましちゃぐい)連(つぃ)りてぃ来(ちゃあ)侍(び)たん。
謝名の大主
下庫裡(しちゃぐい)、近(ちか)く寄(ゆ)り、今日(ちゅう)や名(な)に立(た)ちゅる秋(あち)ぬ十三夜(じゅうさんや)、薄風(うすかぢ)ん涼(すぃだ)さ雲霧(くむぢり)ん晴(は)りてぃ、冴(さや)か照(てぃ)り渡(わた)る月(つぃち)ゆ眺(なが)みゆん、此(く)り此(く)り持(む)合(おお)てぃ居(うぅ)むぬ一(ふぃとぅ)つぃ持(む)た、加(くうぇ)えてぃ飲(ぬ)み。
大山下庫裡
上(あ)ぎてぃ巣出(すぃでぃ)有侍(やび)ら。
謝名の大主
一(ふぃとぅ)つぃ注(つぃ)ぎ。やあ、下庫裡(しちゃぐい)、取(とぅ)り付(つぃ)ちん無(ね)らん望(ぬず)み事(ぐとぅ)有(や)すぃが、汝(ぃやあ)娘(うぃなぐ)二人(ふたい)潮汲(しゅうく)みに出(ぃん)ぢてぃ居(うぅ)すぃ、此処(くま)に呼(ゆ)でぃ暫(しば)し酌(しゃく)ゆ取(とぅ)らちゃすぃが、姿(すぃがた)から器量(ちりょお)人勝(ふぃちゅまさ)りでむぬ、我(わ)が屋戸(やどぅ)に遣(や)らち奉公(ふうくう)ゆ為(し)みり。
大山下庫裡
今(なま)ぬ仰(うう)し事(ぐとぅ)百巣出(むむすぃでぃ)どぅ有(や)や侍(び)しが、二人共(たいとぅむ)縁組(いぃんぐみ)済(すぃ)まち有(あ)や侍(び)りば、約束(やくすく)ゆ違(たが)てぃ大主(ううぬし)に上(あ)ぎゆすぃや、百姓(ひゃくしょお)ぬ身(み)ゆ有(や)てぃん肝(ちむ)成(な)らん有(あ)や侍(び)むぬ、此(く)ぬ仰(うう)し事(ぐとぅ)や許(ゆる)ち給(たぼ)り。
謝名の大主
やあ、下庫裡(しちゃぐい)、此(く)ぬ世(ゆ)人間(にんぢん)や夢(いみ)ぬ間(ま)どぅ有(や)ゆる、要(い)らん義理(ぢり)守(まむ)てぃ浮世(うちゆ)暮(く)らさりみ、娘(わらび)二人(たい)遣(や)らち我(わ)が側(すば)に置(う)かば、其(う)ぬ飾(かざ)り為(し)みてぃ生(な)し親(うや)や実(だに)ゆ、引(ふぃ)ち同胞(はろじ)迄(までぃ)ん楽(らく)ゆ誇(ふく)らしゅん、とおとお、尽(つぃ)く尽(づぃ)くとぅ後(あとぅ)ぬ事(くとぅ)考(かんげ)てぃ見(ん)でぃ。
宇地泊のひや
百果報(むむかふ)有(や)たんとぅ目(み)ぬ前(め)引(ふぃ)ち寄(ゆ)してぃ、要(い)らん義理(ぢり)立(た)てぃてぃ鈍(どぅん)な事(くとぅ)言(い)うみ、さあさあ、急(いす)ぢ拝(うぅが)ん留(とぅ)みらりり。
大山下庫裡
段々(だんだん)ぬ仰(うう)し事(ぐとぅ)美拝(みふぇ)どぅ有(や)や侍(び)すぃが、義理(ぢり)背(すむ)ち御請(うう)き勤(がらみ)きや成(な)らん、是非(じふぃ)共(とぅむ)に御断(うくとぅわ)り許(ゆる)ち給(たぼ)り。
謝名の大主
やあ、馬鹿(ばか)、我身(わみ)や誰(たる)とぅ思(む)てぃ愚口(ぐち)に固(かた)まとぅが、此(く)ぬ上(ぅうぃい)に余(あま)り自儘(じまま)どぅん為(しゅ)らば、露(つぃゆ)ぬ身(み)ぬ命(いぬち)散(ち)らち取(とぅ)らさ。
大山下庫裡
如何(いか)な下々(しむじむ)ぬ百姓(ひゃくしょお)有(や)てぃん、御勢(ういちゅ)いに任(まか)ち無理(むり)な事(くとぅ)召(み)しょみ、仮令(たとぅい)一刀(しゅかたな)に殺(くる)さりゆ為(し)ちん、此(く)ぬ仰(うう)し事(ぐとぅ)や御請(うう)き成(な)や侍(び)らん。
謝名の大主
いや、押(う)し返(けえ)ち返(けえ)ち過言(くぁぐん)為(しゅ)る輩(やから)、許(ゆる)ち置(う)ち成(な)らん殺(くる)ち捨(すぃ)てぃら。
宇地泊のひや
ああ、上下(かみしむ)ぬ分(ぶん)知(し)らん気任(ちまか)ちぬ輩(やから)、我(わ)が身(み)為(し)ち我身(わみ)が命(ぬち)や取(とぅ)や侍(び)たる。
謝名の大主
やあ、宇地泊(うちどぅまり)ぬ輩(ひゃあ)、喜友名(きゅうな)ぬ子(し)、一時(ふぃとぅとぅち)ぬ洒気(しゃりぎ)腹立(はらだ)ちに任(まか)ち、人(ちゅ)ぬ命(いぬち)潰(つぃぶ)ち驚(うどぅる)ちどぅ居(うぅ)ゆる、若(む)しか此(く)ぬ事(くとぅ)ぬ露見(るきん)どぅん為(すぃ)らば、一大事(いちでじ)ぬ沙汰(さた)に及(うゆ)ぶ筈(はじ)有(や)りば、兎角(とぅかく)此(く)ぬ事(くとぅ)や波(なみ)立(た)たん如(ぐとぅ)に、取(とぅ)り直(のお)ち按司(あじ)に御宣(うんにゅ)きてぃ置(う)ちゅん、戻(むどぅ)てぃ妻子(とぅじっくぁ)に沙汰(さた)ん為(すぃ)るな。
宇地泊のひや
喜友名の子
拝(うぅが)ん留(とぅ)み有侍(やび)てぃ。
謝名の大主
とおとお、夜(ゆ)ん更(ふ)きてぃ行(い)ちゅい急(いす)ぢ戻(むどぅ)ら。
宇地泊のひや
喜友名の子
御供(うとぅむ)為侍(しゃび)ら。
歌
連(つぃ)り無(な)さや二人(ふたい)朝夕(あさゆ)袖(すでぃ)濡(ぬ)らち
夢(いみ)ぬ間(ま)ぬ浮世(うちゆ)暮(く)らし兼(か)にてぃ
亀松
乙鶴(うとぅづぃる)とぅ吾(わぬ)や生(う)まりらん生(う)まり、一人(ちゅい)参(め)る父親(ちちうや)頼(たゆ)でぃ居(うぅ)や侍(び)たすぃ、謝名(じゃな)ぬ大主(ううぬし)に闇々(やみやみ)とぅ殺(くる)さりてぃ、生(い)ち残(ぬく)る二人(ふたい)如何(いちゃ)が成(な)ゆら。
乙鶴
哀(あわ)り父親(ちちうや)や罪科(つぃみとぅが)ん無(ね)らん、子(くぁ)二人(ふたい)が為(たみ)に殺(くる)さりてぃ居(うぅ)りば、女身(うぃなぐみ)ゆ有(や)てぃん只(ただ)止(や)みぬ成(な)ゆみ、互(たげ)に連(つぃ)り立(た)ちゃい御城(うぐすぃく)に登(ぬぶ)てぃ、按司愛(あじがな)し拝(うぅが)でぃ御披露(ぐふぃる)美御宣(みゅんにゅ)きら。
亀松
やあ、乙鶴(うとぅづぃる)ゆ謝名(じゃな)や人(ちゅ)に変(か)わてぃ胸内(んにうち)ぬ企(たく)み、深(ふか)さ有(あ)る上(ぅうぃい)に時(とぅち)得(うぃ)とぅる者(むぬ)有(や)りば、仮令(たとぅい)御披露(ぐふぃる)美御宣(みゅんにゅ)きてぃ與呼(てぃや)り、事(くとぅ)や難(むつぃか)しく成(な)り立(た)ちゅる積(つぃ)もい、別(びつぃ)に思(う)み付(つぃ)ちゃる事(くとぅ)ぬ又(また)有(あ)すぃや、北山(ふくざん)ぬ世(ゆ)ぬ主(ぬし)湧川(わくがわ)ぬ按司(あじ)や、数々(かずぃかずぃ)ぬ武芸(ぶぎい)人(ふぃちゅ)に立(た)ち抜(ぬ)きてぃ、御弟子(うでぃし)数(かずぃ)数多(あまた)御抱(うかけ)えゆ召(み)しょち、朝夕(あさゆ)御指南(ぐしなん)召(み)しぇん與呼(てぃや)り聞(ち)ちゅん、互(たげ)に連(つぃ)り立(た)ちゃい今帰仁(なきじん)に行(い)ちゃい、彼(あ)ぬ御弟子(うでぃし)成(な)やい御指南(ぐしなん)ゆ受(う)きてぃ、我(わ)が親(うや)ぬ仇(かたち)討(う)ち取(とぅ)てぃぬ後(あとぅ)や、縦令(たとぅい)打(う)ち首(くび)ぬ科(とぅが)に当(あ)たるとぅん、此(く)ぬ世界(しけ)に思(うむ)い残(ぬく)る事(くとぅ)無(ね)さみ、尽(つぃ)く尽(づぃ)くと汝(ぃやあ)ん考(かんげ)えてぃ呉(くぃ)りゆ。
乙鶴
此(く)ぬ事(くとぅ)や我身(わみ)に思(う)み寄(ゆ)らん有(あ)たん、女身(うぃなぐみ)ゆ有(や)てぃん親(うや)ぬ仇(あだ)討(う)ちゅる真(まくとぅ)ぬ願(にげ)えぬ何故(ぬゆ)でぃ徒(あだ)成(な)ゆが、片時(かたとぅち)ん急(いす)ぢ思(うむ)い究(きわ)み遣(や)り。今帰仁(なちじん)に打(う)ち立(た)ちゅる用意(よおい)為(すぃ)らに。
亀松
互(たげ)に肝(ちむ)合(あ)わち誇(ふく)らしゃどぅ有(あ)ゆる、今日(ちゅう)明(あ)きてぃ明後日(あさてぃ)良(ゆ)かる日(ふぃ)ゆでむぬ、他所(ゆす)知(し)らん如(ぐとぅ)に忍(しぬ)でぃ出(ぃん)ぢら、とおとお、内(うち)入(い)やい旅立(たびだ)ちぬ仕度(したく)為(すぃ)らに。
歌
行(ゆ)き帰(けえ)る人(ふぃちゅ)に道(みち)ゆ尋(たずぃ)に遣(や)り
遠(とぅう)く今帰仁(なちじん)に忍(しぬ)でぃ行(い)ちゅん
亀松
喜納(ちな)ぬ番所(ばんどぅくる)越(くぃ)いてぃ多幸山(たこおやま)、馴(な)りん山道(やまみち)や歩(あゆ)でぃ歩(あゆ)まらん。
乙鶴
恩納岳(うんなだき)なかい、掛(か)かる白雲(しらくむ)ん、他所(ゆす)に眺(なが)みやい行方(ゆくい)知(し)らん。
歌
浜(はま)ぬ浜(はま)長(なぎ)し哀(あわ)り鳴(な)く千鳥(ちどぅい)
聞(ち)ちば旅立(たびだ)ちぬ思(うむ)い勝(まさ)る
亀松
後(あとぅ)や湖辺底(くふぃんずく)向(ん)かてぃ行(い)く先(さち)や、音(うとぅ)に聞(き)く名護(なぐ)ぬ許田(ちゅだ)ぬ手水(てぃみずぃ)。
乙鶴
許田(ちゅだ)からや今帰仁(なちじん)五六里(ぐるくり)でむぬ、夜(ゆ)ぬ入(い)らん内(うち)に急(いす)ぢ通(とお)ら。
歌
名護(なぐ)ぬ大兼久(ううがにく)山入端(やまぬふぁ)ん越(くぃ)いてぃ
今帰仁(なちじん)ぬ城(ぐすぃく)今(なま)どぅ着(ち)ちゃる
やあ、乙鶴(うとぅづぃる)ゆ、此(く)りや親泊(うやどぅまり)彼(あ)りや城元(ぐすぃくむとぅ)、脇御門(わちぐむん)寄(ゆ)しりやい御取次(うとぅりつぃぢ)為(すり)らに。御門番衆(ぐむんばんしゅ)御取次(うとぅりつぃぢ)頼(たぬ)みゃ侍(び)ら。
門番
何事(ぬうぐとぅ)が有(や)ゆら。
亀松
此(く)ぬ二人(たい)や宜野湾(ぎぬわん)伊佐村(いさむら)ぬ百姓(ひゃくしょお)、大山下庫裡(おおやましちゃぐい)ぬ生(な)し子(ぐぁ)有(や)や侍(び)すぃが、按司愛(あじがな)し拝(うぅが)でぃ願事(にげぐとぅ)ぬ有(あ)とぅてぃ、畏(うとぅる)しゃや有(あ)てぃん寄(ゆ)しり遣(や)い居(うぅ)有侍(やび)むぬ、良(ゆ)たしゃ有(あ)る様(よお)に美御宣(みゅんにゅ)きてぃ給(たぼ)り。
門番
やあやあ、他間切(たまぢり)ぬ百姓(ひゃくしょ)殊(くとぅ)に女(うぃなぐ)ぬ身(み)、恐(やぐみ)さん知(し)らん、今(なま)ぬ願事(にげぐとぅ)や、御取次(うとぅりつぃぢ)成(な)らん急(いす)ぢ戻(むどぅ)り。
崎枝のひや
やあ、天底(あみすく)ぬ子(し)、下々(しむじむ)ぬ百姓(ひゃくしょ)有(や)てぃん、願事(にげぐとぅ)ぬ有(あ)らば押(う)せえ留(とぅ)み置(う)くな、即即(すくすく)に御披露(ぐふぃる)美御宣(みゅんにゅ)きり與呼(てぃや)り、兼(か)に兼(が)にぬ仰(うう)し拝(うぅが)でぃ居(うぅ)る上(ぅうぃい)に、此(く)ぬ童(わらび)二人(ふたい)遥々(はるばる)とぅ此処(くま)に、寄(ゆ)しりたる所存(しゅずん)徒(あだ)に為(な)ち済(すぃ)みゅみ、とおとお、急(いす)ぢ御取次(うとぅりつぃぢ)為(すぃ)り。
門番
拝(うぅが)ん留(とぅ)み有侍(やび)てぃ。御取次(うとぅりつぃぢ)為侍(しゃび)ら。
崎枝のひや
やあ、童(わらび)、長路(ながみち)ぬ疲(つぃか)り足元(あしむとぅ)ん痛(や)みゅら、暫(しば)し此(く)りなかい休息(きゅすく)ゆ為(すぃ)り。
門番
拝(うぅが)まりゆ召(み)しぇん御前(うめえ)に寄(ゆ)しりり。
湧川の按司
やあやあ、女(うぃなぐ)貴無(あてぃな)しぬ二人(ふたい)連(つぃ)り立(た)ちゃい、如何(いちゃ)る願事(にげぐとぅ)ぬ有(あ)とぅてぃ着(つぃ)ちゃが。
亀松
此(く)ぬ二人(たい)や宜野湾(ぎぬわん)伊佐村(いさむら)ぬ百姓(ひゃくしょお)、大山下庫裡(おおやましちゃぐい)ぬ生(な)し子(ぐぁ)有(や)や侍(び)すぃが、按司(あじ)ぬ頭役(かしらやく)謝名(じゃな)ぬ大主(ううぬし)ぬ、乙鶴(うとぅづぃる)とぅ二人(ふたい)側(すば)に置(う)かんてぃやり、父親(ちちうや)に色々(いるいる)談合(がんごお)ぬ有(あ)たすぃ、二人(たい)共(とぅむ)に縁組(いぃんぐみ)済(すぃ)まち有(あ)や侍(び)りば、約束(やくすく)ゆ違(たげ)てぃ御望(うぬず)みに任(まか)しゅすぃや百姓(ひゃくしょお)ぬ身(み)どぅ有(や)てぃん肝(ちむ)成(な)らんてぃやり、断(くとぅわ)たる腹立(はらだ)ちに殺(くる)ち捨(すぃ)てぃらりてぃ、如何(いちゃ)しがな親(うや)ぬ敵(てぃち)討(う)たんとぅ思(む)てぃ、眠(にぶ)る目(み)ん寝(に)らん思(う)み尽(つぃ)くち居(うぅ)や侍(び)すぃが、女身(うぃなぐみ)ぬ敵討(かたちう)ち力(ちから)及(うゆ)ばらん、按司愛(あじがな)し天(てぃん)や数々(かずぃかずぃ)ぬ武芸(ぶぎい)、御嗜(うたしな)み有(あ)とぅてぃ御弟子数(うでぃしかずぃ)数多(あまた)、朝夕(あさゆ)御指南(ぐしなん)召(み)しぇんてぃやり拝(うぅが)でぃ、女身(うぃなぐみ)ゆ有(や)てぃん太刀打(たちう)ちゆ習(なら)てぃ、我(わ)が親(うや)ぬ仇(あたち)討(う)ち取(とぅ)やい死(し)にば、左京(さちょ)ぬ橋(はし)広(ふぃる)く極楽(ぐくらく)ゆとぅ思(む)てぃ、恐(やぐみ)さん知(し)らん寄(ゆ)しりやい居有侍(うぅやび)むぬ、慈悲(じふぃ)ゆ御情(うなさ)きに御指南(ぐしなん)召(み)しょち給(たぼ)り。
湧川の按司
やあ、童(わらび)、謝名(じゃな)ぬ大主(ううぬし)ぬ側(すば)にどぅん居(うぅ)らば、親子(うやく)共(とぅむ)楽(らく)ゆ誇(ふく)る筈(はじ)有(や)すぃが、縁組(いぃんぐみ)ぬ有(あ)とぅてぃ約束(やくすく)ゆ違(たが)ゆすぃや、道(みち)成(な)らんとぅ思(む)てぃ断(くとぅわ)たる父親(ちちうや)ぬ誠(まくとぅ)、又(また)女身(うぃなぐみ)ぬ二人(ふたい)親(うや)ぬ敵(てぃち)討(う)ちゅる、念願(にんぐぁん)に遥々(はるばる)とぅ下(くだ)てぃ来(ちゃ)る所存(しゅずん)、聞(ち)ちゅる袖(すでぃ)迄(までぃ)ん露(つぃゆ)どぅ置(う)ちゅる。
平敷大主
召(み)しぇる如(ぐとぅ)然(さ)らみ親子(うやっくぁ)ぬ志(くくるざし)、世(ゆ)ぬ中(なか)ぬ手本(てぃふん)沙汰(さた)どぅ残(ぬく)やびる。
湧川の按司
やあ、童(わらび)、願事(にげぐとぅ)ぬ深(ふか)さ肝苦(ちむぐり)しゃ有(あ)むぬ、辞退(じてえ)為(さ)ぬ抱(かけ)え置(う)ち教訓(きゅうくん)ゆ為(すぃ)らに。
亀松
嗚呼(ああ)、尊(とお)と。
湧川の按司
やあ、平敷大主(ふぃしきううぬし)女身(うぃなぐみ)ぬ節義(しつぃぎ)守(まむ)てぃ居(うぅ)る二人(ふたい)外(ふか)に宿(やどぅ)為(し)みてぃ置(う)ちや又(また)成(な)らん、勝手(かってぃ)居(うぅ)てぃ太刀打(たちう)ち指南(しなん)為(さ)ん為(しゅ)むぬ、此(く)ぬ様(よお)按司(あじ)に語(かた)てぃ聞(ち)かし。
平敷大主
拝(うぅが)ん留(とぅ)み有侍(やび)てぃ。とおとお、内原(うちばる)に寄(ゆ)しりてぃ女按司(うぅなじゃら)ゆ拝(うぅが)み。
湧川の按司
大山下庫裡(おおやましちゃぐい)ぬ娘(わらび)亀松(かみまつぃ)乙鶴(うとぅづぃる)ど、親(うや)ぬ敵(てぃち)討(う)ちゅる念願(にんぐぁん)ぬ有(あ)とぅてぃ、弟子(でぃし)に抱(かけ)え置(う)ち教訓(きゅうくん)ゆ為(しゃ)りば、長刀(ながたち)ぬ伝法(でぃんぷ)残(ぬく)らずぃに渡(わた)てぃ敵(てぃち)に打(う)ち勝(か)ちゅすぃ疑(うたげ)えや無(ね)らん、やあ、平敷大主(ふぃしきううぬし)亀松(かみまつぃ)乙鶴(うとぅづぃる)連(つぃ)り出(ぃん)ぢりてぃやり、内(うち)に出(ぃん)ぢ按司(あじ)に語(かた)ひ来(く)う。
平敷大主
拝(うぅが)ん留(とぅ)み有侍(やび)てぃ。
湧川の按司
やあ、亀松(かみまつぃ)乙鶴(うとぅづぃる)、寝(に)てぃ覚(さ)みてぃ親(うや)ぬ仇(かたち)討(う)ち取(とぅ)ゆる、念力(にんりき)ぬ深(ふか)さ思(う)み頑張(はま)てぃ居(うぅ)る故(ゆい)に、其(う)り其(う)りぬ伝法(でぃんぷ)習(なら)い取(とぅ)てぃ有(あ)りば、敵(てぃ)ちとぅ立(た)ち合(え)え気遣(きづぃけ)えや無(ね)らん、暇(いとぅま)取(とぅ)らしゅむぬ急(いす)ぢ立(た)ち戻(むどぅ)てぃ年月(にんづぃち)に積(つぃむ)る思(うむ)い遂(とぅ)ぎり。
亀松
長浜(ながはま)ぬ真砂(まさぐ)読(ゆ)みや尽(つぃく)すとぅん、此(く)ぬ御恩(ぐうん)尊(とぅうとぅ)さや言(い)ちん尽(つぃく)さらん、願(ぐぁん)ぬ如(ぐとぅ)親(うや)ぬ仇(かたち)討(う)ち済(すぃ)まち、寄(ゆ)しりやい美拝(みふぇ)美御宣(みゅんにゅ)き有侍(やび)ら。
女按司
やあ、亀松(かみまつぃ)乙鶴(うとぅづぃる)ゆ、召(み)しぇる如(ぐとぅ)然(さ)らみ、眠(にぶ)る目(み)ん寝(に)らん、朝夕(あさゆ)肝(ちむ)尽(つぃく)ち習(な)れ取(とぅ)たる手並(てぃな)み、互(たげ)に振(ふ)り立(た)てぃてぃ仇(かたち)討(う)ち取(とぅ)やい、二人(たい)が誇(ふく)い声(ぐぃ)や急(いす)ぢ聞(ち)かし。
乙鶴
思(う)み子(ぐぁ)変(か)わらずぃに御愛(うかな)しゃゆ為(さ)りてぃ、此(く)ぬ間(ええ)ぬ御恩(ぐうん)如何(いちゃ)し忘(わすぃ)や侍(び)が、片時(かたとぅち)ん急(いす)ぢ仇(かたち)討(う)ち取(とぅ)やい、又(また)ん拝(うぅが)みゃ侍(び)ら御待(うま)ち召(み)しょり。
湧川の按司
やあ、平敷大主(ふぃしきううぬし)、汝(ぃやあ)ん連(つぃ)りてぃ行(い)ぢ直(すぃ)ぐに按司(あじ)拝(うぅが)でぃ、亀松(かみまつぃ)乙鶴(うとぅづぃる)が親(うや)ぬ敵(てぃち)討(う)ちゅる、願事(にげぐとぅ)ぬ有(あ)とぅてぃ弟子(でぃし)に抱(かけ)え置(う)ち、太刀打(たちう)ちぬ伝法(でぃんぷ)渡(わた)ち有(あ)や侍(び)むぬ、御障(うさわ)りぬ無(ね)ん有(あ)らば、謝名(じゃな)ぬ大主(ううぬし)とぅ立(た)ち合(え)えぬ勝負(しゅうぶ)願(にげえ)てぃ居(うぅ)る段(だん)、委細(いせえ)御相談(ぐすうだん)済(すぃ)まち来(く)う。
平敷大主
拝(うぅが)ん留(とぅ)み有侍(やび)てぃ。やあ、仲里(なかざとぅ)ぬ子(し)、明日(あちゃ)や明(あ)き明(あ)きに舟路(ふなじ)から行(い)ちゅん、急(いす)ぢ乗船(じょおすぃん)ぬ用意(ゆうい)為(し)みり。
仲里の子
拝(うぅが)ん留(とぅ)み有侍(やび)てぃ。
湧川の按司
やあ、亀松(かみまつぃ)乙鶴(うとぅづぃる)、立(た)ち合(え)えぬ初(はじ)み心得(くくるい)に成(な)ゆすぃ、内(うち)に入(い)り細(くま)く語(かた)てぃ聞(ち)かさ。
歌
押(う)す風(かぢ)や真艫(まとぅむ)波(なみ)ん押(う)し添(すぃ)いてぃ
亀松
四年(ゆとぅし)住(すぃ)み馴(な)りし城元(ぐすぃくむとぅ)見(ん)りば、降(ふ)らん夏雨(なつぃぐり)に袖(すでぃ)ゆ濡(ぬ)らす。
乙鶴
袖(すでぃ)濡(ぬ)らち互(たげ)に戻(むどぅ)てぃ行(い)く今日(ちゅう)や喜(ゆるく)びぬ中(なか)ぬ名残(なぐ)り然(さ)らみ。
歌
時(とぅ)ちぬ間(ま)に回(まわ)る残波岬(ざんぱみさち)
平敷大主
運天(うんてぃん)ぬ港(んなとぅ)明(あ)き明(あ)きに出(ぃん)ぢゃち、順風(じゅんぷう)ぬ良(ゆ)たしゃ波(なみ)ん押(う)し添(すぃ)いてぃ、覚(うび)らずぃに着(つぃ)ちゃさ伊佐(いさ)ぬ泊(とぅまり)。やあ、亀松(かみまつぃ)乙鶴(うとぅづぃる)、片時(かたとぅち)ん急(いす)ぢ城元(ぐすぃくむとぅ)登(ぬぶ)てぃ、按司(あじ)拝(うぅが)でぃ願(にげ)え筋(すぃじ)済(すぃ)まち来(く)ん為(しゅ)むぬ、二人(たい)や宿(やどぅ)に出(ぃん)ぢ待(ま)ちゃい居(うぅ)りゆ。
亀松
肝(ちむ)願(にげ)ゆ為(し)ちゅてぃ御待(うま)ち為侍(しゃび)ら。
平敷大主
とおとお、急(いす)が急(いす)が。御門番衆(ぐむんばんしゅ)御取次(うとぅりつぃぢ)頼(たぬ)ま。
門番
誰(たる)が有(や)い召(み)しぇら。
平敷大主
湧川(わくがあ)ぬ按司(あじ)ぬ使(つぃけ)に寄(ゆ)しりやい居(うぅ)有侍(やび)すぃや、大山下庫裡(おおやましちゃぐい)ぬ娘(わらび)亀松(かみまつぃ)乙鶴(うとぅづぃる)どぅ、謝名(じゃな)ぬ大主(ううぬし)ぬ側(すば)に置(う)かんてぃやり、下庫裡(しちゃぐい)に色々(いるいる)談合(だんごお)ぬ有(あ)たすぃ、二人共(たいとぅむ)に縁組(いぃんぐみ)ぬ済(すぃ)まち有(あ)や侍(び)りば、約束(やくすく)ゆ違(たが)てぃ御望(うぬず)み任(まか)しゅすぃや、百姓(ひゃくしょお)ぬ身(み)有(や)てぃん肝(ちむ)成(な)らんてぃやり、断(くとぅわ)たる恨(うら)み腹立(はらだ)ちに任(まか)ち、即座(すくざ)居(うぅ)てぃ一刀(ちゅかたな)に殺(くる)ち捨(すぃ)てぃらりてぃ、彼(あ)ぬ娘(わらび)二人(ふたい)哀(あわ)り泣(な)ち暮(く)らち、如何(いちゃ)しがな朝夕(あさゆ)太刀打(たちう)ちゆ習(なら)てぃ親(うや)ぬ敵仇(てぃちかたち)討(う)ち取(とぅ)らんとぅ思(む)てぃ、湧川(わくがあ)ぬ按司(あじ)に願事(にげぐとぅ)ぬ有(あ)とぅてぃ、四年(よとぅ)成(な)てぃぬ九月(くぐぁつぃ)弟子(でぃし)に抱(かけ)え置(う)ち、長太刀(ながたち)ぬ伝法(でぃんぷ)渡(わた)ち有(あ)や侍(び)むぬ、二人(ふたい)が孝心(くうしん)取(とぅ)い立(た)てぃ召(み)しょおち、御障(うさわ)りぬ無(ね)ん有(あ)らば、謝名(じゃな)ぬ大主(ううぬし)とぅ、立(た)ち合(え)えぬ勝負(しゅうぶ)仰(うう)し為(さ)りる如(ぐとぅ)、願(にげ)てぃ居(うぅ)る次第(しでえ)御宣(うんにゅ)きりてぃやり、遥々(はるばる)とぅ使(つぃけ)え寄(ゆ)しりやい来(ちゃあ)侍(び)たる。
神山の按司
やあ、平敷大主(ふぃしきううぬし)、伊佐(いさ)ぬ村頭(むらがしら)大山下庫裡(おおやましちゃぐい)どぅ百姓(ひゃくしょお)ぬ財物(ぜぶつぃ)押(う)し取(とぅ)いに取(とぅ)やい、人(ふぃとぅ)ぬ妻(とぅじ)生(な)し子(ぐぁ)鬼無理(うにむり)に犯(うか)ち、段々(だんだん)ぬ非法(ひふう)島国(しまぐに)ぬ障(さわ)り許(ゆる)ち置(う)ち成(な)らん殺(くる)ちゃる段(だん)、謝名(じゃな)からぬ首尾(しゅび)や予(か)にてぃ聞(ち)ち居(うぅ)たん、ああ、色欲(いるゆく)に迷(まゆ)てぃ人(ふぃちゅ)ぬ命(いぬち)潰(つぃぶ)ち有(あ)る事(くとぅ)や、大主(ううぬし)ぬ言(ぃや)りすぃ只(ただ)今(なま)どぅ聞(ち)ちゅる、是程(くりふどぅ)ぬ悪人(あくにん)許(ゆる)ち置(う)ち済(すぃ)まん、屹度(きっとぅ)其(う)ぬ科(とぅが)に当(あ)てぃる筈(はじ)有(や)すぃが、彼(あ)ぬ娘(わらび)二人(ふたい)親(うや)ぬ仇(あだ)討(う)ちゅる、願事(にげぐとぅ)ぬ深(ふか)さ肝苦(ちむぐり)しゃ有(あ)る上(ぅうぃい)に、湧川(わくがあ)ぬ按司(あじ)ぬ御慈悲(うじふぃ)御情(うなさ)きに、長太刀(ながたち)ぬ伝法(でぃんぷ)御渡(うわた)ち有(あ)とぅてぃ、遥々(はるばる)とぅ御御使(うみつぃけ)え有難(ありがた)さ有(あ)りば、立(た)ち合(え)えぬ願(にげ)え取(とぅ)り止(や)みや成(な)らん、日柄(ふぃがら)究(きわ)みやい注進(ちゅうしん)ゆ為(さ)ん為(しゅ)むぬ、大主(ううぬし)ん立(た)ち合(え)見物(みむん)ゆ為(さ)ってぃ、勝(か)ち負(ま)きぬ次第(しでえ)委細(いせえ)御宣(うんにゅ)きてぃ給(たぼ)り。
平敷大主
拝(うぅが)ん留(とぅ)み有侍(やび)てぃ。今(なま)ぬ仰(うう)し事(ぐとぅ)拝(うぅが)みどぅん為(すぃ)らば、如何(いか)許(ばか)り二人(ふたい)有難(ありがた)さ思(うむ)有侍(やび)が、急(いす)ぢ立(た)ち戻(むどぅ)てぃ此(く)ぬ様(よ)語(かた)てぃ聞(ち)か為侍(しゃび)ら。先(ま)ずぃ御暇(ういとぅま)ゆ為侍(しゃび)ら。
神山按司
やあ、我如古(がにく)大主(ううぬし)、双方(すうふ)呼(ゆ)び出(ぃん)じゃち事(くとぅ)ぬ起(う)こりから、実成(じつぃな)りぬ次第(しでえ)問(とぅ)いゆ尋(たずぃ)にやい、細々(くまぐま)ぬ首尾方(しゅびふ)急(いす)ぢ聞(ち)かし。やあ、謝名(じゃな)ぬ悪業(あくごお)現(あらわ)りてぃ居(うぅ)りば、屋戸(やどぅ)戻(むどぅ)ち置(う)ちや変(ふぃん)有(あ)らん為(しゅ)むぬ、留(とぅ)み置(う)ちゃい難(がた)く番手(ばんてぃい)付(つぃ)ち置(う)き。
我如古大主
拝(うぅが)ん留(とぅ)み有侍(やび)てぃ。
神山按司
とおとお、油断(ゆだん)為(すぃ)るな。
我如古大主
此(く)りや我如古(がにく)大主(ううぬし)、相役(ええやく)謝名(じゃな)ぬ色欲(いるゆく)に迷(まゆ)てぃ、大山下庫裡(おおやましちゃぐい)殺(くる)ち有(あ)る次第(しでえ)、糸口(いとぅぐち)首尾(しゅび)美御宣(みゅんにゅ)きてぃやり、仰(うう)し事(ぐとぅ)拝(うぅが)でぃ尋(たずぃ)にやい見(み)りば、双方(すうふ)ぬ口柄(くちがら)一々(いちいち)に符号(ふぐう)、亀松(かみまつぃ)乙鶴(うとぅづぃる)が孝心(くうしん)御感(うかん)じゆ召(み)しょち、来(ちゅう)る十日(とぅか)二日(ふぃつぃか)立(た)ち合(え)え仰(うう)し為(さ)りゆむぬ、やあ、糸数(いとぅかずぃ)ぬ子(し)、伊佐村(いさむら)ぬ東(あがり)場所(ばしゅ)良(ゆ)たしゃ有(あ)むぬ、御桟敷(うさぢち)ぬ構(かめ)え双方(すうふ)ぬ控(ふぃか)い所(じゅ)、諸人(しゅじん)見物場(きんぶつぃば)迄(までぃ)此(く)ぬ図(ずぃ)ぬ通(とぅ)い、急(いす)ぢ調(とぅとぅぬ)ゆる用意(ゆうい)為(し)みり。
糸数の子
拝(うぅが)ん留(とぅ)み有侍(やび)てぃ。
我如古大主
やあ、謝名(じゃな)や太刀打(たちう)ちに名(な)得(うぃ)とぅる強者(つぃわむん)、女身(うぃなぐみ)ぬ立(あ)ち合(え)御気遣(うきづぃ)けゆでむぬ、新垣(あらかち)ぬ輩(ひゃあ)、高良(たから)ぬ子(し)二人(たい)や、予(か)にてぃ助(すぃ)き太刀(だち)に詰(つぃ)み居(うぅ)やい居(うぅ)とぅてぃ、若(む)しか亀松(かみまつぃ)乙鶴(うとぅづぃる)負(ま)き太刀(だち)に成(な)らば、謝名(じゃな)に飛(とぅ)び掛(か)かてぃ首(くび)取(とぅ)ゆる如(ぐとぅ)に、万事(ばんじ)気(ち)ぬ付(つぃ)ちゃい手組(てぃいぐみ)為(し)ち居(うぅ)り。
新垣のひや
高良の子
拝(うぅが)ん留(とぅ)み有侍(やび)てぃ。
我如古大主
やあ、牧志(まきし)ぬ子(し)、謝名(じゃな)ぬ装束(しゅうずく)細(みすぃ)く見届(んとぅどぅ)きてぃ、着込(ちく)み等(などぅ)ぬ企(たく)み無用(むよ)に為(し)みり。
牧志の子
拝(うぅが)ん留(とぅ)み有侍(やび)てぃ。
我如古大主
とおとお、其(う)り其(う)りぬ言渡(いわた)し油断(ゆだん)為(し)るな。
上原
此(く)ぬ二人(たい)や、伊佐(いさ)喜友名(きゅうな)ぬ馬番(ぅんまばん)、今日(ちゅう)伊佐村(いさむら)ぬ亀松(かみまつぃ)乙鶴(うとぅづぃる)姉妹(ちょおでえ)二人(たい)、謝名(じゃな)ぬ大主(ううぬし)とぅ討(う)ち合(え)え仰(うう)しぬ有(あ)てぃ、御見物場(ぐきんぶつぃば)ぬ御掃除(うそおじ)に行(い)ちゅん、はいはい、崎間(さちま)輩(ふぃい)、彼(あ)り彼(あ)り見(ん)でぃ四方八方(しふうはっぷう)から底魚(しゅく)ぬ寄(ゆ)ゆる如(ぐとぅ)寄(ゆ)てぃ来(ちゅ)る見物人(きんぶつぃにん)。
崎間
扨(さ)てぃん扨(さ)てぃん夥(うびただ)しい事(くとぅ)、斯有(かにゃ)る大事(ううぐとぅ)や親祖父(うやふぁあふじ)から何(ぬ)噺(はなし)ん聞(ち)かん。
上原
成程(んちゃ)其(う)ぬ筈(はじ)や有(あ)らに、女(うぃなぐ)童(わらび)ぬ三四年(みゆにん)ぬ内(うち)に、彼(あ)り程(ふどぅ)ぬ武士(ぶし)に打(う)ち成(な)てぃ、鬼(うに)ゆかん恐(うとぅ)るしい謝名(じゃな)ぬ大主(ううぬし)とぅ、立(た)ち争(おお)らんでぃ為(しゅ)すぃや、尤(どぅっとぅ)むぬ珍(ふぃるま)しい事(くとぅ)。
崎間
いやい上原(ぅうぃいはら)、言(ぃゆ)る内御役々衆(うちうやくやくしゅう)ん軈(やが)てぃ御出(うぃん)ぢ召(み)しょおる筈(はじ)、御掃除(うそおじ)ぬ忍苦(にんく)成(な)ゆんどぅん遣(や)れえ、二人(たい)や取(とぅ)っ付(つぃ)きらってぃ彼(あ)り程(ふどぅ)ぬ名所(みいしゅ)居(うぅ)てぃ、尻(つぃび)打(う)ち付(つぃ)きらりいる積(つぃ)むい、でぃい急(いす)ごおやあ。
上原
ああ、尤(むっとぅ)む、急(いす)ごおやあ。
崎間
扨(さ)てぃん扨(さ)てぃん公事(くじ)事(ぐとぅ)や、二三日(ふたみっか)ぬ内(うち)に此(く)り程(ふどぅ)立派(りっぱ)に出来(でぃき)たる御桟敷(うさぢち)御仮屋(うかりや)、急(いす)ぢ御掃除(うそおじ)始(はじ)みろおや。
上原
心得(くくり)てぃ。
崎間
とおとお、塵(ちり)一(てぃ)つぃん無(ね)らん清(ちゅ)らさどぅ癖(くし)、先足(さちあし)入(い)りや乍(が)ち一話(ちゅはなし)為(そお)やあ。
上原
いやい、崎間(さちま)ぬ輩(ふぃい)、我(わ)あ願(にげ)ぬ有(あ)すぃ聞(ち)ち呉(くぃ)り。
崎間
何(ぬう)願(にげ)てぃ居(うぅ)が。
上原
先(ま)ずぃ華(はね)え聞(ち)かりり、四五日(しぐにち)先(さち)原(はら)東(あがり)に大山下庫裡(おおやましちゃぐい)ぬ家縺(やあむちゃれ)え今日(ちゅう)ぬ仕組(しく)み有(や)たら、亀松(かみまつぃ)乙鶴(うとぅづぃる)長刀(ながたち)白刃(しらば)出(ぃん)じゃち戦(たたか)ゆたん、姉(すぃいざ)ぬ打(う)ち掛(か)きりば妹(うっとぅ)ぬ外(はずぃ)し、ああ、我達(わったあ)があ、肝(ちむ)恐(うとぅ)るしゃぬ見(ん)いん成(な)らん、本(ふん)に脈(みゃく)ん脳天(ひゅうるち)に上(あ)が而居(とお)たさあ、其(う)りや先(ま)ずぃ有(あ)ん、いやい、崎間(さちま)輩(ふぃい)、彼(あ)ぬ姉妹(ちょおでえ)二人(たい)ぬ影(かあぎ)ぬ清(ちゅ)らさや、扨(さ)てぃん扨(さ)てぃん如何(ちゃ)ん言(ぃや)らん、神(かみ)か仏(ふとぅき)かんでぃとぅ思(うま)ありいる、成程(んちゃ)謝名(じゃな)ぬ大主(ううぬし)ぬ眩暈(くく)てぃ巡(みぐ)てぃ有(あ)すぃん尤(むっとぅ)む、彼(あ)ぬ二人(たい)ぬ内(うち)、一人(ちゅい)我(わ)あ妻(とぅじ)に為(しゅう)どぅどぅん有(や)らば、万々(まんまん)ぬ願(にげ)足(た)りてぃ人間(にんぢん)に生(う)まりたる芯(しん)立(た)ちゅしがんでぃ思(うむ)てぃ、其(う)りから此(く)ぬ方(かた)、二人(たい)が面影(うむかぢ)ぬ夜(ゆ)ん昼(ふぃる)ん目(み)ぬ緒(うぅ)に下(さ)がてぃ、取(とぅ)い仕事(しぐとぅ)ん少(すっとぅ)ん成(な)らん、至極(しぐく)哀(あわ)り尽(つぃく)ち居(うぅ)さあ。
崎間
いやい、上原(ぅうぃいはら)、汝(ぃやあ)馬番(ぅんまばん)位(ぐれえ)ぬ者(むん)ぬ、志(くくるざし)や本(ふん)ぬ大御大名(おおうでえみょお)、天(てぃん)に走(は)い走(ば)い、あはあは。
我如古大主
此(く)りや我如古大主(がにくううぬし)、今日(ちゅう)ぬ御座構(うざがめ)え見物(きんぶつぃ)に行(い)ちゅん。やあやあ、馬番(ぅんまばん)、此(く)り程(ふどぅ)ぬ大事(ううぐとぅ)見物場(きんぶつぃば)居(うぅ)てぃ、要(い)らん者(むん)ぬ話(はなし)無用(むよお)や有(あ)らに、御掃除(うそおじ)ぬ勤(つぃとぅ)み仕舞(しま)いどぅん有(や)らば、急(いす)ぢ詰(つぃ)み所(しゅ)に戻(むどぅ)てぃ行(い)き。
馬番
うう。
我如古大主
早(はよ)お行(い)ち。やあ、糸数(いとぅかずぃ)ぬ子(し)、立(た)ち合(え)ぬ刻限(くくぎん)近(ちか)く成(な)てぃ居(うぅ)むぬ、平敷大主(ふぃしきううぬし)注進(ちゅうしん)に行(い)き。
糸数の子
拝(うぅが)ん留(とぅ)み有侍(やび)てぃ。
我如古大主
やあ、牧志(まきし)ぬ子(し)、目(み)に余(あま)る見物人(きんぶつぃにん)関合(すぃきえ)えゆ為(し)らば、立(た)ち合(え)えぬ障(さわ)り怪我(きが)ぬ本(むとぅ)でむぬ、能々(ゆくゆく)下知方(ぎちかた)念(にん)入(い)ゆる如(ぐとぅ)に、構(かめ)ぬ役々(やくやく)に固(かた)く言(い)い渡(わた)し。
牧志の子
拝(うぅが)ん留(とぅ)み有侍(やび)てぃ。
我如古大主
とおとお、急(いす)ぢ急(いす)ぢ。
但(ただ)し神山(かみやま)ぬ按司(あじ)、我如古大主(がにくううぬし)、平敷大主(ふぃしきううぬし)三人(みたい)桟敷着座(さじちちゃくざ)。新垣(あらかち)、高良(たから)両人(りょおにん)罷(まか)り出(で)る・・御礼(おんれい)。助力(じょりょく)として舞台桟敷前(ぶたいさじきまえ)左右(さゆう)に伺(うかが)い出仕(しゅっし)候得(そおらえ)ば、亀松(かみまつぃ)、乙鶴(うとぅづぃる)一人一人(ひとりびとり)出羽(でば)、笛太鼓(ふえたいこ)一勢(いっせい)より打(う)ち上(あ)げ迄(まで)、謝名(じゃな)ぬ大主(ううぬし)出羽(でば)、笛太鼓(ふえたいこ)一勢(いっせい)打(う)ち上(う)げ迄(まで)。
亀松
やあ、大主(ううぬし)、此(く)ぬ先(さち)ぬ悪行(あくぎょ)今日(ちゅう)どぅ思(う)み知(し)ゆら、島国(しまぐに)ゆ鳴響(とぅゆ)む謝名(じゃな)ぬ大主(ううぬし)ぬ、女身(うぃなぐみ)ぬ手(てぃ)に掛(か)かてぃ命(ぬち)取(とぅ)らすゆいか、迚(とぅてぃ)ん切腹(しっぷく)清(ちゅ)ら事(ぐとぅ)や有(あ)らに。
謝名の大主
推参(すぃいさん)な事(くとぅ)言(ぃゆ)み、急(いす)ぢ立(た)てぃ、只(ただ)一太刀(ちゅたち)に切(ち)り殺(くる)ち取(とぅ)らさ。
神山按司
やあ、我如古大主(がにくううぬし)、亀松(かみまつぃ)乙鶴(うとぅづぃる)此処(くま)に呼(ゆ)び。
我如古大主
やあ、御前(ぐじん)に御用(ぐよ)御側(うすば)寄(ゆ)てぃ拝(うぅが)み。
神山按司
やあやあ、女身(うぃなぐみ)ぬ謝名(じゃな)とぅ立(た)ち合(え)えぬ事(くとぅ)や、予(か)にてぃ居(うぅ)てぃ至極(しぐく)心配(しわ)に思(うむ)ゆたん、ああ、此(く)り程(ふどぅ)ん容易(たやすぃ)く仇(かたち)討(う)ち取(とぅ)たすぃ、神代(かみゆ)にん聞(ち)かん働(はたら)ちどぅ有(や)ゆる、やあ、此(く)の褒美(ふび)為(しゅ)すぃや先(ま)ずぃ後(あとぅ)ぬ事(くとぅ)、亀松(かみまつぃ)乙鶴(うとぅづぃる)細(みすぃ)く聞(ち)ち、湧川(わくがあ)ぬ按司(あじ)ぬ御夫婦(ぐふうふ)ぬ慈悲(じふぃ)御情(うなさ)きや二人(ふたい)命(ぬち)留(とどぅ)み忘(わすぃ)てぃや済(すぃ)まん、明日(あちゃ)や御挨拶(ぐあいさつぃ)に使者(ししゃ)ゆ立(た)てぃゆむぬ、連(つぃ)り立(た)ちゃい、美拝(みふぇ)御宣(うんにゅ)きてぃ来(く)う。
亀松
仇(かたち)討(う)ち取(とぅ)たる御慈悲(ぐじふぃ)尊(とぅうとぅ)さや、云言葉(いくとぅば)に述(ぬ)びてぃ美御宣(みゅんにゅ)きん成(な)らん、此(く)ぬ御恩(ぐうん)美拝(みふぇ)や二所(たとぅくる)ぬ御主(うしゅ)ぬ、百年(むむとぅ)割(わ)てぃ報割(ふわ)り御掛(うか)き栄(ぶせ)召(み)しぇすぃ、夜昼(ゆるふぃる)ん二人(ふたい)御願(うにげ)為侍(しゃび)ら。
神山の按司
やあ、平敷大主(ふぃしきううぬし)、立(た)ち合(え)えぬ様子(よおすぃ)細々(くまぐま)ぬ事(くとぅ)や、按司(あじ)ぬ御夫婦(ぐふうふ)に御宣(うんにゅ)きてぃ給(たぼ)り。
平敷大主
拝(うぅが)ん留(とぅ)み有侍(やび)てぃ。
神山の按司
やあ、仇(かたち)討(う)ち取(とぅ)たる今日(ちゅう)ぬ嬉(うり)しさに、打(う)ち誇(ふく)てぃ二人(ふたい)踊(うどぅ)てぃ戻(むどぅ)り。
亀松・乙鶴
嗚呼(ああ)、尊(とお)とぅ。
亀松
やあ、乙鶴(うとぅづぃる)ゆ、美宣(みゅ)んさ事(ぐとぅ)担(かみ)てぃ踊(うどぅ)てぃ戻(むどぅ)ら。
歌
仇(かたち)討(う)ち取(とぅ)やい誇(ふく)てぃ戻(むどぅ)ゆすぃや
御慈悲(ぐじふぃ)ある御主(うしゅ)ぬ御蔭(うかぎ)然(さ)らみ