伏山敵討:本文 摩文仁親方作

 

富盛大主

 

是(くり)や棚原(たなばる)ぬ臣下(しんか)富盛大主(とぅみむいうふぬし)、我(わ)が主人(しゅじん)按司(あじ)どぅ御慈悲(ぐじふぃ)世(ゆ)に勝(まさ)てぃ、波風(なみかぢ)ん立(た)たん治(うさ)まとぅる御世(みゆ)に、天願(てぃんぐぁん)ぬ按司(あじ)ぬ悪欲(あくゆく)企(たく)でぃ、去年(くず)ぬ八月(はちぐぁつぃ)に軍(いくさ)押(う)し寄(ゆ)してぃ、棚原(たなばる)ぬ城(ぐすぃく)七重八重なないやい)囲(かく)でぃ、按司愛(あじがな)し御初(うはじ)み御臣下(ぐしんか)ぬ全員(まぢり)、殺(くる)さりゆ召(み)しょち城(ぐすぃく)ん奪(うば)い取(とぅ)らり、俄(にわ)か事(ぐとぅ)有(や)りば謀(はか)り事(ぐとぅ)堪(て)えてぃ、我身(わみ)ん討(う)ち死(じ)に極(きわ)みやい居(うぅ)たすぃ、後(あとぅ)返(けえ)ち仇(かたち)討(う)ち取(とぅ)らんとぅ思(む)てぃ、女按司(うぅなじゃら)とぅ思(う)み子(ぐぁ)御供(うとぅむ)勤(がらみ)ちゃい、遥々(はるばる)とぅ逃(に)ぎてぃ隠(かく)りやい居(うぅ)たすぃ、壁(かび)ん物(むぬ)聞(ち)ちゅる世(ゆ)ぬ中(なか)ゆ有(や)りば、共(とぅむ)に又(また)居(うぅ)てぃや大事(でじ)有(あ)らんとぅ思(む)てぃ、今(なま)や散(ち)り散(ぢ)りに別(わか)りやい居(うぅ)すぃが、女按司(うぅなじゃら)ん思(う)み子(ぐぁ)ん哀(あわ)りてぃる哀(あわ)り、巣無(すぃな)き鳥(とぅい)心(ぐくる)宿(やどぅ)る方(かた)無(ね)らん、拝(うぅが)でぃ忍(しぬ)ばらん斯(か)に苦(くり)しゃ有(あ)るい、いや、浅(あさ)ましや此(く)ぬ身(み)生(い)ち残(ぬく)てぃ居(うぅ)とぅてぃ、彼(あ)ぬ敵(てぃち)ゆ許(ゆる)ち此(く)ぬ天(てぃん)ぬ下(しちゃ)に、後(うし)る指(ゆび)指(さ)さり居(うぅ)りや又(また)成(な)らん、如何(いちゃ)しがなとぅ思(む)てぃ眠(にぶ)る夜(ゆ)ん寝(に)らん、闇々(やみやみ)とぅ我肝(わぢむ)塞(ふさ)がやい居(うぅ)たすぃ、天(てぃん)ぬ引合(ふぃちゃ)わしが天願(てぃんぐぁん)ぬ按司(あじ)どぅ、来(ちゅう)る八月(はちぐぁつぃ)に本部山(むとぅぶやま)登(ぬぶ)てぃ、猪狩(ししか)りぬ企(くわだ)てぃぬ有(あ)んてぃやり聞(ち)ちゅん、はあ、棚原(たなばる)ぬ御運(ぐうん)又(また)開(ふぃら)ち然(さ)らみ、遅(うく)りてぃや済(すぃ)まん姿(すぃがた)引(ふぃ)ち窶(やつぃ)てぃ、本部山(むとぅぶやま)登(ぬぶ)てぃ節(しつぃ)ゆ待(ま)ち受(う)きてぃ、仇(かたち)討(う)ち取(とぅ)ゆる計(はか)れえゆ為(すぃ)らに、とおとお、暗闇(くらやみ)どぅ有(や)りば見(み)る人(ふぃち)ん居(うぅ)らん、片時(かたとぅち)ん急(いす)ぢ忍(しぬ)でぃ行(い)ちゅん。

 

 

 歌

 

君(ちみ)ぬ仇(かたち)うぅ討(う)たんちゃり 思(うむ)い立(た)つ身(み)ぬ志(くくるざし) 深(ふか)く編(あ)み笠(がさ)顔(かう)隠(かく)ち 神(かみ)や仏(ふとぅき)に念願(にんぐぁん)し いざや最期(さいぐ)とぅ勇(いさ)み立(た)つ 忍(しぬ)ぶ心(くくる)は他所(ゆす)知(し)らん 君(きみ)とぅ親(うや)とぅぬ敵仇(てぃちかたち) 共(とぅむ)に月日(つぃちふぃ)うぅ頂(いただ)かん 昔語(んかしがた)りうぅ身(み)に尋(とぅ)めてぃ 夜(ゆる)ん昼(ふぃる)うぅん絶(て)え間(ま)なく 村々(むらむら)里々(さとぅざとぅ)越(くぃ)い来(く)りば 此処(くま)や名(な)に立(た)つ門(じょお)が道(みち) 歩(あゆ)み兼(か)にたる坂平(さかふぃら)ん 心(くくる)勇(いさ)みてぃ走(は)い登(ぬぶ)てぃ エイ、 今(なま)どぅ本部(むとぅぶ)ぬ嘉津宇岳(かつうだき) 山(やま)ぬ麓(ふむとぅ)に忍(しぬ)でぃ来(ちゃ)る 

 

富盛大主

 

夜昼(ゆるふぃる)ゆ掛(か)きてぃ今(なま)どぅ着(つぃ)ちゃる、山(やま)深(ふか)さ有(あ)りば他所目(ゆすみ)無(ね)ぬ有(あ)むぬ忍(しぬ)び隠(かく)りとぅてぃ節(しつぃ)ゆ待(ま)たに。

 

 歌

 

 廻(みぐ)てぃ春(はる)来(く)りば 木草(きくさ)でぃん知(し)ゆり

      人(ふぃちゅ)に生(う)まりとぅてぃ 節(しつぃ)ゆ知(し)らに

 

棚原の若按司

 

今(なま)出(ぃん)ぢる我身(わみ)や棚原(たなばる)ぬ生(な)し子(ぐぁ)、連(つぃ)り無(な)さや按司添(あじすぃ)去年(くず)ぬ八月(はちぐぁつぃ)に、天願(てぃんぐぁん)ぬ按司(あじ)に殺(くる)さりゆ召(み)しょち、城(しる)ん奪(ば)い取(とぅ)らり宿(やどぅ)る方(かた)無(ね)らん、哀(あわ)り母親(ふぁふぁうや)とぅ朝夕(あさゆ)泣(な)ち暮(く)らち、彼(あ)ぬ山(やま)に隠(かく)り此(く)ぬ洞(どお)に隠(かく)り百(むむ)忍(しぬ)び忍(しぬ)でぃ長(なが)れえてぃ居(うぅ)たん、男(うぃきが)生(う)まりとぅてぃ敵(てぃち)とぅ諸共(むるとぅむ)に、天(てぃん)ゆ頂(いただ)ちゅる義理(ぢり)ぬ又(また)無(ね)らん、討(う)たんちゃい為(すぃ)りば童身(わらびみ)ぬ一人(ふぃちゅい)、思(うむ)い自由(じゆ)成(な)らん差(さ)し詰(つぃ)まてぃ居(うぅ)たん、富盛大主(とぅみむいうふぬし)どぅ本部山(むとぅぶやま)登(ぬぶ)てぃ、隠(かく)りやい居(うぅ)とぅてぃ時節(じしつぃ)待(ま)ち受(う)きてぃ、敵(てぃち)ゆ討(う)ち取(とぅ)ゆる計(はか)れ為(しゅ)んてぃやり、語(かた)り部(び)ぬ有(あ)とぅてぃ、今日(ちゅう)どぅ吾(わ)ね聞(ち)ちゃる、遅(うく)りてぃや済(すぃ)まん急(いす)ぢ此(く)ぬ事(くとぅ)や、母親(ふぁふぁうや)に知(し)らち、暇(いとぅま)得(うぃ)てぃからに、大主(うふぬし)ぬ住(すぃ)み家(や)尋(たずぃ)にやい欲(ぶ)しゃぬ、やあ、母親(ふぁふぁうや)ゆ、やあ、亀千代(かみぢゅ)。

 

 歌

 

 何(ぬ)がすぃ思(う)み童(わらび) 物思(むぬみ)顔(がう)為(し)ちゅる

       思(う)む事(ぐとぅ)ぬ有(あ)らば 語(かた)てぃ聞(ち)かし

 

 

何(ぬ)がすぃ思(う)み童(わらび)物思(むぬ)み顔(がう)為(し)ちゅる。思(う)む事(くとぅ)ぬ有(あ)らば語(かた)てぃ聞(ち)かし。

 

棚原の若按司

 

やあ、母親(ふぁふぁうや)ゆ、朝夕(あさゆ)忘(わすぃ)りらん親(うや)ぬ敵仇

(てぃちかたち)、討(う)たんてぃい為(すぃ)りば童身(わらびみ)ぬ一人(ふぃちゅい)、大敵(ううてぃち)に向(ん)かてぃ働(はたら)ちん成(な)らん、長(なが)れえてぃ居(うぅ)たん差(さ)し詰(つぅ)まてぃ居(うぅ)有侍(やび)たん、語(かた)り部(び)ぬ有(あ)とぅてぃ聞(ち)きば大主(うふぬし)や、本部山内(むとぅぶやまうち)に隠(かく)りやい居(うぅ)とぅてぃ、暇(ふぃま)うぅ伺(うかが)やい敵(てぃち)ゆ討(う)ち取(とぅ)ゆる、計(はか)れ為(しゅ)んてぃやい今日(ちゅう)どぅ吾(わ)ね聞(ち)ちゃる、やあ、母親(ふぁふぁうや)ゆ、年月(とぅしつぃち)や積(つぃむ)てぃ十(とぅ)に余(あま)てぃ居(うぅ)とぅてぃ、敵仇(てぃちかたち)許(ゆる)ち後(うし)る指(ゆび)指(さ)さり、如何(いちゃ)し此(く)ぬ世界(しけ)に居(うぅ)りぬ又(また)成(な)ゆが、大主(うふぬし)ゆ尋(たずぃ)に頼(たぬ)み欲(ぶ)しゃ有(あ)むぬ、暇(いとぅま)呉(くぃ)てぃ給(たぼ)り、やあ、母親(ふぁふぁうや)ゆ。

 

 

露(つぃゆ)含(ふく)む童(わらび)今(なま)や年(とぅし)若(わか)さ、年(とぅし)ぬ重(かさ)ならば勧(すぃすぃ)みらん為(しゅ)むぬ、今(なま)や此(く)ぬ事(くとぅ)や止(や)みてぃ呉(くぃ)りゆ。

 

若按司

 

やあ、母親(ふぁふぁうや)ゆ、召(み)しぇる如(ぐとぅ)今(なま)や御気遣(うきづぃけ)ん有(あ)ゆら、親(うや)ぬ敵仇(てぃちかたち)討(う)ち取(とぅ)らんとぅ思(む)てぃ、隠(かく)りやい居(うぅ)とぅてぃ朝夕(あさゆ)嗜(たしな)どぅてぃ、此(く)ぬ時運(じうん)合(ええ)てぃ許(ゆる)ち済(すぃ)ま侍(び)らん、彼(あ)ぬ輩(やから)下人(んざ)どぅ驕(うぐ)り日(ふぃ)に増(ま)さてぃ、首里城(しゅいぐすぃく)迄(までぃ)ん美御宣(みゅんにゅ)かてぃ居(うぅ)とぅてぃ、追(う)っ手(てぃ)ぬ軈(やが)てぃ下(くだ)ゆんでぃ聞(ち)ちゅん、若(む)しか遅(うくり)とぅてぃ他所(ゆす)ぬ手(てぃ)に入(い)らば、子(くぁあ)に生(う)まりたる道(みち)ゆ失(うしな)ゆみ、是非(じふぃ)ゆ美御宣(みゅんにゅ)かてぃ暇(いとぅま)呉(くぃ)てぃ給(たぼ)り。

 

 

知(し)らん山道(やまみち)に唯(ただ)一人(ふぃちゅい)遣(や)らち、道中(みちなか)ぬ嵐(あらし)有(あ)らば如何(ちゃ)為(しゅ)が。

 

若按司

 

親(うや)ぬ為(たみ)とぅ思(む)てぃ勇(いさ)でぃ行(い)く先(さち)や、神(かみ)ぬ御守(うまむ)いん有(あ)らん為(しゅ)むぬ。

 

 

頼(たぬ)むしゃ虎松(とぅらまつぃ)言(ぃゆ)る事(くとぅ)ゆ聞(ち)きば、女身(うぃなぐみ)ゆ有(や)てぃん止(とぅ)みてぃ止(とぅ)みららん。泣(な)く泣(な)くに生(な)し子(ぐぁ)願(にげ)に任(まか)しゅむぬ、暫(しば)し待(ま)てぃ親(うや)ぬ形見(かたみ)渡(わた)さ。

やあ、生(な)し子(ぐぁ)、親(うや)ぬ肌(はだ)添(すぃ)たる此(く)ぬ守(まむ)い刀(がたな)、今(なま)どぅ取(とぅ)らしゅむぬ、後(うく)りらん如(ぐとぅ)に敵(てぃち)に掛(か)かり。

 

亀千代

 

やあ、母親(ふぁふぁうや)ゆ、親(うや)ぬ敵仇(てぃちかたち)とぅ思(み)ば休(やすぃ)まらん有(あ)むぬ、我身(わみ)ん兄前(すぃいざめ)とぅ遣(や)らち給(た)ぼり。

 

若按司

 

やあ、亀千代(かみぢゅ)、父親(ちちうや)に添(でん)すぃ捨(すぃ)てぃらりてぃ居(うぅ)とぅてぃ、哀(あわ)り母一人(ふぁふぁふぃちゅい)頼(たぬ)でぃ居(うぅ)り乍(なぎ)な、二人(ふたい)打(う)ち出(ぃん)ぢてぃ母親(ふぁふぁうや)ゆ捨(すぃ)てぃてぃ、如何(いちゃ)し思(う)み切(ち)やい行(い)ちぬ又(また)成(な)ゆが、其(う)り此(く)りゆ思(うみ)ば勇(いさ)でぃ行(い)く先(さち)ん、思(う)み頑張(はま)てぃ我身(わみ)ぬ行(い)ちん行(い)かりらん、やあ、亀千代(かみぢゅ)、兄(すぃざ)ぬ言(ぃゆ)る言葉(くとぅば)細(みすぃ)く聞(ち)ち留(とぅ)みてぃ、母親(ふぁふぁうや)ぬ御側(うすば)離(はな)りらん如(ぐとぅ)に、朝夕(あさゆ)肝(ちむ)尽(つぃく)ち孝行(こおこお)ゆ為(し)ちゅてぃ、嬉(うり)し事(ぐとぅ)聞(ち)くぬ節(しつぃ)ゆ待(ま)てぃゆ。

 

亀千代

 

召(み)しぇる事(くとぅ)聞(ち)きば、理(くとぅわり)どぅ有(や)ゆる、御事付(うとぅづぃ)きぬ儘(まま)忘(わすぃ)りらん如(ぐとぅ)に、肝(ちみ)に思(う)み染(す)みてぃ孝行(こおこお)ゆ為(し)ちゅてぃ、勝(か)ち戦(いくさ)召(み)しぇすぃ御待(うま)ち為侍(しゃび)ら。

 

若按司

 

やあ、亀千代(かみぢゅ)、今(なま)ぬ如(ぐとぅ)有(や)りば誇(ふく)らしゃどぅ有(あ)ゆる、とおとお、御暇(ういとぅま)ゆ為侍(しゃび)ら。

 

 

やあ、生(な)し子(ぐぁ)、一人(ふぃちゅい)居(うぅ)る母(ふぁふぁ)ぬ頼(たん)でぃ言(ぃゆ)る言葉(くとぅば)、肝(ちむ)に思(う)み染(す)みてぃ粗相(すそ)にどぅん思(うむ)な、若(む)しや身(み)に積(つぃむ)てぃ泣(な)く涙(なだ)ぬ内(うち)に、取(とぅ)い育(すだ)てぃ為(しゃ)すぃん此(く)ぬ事(くとぅ)ゆ有(や)りば、大主(うふぬし)ゆ頼(たぬ)でぃ共(とぅむ)に計(はか)れやい、物事(むぬぐとぅ)に心(くくる)油断(ゆだん)為(すぃ)るな、物思(むぬう)みば色(いる)に現(あらわ)りる習(なれ)え、露(つぃゆ)程(ふどぅ)ん他所(ゆす)に知(し)らん如(ぐとぅ)に、心(くくる)静(しず)みとぅてぃ敵(てぃち)に掛(か)かり、義理(じり)ぬ別(わか)り道(みち)梓弓(あずぃさゆみ)心(ぐくる)、引(ふぃ)ちゆ返(けえ)さらん斯(か)に苦(くり)しゃ有(あ)りば、思(う)み尽(つぃく)ち我身(わみ)や如何(いちゃ)し待(ま)ちゅが。

 

若按司

 

やあ、母親(ふぁふぁうや)ゆ、泣(な)ちば何時(いつぃ)迄(までぃ)ん御名残(うなぐ)りどぅ勝(まさ)る、やあ、亀千代(かみぢゅ)、とおとお、内(うち)に御遣(うんつぃ)けゆ拝(うぅが)み。

 

 歌

 

 義理(じり)ぬ別(わか)り道(みち) 思(う)み切(ち)やい居(うぅ)すぃが

    嵐声(あらしぐぃ)ぬ有(あ)らば 我身(わみ)や如何(ちゃ)為(しゅ)が

 

 

濯(ゆすぃ)でぃ濯(ゆすぃ)まらん振別(ふや)かりぬ涙(なみだ)、押(う)し払(はれ)え払(はれ)え、打(う)ち向(ん)かてぃ見(ん)りば、あきよ連(つぃ)り無(な)さや後影(あとぅかぢ)ん見(ん)らん、目元(みむとぅ)暗々(くらぐら)とぅ成(な)るが心気(しんち)。

 

 歌

 目元(みむとぅ)暗々(くらぐら)とぅ 成(な)るが心気(しんち)。

 

亀千代

 

やあ、母親(ふぁふぁうや)ゆ、此処(くま)に足(あし)淀(ゆどぅ)でぃ他所(ゆす)知(し)りてぃからや、男君前(やちめえ)ぬ御為(うたみ)成(な)らん筈(はじ)でむぬ、御気張(うちば)りゆ召(み)しょり御供(うとぅむ)為侍(しゃび)ら、とおとお、御立(うた)ち召(み)しょり。

 

 歌

 

  義理(ぢり)ぬ云言葉(いくとぅば)に 引(ふぃ)かさりてぃ我身(わみ)ぬ

         哀(あわ)り泣(な)く泣(な)くん 戻(むどぅ)る心気(しんち)

 

若按司

 

馴(な)りぬ山道(やまみち)や歩(あゆ)でぃ歩(あゆ)まらん、夜間暮(ゆまんぐぃ)ぬ雲(くむ)とぅ連(つぃ)りてぃ急(いす)が。

 

 歌

 

親(うや)ぬ為(たみ)とぅ思(む)てぃ 百勇(むむいさ)み勇(いさ)でぃ 他所(ゆす)知(し)らん如(ぐとぅ)に 笠(かさ)に顔(かう)隠(かく)ち 守(まむ)り氏神(うじがみ)に 肝(ちむ)ぬ願(にげ)為(し)ちゅてぃ 遥々(はるばる)とぅ忍(しぬ)でぃ 今(なま)どぅ着(つぃ)ちゃる。

 

若按司

 

頼(たぬ)む山内(やまうち)や今(なま)どぅ着(つぃ)ちゃる、大主(うふぬし)ぬ住(すぃ)み家(か)尋(たずぃ)にやい見(ん)だに、彼(あ)ぬ山(やま)ぬ奥(うく)に小屋掛(くやが)きぬ見(み)ゆすぃ、疑(うたげ)えや無(ね)らん急(いす)ぢ行(い)かに。此(く)ぬ屋戸(やどぅ)ぬ内(うち)に物知(むぬし)らり為侍(しゃび)ら。

 

富盛大主

 

此様(くにや)夜深(ゆぶか)くに童声(わらびぐぃ)ぬ有(あ)すぃや、肝(ちむ)不思議(ふしぢ)でむぬ出(ぃん)ぢてぃ見(ん)だに。

さり、是(くり)や富盛大主(とぅみむいうふぬし)、御疑(ううた)げゆ召(み)しょな。

 

若按司

 

何(ぬ)がし大主(うふぬし)や其(う)ぬ態(なり)に成(な)てぃ居参(いめ)が。

 

富盛大主

 

神(かみ)ぬ引合(ふぃちゃ)わしか此処(くま)に拝(うぅが)み有侍(やび)すぃや、やあ、思(う)みん子(ぐぁ)、御別(うわか)りぬ後(あとぅ)や尋(とぅ)めてぃ拝(うぅが)まてぃい、国々(くにぐに)ゆ巡(みぐ)り島々(しまじま)ゆ悟(さとぅ)り、寝(に)てぃ覚(さ)みてぃ思(うむ)い様々(さまざま)に為侍(しゃび)たすぃが、望(ぬず)みに任(まかあ)ち其(う)ぬ褒美(ふび)呉(くぃ)ゆんてぃやり、節々(しつぃじつぃ)ぬ廻(まあ)し文(ぶみ)絶(て)える間(ま)や無(ね)らん、野(ぬ)に伏(ふ)し山(やま)に伏(ふ)し、哀(あわ)りてぃる哀(あわ)り差(さ)し詰(つぃ)まてぃ居(うぅ)有侍(やび)たん、天(てぃん)とぅ地(ち)や鏡(かがん)隠(かく)る方(かた)無(ね)らん、是非(じふぃ)無(な)さに此(く)ぬ身(み)姿(すぃがた)引(ふぃ)ち替(けえ)てぃ、此(く)ぬ山(やま)に便(たゆ)でぃ住(すぃ)めてぃ居有侍(うぅやび)たん、はあ、思(う)みん子(ぐぁ)拝(うぅが)みゆすぃや夢(いみ)が有(や)や侍(びい)ら。

 

若按司

 

やあ、大主(うふぬし)ゆ、此(く)ぬ間(ええ)や母親(ふぁふぁうや)とぅ亀千代(かみちゆ)とぅ三人(みたい)、彼(あ)ぬ山(やま)に隠(かく)り此(く)ぬ洞(どぅう)に隠(かく)り、暮(く)らさらん暮(く)らし居(うぅ)り乍(なげ)な我身(わみ)ぬ、天願(てぃんぐぁん)ぬ事(くとぅ)や朝夕(あさゆ)忘(わすぃ)りらん、討(う)ち取(とぅ)ゆる計(はか)れ様々(さまざま)に思(うむ)てぃ、眠(にぶ)る夜(ゆ)ん寝(に)らん嗜(たしな)まい居(うぅ)すぃが、童身(わらびみ)ぬ一人(ふぃちゅい)如何(いちゃ)に働(はたら)ちん、大敵(ううてぃち)に向(ん)かてぃ勝(か)ちや又(また)成(な)らん、徒(いたづぃ)らに此(く)ぬ身(み)長(なが)れえてぃ居(うぅ)とぅてぃ、親(うや)ぬ敵(てぃち)許(ゆる)ち此(く)ぬ体(から)に死(し)なば、過(すぃ)ぢし父親(ちちうや)ぬ如何(いちゃ)し拝(うぅが)まりが、命(いぬち)振(ふ)り捨(すぃ)てぃてぃ討(う)ち死(じ)にに極(きわ)み、時節(じしつぃ)待(ま)ち受(う)きてぃ隠(かく)りやい居(うぅ)たん、大主(うふぬし)ぬ行方(ゆくい)聞(ち)ちゆ定(さだ)みとぅてぃ、共(とぅむ)に計(はか)れやい天願(てぃんぐぁん)ゆ殺(くる)ち、子(くぁあ)に生(う)まりたる道(みち)ゆ立(た)てぃ欲(ぶ)しゃぬ、知(し)らん山(やま)尋(とぅ)めてぃ遥々(はるばる)とぅ着(つぃ)ちゃる、取(とぅ)り分(わ)きてぃ給(たぼ)り、やあ、大主(うふぬし)ゆ。

 

富盛大主

 

拝(うぅが)ん留(とぅ)み有侍(やび)てぃ、頼(たぬ)むしゃや思(う)み子(ぐぁ)御幼稚(ぐよおち)ぬ時分(じぶん)、召(み)しぇる事(くとぅ)聞(ち)きば時運(じうん)知有侍(しやび)たん、やあ、思(う)みん子(ぐぁ)、細々(くまぐま)ぬ次第(しでえ)美御宣(みゅんにゅ)きる筈(はじ)どぅ、此処(くま)や人(ふぃとぅ)繁(しぢ)さ他所(ゆす)知(し)りてぃ済(すぃ)まん、山住(やまずぃ)みぬ習(なれ)や阿旦葉(あだんば)ぬ筵(むしる)、粗相(すそ)に有(あ)や侍(び)すぃが、先(ま)ずぃ先(ま)ずぃ内(うち)に御遣(うつぃ)け為侍(しゃび)ら。

 

若按司

 

此(く)ぬ間(ええ)ぬ手並(てぃな)み大主(うふぬし)に見(ん)してぃ、心(くくる)静(しず)みとぅてぃ敵(てぃち)ゆ待(ま)たに。

やあ、大主(うふぬし)ゆ大主(うふぬし)ゆ。

親(うや)ぬ敵仇(てぃちかたち)討(う)ち取(とぅ)らんとぅ思(む)てぃ、眠(にぶ)る夜(ゆ)ん寝(に)らん思(う)み頑張(はま)てぃ我身(わみ)ぬ、朝夕(あさゆ)嗜(たしな)たる手並(てぃな)み見(ん)しら。

 

富盛大主

 

とおとお、御気張(うちば)りゆ召(み)しょり拝(うぅが)でぃ見侍(にゃび)ら。

 

 歌

 

 朝夕(あさゆ)嗜(たしな)たる 長刀(なぎなた)ぬ刃先(はさち)

      敵(てぃち)ぬ首筋(くびすぃじ)に 断(た)たな置(う)ちゅみ

 

富盛大主

 

はあ、御手並(うてぃな)みゆ拝(うぅが)でぃ誇(ふく)らしゃどぅ有(あ)や侍(びい)る、我身(わみ)ん振(ふ)り立(た)ちゃい御御目(みうみ)掛(か)き有侍(やび)ら。

 

若按司

 

とおとお、振(ふ)り立(た)てぃてぃ見(ん)しらりり。

     (笛とともに大主に手並み)

振(ふ)り立(た)ちゅすぃ見(ん)りば誇(ふく)らしゃどぅ有(あ)ゆる、真(まく)とぅ勝(か)ち戦(いくさ)疑(うたげ)えや無(ね)らん。

 

富盛大主

 

如何(いか)な天願(てぃんぐぁん)ぬ大勢(ううずぃい)ゆ有(や)てぃん、自由(じゆ)に討(う)ち取(とぅ)ゆすぃ疑(うたげ)えや成(な)や侍(び)らん、とおとお、内(うち)に入(い)り召(み)しょり。

 

天願の按司

 

出(でぃ)よお来(ちゃ)る者(むぬ)や天願(てぃんぐぁん)ぬ按司(あじ)、棚原(たなばる)ぬ按司(あじ)どぅ驕(うぐ)り者(むぬ)有(や)とぅてぃ、去年(くず)ぬ八月(はちぐぁつぃ)に軍(いくさ)押(う)し寄(ゆ)してぃ、思(うむ)う如(ぐとぅ)按司(あじ)や討(う)ち済(すぃ)まち有(あ)すぃが、富盛大主(とぅみむいうふぬし)取(とぅ)り逃(ぬが)ち居(うぅ)らん、世間(しきん)鳴響(とぅゆ)まりる強者(つぃわむぬ)どぅ有(や)りば、若(む)しか後(あとぅ)返(けえ)ち謀叛(むふん)為(しゅ)らとぅ思(む)てぃ、村々(むらむら)ゆ探(さとぅ)り島々(しまじま)ゆ巡(みぐ)り、探(さぐ)らちん居(うぅ)らん気(ち)ぬ毒(どぅく)どぅ有(や)たる、世間(しきん)取(とぅ)い沙汰(さた)ぬ童口(わらびぐち)聞(ち)きば、一人身(ふぃちゅいみ)に成(な)とぅてぃ此辺(くふぃ)な大敵(ううてぃち)に、弓(ゆみ)引(ふぃ)ちぬ成(な)らん、切腹(しっぷく)ゆ為(しゃ)んてぃやり、はあ、悪按司(あくあじ)ぬ生(な)し子(ぐぁ)生(い)ち残(ぬく)てぃ居(うぅ)てぃん、富盛大主(とぅむいうふぬし)ぬ死後(しぐ)に成(な)てぃ居(うぅ)りば、誰(たる)頼(たゆ)てぃ我身(わみ)に敵(てぃち)ぬ又(また)成(な)ゆが、今日(ちゅう)からや明日(あちゃ)からや事障(くとぅさわ)り無(ね)らん、道障(みちさわ)り無(ね)らん、浮世(うちゆ)楽々(らくらく)とぅ暮(く)らす嬉(うり)しゃ、やあやあ、平安座大主(ふぃんざうふぬし)、平安名大主(ふぃんなうふぬし)、石川(いしちゃあ)ぬ輩(ひゃあ)。

 

 

ふう。

 

天願の按司

 

やあ、天気(てぃんち)澄(すぃ)み渡(わた)てぃ良(ゆ)かる日(ふぃ)ゆ有(や)りば、本部山(むとぅぶやま)登(ぬぶ)てぃ狩(か)りゆ為(さ)ん為(しゅ)むぬ、其(う)ぬ様(よ)用意(よおい)為召(しみ)しょり。

 

供三人

 

拝(うぅが)ん留(とぅ)み有侍(やび)てぃ。

 

狩人

 

くぁあいくぁあい、大山猪(あっぱやましし)てぃはち、急(いす)ぢ戻(むどぅ)てぃ妻(とぅじ)生(な)しん子(ぐぁ)嬉(いしょお)さ為(し)みらにば成(な)らん。

 

天願の按司

 

ええ、狩人(かりんちゅ)、暫(しば)し止(とぅどぅ)まりゆ頼(たぬ)む事(くとぅ)有(あ)むぬ。

 

狩人

 

明時(あかとぅんち)から出(ぃん)ぢてぃ、未(なあ)だ昼飯(あさばん)ん食(は)まん胸(んに)空(さあさ)有(あ)や侍(びい)むぬ先(ま)ずぃ御先(うさち)通(とぅう)や侍(び)ら。

 

石川のひや

 

いや、彼辺(あふぃ)な按司添(あじすぃい)ぬ仰(うう)し事(ぐとぅ)聞(ち)かな、一大事(いちでぢ)ぬ御咎(うとぅが)みに当(あ)たる筈(はじ)有(や)すぃが。

 

狩人

 

罪科(つぃみとぅが)んでぃすぃや、我達(わした)山原(やんばる)ん恐(うとぅる)しゃ物(むぬ)だ有侍(やび)る、急(いす)ぢ拝(うぅが)にゃ侍(び)ら。

 

天願の按司

 

ええ、是(くり)や為(し)たり為(し)たり、今日(ちゅう)ぬ働(はたら)ちか、一段(いちだん)な事(くとぅ)ゆ事(くとぅ)ゆ。

 

狩人

 

是(くり)や世話(しわ)足(た)らんでぃ言(い)ち、山猪(やましし)ぬ旨(まあ)さ山猪(やましし)だ有侍(やび)る、今日(ちゅう)や手柄(てぃがら)為(し)ち有(あ)や侍(びい)ん。

 

天願の按司

 

ええ、狩人(かりんちゅ)、此(く)ぬ山(やま)に登(ぬぶ)てぃ狩(か)りゆ為(さ)ん為(しゅ)すぃが、如何(いちゃ)に時分柄(じぶんがら)良(ゆ)たしゃ有(あ)ゆが。

 

狩人

 

今(なま)や秋(あち)ぬ始(はじ)まい、猪狩(ししが)りぬ合間(ああき)だ有侍(やびい)る、良(ゆ)たしゃ有(あ)や侍(びい)ん。

 

天願の按司

 

やあ、狩人(かりんちゅ)、先(さち)立(た)ちゃい呉(くぃ)りゆ道(みち)知(し)らん有(あ)むぬ、似合(にえ)ん有(あ)むぬ気張(ちば)り気張(ちば)り。

 

狩人

 

彼処(あま)や誰(たる)が有(いぇ)ん為(しぇ)え侍(び)ら。

 

石川のひや

 

彼処(あま)や天願(てぃんぐぁん)ぬ按司(あじ)、彼辺(あふぃ)な按司添前(あじすぃいめ)知(し)らん有(あ)たみ。

 

狩人

 

ああ、拝(うぅが)ん知(し)や侍(び)らん、怖(うとぅる)しゃどぅ有(あ)や侍(び)たる、畏(やぐみ)さどぅ有(あ)や侍(び)すぃが、今日(ちゅう)ぬ山入(やまい)りや必(かんな)じ御取(うとぅ)い止(や)み召(み)しょり、一大事(いちでじ)な物(むぬ)ぬ有(や)や侍(びい)ん。

 

天願の按司

 

何事(ぬうくとぅ)ぬ有(あ)ゆが語(かた)てぃ聞(ち)かし。

 

狩人

 

此(く)ぬ頃(ぐる)何処(まあ)ぬ者(むぬ)とぅや知(し)や侍(び)らん、此(く)ぬ山内(やまうち)に住(すぃ)まてぃ居(うぅ)や侍(び)すぃが、話(はなし)どぅ聞(ち)ち有侍(やび)りば、是(くる)や元(むとぅ)棚原(たなばる)ぬ按司(あじ)ぬ臣下(しんか)富盛大主(とぅむいうふぬし)んでぃ言(い)ち、主人(しゅじん)ぬ敵(てぃち)討(う)たんでぃ姿(すぃがた)変(か)わち面目鼻(つぃらみいばな)ん毛(きい)生(ふぃ)い被(かん)てぃ恐(うとぅる)しゃ者(むん)だ有侍(やび)る、ああ、此(く)ぬ世(ゆ)に鬼(うに)見(ん)ちゃる人(ちゅ)ぬ居(うぅ)ゆみ、是(くり)どぅ鬼(うに)だ有侍(やびい)る。

 

天願の按司

 

はあ、生(い)ち逆死(ざかし)富盛(とぅむい)死(し)ぢゃん與呼(てぃやり)聞(ち)ちゃすぃ、生(い)ちち此(く)ぬ山(やま)に籠(くま)てぃ居(うぅ)ゆみ、仕合(しやわ)しどぅ有(や)ゆる、やあ、大主(うふぬし)、彼(あ)りや唯(ただ)一人(ふぃちゅい)網(あみ)ぬ魚心(いゆぐくる)、是(くり)ゆ遣(つぃか)わしゃい呼(ゆ)び出(ぃん)ぢゃちからに、四方(しふう)から囲(かく)でぃ生(い)ち捕(どぅ)いに為(すぃ)らに。

 

供三人

 

拝(うぅが)ん留(とぅ)み有侍(やび)てぃ。

 

天願の按司

 

さあさあ、狩人(かりんちゅ)、頼(たぬ)ま頼(たぬ)ま。

 

狩人

 

うう。

彼(あ)ぬ木(き)ぬ陰(かぎ)から見(み)ゆる小屋掛(くやが)きだ有侍(やびい)る、我身(わみ)や御入(うり)り召(み)しぇ侍(び)り。

 

平安座大主

 

やあ、石川(いしかわ)、急(いす)ぢ走(は)い寄(ゆ)やい鬨(とぅち)ぬ声(くぃ)ゆ挙(あ)ぎり。

 

石川のひや

 

拝(うぅが)ん留(とぅ)み有侍(やび)てぃ。

やあ、富盛(とぅむい)、天願(てぃんぐぁん)ぬ按司(あじ)ぬ押(う)し掛(か)きてぃ居参(いめ)ん、急(いす)ぢ首(くび)下(さ)ぎてぃ出(ぃん)ぢょおり出(ぃん)ぢょおり。

 

富盛大主

 

はあ、悪心(あくしん)ぬ奴腹(やっぱら)巡(みぐ)てぃ着(つぃ)ちゃみ。

 

天願の按司

 

やあ、富盛(とぅむい)、耳(みみ)ぬ根(に)ゆ開(あ)きてぃ実(だに)ゆ聞(ち)ち留(とぅ)みり、一人身(ふぃちゅいみ)に成(な)とぅてぃ此辺(くふぃ)な天願(てぃんぐぁん)に、弓引(ゆみふぃ)ちぬ成(な)ゆみ是非(じふぃ)ゆ改(あらた)みてぃ、降参(こおさん)ゆ為(すぃ)らば若按司(わかあじ)ん共(とぅむ)に、助(たすぃ)きやい取(とぅ)らさ取(とぅ)り立(た)てぃてぃ取(とぅ)らさ、勘違(かんちげ)え為(すぃ)るな、さあさあ、含(ふく)み含(ふく)み。

 

富盛大主

 

ああ、此(く)ぬ程(ふどぅ)ぬ祈願(きぐぁん)天(てぃん)ん知(し)り召(み)しょち、時運(じうん)尽(つぃ)ち果(は)てぃてぃ巡(みぐ)てぃ来(ちゃ)るい、暫(しば)し止(とぅどぅ)まりり若按司(わかあじ)に美御宣(みゅんにゅ)きてぃ、残(ぬく)らずぃに踏(ふ)み殺(くる)ち取(とぅ)らさ。

さり、憎(にく)い天願(てぃんぐぁん)が寄(ゆ)し掛(か)きてぃ居(うぅ)や侍(び)すぃが、如何(いちゃ)し犬猫(いんまや)ぬ虎(とぅら)ぬ前(め)に寄(ゆ)ゆが、若按司(わかあじ)ぬ前(め)や此処(くま)に御座(うざ)召(み)しょおち、軍神(いくさがみ)成(な)とぅてぃ御守(うまむ)りゆ召(み)しょり。

 

若按司

 

軽(かる)んじてぃ従(から)や仕損(しすん)じぬ基(むとぅい)、心(くくる)静(しずぃ)みとぅてぃ敵(てぃち)に掛(か)かり。

 

天願の按司

 

やあ、富盛(とぅむい)、手(てぃ)ぬ裏(うら)に握(にぎ)らりてぃ如何(いちゃ)し働(はたら)ちゅが、さあさあ、囲(かく)み囲(かく)み。

 

富盛大主

 

いや、寄(ゆ)し手(てぃ)ぬ面々(みんみん)確(たし)かに聞(ち)き、天(てぃん)ぬ戒(いまし)みか遥々(はるばる)とぅ来(ちゃ)すぃや、此処(くま)や待(ま)ち受(う)きてぃ忍(しぬ)でぃ居(うぅ)すぃ知(し)らん、大口(うふぐち)ゆ為(すぃ)るか舌(しば)ゆ抜(ぬ)ち取(とぅ)らさ。

 

若按司

 

やあやあ、野心(やしん)な奴腹(やつぃばら)、此(く)ぬ間(ええ)ぬ恨(うら)み濯(すす)じ取(とぅ)らさ。

 

天願の按司

 

はあ、生(い)ち逆死(さかし)童(わらび)言(ぃゆ)る事(くとぅ)ぬ憎(にく)さ、やあ、供(とぅむ)ぬ達(ちゃあ)、唯(ただ)平攻(ふぃらじ)みに手取(てぃどぅ)り為(し)ちから込(く)ん締(し)みてぃ来(ちゅう)に。

 

供三人

 

拝(うぅが)ん留(とぅ)み有侍(やび)てぃ。

 

(但し此の時双方合戦、天願の軍勢は独り独り富盛大主に打たれ遂に天願に立ち向かい若按司両人にて天願を討ち果たす)

 

富盛大主

 

やあ、天願(てぃんぐぁん)、悪欲(あくゆく)ぬ報(むく)い巡(みぐ)てぃ来(ちゃあ)み。

 

天願の按司

 

いや、此(く)ぬ按司(あじ)ぬ手並(てぃな)み知(し)らん有(あ)たみ。

 

若按司

 

やあやあ、暫(しば)し待(ま)てぃ。

朝夕(あさゆ)忘(わすぃ)りらん親(うや)ぬ敵仇(てぃちかたち)、大主(うふぬし)ぬ蔭(かぎ)に討(う)ち取(とぅ)たる今日(ちゅう)や過(すぃ)ぢし父親(ちちうや)ん嬉(うり)しゃ召(み)しぇら、急(いす)ぢ立(た)ち戻(むどぅ)てぃ母親(ふぁふぁうや)ゆ拝(うぅが)でぃ、親(うや)ぬ跡(あとぅ)照(てぃ)らす計(はか)れえゆ為(すぃ)らに。

 

富盛大主

 

天(てぃん)ぬ引合(ふぃちゃ)わしか今日(ちゅう)ぬ引合(ふぃちゃ)わしや、思(う)みん子(ぐぁ)ぬ御果報(うかふ)働(はたら)ちん有(あ)や侍(び)らん、とおとお、御急(ういす)ぢゆ召(み)しょり御供(うとぅむ)勤(がらみ)きゃい、元(むとぅ)ぬ御城(うぐすぃく)に御取(うとぅ)り立(た)てぃ為侍(しゃび)ら。

 

若按司

 

今日(ちゅう)ぬ誇(ふく)らしゃや物(むぬ)に譬(たとぅ)ららん、押(う)し連(つぃ)りてぃ互(たげ)に踊(うどぅ)てぃ戻(むどぅ)ら。

 

富盛大主

 

召(み)しぇる如(ぐとぅ)踊(うどぅ)てぃ御供(うとぅむ)為侍(しゃび)ら。

 

 歌

 

 仇(かたち)討(う)ち取(とぅ)たる 今日(きゅう)ぬ誇(ふく)らしゃや

        過(すぃ)ぢし父親(ちちうや)ん 嬉(うり)しゃ召(み)しぇら