久志の若按司:本文 摩文仁親方作
謝名の大主
出(でぃ)よお来(ちゃ)る者(むぬ)や、天願(てぃんぐぁん)ぬ按司(あじ)ぬ頭役(かしらやく)為(しゅ)たる謝名(じゃな)ぬ大主(ううぬし)、ああ、浅(あさ)ましや此(く)ぬ身(み)黒髪(くるかみ)に雪(ゆち)ぬ、積(つぃむ)る年(とぅし)迄(までぃ)ん人(ふぃちゅ)ぬ下知(ぎち)受(う)きてぃ、朝夕(あさゆ)胸内(んにうち)に煙(ちむり)立(た)たゆりか、主人(しゅじん)討(う)ち果(は)たち、按司(あじ)ぬ身(み)に成(な)やい、夢(いみ)ぬ間(ま)ぬ浮世(うちゆ)楽(らく)為(すぃ)らんとぅ思(む)てぃ、色欲(しきゆく)ゆ進(すぃすぃ)み飽(あ)ち無者(もおか)がやり、討(う)ち取(とぅ)らんてぃやり様々(さまざま)に為(しゅ)すぃが、聞(ち)ち立(た)ちん為(すぃ)らん義理(ぢり)守(まむ)てぃ居(うぅ)りば、願事(にげぐとぅ)や叶(かな)ん気(ち)ぬ毒(どぅく)どぅ有(や)たる、はあ、去(ぃん)ぢゃる三日(みっか)に原(もお)遊(あすぃ)び勧(すぃすぃ)み遣(や)り、戻(むどぅ)る道中(みちなか)に伏勢(ふくぜえ)ゆ置(う)ちゅてぃ、思(う)むた如(ぐとぅ)按司(あじ)や討(う)ち済(すぃ)まち有(あ)すぃが、城内(ぐすぃくうち)生(な)し子(ぐぁ)跡形(あとぅかた)ん無(ね)らん、気(ち)ぬ毒(どぅく)どぅ有(や)ゆる気障(ちざわ)りどぅ有(や)ゆる、やあ、富盛(とぅみむり)大主(ううぬし)、川崎(かわさち)ぬ輩(ひゃあ)、平田(ふぃらた)ぬ子(し)。
富盛・川崎・平田
ふう。
謝名の大主
やあ、思(うむ)た事(くとぅ)叶(かな)てぃ按司(あじ)ん討(う)ち果(は)たち、楽(らく)ん楽(らく)選(いら)でぃ誇(ふく)らしゃどぅ有(あ)すぃが、城内(ぐすぃくうち)生(な)し子(ぐぁ)跡形(あとぅかた)ん無(ね)らん、又(また)久志(くし)ぬ若按司(わかあじ)や天願(てぃんぐぁん)ぬ別(わか)り、嫡家(ちゃくや)滅(ふるぶ)さり唯(ただ)痛(や)でぃや居(うぅ)らん、天願(てぃんがん)ぬ若按司(わかあじ)助(たすぃ)きやい二人(ふたい)、命(いぬち)振(ふ)り捨(すぃ)ててぃ弓(ゆみ)引(ふぃ)ちゅらとぅ思(み)ば、気障(ちざわ)りどぅ有(や)ゆる事(くとぅ)障(ざわ)りでむぬ、先(ま)ずぃ久志(くし)ぬ城元(ぐすぃくむとぅ)に軍(いくさ)押(う)し寄(ゆ)してぃ、急(いす)ぢ若按司(わかあじ)討(う)ち果(は)たちからに、天願(てぃんぐぁん)ぬ生(な)し子(ぐぁ)探(さげ)し改(あらた)みてぃ、根葉(にふぁ)ん刈(か)り捨(すぃ)ててぃ、我肝(わぢむ)休(やすぃ)ま。
富盛・川崎・平田
拝(うぅが)ん留(とぅ)み有侍(やび)てぃ。
平田の子
はあ、召(み)しぇえる如(ぐとぅ)、彼(あ)ぬ二人(ふたい)世界(しけ)に生(い)ちてぃ置(う)ちからや、後々(あとぅあとぅ)ぬ障(さわ)り御気遣(うきづぃ)けどぅ有(や)ゆる、片時(かたとぅち)ん急(いす)ぢ討(う)ち取(とぅ)やい来侍(ちゃび)ら。
富盛大主
やあ、按司愛(あじがな)し、久志(くし)ぬ若按司(わかあじ)や世界(しけ)に立(た)ち抜(ぬ)ぎてぃ、義理(ぢり)ん分別(ぶんびつぃ)ん人並(ふぃちゅな)みや有(あ)らん、又(また)彼(あ)ぬ大親(うふうや)立川(たちかわ)ぬ大主(うふぬし)とぅ砂田(すぃなだ)ぬ子(し)二人(たい)や、世間(しきん)沙汰(さた)為(さ)りる強者(つぃわむん)ゆ有(や)りば、自由(じゆ)に討(う)ち取(とぅ)ゆる敵(てぃち)や又(また)有(あ)らん、天願(てぃんぐぁん)ぬ城(ぐすぃく)討(う)ちゆ滅(ふるぶ)しゃい御万人(うまんちゅ)ぬ心(くくる)落(う)てぃ着(つぃ)かん内(うち)に、城(ぐすぃく)立(た)ち出(ぃん)ぢてぃ城(ぐすぃく)離(はな)りやい、遥々(はるばる)とぅ久志(くし)に軍(いくさ)押(う)し寄(ゆ)してぃ、若(む)しか此(く)ぬ城(ぐすぃく)一大事(いちでじ)ぬ有(あ)らば、百(むむ)悔(く)やみ為(し)ちん益(いき)や又(また)無(ね)さみ、今(なま)程(ふどぅ)や城(ぐすぃく)堅(かた)く打(う)ち守(まむ)てぃ、時節(じしつぃ)計(はか)れ遣(や)り軍(いくさ)寄(ゆ)し有侍(やび)ら。
川崎のひや
やあ、按司愛(あじがな)し、久志(くし)ぬ城元(ぐすぃくむとぅ)軍(いくさ)寄(ゆ)しゆすぃや、大主(うふぬし)ぬ言(ぃや)りる如(ぐとぅ)先止(さちどぅ)みに召(み)しょち、急(いす)ぢ島々(しまじま)に回文(かいぶん)ゆ通(とぅう)ち、天願(てぃんぐぁん)ぬ生(な)し子(ぐぁ)生(い)ち捕(どぅ)いに取(とぅ)やい、久志(くし)ぬ若按司(わかあじ)ぬ降参(こおさん)ゆ為(しゅ)らば、天願(てぃんぐぁん)ぬ生(な)し子(ぐぁ)帰(けえ)ち渡(わた)さてぃやり、久志(くし)ぬ若按司(わかあじ)に文(ふみ)ゆ使(つぃか)わさば、泣(な)く泣(な)くん此処(くま)に降(くだ)てぃ来(く)ん為(しゅ)むぬ、其(う)ぬ時(とぅち)に二人(ふたい)殺(くる)ち捨(すぃ)てぃ有侍(やび)ら。
謝名の大主
やあ、大主(うふぬし)、やあ、川崎(かわさち)、言(ぃゆ)る事(くとぅ)ゆ聞(ち)きば理(くとぅわり)どぅ有(や)ゆる、急(いす)ぢ手(てぃ)割(わ)けえに島々(しまじま)ゆ回(まわ)てぃ、天願(てぃんぐぁん)ぬ生(な)し子(ぐぁ)搦(から)み出(ぢゃ)す者(むぬ)や、取(とぅ)り位(くれ)ん付(つぃ)きてぃ島知行(しまちぎょ)ん呉(くぃ)ゆん、若(む)し隠(かく)ち置(う)く者(むぬ)や、一門(いちむん)や実(だに)ゆ引(ふぃ)ち同胞(はろじ)迄(までぃ)ん、生(い)ち責(じ)みゆ為(しゅ)んでぃ堅(かた)く言(い)い渡(わた)ち、片時(かたとぅち)ん早(ふぇえ)く搦(から)み出(ぃん)ぢゃち来(く)う。
富盛大主
拝(うぅが)ん留(とぅ)み有侍(やび)てぃ。
謝名の大主
とおとお、急(いす)ぢ急(いす)ぢ。
歌
生(ぅん)まりらん生(ぅん)まり 妹様(うみない)とぅ我身(わみ)や
朝夕(あさゆ)血(ち)ぬ涙(なみだ) 袖(すでぃ)ゆ濡(ぬ)らち
天願の若按司
天願(てぃんぐぁん)ぬ生(な)し子(ぐぁ)千代松(ちゆまつぃ)どぅ有(や)ゆる、按司添(あじすい)が事(くとぅ)や謝名(じゃな)ぬ大主(うふにし)に、殺(くる)さりゆ召(み)しょち哀(あわ)り母前(あやめえ)ん、乱(みだ)り矢(や)に当(あ)たてぃ消(ち)いゆ果(は)てぃ召(み)しょち、二所(たとぅくる)ぬ親(うや)に捨(すぃ)てぃらりてぃ居(うぅ)りば、貴(あてぃ)無(な)しぬ妹様(うみない)朝夕(あさゆ)泣(な)ち暮(く)らち、百(むむ)縋(すぃが)い縋(すぃが)てぃ離(はな)す事(くとぅ)無(ね)らん、我肝(わぢむ)消(ち)い消(ぢ)いとぅ互(たげ)に袖(すでぃ)絞(しぶ)てぃ、死(し)に病(や)んてぃやい為(しゅ)すぃが親(うや)ぬ敵仇(てぃちかたち)、討(う)たな徒(いたづぃ)らに死(し)にん又(また)成(な)らん、久志(くし)ぬ若按司(わかあじ)や我(わ)が従兄弟(いちく)有(や)りば、彼(あ)り頼(たぬ)でぃからに忍(しぬ)び隠(かく)りやい、時節(じしつぃ)待(ま)ち受(う)きてぃ敵(てぃち)討(う)たんとぅ思(む)てぃ、妹様(うみない)ゆ連(つぃ)りてぃ忍(しぬ)でぃ行(い)ちゅん。
歌
久志(くし)ぬ城元(しるむとぅ)や 東表(あがいむてぃ)でむぬ
太陽(てぃだ)上(あ)がる方(かた)に 尋(とぅ)めてぃ行(い)ちゅん
乙鶴
やあ、兄前(すぃいざ)前(め)ゆ、長路(ながみち)ぬ疲(つぃか)り足(ふぃさ)ん引(ふぃ)かりらん、此処(くま)に足(ふぃさ)淀(ゆどぅ)てぃ暫(しば)し休(やすぃ)みゃ侍(び)ら。
天願の若按司
やあ、妹君(うみない)ゆ、夜(ゆ)ん暮(く)りてぃ居(うぃ)りば此処(くま)居(うく)てぃ休(やすぃ)まに、彼(あ)ぬ村(むら)に頼(たゆ)てぃ足(あし)ゆ休(やすぃ)ま、とおとお、気張(ちば)り気張(ちば)り。此(く)ぬ屋戸(やどぅ)ぬ内(うち)に物(むぬ)ゆ御宣(うんにゅ)きら。
宿主
誰(たる)が有(や)ゆら。
天願の若按司
哀(あわ)り首里方(しゅいかた)ぬ者(むぬ)どぅ有(や)や侍(び)すぃが、闇(やみ)ぬ夜(ゆ)ぬ暗(くら)さ行(い)く先(さち)ん見(ん)らん、御情(うなさ)きに一夜(いちや)借(か)らち給(たぼ)り。
宿主
やあ、如何(いちゃ)る事(くとぅ)有(あ)とぅてぃ童(わらび)貴(あてぃ)無(な)しぬ、唯(ただ)二人(ふたい)連(つぃ)りてぃ何処(ま)かい行(い)ちゅが。
天願の若按司
国頭(くんぢゃん)に思(う)む事(くとぅ)ぬ有(あ)てぃどぅ行(い)ちゃ侍(び)すぃが、闇(やみ)ぬ夜(ゆ)ぬ暗(くら)さ行(い)く先(さち)ん見(ん)らん、頼(たぬ)でぃ御情(うなさ)きに借(か)らち給(たぼ)り。
宿主
はあ、見(ん)りば此(く)ぬ二人(ふたい)只(ただ)ぬ人(ちゅ)や有(あ)らん、確(たし)か天願(てぃんぐぁん)ぬ思(う)みん子(ぐぁ)どぅ有(や)ゆる、見(ん)ちゃる目(み)ぬ痛(いちゃ)さ助(たすぃ)き欲(ぶ)しゃ有(あ)すぃが、天願(てぃんぐぁん)ぬ生(な)し子(ぐぁ)隠(かく)ち置(う)く者(むん)や、一門(いちむん)や実(だに)ゆ引(ふぃ)ち同胞(はろじ)迄(までぃ)ん、切(ち)り殺(くる)ち捨(すぃ)てぃらりん與呼(てぃや)り御触(うふ)りぬ有(あ)むぬ、此処(くま)からや急(いす)ぢ出(ぃん)ぢてぃ給(たぼ)り。
天願の若按司
やあやあ、闇(やみ)ぬ夜(ゆ)ぬ暗(くら)さ雪霜(ゆちしむ)や降(ふ)ゆり、頼(たん)でぃ御情(うなさ)きに借(か)らち給(たぼ)り。
いや、思(う)み子(ぐぁ)宿(やどぅ)借(か)らち我(わ)が命(いぬち)取(とぅ)ゆみ、とおとお、急(いす)ぢ出(ぃん)ぢてぃ給(たぼ)り。
天願の若按司
やあやあ。
宿主
いや、成(な)らん成(な)らん。
歌
あきよ憂(う)ち苦(くり)しゃ、妹君(うみない)とぅ我身(わみ)や、
巣(すぃ)無(な)き鳥心(とぅいぐくる)、宿(やどぅ)る方(かた)無(ね)らん、
冬(ふゆ)ぬ夜(ゆ)ぬ縁(ゆすぃが)、雪霜(ゆちしむ)に濡(ぬ)りてぃ、
馴(な)りん山路(やまみち)や、歩(あゆ)でぃ歩(あゆ)まらん、
目元(みむとぅ)暗々(くらぐら)とぅ、成(な)るが心気(しんち)。
乙鶴
やあ、兄前(すぃいざめ)ゆ、何(ぬ)がすぃ兄前(すぃいざめ)や足(あし)迷(まみ)ぢ召(み)しょる。
天願の若按司
やあ、妹君(うみない)ゆ、此(く)ぬ間(ええ)ぬ疲(つぃか)り足(あし)ん引(ふぃ)かりらん、我肝(わぢむ)消(ち)い消(ぢ)いとぅ成(な)やい行(い)ちゅん。
乙鶴
やあ、兄前(すぃいざめえ)ゆ、山路(やまみち)や暗(くら)さ雪霜(ゆちしむ)ん降(ふ)ゆり、御気張(うちば)りゆ召(み)しょち村(むら)に出(ぃん)ぢ有侍(やび)ら。
天願の若按司
やあ、妹君(うみない)ゆ、村(むら)便(たゆ)てぃてぃやり哀(あわ)り此(く)ぬ二人(たい)に、片時(かたとぅち)ん宿(やどぅ)ゆ借(か)らしゅすぃや居(うぅ)らん、やあ、妹君(うみない)ゆ、此(く)ぬ間(ええ)ぬ疲(つぃか)り歩(あゆ)でぃ歩(あゆ)まらん、躓(つぃまづぃ)てぃ消(ち)果(は)てぃる露(つぃゆ)ぬ身(み)どぅ有(や)すぃが闇(やみ)ぬ山路(やまみち)に捨(すぃ)てぃてぃ先(さち)成(な)らば、当(あ)てぃ無(な)しぬ妹君(うみない)や如何(いちゃ)が為(しゅ)ゆら。
乙鶴
やあ、兄前(すぃいざめ)ゆ兄前(すぃいざめ)ゆ、何(ぬ)がし兄前(すぃいざめ)や物言(むぬい)声(ぐぃ)ん無(ね)らん。
歌
あき、如何(いちゃ)が成(な)ゆら。
富盛大主
此(く)りや富盛大主(とぅみむりうふぬし)、天願(てぃんぐぁん)ぬ生(な)し子(ぐぁ)探(さげ)し改(あらた)みに、夜昼(ゆるふぃる)ん掛(か)きてぃ島々(しまじま)に行(い)ちゅん、とおとお、急(いす)が急(いす)が。
供両人
御供(うとぅむ)為侍(しゃび)ら。
富盛大主
やあ、如何(いちゃ)る事(くとぅ)有(あ)とぅてぃ童(わらび)貴(あてぃ)無(な)しぬ、斯如(かにゃ)る山路(やまみち)に声(くぃい)立(た)てぃてぃ泣(な)ちゅが。
天願の若按司
やあやあ、哀(あわ)り此(く)ぬ二人(たい)や首里方(しゅいかた)ぬ者(むぬ)ゆ、国頭(くにがみ)に思(う)む事(くとぅ)ぬ有(あ)てぃどぅ行(い)ちゃ侍(び)すぃが、闇(やみ)ぬ夜(ゆ)ぬ暗(くら)さ行(い)く先(さち)ん見(ん)らん、一夜(ちゅや)明(あ)かさてぃやり此処(くま)に居(うぅ)ゆる。
富盛大主
やあ、供(とぅむ)ぬ達(ちゃあ)、見(ん)りば此(く)ぬ二人(ふたい)只(ただ)ん人(ちゅ)や有(あ)らん、天願(てぃんぐぁん)ぬ生(な)し子(ぐぁ)疑(うたげ)えや無(ね)らん、とおとお、急(いす)ぢ縄(なわ)ゆ掛(か)きり。
供両人
拝(うぅが)ん留(とぅ)み有侍(やび)てぃ。
天願の若按司
やあやあ、天願(てぃんぐぁん)ぬ若按司(わかあじ)や謝名(じゃな)ぬ大主(うふぬし)ぬ、許(ゆる)ち許(ゆる)さらん敵仇(てぃちかたち)有(や)りば、真(まく)とぅ天願(てぃんぐぁん)ぬ生(な)し子(ぐぁ)どぅん有(や)らば、縄(なわ)ん掛(か)きゆらば如何程(いかふどぅ)ん掛(か)きり、人間違(ちゅまげ)えゆ召(み)しょち罪科(つぃみとぅが)ん無(ね)らん此(く)ぬ二人(ふたい)に、何故(ぬゆ)でぃ縄(なわ)ゆ掛(か)き召(み)しぇが、細(みすぃ)く見分(みわ)きやい許(ゆる)ち給(たぼ)り。
富盛大主
いや、人違(ちゅちげ)えん有(あ)らん見済(んすぃ)まちどぅ居(うぅ)ゆる、己達(うがたち)どぅ尋(とぅ)める道中(どおちゅう)どぅ有(や)たる、責(し)み縄(なわ)ぬ緩(うる)さ今少(にゃふぃん)込(く)ん締(し)みり。
供両人
如何(いちゃ)が如何(いちゃ)が。
天願の若按司
此(く)ぬ涯(ちわ)ゆ有(や)りば、隠(かく)ち隠(かく)さらん、実(じつぃ)ゆ現(あらわ)りてぃ願(にげ)ゆ御宣(うんにゅ)きら、真(まく)とぅ天願(てぃんぐぁん)ぬ若按司(わかあじ)どぅ有(や)ゆる、此(く)りや守(む)い役(やかあ)生(な)し子(ぐぁ)乙鶴(うとぅづぃる)ゆ、運(うん)足(た)らん我身(わみ)とぅ連(つぃ)りてぃ来(ちゃ)る故(ゆい)に、罪科(つぃみとぅが)ん無(ね)らん縄(なわ)ゆ掛(か)かゆすぃや、肝(ちむ)ん肝(ちむ)成(な)らん事(くとぅ)ゆ又(また)でむぬ、我身(わみ)や責(し)みゆらば如何程(いかふどぅ)ん責(し)みり、当(あ)てぃ無(な)しぬ此(く)りや許(ゆる)ち給(たぼ)り。
富盛大主
いや、推参(すぃいさん)な事(くとぅ)言(い)うな、
供両人
さあさあ、立(た)ちょおり立(た)ちょおり。
天願の若按司
ああ、口惜(くちう)しゃ残念(ざんにん)、義理(ぢり)情(なさ)き知(し)らん野心(やしん)な奴腹(やつぃばら)。
富盛大主
生(なま)賢(ざか)し下人(んざ)ぬ言(ぃゆ)る事(くとぅ)ぬ憎(にく)さ、責(し)み縄(なわ)ぬ緩(うる)さ今少(にゃふぃん)込(く)ん締(し)みり。
供両人
拝(うぅが)ん留(とぅ)み有侍(やび)てぃ、如何(いちゃ)が如何(いちゃ)が、さあさあ、歩(あゆ)み歩(あゆ)み。
歌
何(ぬ)ぬ罪(つぃみ)ん無(ね)らん 敵(てぃち)ぬ手(てぃ)に掛(か)かてぃ
哀(あわ)り生殺(なまぐる)し 為(さ)りるとぅ思(み)ば
富盛大主
やあ、供(とぅむ)ぬ達(ちゃあ)、島々(しまじま)ゆ廻(まわ)てぃ里々(さとぅさとぅ)ゆ巡(みぐ)てぃ、此(く)ぬ間(ええ)ぬ疲(つぃか)り足(あし)怠(だる)さ有(あ)むぬ、東恩納(あがりうんな)番所(ばんじゅ)に一夜(ふぃちゅゆ)明(あ)かさ。
供両人
拝(うぅが)ん留(とぅ)み有侍(やび)てぃ。
富盛大主
とおとお、急(いす)が急(いす)が。
供
さあさあ、急(いす)ぢ急(いす)ぢ。
供
さあさあ、歩(あゆ)み歩(あゆ)み。
久志の若按司
出(でぃ)よお来(ちゃ)る者(むぬ)や久志(くし)ぬ若按司(わかあじ)、天願(てぃんぐぁん)ぬ按司(あじ)や御運(ぐうん)尽(つぃ)ち果(は)てぃてぃ、謝名(じゃな)ぬ大主(うふぬし)ぬ謀叛事(むふんぐとぅ)企(たく)でぃ、按司(あじ)ん女按司(うなじゃら)ん殺(くる)さりゆ召(み)しょち、果敢(はか)なさや嫡子(ちゃくし)千代松(ちゆまつぃ)が事(くとぅ)どぅ、野山(ぬやま)から下(くだ)い探(さげ)えしゅん與呼(てぃや)り、語(かた)り部(び)ぬ有(あ)とぅてぃ今(なま)どぅ吾(わ)ね聞(ち)ちゅる、ああ、口惜(くちう)しゃ残念(ざんにん)、やあ、大主(うふぬし)、やあ、砂田(すぃなだ)ぬ子(し)、身(み)に替(け)えてぃ千代松(ちゆまつぃ)や助(たすぃ)きらん為(しゅ)むぬ、片時(かたとぅち)ん急(いす)ぢ島々(しまじま)ゆ廻(まわ)てぃ、千代松(ちゆまつぃ)が行方(ゆくい)尋(たずぃ)出(ぃん)ぢゃちからに、敵(てぃち)討(う)ちゅる事(くとぅ)に計(はか)れ給(たぼ)り。
立川の大主
砂田の子
拝(うぅが)ん留(とぅ)み有侍(やび)てぃ。
立川の大主
やあ、按司愛(あじがな)し、此(く)ぬ事(くとぅ)や少(いふぃ)ん油断(ゆだん)為(すぃ)や済(すぃ)まん、急(いす)ぢ手分(てぃわ)けえに島々(しまじま)ゆ廻(まわ)てぃ、若按司(わかあじ)ぬ御行方(うゆくぃ)尋(たずぃ)にやい来(ちゃ)侍(び)ら。
久志の若按司
やあ、大主(うふぬし)、此(く)ぬ仕度(したく)為(し)ちや尋(たずぃ)にや成(な)らん、互(たげ)に打(う)ち窶(やつぃ)り忍(しぬ)ぶ編(あ)み笠(がさ)に、深(ふか)く顔(かう)隠(かく)ち急(いす)ぢ出(ぃん)ぢら。
立川の大主
拝(うぅが)ん留(とぅ)み有侍(やび)てぃ。
久志の若按司
やあ、大主(うふぬし)、やあ、砂田(すぃなだ)ぬ子(し)、手配(てぃくば)いぬ如(ぐとぅ)に美里(みさとぅ)から越来(ぐぃいく)、具志川(ぐしちゃあ)、与那城(ゆなぐすぃく)、勝連(かつぃりん)に忍(しに)ば。
立川の大主
とおとお、御供(うとぅむ)為侍(しゃび)ら。
歌
命(いぬち)限(かぎ)りぬ出(ぃん)ぢ立(た)ちに 有(あ)りし様(さま)替(か)え編(あ)み笠(がさ)に 深(ふか)く面(うむてぃ)うぅ隠(かく)してぃず 久志(くし)ぬ山路(やまみち)分(わ)き出(ぃん)ぢてぃ 行(い)きば程(ふどぅ)無(な)く金武(ちん)ぬ寺(てぃら) 御宮(うみや)立(た)ち寄(ゆ)り伏(ふ)し拝(うぅが)み 南無(なむ)や観音大菩薩(かんぬんだいぶさつぃ) 慈悲(じふぃ)ぬ功徳(くどぅく)や千代松(ちゆまつぃ)に 急(いす)ぢ引(ふぃ)ち合(あ)わし給(た)ぼりてぃやり 心(くくる)に念(にん)じ礼拝(りいふぇえ)し 去来(いざ)や去来(いざ)やとぅ 立(た)ち出(ぃん)ぢてぃ 伊芸(いぎ)や屋嘉村(やかむら)行(い)ち過(すぃ)ぢてぃ 歩(あゆ)み兼(か)にたる七日浜(なぬかはま) 石川(いしちゃあ)走(は)い川(かあ)打(う)ち渡(わた)てぃ うぃい 今(なま)どぅ美里(みさとぅ)ぬ伊波村(いはむら)に急(いす)ぢ急(いす)ぢてぃ忍(しぬ)でぃ来(ちゃ)る。
砂田の子
さり、美里(みさとぅ)伊波村(いはむら)に着(つぃ)ちゃ侍(び)たん。
久志の若按司
とおとお、屋戸屋戸(やどぅやどぅ)ぬ数(かずぃ)や残(ぬく)らずぃに忍(しぬ)ば。
砂田の子
拝(うぅが)ん留(とぅ)み有侍(やび)てぃ。
砂田の子
さり、天願(てぃんぐぁん)ぬ若按司(わかあじ)とぅ思(う)み妹(ない)ぬ前(めえ)や、富盛大主(とぅみむりうふぬし)ぬ生(い)ち捕(どぅ)りに取(とぅ)やい、東恩納(あがりうんな)番所(ばんしゅ)に宿(やどぅ)借(か)やい居(うぅ)んでぃ、此(く)ぬ村(むら)ぬ頭(かしら)から細々(くまぐま)聞(ち)ちゃ侍(び)たん。
久志の若按司
嗚呼(ああ)、尊(とお)と、願(にが)た事(くとぅ)叶(かな)てぃ今(なま)ぬ引合(ふぃちゃ)わしや、真(まく)とぅ観音(くぁんぬん)ぬ御助(うたすぃ)きどぅ有(や)ゆる、とおとお、油断(ゆだん)しや済(すし)まん、急(いす)が急(いす)が。
立川の大主
砂田の子
御供(うとぅむ)為侍(しゃび)ら。
久志の若按司
やあやあ、東恩納(あがりうんな)番所(ばんしゅ)に着(つぃ)ちゃん、やあ、砂田(すぃなだ)の子(し)、事(くとぅ)多(うふ)さ為(し)ちや大事(でじ)有(あ)らん為(しゅ)むぬ、謝名(じゃな)ぬ使(つぃ)けてぃやり出(だ)し抜(ぬ)ぢゃい出(ぃん)ぢゃし、我身(わみ)や此処(くま)なかい待(ま)ち受(う)きてぃ居(うぅ)とぅてぃ、憎(にく)い生(い)ち輩(やから)切(ち)り殺(くる)ち捨(すぃ)てぃら。
砂田の子
拝(うぅが)ん留(とぅ)み有侍(やび)てぃ。
久志の若按司
やあ、立川(たちかあ)の大主(うふぬし)や、勝手(かってぃ)から忍(しぬ)でぃ内(うち)に踏(ふ)み入(い)やい、急(いす)ぢ千代松(ちゆまつぃ)連(つぃ)りてぃ参(もお)り。
立川の大主
拝(うぅが)ん留(とぅ)み有侍(やび)てぃ。
砂田の子
やあ、富盛大主(とぅみむりうふぬし)、按司愛(あじがな)し御遣(うつぃ)けに下(くだ)てぃ来(ちゃあ)侍(び)たん。
富盛大主
按司愛(あじがな)し御遣(うつぃ)け有(や)たるが有(や)ゆら。
久志の若按司
やあ、富盛(とぅみむい)、久志(くし)ぬ若按司(わかあじ)知(し)っち居(うぅ)たみ。
富盛大主
はあ、何事(ぬうくとぅ)が有(や)ゆら。
砂田の子
いや、悪欲(あくゆく)ぬ報(むく)い今(なま)どぅ思(う)み知(し)ゆら、如何(いちゃ)が如何(いちゃ)が。
天願の若按司
やあ、兄前(すぃいざめ)ゆ。
歌
斯如(かにゃ)る引合(ふぃちゃ)わしや 夢(いみ)が有(や)ゆら。
天願の若按司
やあ、兄前(すぃいざめ)ゆ、謝名(じゃな)ぬ大主(うふぬし)ぬ謀叛事(むふんぐとぅ)企(たく)でぃ、按司添(あじし)ん母前(あやめ)ん殺(くる)さりゆ召(み)しょち残(ぬく)る此(く)ぬ二人(たい)ん殺(くる)さ為(しゅ)んてぃやり、野山(ぬやま)から下(くだ)り探(さげ)しゅんでぃ有(あ)りば、頼(たぬ)む方(かた)居(うぅ)らん宿(やどぅ)る方(かた)無(ね)らん、思(う)み妹(ない)とぅ二人(ふたい)兄前(すぃいざめ)ゆ尋(とぅ)めてぃ、寄(ゆ)しりゆる道中(どちゅ)に彼(あ)ぬ輩(やから)無残(むざ)に、生(い)ち捕(どぅ)いに取(とぅ)らり殺(くる)さりる命(いぬち)、斯如(かにゃ)る御助(うたすぃ)きや夢(いみ)が有(や)や侍(びい)ら。
久志の若按司
やあ、千代松(ちゆまつぃ)や乙鶴(うとぅづぃる)ゆ、按司添(あじし)ん母前(あやめ)ん御運(ぐうん)尽(つぃ)ち果(は)てぃてぃ、謝名(じゃな)ぬ手(てぃ)に掛(か)かてぃ殺(くる)さりゆ召(み)しょち、ああ、口惜(くちう)しゃ残念(ざんにん)、やあ、千代松(ちゆまつぃ)ゆ、泣(な)かんてゃい如何(ちゃ)為(しゅ)が互(たげ)に思(う)み切(ち)やい、急(いす)ぢ我(わ)が城(しる)に立(た)ち戻(むどぅ)てぃ居(うぅ)とぅてぃ、時節(じしつぃ)待(ま)ち受(う)きてぃ敵(てぃち)ゆ討(う)ち取(とぅ)らに。
天願の若按司
やあ、兄前(すぃいざめ)ゆ、良(ゆ)たしゃ有(あ)る様(よお)に、御計(うはか)れゆ召(み)しょり。
立川の大主
ああ、拝(うぅが)でぃ懐(なつぃ)かしゃや袖(すでぃ)ぬ涙(なみだ)、やあ、若按司(わかあじ)ぬ前(め)、互(たげ)に肝(ちむ)揃(する)てぃ御腰立(うくしだ)ち為(すぃ)らば、仇(かたち)討(う)ち取(とぅ)ゆすぃ手(てぃ)ぬ内(うち)どぅ有侍(やび)る。
天願の若按司
良(ゆ)たしゃ有(あ)る様(よお)に計(はか)れやい給(たぼ)り。
立川の大主
拝(うぅが)ん留(とぅ)み有侍(やび)てぃ。
久志の若按司
やあ、千代松(ちゆまつぃ)、悪(あく)企(たく)む輩(やから)生(い)ちてぃ置(う)ち成(な)らん。肝(ちむ)ぬ飽(あ)く儘(まま)に殺(くる)ち捨(すぃ)てぃり。
富盛大主
やあ、按司愛(あじがな)し、願事(にげぐとぅ)ぬ有(あ)むぬ御宣(うんにゅ)かてぃ給(たぼ)り、今日(ちゅう)からや心(くくる)引(ふぃ)ちゆ改(あらた)みてぃ、夜昼(ゆるふぃる)ん御奉公(みゃでり)働(はたら)かん為(しゅ)むぬ、露(つぃゆ)ぬ身(み)ぬ命(いぬち)助(たすぃ)きやい給(たぼ)り。
久志の若按司
悪(あく)企(たく)む下人(んざ)とぅ肝(ちむ)合(あ)わち居(うぅ)たる、罪科(つぃみとぅが)ぬ如何(いちゃ)し許(ゆる)ち許(ゆる)さりが、やあ、千代松(ちゆまつぃ)、とおとお、急(いす)ぢ殺(くる)ち捨(すぃ)てぃり。
富盛大主
やあ、押(う)し返(けえ)し返(けえ)し畏(うとぅる)しゃどぅ有(あ)すぃが、頼(たん)でぃ願事(にげぐとぅ)や御宣(うんにゅ)かてぃ給(たぼ)り、謝名(じゃな)が悪欲(あくゆく)ぬ罪深(つぃみふか)さ有(あ)る事(くとぅ)や、予(か)にてぃから我身(わみ)ん知(し)り尽(づぃ)くどぅ有(や)すぃが、彼(あ)りが為情(しなさ)きん受(う)きてぃ居(うぅ)る故(ゆい)に、捨(すぃ)てぃてぃ捨(すぃ)てぃららん頼(たん)でぃ居(うぅ)有侍(やび)たる、ああ、今(なま)切(ち)りる命(いぬち)御助(うたすぃ)きぬ有(あ)らば、此(く)ぬ御恩(ぐうん)美拝(みふぇ)や何時(いつぃ)すぃ忘(わすぃ)有侍(やび)が、慈悲(じふぃ)ゆ御情(うなさ)きに許(ゆる)ち給(たぼ)り。
久志の若按司
やあ、大主(うふぬし)、やあ、砂田(すぃなだ)の子(し)、富盛大主(とぅみむいうふぬし)ぬ願事(にげぐとぅ)ゆ聞(ち)きば、殺(くる)しゅすぃや忍(しぬ)ばらん肝苦(ちむぐり)しゃ有(あ)むぬ特(とぅく)とぅ此(く)ぬ事(くとぅ)や考(かんげ)えてぃ給(たぼ)り。
立川の大主
やあ、按司愛(あじがな)し、此(く)ぬ輩(やから)下人(んざ)ぬ今(なま)ぬ云言葉(いくとぅば)や、偽(いつぃわ)りどぅ有(や)ゆる許(ゆる)ち済(すぃ)ま侍(び)らん、急(いす)ぢ引(ふぃ)ち立(た)てぃてぃ殺(くる)ち捨(すぃ)てぃ有侍(やび)ら。
久志の若按司
やあ、大主(うふぬし)、人(ふぃちゅ)ぬ生(い)ち死(し)にに掛(か)かる願事(にげぐとぅ)や、身(み)ぬ上(ぅうぃ)に引(ふぃ)ち当(あ)てぃ思(うむ)らにば済(すぃ)まん、富盛(とぅみむい)ぬ大主(うふぬし)ぬ露(つぃゆ)ぬ身(み)ぬ命(いぬち)、慈悲(じふぃ)ゆ為(し)ち我身(わみ)ぬ助(たすぃ)きゆる上(ぅうぃい)に、義理(ぢり)背(すむ)ち如何(いちゃ)し謀叛(むふん)企(くわだ)ちゅが、此(く)ぬ事(くとぅ)や尽々(つぃくづぃく)とぅ料簡(りょおけん)ゆ為(さ)りり。
立川の大主
ああ、召(み)しぇえる如(ぐとぅ)、命(いぬち)ゆり重(うむ)さ有(あ)る物(むぬ)や有(あ)や侍(び)らん、やあ、砂田(すぃなだ)ぬ子(し)、仰(うう)し事(ぐとぅ)篤(とぅく)とぅ考(かんげ)えてぃ見(み)りば、此(く)ぬ程(ふどぅ)ぬ御慈悲(ぐじふぃ)蒙(こおむ)てぃぬ上(ぅうぃい)に、謀叛(むふん)企(くわだ)ちゅる肝(ちむ)ぬ忍(しぬ)ばりみ、とおとお、尽々(つぃくづぃく)とぅ汝(ぃやあ)ん考(かんげ)えてぃ見(ん)でぃゆ。
砂田の子
さり、按司愛(あじがな)し、やあ、大主(うふぬし)、此辺(くふぃ)な事(くとぅ)俄(にわ)かに決断(きちだん)や成(な)や侍(び)らん、籠舎(るうしゃ)締(し)み置(う)ちゅてぃ先(ま)ずぃ考(かんげ)えてぃ見有侍(みゃび)ら。
久志の若按司
やあ、砂田(すぃなだ)ぬ子(し)、富盛(とぅみむい)ぬ大主(うふぬし)ぬ命(いぬち)助(たすぃ)きやい、敵(てぃち)討(う)ちゅる計(はか)れ頼(たぬ)み欲(ぶ)しゃ有(あ)むぬ、是非(じふぃ)ゆ此(く)ぬ事(くとぅ)や我身(わみ)に打(う)ち任(まか)ち呉(くぃ)り、とおとお、疑(うたが)てぃや済(すぃ)まん我(わ)が下知(ぎち)ぬ如(ぐとぅ)に、急(いす)ぢ解(とぅ)き許(ゆる)し。
砂田の子
拝(うぅが)ん留(とぅ)み有侍(やび)てぃ。
富盛の大主
ああ、とおと、命(いぬち)助(たすぃ)かたる此(く)ぬ御恩(ぐうん)御拝(みふぇ)や、胸(んに)に思(う)み染(す)みてぃ胸(んに)に思(う)み留(とぅ)みてぃ、夜昼(ゆるふぃる)ん御奉公(みゃでり)、肝(ちむ)ん肝(ちむ)尽(つぃ)くち、百年(むむとぅ)在(わ)り千代(ちゅ)在(わ)り拝(うぅが)でぃ巣出(すぃでぃ)有侍(やび)ら。
久志の若按司
やあ、富盛(とぅみむい)ぬ大主(うふぬし)、謝名(じゃな)ぬ悪欲(あくゆく)ぬ罪(つぃみ)深(ふか)さ有(あ)すぃや、天願(てぃんぐぁん)ぬ按司(あじ)ぬ御情(うなさ)きや深(ふか)く、身(み)に余(あま)る迄(までぃ)ん蒙(こおむ)やい居(うぅ)とぅてぃ、謀叛(むふん)企(くわだ)ちゃい生(い)ち楽(らく)ゆ好(くぬ)む、罪科(つぃみとぅが)ぬ如何(いちゃ)し凌(しぬ)ぢ凌(しぬ)がりが、やあ、富盛大主(とぅみむいうふぬし)、天(てぃん)ぬ御助(うたすぃ)きか神(かみ)ぬ引合(ふぃちゃ)わしに、謝名(じゃな)が頭役(かしらやく)川崎(かわさち)ぬ輩(ひゃあ)が、謝名事(じゃなくとぅ)どぅ朝夕(あさゆ)酒(さき)とぅ色(いる)好(くぬ)み、百姓(ひゃくしょ)虐(した)ぎやい驕(うぐ)り日(ふぃ)に増(ま)さてぃ、御万人(うまんちゅ)ぬ間切(まぢり)泣(な)ちゆ恨(うら)みとぅてぃ、繰(く)い返(けえ)ち元(むとぅ)ぬ御代(みゆ)待(ま)ちゃい居(うぅ)むぬ、時節(じしつぃ)計(はか)れやい謝名(じゃな)ぬ首(くび)取(とぅ)やい、天願(てぃんぐぁん)ぬ御恥(うはじ)濯(すす)ぢ上(あ)ぎらちゃい、文(ふみ)ぬ通(かゆ)わしに内通(ねえつう)ぬ有(あ)むぬ、大主(うふぬし)や急(いす)ぢ立(た)ち戻(むどぅ)てぃからに、川崎(かわさち)ぬ輩(ひゃあ)とぅ二人(ふたい)語(かた)らやい、敵(てぃち)討(う)ちゅる計(はか)れ内通(ねえつう)ゆ為(さ)りり。
富盛の大主
拝(うぅが)ん留(とぅ)み有侍(やび)てぃ。
やあ、立川(たちかあ)ぬ大主(うふぬし)、川崎(かわさち)ぬ輩(ひゃあ)が、今(なま)ぬ如(ぐとぅ)有(や)りば、謝名(じゃな)ぬ首(くび)取(とぅ)ゆすぃ疑(うたげ)えや無(ね)らん、やあ、大主(うふぬし)、我身(わみ)や立(た)ち戻(むどぅ)てぃ謝名(じゃな)に返答(ふぃんとぅう)や、天願(てぃんぐぁん)ぬ若按司(わかあじ)や久志(くし)ぬ按司(あじ)頼(たゆ)てぃ、万事(ばんじ)敵(てぃち)討(う)ちゅる手組(てぃぐみ)為(しゅ)んてぃやい、語(かた)りどぅん為(すぃ)りば謝名(じゃな)ぬ大主(うふぬし)や、騒(さわ)ぢ驚(うどぅる)ちゃい攻(すぃ)みてぃ掛(か)かる筈(はじ)、其(う)ぬ時(とぅち)立川(たちかあ)ぬ大主(うふぬし)とぅ砂田(すぃなだ)ぬ子(し)二人(たい)や、強者(つぃわむぬ)ゆ引(ふぃ)ち連(つぃ)りてぃ金武(ちん)ぬ嶽(たき)なかい、伏(ふ)しゆ隠(かく)りとぅてぃ謝名(じゃな)が旗印(はたじるし)、伊芸(いぎ)屋嘉(やか)ぬ辺(あた)い走(は)い避(さ)ちる時分(じぶん)、一時(いっとぅち)に進(すぃすぃ)む道(みち)塞(ふさ)ぢ、息(いち)ん継(つぃ)かさじに平攻(ふぃらじ)みゆ為(さ)りり、又(また)川崎(かわさち)とぅ我身(わみ)や謝名(じゃな)が引(ふぃ)ち返(けえ)ち、逃(に)ぎゆ走(は)いゆらば、後(うし)る取(とぅ)り囲(かく)でぃ殺(くる)ち捨(すぃ)てぃら。
立川の大主
やあ、富盛大主(とぅみむいうふぬし)、今(なま)ぬ如(ぐとぅ)有(や)りば誇(ふく)らしゃどぅ有(や)ゆる、謝名(じゃな)が首(くび)取(とぅ)ゆすぃ疑(うたげ)えや無(ね)らん、頼(たん)でぃ此(く)ぬ事(くとぅ)や働(はたら)ちゃい給(たぼ)り。
久志の若按司
やあ、富盛大主(とぅみむいうふぬし)、今(なま)ぬ如(ぐとぅ)有(や)りば誇(ふく)らしゃどぅ有(や)ゆる、川崎(かわさち)ぬ輩(ひゃあ)とぅ二(ふたい)語(かた)らやい、細々(くまぐま)ぬ事(くとぅ)や内通(ねえつう)ゆ為(さ)りり。
富盛の大主
拝(うぅが)ん留(とぅ)み有侍(やび)てぃ。
やあ、按司愛(あじがな)し、此(く)ぬ事(くとぅ)や少(いふぃ)ん油断(ゆだん)しや済(すぃ)ま侍(び)らん、とおとお、御暇(ういとぅま)ゆ為侍(しゃび)ら。
久志の若按司
とおとお、肝(ちむ)ん肝(ちむ)添(すぃい)てぃ働(はたら)ちゃい給(たぼ)り。
富盛大主
拝(うぅが)ん留(とぅ)み有侍(やび)てぃ。
砂田の子
さり、按司愛(あじがな)し、富盛大主(とぅみむいうふぬし)ぬ謝名(じゃな)ぬ御情(うなさ)きや、数(かずぃ)てぃ数(かずぃ)知(し)らん身(み)に受(う)きてぃ居(うぅ)りば、縦令(たとぅい)寸々(すぃんずぃん)に刻(きざ)まりや為(し)ちん、謝名(じゃな)に打(う)ち背(すむ)ち何故(ぬゆ)でぃ降(くだ)や侍(び)が、今(なま)ぬ云言葉(いくとぅば)や偽(いつぃわ)りどぅ有(や)ゆる、急(いす)ぢ追(うぃ)い付(つぃ)きてぃ殺(くる)ち捨(すぃ)てぃ有侍(やび)ら。
立川の大主
はあ、暫(しば)し待(ま)てぃ、やあ、砂田(すぃなだ)の子(し)、富盛大主(とぅみむいうふぬし)ぬ偽(いつぃわ)いぬ上(ぅうぃい)に、抜(ぬ)ぢ返(けえ)ち討(う)ちゅる御計(うはか)れどぅ有(や)ゆる、強者(つぃわむん)ぬ間切(まぢり)金武嶽(きんだき)に遣(や)らち、千代松(ちゆまつぃ)とぅ我身(わみ)や城元(しるむとぅ)に残(ぬく)ち、討(う)ち取(とぅ)らんてぃやり企(たく)でぃ居(うぅ)る事(くとぅ)や、云言葉(いくとぅば)ぬ色(いる)に現(あらわ)りてぃ居(うぅ)くとぅ、偽(いつぃわ)いぬ上(ぅうぃい)に、謀(はか)り事(ぐとぅ)巡(みぐら)しゃい、抜(ぬ)ぢ返(けえ)ち討(う)ちゅる分別(ふんびつぃ)どぅ有(や)ゆる、又(また)川崎(かわさち)ぬ輩(ひゃ)、人(ふぃちゅ)に勝(すぐ)りとぅる強者(つぃわむいぬ)どぅ有(や)りば、後々(あとぅあとぅ)ぬ障(さわ)い彼(あ)り生(い)ちてぃ置(う)きや、謝名(じゃな)に打(う)ち勝(か)ちゅる計(はか)れえや成(な)らん、此(く)ぬ事(くとぅ)や一期(いちぐ)気(ち)に掛(か)かてぃ居(うぅ)てぃどぅ、謝名(じゃな)ぬ手(てぃ)に掛(か)きてぃ殺(くる)さとぅ思(む)てぃ、富盛大主(とぅみむいうふぬし)出(だ)し抜(ぬ)ぎに抜(ぬ)ぢゃる。
砂田の子
はあ、今(なま)ぬ御計(うはか)れぬ有(あ)る事(くとぅ)や我身(わみ)ぬ、予(か)にてぃ夢程(いみふどぅ)ん知(い)らん有(あ)や侍(び)たん。
立川の大主
やあ、按司愛(あじがな)し、此(く)ぬ事(くとぅ)や少(いふぃ)ん油断(ゆだん)しや済(すぃ)まん、片時(かたとぅち)ん急(いす)ぢ城(しる)に立(た)ち戻(むどぅ)てぃ、敵(てぃち)ゆ待(ま)ち受(う)きる計(はか)れ為侍(しゃび)ら。
久志の若按司
とおとお、急(いす)ぢ急(いす)ぢ。
謝名の大主
やあ、平田(ふぃらた)ぬ子(し)、川崎(かわさち)ぬ輩(ひゃあ)や敵(てぃち)とぅ肝(ちむ)合(あ)わち、謀叛(むふん)企(くわだ)ちゃい、内通(ねえつう)ゆ為(しゅ)る輩(やから)、生(い)ちてぃ置(う)ち成(な)らん込(く)ん締(し)みてぃ来(ちょお)り。
平田の子
拝(うぅが)ん留(とぅ)み有侍(やび)てぃ。
御万人(うまんちゅ)ぬ間切(まぢり)実(だ)にゆ聞(ち)ち留(とぅ)みり、此(く)ぬ輩(やから)下人(んざ)どぅ御主人(ぐしゅじん)に背(すむ)ち、謀叛(むふん)為(しゃ)る科(とぅが)に殺(くる)さしゆ召(み)しぇん、とおとお、急(いす)ぢ、急(いす)ぢ。
川崎の子
やあ、平田(ふぃらた)の子(し)。
平田の子
いや、物事(むぬぐとぅ)ぬ多(うふ)さ、急(いす)ぢ急(いす)ぢ、とおとお、居(い)よおり居(い)よおり。さり、川崎(かわさち)ぬ輩(ひゃ)迫(しま)てぃ来(ちゃあ)侍(び)たん。
謝名の大主
やあ、川崎(かわさち)、如何(いちゃ)る事(くとぅ)有(や)とぅてぃ我(わ)が恩義(うんぢ)忘(わすぃ)てぃ、敵(てぃち)とぅ肝(ちむ)合(あ)わち謀叛(むふん)企(くわだ)ちゅが。
川崎のひや
やあ、按司愛(あじがな)し、御主人(ぐしゅじん)ぬ御恩(ぐうん)山(やま)ゆりん高(たか)く海(うみ)ゆりん深(ふか)く、思(うむ)い為(しゅ)る我身(わみ)ぬ何故(ぬゆ)でぃ悪(あく)企(たく)でぃ、謀叛(むふん)企(くわだ)ちゅが神仏(かみふとぅき)掛(か)きてぃ偽(いつぃわ)い有(あ)や侍(び)らん、頼(たん)でぃ尽々(つぃくづぃく)とぅ思(うむ)てぃ給(たぼ)り。
謝名の大主
いや、胸(んに)に悪(あく)企(たく)でぃ口(くち)に花(はな)咲(さ)かすぃ、島国(しまくに)ぬ輩(やから)生(い)ちてぃ置(う)ち成(な)らん、急(いす)ぢ引(ふぃ)ち立(た)てぃてぃ殺(くる)ち来(ちょお)り。
川崎のひや
ああ、口惜(くちう)しゃ残念(ざんにん)、やあ、富盛大主(とぅみむいうふぬし)、落(う)てぃる此(く)ぬ首(くび)や惜(う)しさ又(また)無(ね)らん、彼如(あにゃ)る敵方(てぃちかた)に打(う)ちゆ騙(だま)さりてぃ、主人(しゅじん)初(かたくじ)ら数多(あまた)御真人(うまんちゅ)ん、軈(やが)てぃ闇々(やみやみ)とぅ成(な)ゆらとぅ思(み)ば。
謝名の大主
いや、押(う)し返(けえ)し返(けえ)し過言(くぁぐん)為(しゅ)る輩(やから)、迚(とぅてぃ)ん一刀(ちゅかたな)に切(ち)り殺(くる)ち捨(すぃ)てぃら。
平田の子
やあ、按司愛(あじがな)し、謀叛(むふん)為(しゅ)る輩(やから)殺(くる)ち捨(すぃ)てぃ召(み)しょち、我達(わした)供連(とぅむづぃ)りん誇(ふく)らしゃどぅ有(あ)や侍(びい)る。
謝名の大主
やあ、大主(うふぬし)や平田(ふぃらた)ぬ子(し)、久志(くし)ぬ若按司(わかあじ)や勝(すぃぐ)り者(むん)てぃやり、世界(しけ)ぬ取(とぅ)い沙汰(さた)に肝(ちむ)騒(さわ)ぢ居(うぅ)たん、はあ、思(うむ)たすぃとぅ変(か)わてぃ今(なま)ぬ如(ぐとぅ)有(や)りば、一鼓(ちゅづぃじん)に討(う)ち取(とぅ)ゆすぃ疑(うたげ)えや無(ね)らん。今日(ちゅう)明(あ)きる二十日(はつぃか)良(ゆ)かる日(ふぃ)ゆ有(や)ぐとぅ、久志(くし)ぬ城元(しるむとぅ)に軍(いくさ)押(う)し寄(ゆ)してぃ、二人(たい)ぬ按司(あじ)討(う)ち果(は)たち我肝(わぢむ)休(やすぃ)ま。
富盛の大主
拝(うぅが)ん留(とぅ)み有侍(やび)てぃ。
やあ、按司愛(あじがな)し、久志(くし)ぬ若按司(わかあじ)とぅ約束(やくすく)ぬ如(ぐとぅ)に、内通(ねえつう)ぬ書状(しょじょお)書(か)きゆ調(とぅとぅ)にやい、急(いす)ぢ夜通(ゆどお)しに持(む)たち遣(や)ら為侍(しゃび)ら。
謝名の大主
とおとお、急(いす)ぢ急(いす)ぢ。
久志の若按司
やあ、富盛大主(とぅみむいうふぬし)ぬ只今(ただなま)ぬ使(つぃけ)や、今日(きゅう)明(あ)きる二十日(はつぃか)軍(いくさ)寄(ゆ)しゆむぬ、約束(やくすく)ぬ如(ぐとぅ)金武(ちん)ぬ嶽(たき)なかい、伏勢(ふしずぃ)ゆ為(し)ち居(うぅ)てぃ待(ま)ち受(う)きり與呼(てぃやい)、内通(ねえつう)ぬ文(ふみ)や此(く)りどぅ有(や)ゆる。
天願の若按司
やあ、兄前(すぃいざめえ)ゆ、今(なま)ぬ如(ぐとぅ)有(や)りば誇(ふく)らしゃどぅ有(あ)ゆる、良(ゆ)たしゃ有(あ)る様(よお)に御計(うはか)れゆ召(み)しょり。
やあ、大主(うふぬし)。
立川の大主
やあ、按司愛(あじがな)し、此(く)ぬ文(ふみ)ゆ見(み)りば、御計(うはか)れぬ如(ぐとぅ)に、川崎(かわさち)ぬ輩(ひゃあ)や大主(うふぬし)ぬ手(てぃ)に掛(か)かてぃ、殺(くる)さりゆ為(し)ちゃすぃ疑(うたげ)えや無(ね)らん、はあ、川崎(かわさち)ぬ輩(ひゃあ)が今(なま)ぬ如(ぐとぅ)有(や)りば、仇(かたち)討(う)ち取(とぅ)ゆすぃ手(てぃ)ぬ内(うち)どぅ有(や)や侍(びい)る。
久志の若按司
やあ、大主(うふぬし)、急(いす)ぢ其(う)り其(う)りぬ手組(てぃぐみ)言(い)い渡(わた)さ。
立川の大主
拝(うぅが)ん留(とぅ)み有侍(やび)てぃ。
久志の若按司
やあ、伊豆味(いずみ)下庫裡(しちゃぐい)や、金武(きん)ぬ嶽(たき)なかい薄煙(うすぃちむり)立(た)てぃてぃ、伏(ふ)し勢(ずぃい)ぬ様子(よおすぃ)敵(てぃち)に見(ん)しり。
伊豆味下庫裡
拝(うぅが)ん留(とぅ)み有侍(やび)てぃ。
久志の若按司
やあ、砂田(すぃなだ)の子(し)や、本門(ふんむん)ぬ東(あがり)山中(やまなか)に深(ふか)く伏(ふ)しゆ隠(かく)りとぅてぃ、謝名(じゃな)ぬ大主(うふぬし)ぬ東原(あがりばる)臨(ぬず)でぃ、逃(に)ぢゆ走(は)い寄(ゆ)らば、一時(ふぃととぅち)に出(ぃん)ぢてぃ殺(くる)ち捨(すぃ)てぃり。
砂田の子
拝(うぅが)ん留(とぅ)み有侍(やび)てぃ。
久志の若按司
やあ、浜崎(はまさち)ぬ輩(ひゃあ)、久志嶽(くしだき)に深(ふか)く伏(ふ)しゆ隠(かく)りとぅてぃ謝名(じゃな)が西屋戸(にしやどぅ)に逃(に)ぢゆ走(は)い寄(ゆ)らば、進(すぃすぃ)む道(みち)塞(ふさ)ぢ殺(くる)ち捨(すぃ)てぃり。
浜崎のひや
拝(うぅが)ん留(とぅ)み有侍(やび)てぃ。
久志の若按司
やあ、外間(ふかま)ぬ子(し)や、城(ぐすぃく)ぬ南(みなみ)ぬ小林(くばやし)に深(ふか)く、伏(ふ)しゆ隠(かく)りとぅてぃ謝名(じゃな)が軍勢(ぐんずぃい)ぬ、城(しる)ぬ門内(むんない)に踏(う)み入(い)ゆる時分(じぶん)、相図(ええづぃ)ぬ鐘(かに)ぬ鳴(な)らば後(うし)るから攻(し)みり。
外間の子
拝(うぅが)ん留(とぅ)み有侍(やび)てぃ。
やあ、立川(たちかあ)の大主(うふぬし)や、本門(ふんむん)ぬ内(うち)に忍(しぬ)び隠(かく)りとぅてぃ、謝名(じゃな)が門内(むんうち)に入(い)ゆすぃ見(ん)かきらば、七重八重(なないやい)囲(かく)でぃ殺(くる)ち捨(すぃ)てぃらりり。
立川の大主
拝(うぅが)ん留(とぅ)み有侍(やび)てぃ。
久志の若按司
又(また)千代松(ちゆまつぃ)とぅ我身(わみ)や、鬨(とぅち)ぬ声(くぃ)ゆ聞(ち)かば、物見(むぬみ)走(は)い登(ぬぶ)てぃ、敵(てぃち)ぬ軍勢(ぐんずぃい)ゆ誘(さす)い入(い)りら。
惣人数
拝(うぅが)ん留(とぅ)み有侍(やび)てぃ。
久志の若按司
やあ、千代松(ちゆまつぃ)、手配(てぃくば)いん済(すぃ)まち誇(ふく)らしゃどぅ有(あ)ゆる、習取(なれとぅ)たる手並(てぃな)み振(ふ)り立(た)てぃてぃ見(み)しり。
歌
朝夕(あさゆ)嗜(たしな)たる 長刀(なぎなた)ぬ刃先(はさち)
敵(てぃち)ぬ首筋(くびすぃじ)に 断(た)たな置(う)ちゅみ。
久志の若按司
やあ、千代松(ちゆまつぃ)、振(ふ)り立(た)ちゅすぃ見(ん)りば嬉(うり)しさどぅ有(あ)ゆる、城(しる)に立(た)ち戻(むどぅ)てぃ敵(てぃち)ゆ待(ま)たに。
天願の若按司
うう。
謝名の大主
やあやあ、時(とぅち)移(うつぃ)ち済(すぃ)まん、急(いす)が急(いす)が。
富盛大主
拝(うぅが)ん留(とぅ)み有侍(やび)てぃ。
謝名の大主
はあ、金武(きん)ぬ岳(たき)見(ん)りば薄煙(うすぃちむり)立(た)ちゅん、伏勢(ふくずぃい)ぬ様子(よおすぃ)疑(うたげ)えや無(ね)らん、とおとお、急(いす)が急(いす)が。
富盛大主
はあ、久志(くし)ぬ若按司(わかあじ)ぬ運(うん)ぬ末(すぃい)成(な)たら、我(わ)が謀(はか)り事(ぐとぅ)に心(くくる)打(う)ち許(ゆる)ち、彼(あ)り彼(あ)り御目(うみ)掛(か)きり、本門(ふんむん)ん開(ひら)ち居(うぅ)有侍(やびい)ん。
謝名の大主
急(いす)ぢ走(は)い寄(ゆ)やい鬨(とぅち)ぬ声(くぃ)ゆ挙(あ)ぎり。
富盛大主
やあ、久志(くし)ぬ若按司(わかあじ)、富盛大主(とぅみむいうふぬし)ぬ偽(いつぃわ)い言(い)ちゃる、云言葉(いくとぅば)や誠(まくとぅ)とぅ思(む)てぃ居(うぅ)たら、快(くくるゆ)く急(いす)ぢ首(くび)ゆ渡(わた)し。
久志の若按司
やあ、富盛大主(とぅみむりうふぬし)、偽(いつぃわ)りぬ企(たく)み夢(いみ)程(ふどぅ)ん知(し)らん、強者(つぃわむぬ)ぬ全部(まぢり)金武岳(きんだき)に遣(や)らち、此(く)ぬ城(しる)ぬ内(うち)や千代松(ちゆまつぃ)とぅ二人(ふたい)、戦(たたか)わん為(すぃ)りば力(ちから)及(うゆ)ばらん、ああ、口惜(くちう)しゃ残念(ざんにん)。
謝名の大主
やあやあ、急(いす)ぢ攻(し)め入(い)やい切(ち)り殺(くる)ち捨(すぃ)てぃら。
惣人数
ひやあいやい。
久志の若按司
やあ、謝名(じゃな)ぬ大主(うふぬし)、此(く)ぬ按司(あじ)ぬ謀(はか)り事(ぐとぅ)知(し)らん有(あ)たみ。
謝名の大主
ああ、謝名(じゃな)程(ふどぅ)ぬ名将(みいしょお)ん運(うん)ぬ末(すぃい)成(な)たら、出(だ)し抜(ぬ)ぎに抜(ぬ)がり川崎(かわさち)ん殺(くる)ち、己達(うがたち)が手(てぃ)に掛(か)かてぃ生(い)ち捕(どぅ)いに取(とぅ)らり、武士(ぶし)ぬ身(み)ぬ恥辱(ちじゅく)面目(みんむく)ん無(ね)らん、とおとお、快(くくるゆ)く急(いす)ぢ首(くび)ゆ取(とぅ)り。
久志の若按司
やあ、富盛(とぅみむり)、十度(とぅたび)とぅさ許(ゆる)ち十度(とぅたび)生(い)ち捕(どぅ)らり、此(く)ぬ按司(あじ)に向(ん)かてぃ弓(ゆみ)引(ふぃ)ちゅん與呼(てぃやり)、企(たく)でぃ有(あ)る褒美(ふうび)殺(くる)ささん為(しゅ)むぬ、有難(ありがた)さ拝(うぅが)でぃ彼(あ)ぬ世(ゆ)事付(とぅづぃ)き。
富盛大主
ああ、武運(ぶうん)尽(つぃ)き果(は)てぃてぃ生(い)ち捕(どぅ)いに取(とぅ)らり、武士(ぶし)ぬ身(み)ぬ名折(なう)り面目(みんむく)ん無(ね)らん。
謝名の大主
いや、物事(むぬぐとぅ)ん要(い)らん、快(くくるゆ)く急(いす)ぢ首(くび)ゆ渡(わた)し。
天願の若按司
此(く)ぬ輩(やから)下人(んざ)や見(ん)りば休(やすぃ)まらん。
久志の若按司
はあはあ、暫(しば)し待(ま)てぃ、やあ、千代松(ちゆまつぃ)、此(く)ぬ輩(やから)下人(んざ)ぬ悪欲(あくゆく)ぬ罪(つぃみ)や、一刀(ちゅかたな)に為(し)ちや罪(つぃみ)浅(あさ)さ有(あ)むぬ、久志浜(くしはま)に引(ふぃ)ち出(ぃん)ぢゃち獄門(ぐくむん)に挙(あ)ぎり。
浜崎のひや
国吉の子
拝(うぅが)ん留(とぅ)み有侍(やび)てぃ。
久志の若按司
やあ、浜崎(はまさき)ぬ輩(ひゃあ)、やあ、国吉(くにし)ぬ子(し)、急(いす)ぢ引(ふぃ)ち立(た)てぃてぃ籠舎(るうしゃ)為(し)みり。
浜崎のひや
国吉の子
拝(うぅが)ん留(とぅ)み有侍(やび)てぃ。
浜崎のひや
さあさあ、立(た)ちょおり立(た)ちょおり。
国吉の子
さあさあ、急(いす)ぢ急(いす)ぢ。
天願の若按司
やあ、兄前(すぃいざめえ)ゆ、やあ、大主(うふぬし)、互(たげ)に肝(ちむ)揃(する)てぃ働(はたら)ちゃる故(ゆい)に、親(うや)ぬ敵仇(てぃちかたち)討(う)ち取(とぅ)たる今日(ちゅう)や、過(すぃ)ぢし二所(たとぅくる)ん嬉(うり)しゃ召(み)しぇら。
久志の若按司
やあやあ、仇(かたち)討(う)ち取(とぅ)たる今日(ちゅう)ぬ誇(ふく)らしゃや、押(う)し連(つぃ)りてぃ互(たげ)に踊(うどぅ)てぃ戻(むどぅ)ら。
歌
仇(かたち)討(う)ち取(とぅ)たる 今日(きゅう)ぬ誇(ふく)らしゃや
天(てぃん)ぬ白雲(しらくむ)に 昇(ぬぶ)る許(ばか)り