二山和睦の巻：本文 摩文仁親方作
歌
雉面（きじづぃら）や二人（ふたい） 親（うや）に捨（すぃ）てぃらりてぃ
互（たげ）に振分（ふや）かりてぃ 居（うぅ）るが心気（しんち）
千代松
哀（あわ）り知（し）り召（み）しょり今（なま）出（ぃん）ぢるに人（ちゅ）や、南山（なんざん）ぬ頭役（かしらやく）与座（ゆざ）ぬ大主（うふぬし）ぬ兄子（すぃいざぐぁ）千代松（ちゆまつぃ）弟子（うっとぅぐぁ）亀千代（かみちゆ）、父親（ちちうや）ぬ事（くとぅ）どぅ按司愛（あじがな）し御遣（うつぃけ）えに、詔（とぅじ）すぃ事（ぐとぅ）拝（うぅが）でぃ北山（ふくざん）に居参（いめ）ち、引（ふぃ）ちゆ留（とぅ）みらりてぃ御育（うすだ）てぃゆ與呼（てぃやり）、朝夕（あさゆ）母親（ふぁふぁうや）ぬ寄（ゆ）し事（ぐとぅ）どぅ有（や）ゆる。あきよ我（わ）が親（なさ）や七年（なとぅ）余（あま）る迄（までぃ）ん、敵（てぃち）ぬ手（てぃ）に居参（いも）ち籠（く）みらりてぃ居（うぅ）りば、此（く）ぬ間（えだ）ぬ若（む）しや如何（いちゃ）が又（また）召（み）しぇら、子（くぁあ）成（な）とぅる者（むぬ）や休（やすぃ）でぃ居（うぅ）らりゆみ、亀千代（かみちゆ）とぅ二人（ふたい）命（いぬち）思（う）み頑張（はま）てぃ、知（し）らん山国（やまぐに）に尋（とぅ）めに行（い）ぢからに、北山（ふくざん）ぬ按司（あじ）ぬ御肝（うじむ）取（とぅ）り直（のお）ち、二人（たい）が身（み）に替（か）わてぃ父親（ちちうや）や助（たすぃ）き欲（ぶ）しゃ有（あ）むぬ、母親（ふぁふぁうや）に此（く）ぬ様（よ）、迄（までぃ）ゆ語（かた）てぃ片時（かたとぅち）ん急（いす）ぢ忍（しぬ）でぃ行（い）ちゅん。
亀千代
天（てぃん）とぅ地（ち）ぬ中（なか）に生（う）まりたる者（むぬ）や、鳥（とぅい）獣（いちむし）ぬん誠（まくとぅ）有（あ）る習（なれ）え、兄前（すぃざめ）とぅ二人（たい）に生（ぅん）まり居（うぅ）とぅてぃ、子（くぁあ）とぅ成（な）る道（みち）ぬ立（た）ち直（のお）てぃからや、大事（でじ）有（あ）らん為（すぃ）りば驚（うとぅる）さや有（あ）むぬ、片時（かたとぅち）ん急（いす）ぢ尋（とぅ）めてぃ行（い）ぢからに、哀（あわ）り父親（ちちうや）ゆ取（とぅ）い返（けえ）ち二人（ふたい）、人（ふぃちゅ）に生（う）まりたる道（みち）ゆ立（た）てぃら。
千代松
やあ、母親（ふぁふぁうや）ゆ母親（ふぁふぁうや）ゆ。
歌
何（ぬ）がすぃ玉黄金（たまくがに） 物思顔（むぬみがう）為（し）ちゃる
思（う）み事（くとぅ）ぬ有（あ）らば 語（かた）てぃ聞（ち）かし
千代松
巣出（すぃだ）す母親（ふぁふぁうや）ん聞（ち）ち留（とぅ）みてぃ給（たぼ）り、朝夕（あさゆ）思（う）み尽（つぃく）ち語（かた）らゆる事（くとぅ）に、亀千代（かみちゆ）とぅ二人（ふたい）命（いぬち）思（う）み頑張（はま）てぃ、北山（ふくざん）ぬ城（ぐすぃく）尋（とぅ）めてぃ行（い）ぢからに、哀（あわ）り父親（ちちうや）や助（たすぃ）きらん為（しゅ）むぬ、是非（じふぃ）ゆ聞（ち）ち留（とぅ）みてぃ暇（いとぅま）呉（くぃ）てぃ給（たぼ）り。
母親
やあ、生（な）し子（ぐぁ）、今（なま）ぬ事（くとぅ）有（や）りば誇（ふく）らしゃどぅ有（あ）すぃが、貴（あてぃ）無（な）しぬ二人（ふたい）知（し）らん山国（やまぐに）に、如何（いちゃ）し手放（てぃばな）さい許（ゆる）ち遣（や）らさりが、我身（わみ）ん諸共（むるとぅむ）に連（つぃ）りてぃ行（い）かに。
千代松
やあ、母親（ふぁふぁうや）ゆ、男（うぃきが）生（ぅん）まりとぅてぃ年（とぅし）ぬ十二三（じゅうにさん）、貴（あてぃ）無（な）し子（ぐぁ）とぅ召（み）しょち其（う）ぬ年（とぅし）に成（な）りば何（ぬ）がな刃（はむか）ゆん何故（ぬゆ）でぃ恐（うす）りゆが、母親（ふぁふぁうや）ん共（とぅむ）に押（う）し連（つぃ）りてぃ行（い）ぢら、若（む）しか道端（みちばた）に怪我（きが）ぬ又（また）有（あ）らば、願（にが）てぃ居（うぅ）る上（ぅうぃい）に咎（とぅが）みや重（かさ）ゆ成（な）る積（つぃ）むい、是非（じふぃ）ゆ聞（ち）ち分（わ）きてぃ頼（たん）でぃ母親（ふぁふぁうや）や、父親（ちちうや）ぬ御戻（うむどぅ）り御待（うま）ち召（み）しょり。
母親
やあ、生（な）し子（ぐぁ）言（ぃゆ）る事（くとぅ）ゆ聞（ち）きば理（りい）どぅ有（や）ゆる、願（にげ）ぬ如（ぐとぅ）二人（ふたい）暇（いとぅま）取（とぅ）らしゅむぬ、物思（むぬうみ）わ召（み）しょち油断（ゆだん）為（すぃ）るな。
二人
母親（ふぁふぁうや）ぬ御志（くくる）今（なま）ぬ如（ぐとぅ）有（や）りば、願（にげ）てぃ行（い）く先（さち）ん自由（じゆ）どぅ有（や）ゆる。
母親
親（うや）ぬ為（たみ）とぅ思（む）てぃ許（ゆる）ち遣（や）らしゅすぃが、如何（いちゃ）し思（う）み暮（く）らち我身（わみ）や待（ま）つぃが。
亀千代
やあ、母親（ふぁふぁうや）ゆ、親（うや）に孝行（こおこお）ぬ力（ちから）ぬ刀（かなた）や、是（くり）や斯（か）んし為（さ）ん当（あ）たる方（かた）晴（は）りてぃ、何故（ぬゆ）でぃ真実（しんじつぃ）ぬ外（ふか）に又（また）成（な）ゆが、父親子（ちちうやくぁ）連（つぃ）りてぃ来（ちゅう）ん為（しゅ）むぬ、肝（ちむ）ぬ願（にげ）見（ん）ちゅてぃ御待（うま）つぃ召（み）しょり。
千代松
互（たげ）に言語（いかた）れや言（い）やば何時（いつぃ）迄（までぃ）ん、時（とぅち）移（うつぃ）ち済（すぃ）まん御暇（ういとぅま）ゆ為侍（しゃび）ら。
歌
義理（ぢり）とぅ思う（む）てぃ我身（わみ）や 母（ふぁふぁ）思切（うみち）居（う
ぅ）すぃが 別（わか）りゆる際（ちわ）や 袖（すでぃ）ぬ涙（なみだ）
千代松
やあ、亀千代（かみちゆ）、陸（うか）からや今日（ちゅう）に程（ふどぅ）遠（とぅう）き有（あ）りば、知（し）らん山道（やまみち）に如何（いちゃ）し尋（たずぃ）にゆが。
船路（ふなじ）漕（く）ぢ渡（わた）てぃ急（いす）ぢ欲（ぶ）しゃぬ。
亀千代
順風（じゅんぷう）に今日（ちゅう）や波（なみ）ん又（また）立（た）たん、真艫（まとぅむ）とぅ押（う）し風（かぢ）連（つぃ）りてぃ行（い）かに。
歌
真艫（まとぅむ）押（う）し風（かぢ）に 波（なみ）ん押（う）し添（すぃい）てぃ
嘉例吉（かりゆし）ぬ御船（うふに） 走（は）るが清（ちゅ）らさ
船筑
さりさり、運天港（うんてぃんみなとぅ）ぬ来（ちゃ）あ侍（び）たん。
千代松
果報（かふう）し、船筑（ふなちく）渡（わた）ち給（たぼ）ち、巡（みぐ）り逢（あ）う時（とぅち）ん又（また）ん頼（たぬ）ま。
船筑
又（また）ん拝（うぅが）にゃ侍（び）ら。
千代松
やあ、亀千代（かみちゆ）、片時（かたとぅち）ん急（いす）ぢ彼（あ）ぬ村（むら）に便（たゆ）てぃ、哀（あわ）り父親（ちちうや）ぬ行方（ゆくい）尋（たずぃ）にらに。
亀千代
互（たげ）に思（う）み尽（つぃく）ち尋（たずぃ）にやい来（ちゃ）すぃが、若（む）しか外（ふか）成（な）らば、如何（いちゃ）が又（また）成（な）ゆが。
千代松
命（いぬち）振（ふ）り捨（すぃ）てぃてぃ君親（きむうや）ぬ為（たみ）に、肝（ちむ）尽（つぃく）す事（くとぅ）ぬ何故（ぬゆ）でぃ外（ふか）成（な）ゆが、油断（ゆだん）為（しゅ）な互（たげ）に物思（むぬ）み詰（つぃ）みてぃ。
住居人
是（くり）や津口当（つぃくちたい）、んん、船（ふに）ぬ来（ちゅ）る様子（よおすぃ）、先（ま）ずぃ出（ぃん）ぢてぃ見（ん）だにば成（な）らん、はい、汝達（にったあ）や何処（まあ）からが有（や）い召（み）せえ侍（びい）が。
千代松
哀（あわ）り此（く）ぬ二人（たい）や思（う）む事（くとぅ）ぬ有（あ）とぅてぃ、遠方（かあま）ぬ国（くに）から尋（とぅ）めえ尋（とぅ）めえに来（ちゃ）すぃが、知（し）る人（ふぃちゅ）や居（うぅ）らん頼（たぬ）む方（かた）無（ね）らん、御情（うなさ）きに暫（しば）し宿（やどぅ）借（か）らち給（たぼ）り。
住居人
ん、宿（やどぅ）借（か）い召（み）しょらす由（ゆし）や手易（てぃや）すぃ事（ぐとぅ）、先（ま）ずぃ何処（ま）ぬ国（くに）から何（ぬう）でぃ言（ぃゆ）る人（ちゅ）ぬ来（ちゃ）あが、御二人（うふたい）ぬ御様子（ぐよすぃ）細々（くまぐま）語（かた）てぃ給（たぼ）り。
千代松
此（く）ぬ上（ぅうぃい）ゆ有（や）りば、隠（かく）ち隠（かく）さらん、南山（なんざん）ぬ頭役（かしらやく）与座（ゆざ）ぬ大主（うふぬし）ぬ兄子（すぃいざぐぁ）千代松（ちゆまつぃ）弟子（うっとぅぐぁ）亀千代（かみちゆ）、父親（ちちうや）ぬ事（くとぅ）どぅ、年（とぅし）余（あま）る迄（までぃ）ん、御引（うふぃ）ち留（とぅ）み置（う）かり別（わか）りやい居（うぅ）りば、如何（いちゃ）る有様（ありさま）に成（な）やい居参（いめ）が、知（し）り召（み）しょち参（め）らば、語（かた）てぃ給（たぼ）り。
住居人
ああ、与座（ゆざ）ぬ大主（うふぬし）ぬ思（う）みん子（ぐぁ）ぬ来（ちゃ）る有（や）い召（み）しぇるい、んん、篤（とぅく）とぅ拝（うぅが）でぃ見（ん）でぃば何処（まあ）変（か）わらん態（ゆ）く似（に）ち居参（いめ）ん為侍（しぇえびい）ん、彼達（あったあ）や拝（うぅが）でぃ見（ん）でぃば年頃（とぅしぐる）ん十二三（じゅうにさん）ぬ御様子（ぐよおすぃ）、汝達（にったあ）親愛（うやがな）しいとぅぬ別（わか）り方（かた）や先（ま）ずぃ物（むぬ）にてぃ見（ん）でぃば、丁度（ちょおどぅ）二人（たい）共鳥小（とぅむどぅいぐぁあ）ぬピヤピヤ為（しゅ）る時分（じぶん）どぅ有（や）たる筈（はじ）有（や）すぃが、人（ちゅ）ぬ親子（うやくぁ）や大（でえ）な物（むぬ）。生（う）み落（う）とぅち去（さ）てぃ親（うや）ぬ御姿（うすぃがた）や有（あ）てぃん無（ね）らん為（しゅ）てぃ、貴（あてぃ）無（な）しぬ嫡子（ちゃっく）が問（とぅ）うぇん知（し）らんけえ、親（うや）拝（うぅが）みが居参（いめ）んしょお来（ちゃ）んなあ、あはあ、御胴（うんじゅ）が嫌（いや）とぅ諾（うう）、心配（しわ）や為（し）み召（み）しょおんな。先（ま）ずぃ御頑丈（うがんじゅう）だ有侍（やび）とぅどぅう、又（また）汝達（にったあ）親愛（うやがな）しいどぅ十一年（じゅういちにん）成（な）てぃぬ三四月（さんしぐぁつぃ）頃（ぐる）南山（なんざん）ぬ御遣（うつぃけ）えに居参（いめ）ん為居（しょお）ちゃりば、按司御側（あじうすば）に物企（むぬたく）み為（し）ちん、容易（よおい）に事（くとぅ）や起（う）くらん積（つぃ）もいでぃぬ分別（ふんびつぃ）有（や）てぃ、按司（あじ）からぬ御真実（ぐしんじつぃ）、段々（だんだん）ぬ事（くとぅ）、又（また）十七八（じゅうしちはち）ぬ真盛（まさか）り女性方（うぃなぐかた）拝領（はいりょお）有（や）てぃ、度々（たびた）ぬ御酒盛（うさかむ）い、大主（うふぬし）ぬ御取（うとぅ）り持（む）ち大粧（てえそお）至極（しぐく）んち果報（かふう）成（な）んだ有侍（やび）んどお、有（や）んどぅん故郷（くちょお）ん忘（わすぃ）らん、御暇乞（ういとぅまぐ）い度々（たびたび）御宣（うんにゅ）きゆんどぅん、御返事（ぐふぃじ）ぬ下（くだ）らん、今日（ちゅう）ぬ明日（あちゃ）成（な）い、明日（あちゃ）ぬ明後日（あさてぃ）成（な）い為（しゅ）る内（うち）、頼（たん）でぃ夫婦（みいとぅ）ぬ縁（いぃん）に繋（つぃな）がりてぃ、明（あ）きてぃぬ冬（ふゆ）にや男（うぃきが）ん子（ぐぁ）繁盛（はんじょお）、事（くとぅ）や難（むつぃか）しく成（な）い立（た）ち、又々（またまた）次（つぃづぃ）ぬ年（とぅし）にや次男（じなん）迄（までぃ）生（ぅん）み出（ぃん）ぢゃし召（み）しょおち、其（う）りからや御夫婦（ぐふうふ）ぬ仲（なか）、又（また）男（うぃきが）ん子（ぐぁ）ぬ達（ちゃあ）、彼（あ）ぬ罹（わずぃれ）え縋（すぃが）い為（し）召（み）しょおりば、郷里（きょおり）ぬ妻子（とぅじっくぁ）ぬ事（くとぅ）ん思（う）び出（ぃん）ぢゃし出（ぃん）ぢゃしい、泣（な）ち悶（しゅでえ）為召（しみ）しゃすぃ聞（ち）きば、ああ、他所（ゆす）ながら至極（しぐく）哀（あわ）りだ有侍（やびい）る。
千代松
やあ、亀千代（かみちゆ）、二人（たい）命（いぬち）頑張（はま）てぃ尋（とぅ）め尋（とぅ）めえ来（ちゃ）すぃが、今（なま）ぬ事（くとぅ）有（や）りば如何（いちゃ）し寄（ゆ）ゆが。
亀千代
やあ、兄前（すぃいざめえ）ゆ、兎角（とぅかく）北国（きたぐに）に何時（いつぃ）迄（までぃ）んとぅ思（む）てぃ、結（むす）でぃ有（あ）る縁（いぃん）に思（うむ）い引（ふぃ）ちゃさりてぃ、妻（とぅじ）生（な）し子（ぐぁ）捨（すぃ）てぃてぃ隠（かく）りやい居参（いめ）ら。捨（すぃ）てぃらりる親子（うやくぁ）如何（いちゃ）し有侍（やび）ら。
住居人
ああ、人（ちゅ）ぬ上（ぅうぃい）でぃん思（うむ）らん、此（く）ぬ事（くとぅ）や少（いふぃ）ん御心配（うしわ）召（み）しょおんな、今先（なまさち）御宣（うんにゅ）きゆたる大主（うふぬし）ぬ母（あやあ）どぅん、三年前（んちゅなてぃ）ぬ若夏（わかなつぃ）に此（く）ぬ世（ゆ）見（ん）い過（すぃ）ぢ有侍（やび）てぃ、其（う）りからや大主（うふぬし）ん其（う）ぬ思（うむ）いる常（ちゃあ）に罹（わずぃ）らてぃ、幼（いぇえく）る思（うみ）ん子（ぐぁあ）ぬ達（ちゃあ）引（ふぃ）ちぬ為（たみ）、大原（おおはら）に出（ぃん）ぢゃい長刀（なぎなた）鎌手（かまでぃ）唐手（からてぃ）不足（ぶすぃく）、武芸（ぶぎい）ぬ数々（かずぃかずぃ）嗜（たしな）みぬ御様子（ぐよすぃ）、其（う）ぬ事（くとぅ）どぅ大主（うふぬし）や後先（あとぅさち）前（め）寄（ゆ）すぃや合点（がてぃん）な事（くとぅ）、御男子（ぐだんし）ぬ達（ちゃあ）に武芸（ぶぎい）御指南（ぐしなん）召（み）しょち、南山（なんざん）ぬ按司（あじ）ぬ御腰立（うくしだ）てぃ勤（がらみ）かしゅる御計（うはかれ）えんでぃ言（い）や侍（び）ん、とお、此（く）ぬ事（くとぅ）や按司（あじ）に願筋（にげすぃじ）美御宣（みゅんにゅ）きてぃ、済（すぃ）まさん限（かぢ）りや如何（ちゃあ）ん成（な）らん、今（なま）吾（わん）とぅ良（い）い拍子（ひょおし）有（や）しゃ、按司（あじ）ぬ大謝名（おおじゃな）ぬ大主（うふぬし）でぃ言（ぃゆ）る人（ちゅ）ぬ、此（く）ぬ頃（ぐる）按司（あじ）に度々（たびたび）諫言（くぁんぎん）しちゅん置（う）ちん、心（くくる）取（とぅ）い直（のお）し与座（ゆざ）ん早々（ふぇえべえ）とぅ国元（くにむとぅ）に帰（けえ）ち弁免（びんみん）遣（や）る事（くとぅ）んでぃ、御宣（うんにゅ）きみやいに場所（ばしゅ）てぃ有侍（やび）ん、片時（かたとぅち）ん早（ふぇえ）く願（にげ）え立（た）てぃ召（み）しょり。
千代松
今（なま）ぬ事（くとぅ）有（や）りば誇（ふく）らしゃどぅ有（あ）ゆる、やあやあ、引合（ふぃちゃ）わしぬ御縁（ぐいん）、拝（うぅが）む御情（うなさ）きん、段々（だんだん）ぬ肝入（ちむい）り言（い）ちん尽（つぃく）さらん、此（く）ぬ御思（うむ）い一期（いちぐ）頂（つぃじ）に頭（かみ）ら。
住居人
とお、今日（ちゅう）や先（ま）ずぃ我（わ）が屋戸（やどぅ）に御遣（うつぃ）け為（し）ち、御休息（うきゅうすく）召（み）しょち、明日（あちゃ）に為（し）ちから、今（なま）御願（うぐぁん）立（た）てぃ召（み）しょり、先（ま）ずぃ御入（うい）りみ為侍（しゃび）り。
与座の大主
是（くり）や南山（なんざん）ぬ臣下（しんか）与座（ゆざ）ぬ大主（うふぬし）、ああ、国々（くにぐに）ぬ按司部（あじび）勢（いちう）い事（ぐとぅ）やい、軍事（いくさぐとぅ）起（う）くち国（くに）ゆ渡（わた）らしゅん、我（わ）が主人（しゅじん）按司（あじ）ぬ捨（すぃ）てぃ置（う）ちや成（な）らん、南山（なんざん）ぬ十五ケ（じゅうぐか）家（や）打（う）ちゆ平（てえ）らぎてぃ、今（なま）や波風（なみかぢ）ん静（しずぃ）か成（な）てぃ居（うぅ）りば、按司（あじ）ぬ御喜（うゆるく）び御万人（うまんちゅ）ぬ安堵（あんどぅ）や寄（ゆ）りどぅん、北山（ふくざん）や今（なま）に軍事（いくさぐとぅ）絶（て）らん、殊（くとぅ）に南山（なんざん）謀（たばか）ゆう究（きわ）みてぃ有（あ）りば、朝夕（あさゆ）御気（うち）ぬ毒（どぅく）身（み）に余（あま）てぃ居（うぅ）とぅてぃ、邪（ゆくしま）ぬ心（くくる）互（たげ）に取（とぅい）い収（うさ）み、北山（ふくざん）とぅ南山（なんざん）心（くくる）打（う）ち合（あ）わち、四方（ゆむ）ぬ上下（かみしむ）ん静（しずぃ）か成（な）る事（くとぅ）に美宣（みゅん）ち事（ぐとぅ）拝（うぅが）でぃ来（ちゅう）る事（くとぅ）有（や）すぃが、十年（とぅとぅ）余（あま）る迄（までぃ）ん引（ふぃ）ちゆ留（とぅ）みらりてぃ、何事（ぬうぐとぅ）ぬ御返事（ぐふぃじ）絶（てえ）てぃ無（ね）ん有（あ）りば、徒（いたずぃ）らに年日（とぅしふぃ）送（うく）る心気（しんち）、ああ、口惜（くちう）しや嫌（いや）言（い）ちゃんてぃい如何（ちゃ）為（しゅ）が、無情（むじょ）ぬ世（ゆ）ぬ習（なれ）や今日（ちゅう）や名（な）に立（た）ちゅる三月三日（さんぐぁつぃみっちゃ）、馴（な）りし故郷（ふるさとぅ）ぬ名残（なぐ）り立（た）ち増（ま）さてぃ、子供（くぁどぅむ）引（ふぃ）ち連（つぃ）りてぃ遊（あすぃ）でぃ忘（わすぃ）ら。やあやあ、虎千代（とぅらちゆ）、虎松（とぅらまつぃ）ん押（う）し連（つぃ）りてぃ出様（でぃよ）り、出様（でぃよ）り。
（此の時 松腰差し 鋳り長刀持ち出る）
野原（もお）出（ぃん）ぢてぃ見（ん）りば、千草（ちぐさ）萌（みい）出（ぃん）ぢてぃ、吹（ふ）ち添（すぃ）ゆる風（かぢ）ぬ匂（にう）いぬ萎（しゅうら）しゃ、とおとお、此（く）ぬ辺（ふぃん）に居（うぅ）とぅてぃ花（はな）ゆ眺（なが）みらに。やあ、思（う）みん子（ぐぁ）ゆ、春（はる）ぬ草（くさ）ぬ葉（ふぁ）ん翠（みどぅり）差（さ）し添（すぃい）てぃ、見（ん）りば年寄（とぅしゆ）いん若（わか）く成（な）ゆさ。
虎千代
やあ、父親（たありい）ゆ、巡（みぐ）てぃ春（はる）来（く）りば木草（きぐさ）でぃん知（し）ゆい、頼（たん）でぃ父親（ちちうや）ん昔（んかし）繰（く）い戻（むどぅ）ち、花（はな）咲（さ）ちゅる春（はる）ん有（あ）いどぅ為侍（しゃび）る。
与座の大主
やあ、思（う）みん子（ぐぁ）、今日（ちゅう）ぬ誇（ふく）らしゃぬ物（むぬ）に譬（たとぅ）らりみ習（な）れ取（とぅ）たる手並（てぃな）み振（ふ）り立（た）ちゃい見（み）しり。
虎千代
虎 松
拝（うぅが）ん留（とぅ）み有侍（やび）てぃ。
歌
武士（ぶし）ぬ身（み）や空（すら）に 飛（とぅ）ぶ鳥（とぅい）ぬ心（くくる）
見詰（みつぃ）みてぃん手（てぃ）にや 取（とぅ）いや成（な）らん
与座の大主
ああ、出来（でぃき）た出来（でぃき）た。
（但し此の時 虎千代、虎松両人替わる替わる立ち、与座笛吹く真似して鎗長刀手あり）
与座の大主
今日（ちゅう）ぬ誇（ふく）らしゃぬ物（むぬ）に譬（たとぅ）らりみ、とおとお、習（な）れ取（とぅ）たる手並（てぃな）み残（ぬく）らずぃに見（み）しり。
（但し此の時 鎌手唐手あり）
ああ、出来（でぃき）た出来（でぃき）た。
虎千代
やあ、父親（たありい）ゆ、南山（なんざん）ぬ今日（ちゅう）や此（く）ぬ遊（あすぃ）び有（あ）や侍（びい）み。
与座の大主
南山（なんざん）ぬ今日（ちゅう）や段々（だんだん）ぬ遊（あすぃ）び野原（ぬふぁら）から浜辺（はまび）歌（うた）や舞（ま）い遊（あすぃ）び、此（く）りゆいん勝（まさ）る賑（にぎ）やかどぅ有（や）ゆる。
虎千代
やあ、父親（たありい）ゆ、其（う）り程（ふどぅ）ん勝（まさ）る国（くに）有（や）とぅてぃ兎角（とぅかく）、一期（いちぐ）南山（なんざん）ぬ沙汰（さた）ゆ召（み）しょら。
与座の大主
いやいや、汝達（うがたあ）が其（う）ぬ程（ふどぅ）ん成（な）やい又（また）居（うぅ）りば、南山（なんざん）ぬ事（くとぅ）ん言（ぃゆ）てぃ慰（なぐさ）みゆん、互（たげ）に言語（いかた）れや何時（いつぃ）迄（までぃ）ん飽（あ）かん。日（ふぃい）下（う）りてぃ居（うぅ）むぬ出（ぃん）ぢゆ出（ぃん）ぢゆ屋戸（やどぅ）に戻（むどぅ）ら。
歌
戻（むど）る道（みち）過（すぃ）がら 語（かた）る云言葉（いくとぅば）や
聞（ち）ちゅる袖（すでぃ）迄（までぃ）ん 露（つぃゆ）どぅ吾（わ）寄（ゆ）る
情（なさ）き有（あ）る人（ふぃちゅ）ぬ 云言葉（いくとぅば）ぬ匂（にう）い
便（たゆ）てぃ行（い）く先（さち）や 頼（たぬ）む親泊（とぅまい）
千代松
御城元（うしるむとぅ）今（なま）どぅ尋（とぅ）めてぃ着（つぃ）ちゃる。
とおとお、御取次（うとぅりつぃぢ）為（すぃ）らに、御門番衆（ぐむんばんしゅ）御取次（うとぅりつぃぢ）頼（たぬ）ま。
門番
誰（たる）が有（や）い召（み）しぇら。
千代松
南山（なんざん）ぬ臣下（しんか）与座（ゆざ）の大主（うふぬし）ぬ、嫡子（ちゃくし）千代松（ちゆまつぃ）、弟子（うっとぅぐぁ）亀千代（かみちゆ）、按司愛（あじがな）し拝（うぅが）でぃ頼（たぬ）み事（ぐとぅ）有（あ）とぅてぃ、寄（ゆ）しりやい居（うぅ）る次第（しでえ）御取次（うとぅりつぃぢ）頼（たぬ）ま、良（ゆ）たしゃ有（あ）る様（よお）に御宣（うんにゅ）きてぃ給（たぼ）り。
門番
此（く）ぬ様（よ）御取次（うとぅりつぃぢ）為侍（しゃび）ら。
さり、拝（うぅが）まりゆ召（み）しぇん是（くり）に入（い）り召（み）しょり。
按司
やあやあ、童（わらび）貴（あてぃ）無（な）しぬ二人（ふたい）押（う）し連（つぃ）りてぃ、如何（いちゃ）る願事（にげぐとぅ）ぬ有（あ）とぅてぃ来（ちゃあ）が。
千代松
哀（あわ）り此（く）ぬ二人（たい）や与座（ゆざ）の大主（うふぬし）ぬ、兄（すぃいざぐぁ）千代松（ちゆまつぃ）弟子（うっとぅぐぁ）亀千代（かみちゆ）父親（ちちうや）ぬ事（くとぅ）や十年（とぅとぅ）余（あま）る迄（までぃ）ん、御引（うふぃ）ち留（とぅ）み居（うぅ）かりやい居（うぃ）りば、如何（いちゃ）る有様（ありさま）に成（な）やい又（また）居参（いめ）ら、思（うむ）い身（み）に余（あま）てぃ肝（ちむ）ん肝（ちむ）成（な）らん亀千代（かみちゆ）とぅ二人（ふたい）命（いぬち）思（う）み頑張（はま）てぃ、波路（なみじ）遥々（はるばる）とぅ寄（ゆ）しりやい来（ちゃあ）侍（び）たる、是非（じふぃ）ゆ父親（ちちうや）や免（ゆる）ち給（たぼ）り。
亀千代
やあ、按司愛（あじがな）し、兄前（すぃいざめ）とぅ二人（ふたい）人（ふぃちゅ）に生（う）まりとぅてぃ、子（くぁあ）とぅ成（な）る道（みち）ぬ立（た）たな有（あ）てぃからや。太陽（てぃだ）ぬ下（しちゃ）居（うぅ）とぅてぃ怖（うとぅる）しゃゆ有（あ）むぬ、頼（たん）でぃ願事（にげぐとぅ）や御宣（うんにゅ）かてぃ給（たぼ）り。
按司
やあ、童（わらび）貴（あてぃ）無（な）しぬ願事（にげぐとぅ）ぬ萎（しゅら）しゃ、聞（ち）ちゅる袖（すでぃ）迄（までぃ）ん露（つぃゆ）どぅ置（う）ちゅる、やあ、千代松（ちゆまつぃ）、やあ、亀千代（かみちゆ）、敵（てぃち）とぅ片付（かたづぃ）きてぃ返事（ふぃじ）ゆ為（さ）ん為（しゅ）むぬ、其（う）ぬ門（じょお）や先（ま）ずぃ客屋（ちゃくや）に控（ひけ）えてぃ居（うぅ）り。やあ、仲宗根（なかすに）ぬ輩（ひゃあ）、急（いす）ぢ客屋（ちゃくや）に連（つぃ）りてぃ行（い）き。
仲宗根のひや
拝（うぅが）ん留（とぅ）み有侍（やび）てぃ。
とおとお、御供（うとぅむ）為侍（しゃび）ら。
按司
やあやあ、二人（ふたい）押（う）し連（つぃ）りてぃ今（なま）ぬ事（くとぅ）有（や）りば、如何（いちゃ）有（あ）りば済（すぃ）むか考（かんげ）えてぃ見（ん）でぃゆ。
親泊大主
さり、按司愛（あじがな）しい、与座（ゆざ）ぬ大主（うふぬし）どぅ此（く）ぬ国（くに）ぬ様子（よおすぃ）、細々（くまぐま）ぬ事（くとぅ）ん呑（ぬ）み込（く）やい居（うぅ）りば、若（む）しか南山（なんざん）に取（とぅ）い帰（けえ）てぃ後（ぬち）に、御思（うむ）い打（う）ち忘（わすぃ）てぃ物企（むぬたく）み為（すぃ）らば、事（くとぅ）や難（むつぃか）しく成（な）り立（た）ちゅる積（つぃ）むい、親子（うやくぁ）諸共（むるとぅむ）に引（ふぃ）ち留（とぅ）みてぃ置（う）きば、年月日（とぅしつぃちふぃ）重（かさ）に御思（うむ）い忘（わすぃ）りらば、世々（ゆゆ）ぬ御譜代（ぐふでえ）ん萌（みぐみ）に思（む）てぃ、按司愛（あじがな）し御奉公（みゃでえ）思（う）み頑張（はま）る筈（はじ）でえ侍（び）むぬ、此（く）ぬ筋（すぃじ）に御片付（うかたづぃ）き御良（うゆ）たしゃ有侍（あび）らに。
仲宗根のひや
親泊（うやどぅまい）ぬ言（ぃゆ）りる事（くとぅ）、此（く）ぬ国（くに）ぬ仕置（しう）き、事（くとぅ）漏（む）りてぃ済（すぃ）ま侍（び）らん、急（いす）ぢ此（く）ぬ事（くとぅ）に御究（うきわ）みゆ召（み）しょり。
按司
大（でえ）な事（くとぅ）大（でえ）な事（くとぅ）、やあ、謝名（じゃな）ぬ大主（うふぬし）や如何（いちゃ）が如何（いちゃ）が。
謝名の大主
さり、此（く）ぬ事（くとぅ）や兼々（かにがに）御宣（うんにゅ）きる事（くとぅ）に、南山（なんざん）ぬ御所存（ぐしゅずん）考（かんげ）えてぃ見（ん）りば、北山（ふくざん）とぅ南山（なんざん）や共（とぅむ）に天（てぃん）戴（いただ）ち、互（たげ）に地（じ）や踏（ふ）まん敵（てぃち）や又（また）有（あ）らん、一時（ふぃとぅとぅち）ぬ威勢（いすぃい）争（あらす）いぬ為（たみ）に、国（くに）ゆ疲（つぃか）らしゃい人（ちゅ）傷（きずぃ）付（つぃ）きなとぅてぃ、軍事（いくさぐとぅ）為（しゅ）すぃや道（みち）成（な）らん有（あ）りば、互（たげ）に此（く）ぬ間（えだ）ぬ恨（うら）み打（う）ち忘（わすぃ）てぃ、国（くに）ぬ為（たみ）に御計（うはかれ）え有（あ）すぃどぅ、御慈悲（ぐじふぃ）有（あ）る御世（みゆ）ぬ御主人（ぐしゅじん）ぬ印（しるし、天道（てぃだ）に向（ん）かてぃ真実（しんじつぃ）御相談（ぐすだん）仕合（しやわ）しどぅ思（うみ）な、肝（ちむ）暗（ぐら）さ企（たく）でぃ親子（うやくぁ）諸共（むるとぅむ）に、引（ふぃ）ちゆ留（とぅ）み置（う）かば光（ふぃちゃい）有（あ）る御名（うな）や、南山（なんざん）に有（あ）とぅてぃ、北山（ふくざん）や悪名（あくな）流（なが）りゆる積（つぃむ）い、又（また）如何（いちゃ）な按司添（あじすい）ぬ慈悲（じふぃ）ぬ肝（ちむ）飾（かざ）てぃ、色々（いるいる）ぬ情（なさ）き給（た）び召（み）しょち與呼（てぃやり）、人（ふぃちゅ）ぬ御臣下（ぐしんか）ぬ誠（まくとぅ）絶（て）え果（は）てぃてぃ、此処（くま）に肝（ちむ）寄（ゆ）しる事（くとぅ）や又（また）無（ね）さみ、ああ、要（い）らん肝（ちむ）尽（つぃく）ち外（ふか）成（な）とぅる事（くとぅ）ん、昔（んかし）から今（なま）に数（かずぃ）や知（し）らん、片時（かたとぅち）ん急（いす）ぢ御暇（ういとぅま）ゆ給（たぼ）り。
天底の子
やあ、大主（うふぬし）、義理（ぢり）ぬ無（ね）ん人（ふぃちゅ）ぬ世（ゆ）ぬ中（なか）ゆ有（や）りば、只（ただ）真肝（まぢむ）敷（し）ち居（うぅ）とぅてぃ騙（だまさ）りてぃ済（すぃ）まん、南山（なんざん）ぬ親子（うやくぁ）此処（くま）どぅ取（とぅ）い御留（うとぅ）み兎角（とぅかく）片付（かたづぃ）きや有（あ）る筈（はじ）ゆでむぬ、彼（あ）ん為（しぇ）え先（ま）ずぃ留（とぅ）みてぃ置（う）ちゃ侍（び）らな。
謝名の大主
やあ、天底（あみすく）の子（しい）、人（ちゅ）ぬ言葉（くとぅば）や胸内（んにうち）ぬ大将（たえしょ）、云言葉（いくとぅば）ぬ上（ぅうぃい）に肝（ちむ）ぬ底（すく）迄（までぃ）ん、探（さぐ）出（ぃん）ぢる程（ふどぅ）ぬ智高（ちだか）く無（ねえ）ん有（あ）りば、如何（いちゃ）ん如（ぐとぅ）し国（くに）ぬ治（うさ）み又（また）成（な）ゆが、南山（なんざん）ぬ按司（あじ）ぬ御遣（うつぃけ）えぬ御意趣（ぐいしゅ）。又（また）千代松（ちゆまつぃ）、亀千代（かみちゆ）が今（なま）ぬ願立（にげだ）てぃや、誠（まくとぅ）真実（しんじつぃ）ぬ心（くくる）から出（ぃん）ぢてぃ、偽（いつぃわ）いぬ企（たく）み絶（て）えてぃ無（ね）ん有（あ）すぃや、取（とぅ）いゆ究（きわ）みどぅん取（とぅ）いゆ定（さだ）みどぅん、然（さ）り、按司愛（あじがな）しい昔（んかし）から今（なま）に始（はじ）まとぅる御世（みゆ）や、君（きみ）臣下（しんか）共（とぅむ）に義理（ぢり）ぬ道（みち）守（まむ）てぃ親国（うやぐに）ぬ治（うさ）み道（みち）直（すぃぐ）に有（あ）とぅてぃ、御万人（うまんちゅ）其（う）り其（う）りぬ願立（にげだ）てぃん遂（とぅ）ぎてぃ、義理（ぢり）ぬ道筋（みちすぃじ）ん堅（かた）く取（とぅ）い守（まむ）てぃ御主人（ぐしゅじん）ぬ御為（うたみ）、親国（うやぐに）ぬ為（たみ）に命（いぬち）捨（すぃ）てぃゆすぃや露（つぃゆ）照（てぃ）りる如（ぐとぅ）に、思（う）み果（は）たす故（ゆい）どぅ如何（いちゃ）な武士（さむれえ）ぬ国（くに）ぬ刀（かたな）及（うゆ）ぶゆてぃすぃん、何故（ぬゆ）でぃ恐（うす）りゆが、真（まく）とぅ天道（てぃだ）ぬ御慎（うつぃつぃし）み有（あ）てぃん島国（しまぐに）ぬ仕置（しう）き、御念（ぐにん）入（い）り召（み）しょち人（ふぃちゅ）ぬ善悪（じんあく）ん、清（さや）か照（てぃ）り分（わ）かち善（ゆ）たしゃすぃや揚（あ）ぎてぃ悪（わる）しゃすぃや捨（すぃ）てぃてぃ、誹（すさ）み事（ぐとぅ）嫌（きら）てぃ諫（いさ）み事（ぐとぅ）好（くぬ）でぃ、人（ふぃちゅ）ぬ口（くち）開（ふぃら）ち人（ふぃちゅ）ぬ肝（ちむ）明（あ）きてぃ義理（ぢり）ぬ御捌（うさば）ちぬ道（みち）曇（くむ）てぃからや、跡（あとぅ）かてぃゆ隠（かく）ち深山（みやま）住（すぃ）む人（ふぃちゅ）ん、走（や）いゆ集（あつぃ）まやい、我（わ）が御主（うしゅ）ぬ御為（うたみ）誠（まくとぅ）肝（ちむ）尽（つぃく）ち働（はたら）ちな置（う）ちゅみ、照（てぃ）り増（ま）さる光（ふぃちゃい）出（ぃん）ぢる日（ふぃ）ぬ如（ぐとぅ）に、四方（ゆむ）ぬ海山（うみやま）ん暮（く）りる方（かた）無（ね）らん恵（みぐ）み照（てぃ）り渡（わた）てぃ諸島（むるはなり）や諸鳥（むるどぅい）、海（うみ）に船（ふに）渡（わた）り山（やま）に沓（くつぃ）掛（か）きてぃ、珍（みずぃ）ら物（むん）上（あ）ぎてぃ美宣（みゅん）さ事（ぐとぅ）拝（うぅが）でぃ、異変事（いふぃんぐとぅ）成（な）らん。背（すむ）く者（むぬ）居（うぅ）らん、御万人（うまんちゅ）ぬ譲（ゆずぃ）り生（い）ち楽（らく）ゆ誇（ふく）てぃ、弓矢（ゆみや）取（とぅ）い納（うさ）み軍事（いくさぐとぅ）止（や）みてぃ、上下（かみしむ）ぬ治（うさ）み堅（かた）みやい置（う）きば、如何（いちゃ）ん道（みち）有（あ）とぅてぃ弓引（ゆみふぃ）ちぬ為（さ）りが、急（いす）ぢ此（く）ぬ事（くとぅ）や御究（うきわ）みゆ召（み）しょり。
按司
ああ、義理（じり）情（なさ）き尽（つぃく）ち諫（いさ）みゆる事（くとぅ）や、肝（ちむ）に犇々（ふぃしふぃし）とぅ感（かん）じてぃどぅ居（うぅ）ゆる。
天底の子
ああ、此（く）ぬ上（ぅうぃい）や存（ずん）じ寄（ゆ）り絶（て）えてぃ有（あ）や侍（び）らん。
親泊大主
然（さ）り、按司愛（あじがな）しい、大主（うふぬし）ぬ計（はか）れ事（ぐとぅ）気（ち）ぬ付（つぃ）ちん有（あ）や侍（び）たん。真（まく）とぅ我々（わりわり）ぬ鈍（にぶ）さ有（あ）る故（ゆい）に、目（み）ぬ前（め）勇力（ゆうりち）ぬ唯（ただ）一事（いちじ）頼（たゆ）てぃ、遠（とぅう）く計（はか）りゆる智高（ちだか）無（ね）ん有（あ）とぅてぃ、御耳（うみみ）穢（きが）らしや御肝（うぢむ）為（し）てぃ有（あ）むぬ、御咎（うとぅが）みや平（ふぃら）に拝（うぅが）ん留（とぅ）み有侍（やび）ら。
按司
いやいや、其（う）り此（く）りん良（ゆ）たしゃ良（い）い連（つぃ）り肝（ぢむ）揃（する）てぃ、忠義（ちゅうぎ）ぬ心（くくる）深（ふか）さ有（あ）る故（ゆい）どぅ、頑張（はま）てぃ諫（いさ）みゆる肝（ちむ）ぬ振（ふ）り萎（しゅうら）しゃ、又（また）互（たげ）に胸子（んにくぁ）砕（くだ）ち諫（いさ）みたる事（くとぅ）ぬ、立（た）ち立（た）たん事（くとぅ）や我身（わみ）に又（また）有（あ）りば、何（ぬう）でぃ汝達（うがたあ）に咎（とぅが）ぬ掛（か）きらりが、此（く）ぬ事（くとぅ）や少（いふぃ）ん気遣（きづぃけ）えや為（すぃ）るな。やあ、謝名（じゃな）ぬ大主（うふぬし）、暗（くら）さ有（あ）る主人（しゅじん）頼（たぬ）でぃ居（うぅ）る有（や）りば、仮令（たとぅい）気（ち）に違（たが）てぃ腹立（はらだ）てぃゆ為（し）ちん。押（う）し返（けえ）し返（けえ）し諫（いさ）みやい呉（くぃ）りゆ、闇（やみ）ぬ灯（とぅむ）し火（び）ぬ道標（みちしるび）頼（たぬ）ま。此（く）ぬ間（え）ぬ過（あやま）ち気（ち）ぬ毒（どぅく）どぅ有（や）ゆる。
謝名の大主
ああ、美宣（みゅん）し事（ぐとぅ）拝（うぅが）でぃ、袖（すでぃ）どぅ濡（ぬ）ら為侍（しゃび）る、人（ふぃちゅ）ぬ御主人（ぐしゅじん）ぬ沙汰（さた）さりる者（むぬ）や、昔（んかし）から今（なま）に例（たみ）し数（かずぃ）有（あ）すぃが、思（う）み事（ぐとぅ）ぬ有（あ）とぅてぃ御意見（ぐいきん）ゆ為（すぃ）りば、御悟（うさとぅ）いゆ召（み）しょち御肝（うぢむ）改（あらた）みてぃ御油断（ぐゆだん）ぬ成（な）らん御守（うまむ）いぬ有（あ）すぃどぅ、御慈悲（うじふぃ）有（あ）る御主（うしゅ）ぬ光（ふぃちゃい）顕（あらわ）りてぃ世々（ゆゆ）ぬ世々（ゆゆ）鳴響（とぅどぅ）み御名（うな）や朽（く）ちゃ侍（び）らん、ああ、今日（ちゅう）ぬ美宣（みゅん）ち拝（うぅが）でぃ御万人（うまんちゅ）や、有難（ありがた）さ思（うむ）てぃ目眉（みまゆ）打（う）ち笑（わら）てぃ、向（ん）かてぃ来（ちゅ）る顔（かう）ん目（み）ぬ前（め）引（ふぃ）ち寄（ゆ）してぃ北山（ふくざん）ぬ盛（さけ）る印（しるし）で侍（び）る。
按司
やあ、謝名（じゃな）ぬ大主（うふぬし）、南山（なんざん）に遣（つぃか）わしゅる返書（ふぃんしゅ）調（しら）びらん、又（また）、与座（ゆざ）ぬ大主（うふぬし）ぬ親子（うやっくぁ）急（いす）ぢ呼（ゆ）ばさり。
謝名の大主
ふう、やあ、天底（あみすく）ぬ子（しい）、急（いす）ぢ調（しら）びやい上（あ）ぎてぃ来（ちゅう）り。又（また）千代松（ちゆまつぃ）、亀千代（かみちゆ）連（つぃ）りてぃ来（く）う。
天底の子
拝（うぅが）ん留（とぅ）み有侍（やび）てぃ。
仲宗根のひや
与座（ゆざ）ぬ大主（うふぬし）急（いす）ぢ呼（ゆ）でぃ来（ちゅう）り。
天底の子
拝（うぅが）ん留（とぅ）み有侍（やび）てぃ。
与座（ゆざ）ぬ大主（うふぬし）連（つぃ）りてぃ来有侍（ちゃあび）たん。
按司
やあ、大主（うふぬし）、使（つぃけ）え召（み）しちゃすぃや別事（びつぃぐとぅ）や有（あ）らん、尋（たずぃ）に欲（ぶ）しゃる事（くとぅ）有（あ）とぅてぃ呼（ゆ）でぃ見（ん）ちゃる。
与座の大主
何（ぬ）う事（ぐとぅ）が急（いす）ぢ糺（ただ）すぃ召（み）しょり。
按司
大主（うふぬし）や南山（なんざん）に生（う）みん子（ぐぁ）幾人（いくたい）が。
与座の大主
男（うぃきぐぁ）ん子（ぐぁ）二人（たい）で有侍（えび）る。
按司
兄子（すぃいざぐぁ）千代松、弟子（うっとぐぁ）亀千代（かみちゆ）い。
与座の大主
さてぃさてぃ、如何（いちゃ）し按司愛（あじがな）し知（し）り召（み）しょち居参（いめ）が。
按司
其（う）ぬ事（くとぅ）どぅ有（や）ゆる大主（うふぬし）ゆ尋（とぅ）めてぃ、波路（なみじ）遥々（はるばる）とぅ渡（わた）てぃ来（ち）居（うぅ）ん、呼（ゆ）び寄（ゆ）してぃ有（あ）りば、連（つぃ）りてぃ来（ちゅ）ん為（しゅ）むぬ。
天底の子
連（つぃ）りてぃ来有侍（ちゃあび）たん。
千代松
亀千代
やあ、父親（たありい）ゆ。
与座の大主
やあ、生（う）みん子（ぐぁ）。
歌
親子（うやくぁ）振合（ふやわ）ちゃし 夢（いみ）が有（や）ゆら
天底の子
然（さ）り、上（あ）ぎ有侍（やび）ら。
按司
出来（でぃき）た出来（でぃき）た。
与座の大主
やあ、生（う）みん子（ぐぁ）、赤子（あかんぐぁ）ぬ時分（じぶん）別（わか）りやい居（うぅ）りば、元（むとぅ）ぬ面顔（つぃらかう）ん夢現心（ゆみうつぃつぃぐくる）、会（あ）わてぃない知（し）らん夢（いみ）や有（あ）らに。
千代松
やあ、父親（たありい）ゆ、赤（あか）さでぃぬ内（うち）に振別（ふやか）りてぃ居（うぅ）りば、如何（しちゃ）が成（な）てぃ居参（いめ）ん、音連（うとづぃ）りん無（ね）らん、思（うむ）い身（み）に余（あま）てぃ肝（ちむ）に肝（ちむ）成（な）らん、亀千代（かみちゆ）とぅ二人（ふたい）命（いぬち）思（う）み頑張（はま）てぃ、知（し）らん此（く）ぬ国（くに）に尋（とぅ）め尋（とぅ）めに来（ちゃ）すぃが、真（まく）とぅ拝（うぅが）ぬすぃや夢（いみ）が有（や）や侍（びい）ら。
按司
やあ、千代松（ちゆまつぃ）、亀千代（かみちゆ）、親（うや）ぬ為（たみ）とぅ思（む）てぃ、波路（なみじ）遥々（はるばる）とぅ渡（わた）てぃ来（ちゅ）る心（くくる）感（かん）じてぃどぅ居（うぅ）ゆる、やあ、大主（うふぬし）、此（く）ぬ間（ま）や其（う）り其（う）り片付（かたづぃ）きぬ有（あ）てぃどぅ、留（とぅ）み置（う）ちん有（あ）たる、既（にゃあ）や片付（かたづぃ）きてぃ暇（いとぅま）取（とぅ）らしゅむぬ親子（うやくぁ）押（う）し連（つぃ）りてぃ誇（ふく）てぃ立（た）ち戻（むどぅ）り。
親子三人
嗚呼（ああ）、尊（とお）とぅ。
子二人
願（にが）た事（くとぅ）叶（かな）てぃ誇（ふく）らしゃどぅ有（あ）や侍（びい）る。此（く）ぬ御恩（ぐうん）一期（いちぐ）肝（ちむ）に被（かん）じゃ侍（び）ら。
按司
ええ、大主（うふぬし）、国元（くにむとぅ）に行（い）かば、按司（あじ）に首尾方（しゅびかた）や、是々（くりくり）良（ゆ）たしゃ有（あ）る様（よお）に計（はか）れやい給（たぼ）り。
与座の大主
拝（うぅが）ん留（とぅ）み有侍（やび）てぃ。
親子（うやくぁ）振合（ふやわ）ちゃい錦（にしき）打（う）ち童子（わらび）、立（た）ち帰（けえ）る今日（ちゅう）や嬉（うり）ししゃどぅ有（あ）すぃが、貴（あてぃ）無（な）しぬ二人（たい）や如何（いちゃ）が為（しゅ）ゆら。
虎千代
やあ、父親（たありい）ゆ、我身（わみ）ん諸共（むるとぅむ）に連（つぃ）りてぃ給（たぼ）り。
虎松
我身（わみ）ん連（つぃ）り行（い）かに、やあ、父親（たありい）ゆ。
按司
やあやあ、己達（うがたあ）や、此処（くま）に生（ぅん）まりたる者（むぬ）ゆ、親（うや）連（つぃ）りてぃ行（い）ちゅる道（みち）や又（また）無（ね）らん。とおとお、今日（ちゅう）からや明日（あちゃ）からや、我（わ）が側（すば）に置（う）ちい其（う）ぬ育（すだ）てぃ為（し）ちゅてぃ楽（らく）ゆ誇（ふく）らしゅん思（う）み留（とぅ）みてぃ居（うぅ）りゆ。
虎千代
やあ、按司愛（あじがな）しい、哀（あわ）り此（く）ぬ二人（たい）や此処（くま）に生（ぅん）まりてぃどぅ、育（すだ）てぃ有（あ）る事（くとぅ）や召（み）しぇる事（くとぅ）有（や）すぃが、親（うや）や南山（なんざん）ぬ御臣下（ぐしんか）どぅ有（や）ゆる、育（すだ）てぃやり一期（いちぐ）居（うぅ）いぬ又（また）成（な）ゆみ、是非（じふぃ）ゆ知（し）り召（み）しょち許（ゆる）ち給（たぼ）り。
虎松
母親（ふぁふぁうや）んでぃにし捨（すぃ）てぃらりてぃ居（うぅ）とぅてぃ、又（また）ん父親（ちちうや）ぬ捨（すぃ）てぃ参（めえ）ん有（や）りば、如何（いちゃ）し暮（く）ら為侍（しゃび）が、兄前（すぃいざめ）とぅ我身（わみ）や。
千代松
やあ、父親（たありい）ゆ、巣出（すぃだ）す母親（ふぁふぁうや）や待（ま）ち兼（か）にてぃ居参（いめ）ら。片時（かたとぅち）ん急（いす）ぢ御暇（ういとぅま）ゆ為侍（しゃび）ら。
亀千代
とおとお、御暇（ういとぅま）ゆ為侍（しゃび）ら、御立（うた）ち召（み）しょり。
虎松
兄前（すぃいざめ）とぅ我身（わみ）捨（すぃ）てぃてぃ何処（まあ）かい居参（いめ）が。
虎千代
虎松（とぅらまつぃ）ん共（とぅむ）に連（つぃ）りてぃ給（たぼ）り。
与座の大主
ああ、哀（あわ）り我（わ）が親（なさ）や二（ふた）つぃ無（ね）ん我身（わみ）ぬ、片付（かたづぃ）きん成（な）らん中（なか）に挟（はさ）まりてぃ我肝（わぢむ）暗闇（くらやみ）とぅ成（な）るが心気（しんち）。
歌
二（ふた）つぃ無（ね）ん我身（わみ）ぬ 中（なか）に挟（はさ）まりてぃ
心（くくる）闇々（やみやみ）とぅ 成（な）るが心気（しんち）
按司
やあ、人（ふぃちゅ）ぬ上（ぅうぃ）どぅ有（や）すぃが、斯（か）にん難（むつぃか）さみ、互（たげ）に泣（な）ち暮（く）らち苦（くり）さ為（し）ち居（うぅ）りば、真（まく）とぅ留（とぅ）み置（う）ちゅる肝（ちむ）ぬ忍（しぬ）ばらん、やあ、大主（うふぬし）、二人（ふたい）共（とぅむ）暇（いとぅま）免（ゆる）ち遣（や）らしゅむぬ、親子（うやくぁ）諸共（むるとぅむ）に連（つぃ）りてぃ居参（いも）り。
与座の大主
やあ、按司愛（がじがな）しい、身（み）に余（あま）る御恩（ぐうん）打（う）ち重（かさ）に重（かさ）に、真（まくとぅ）かや実（じつぃ）か嬉（うり）ししゃぬ余（あま）り、真（まくとぅ）でぃん思（うま）ん、やあ、按司愛（あじがな）しい、御恩（ぐうん）尊（とぅうとぅ）さや如何（いちゃ）し忘（わすぃ）や侍（び）が、国元（くにむとぅ）に行（い）かば年々（とぅしどぅし）ぬ初（はじ）み、我（わ）が主人（しゅじん）按司（あじ）ぬ御万人（うまんちゅ）ぬ御果報（ぐかふ）願（にげ）てぃ又（また）親子（うやくぁ）此（く）ぬ国（くに）に向（ん）かてぃ、按司愛（あじがな）し御掛（うか）き栄（ふせ）え願（にげ）ゆ上（あ）ぎ有侍（やび）ら。
按司
やあ、大主（うふぬし）、是（くり）からぬ先（さち）や船（ふに）ぬ往来（おおれえ）ん繁（しじ）さ有（あ）らでむぬ、文（ふみ）ぬ通（かゆ）わしに互（たげ）に睦（むつぃ）まじく取合（とぅや）わしゆ為（すぃ）らに。
千代松
やあ、按司愛（あじがな）しい、段々（だんだん）ぬ御慈悲（ぐじひ）言（い）ちん尽（つぃく）さらん、此（く）ぬ御恩（ぐうん）尊（とぅうとぅ）さや胸（んに）に思（う）み染（すぃ）みてぃ、按司愛（あじがな）し代（でえ）ぬ百年（むむとぅ）何時（いつぃ）迄（までぃ）ん御掛（うか）き幸（さち）召（み）しぇる御願（うにげ）為侍（しゃ）びら。
与座の大主
やあ、按司愛（あじがな）しい、北山（ふくざん）に謝名（じゃな）、南山（なんざん）に与座（ゆざ）二人（ふたい）此（く）ぬ世界（しけ）に生（い）ちち居（うぅ）る間（えだ）や、弓矢（ゆみや）取（とぅ）い納（うさ）み軍事（いくさぐとぅ）止（や）みてぃ、不意（ふい）ぬ急（いす）ぢ難（なん）絶（て）えてぃ有（あ）や侍（び）らん。
按司
ああ、真（まく）とぅ大主（うふぬし）ぬ気立（ちだ）てぃ顕（あらわ）りてぃ、謝名（じゃな）とぅ大主（うふぬし）や割符（わいふ）心（ぐくる）、やあ、天底（あみすく）ぬ子（しい）、明日（あちゃ）や大主（うふぬし）ぬ船送（ふなうく）い為（さ）ん為（しゅ）むぬ、急（いす）ぢ其（う）り其（う）りぬ用意（よおい）為居（しょお）り。
天底の子
拝（うぅが）ん留（とぅ）み有侍（やび）てぃ。
与座の大主
御情（うなさ）きぬ御恩（ぐうん）美拝（みふぇえ）にゃ侍（び）る、又（また）思（う）み着（ちゃ）きん成（な）らん親子（うやくぁ）振合（ふや）わしゃい、立（た）ち帰（けえ）る今日（ちゅう）や誇（ふく）らしゃどぅ有（あ）すぃが、真（まく）とぅ御暇（ういとぅま）に御宣（うんにゅ）きる際（ちわ）や、此（く）ぬ間（えだ）ぬ名残（なぐ）り袖（すでぃ）に受（う）き留（とぅ）みてぃ、立（た）ち別（わか）り兼（か）にる馴（な）りし御側（うすば）、やあ、思（う）みん子（ぐぁ）、夜（ゆ）ん暮（く）りてぃ行（い）きば歩（あゆ）まらん有（あ）むぬ、今日（ちゅう）や我（わ）が屋戸（やどぅ）に押（う）し連（つぃ）りてぃ行（い）ちゅてぃ、明日（あちゃ）や明（あ）き明（あ）きに押（う）し連（つぃ）りてぃ登（ぬぶ）てぃ、御暇（ういとぅま）ゆ為侍（しゃび）ら。
按司
とおとお。
与座の大主
やあ、思（う）みん子（ぐぁ）、御暇（ういとぅま）ん済（すぃ）まち残（ぬく）る事（くとぅ）無（ね）らん、とおとお、急（いす）が急（いす）が。
子四人
とおとお、御供（うとぅむ）為侍（しゃび）ら。
歌
大主（うぬし）や先（さち）から 按司添（あじすぃ）や後（あとぅ）から 古宇利（くうり）下（う）りてぃ 船元（ふなむとぅ）に登（ぬぶ）てぃ 片手（かたてぃ）しゃ首（くび）抱（だ）ち 片手（かたてぃ）しゃ酌（しゃく）取（とぅ）てぃ 目（みい）ぬ冴（しぇえ）や 大主（うぬし）名護（なぐ）送（うく）ら 肝（ちむ）好（すぃ）ち大主（うふぬし） 御屋戸（うやどぅ）迄（までぃ）送（うく）ら。