義臣物語：本文　田里朝直作

国吉

出様（でぃよお）来（ちゃ）る者（むぬ）や、元（むとぅ）ぬ国吉（くにし）ぬ輩（ひゃ）今（なま）や国吉（くにし）ぬ子（し）、ああ、島尻（しまじり）ぬ世（ゆ）ぬ主（しゅ）高嶺（たかみに）ぬ按司（あじ）や、色欲（いるゆく）に耽（ふき）てぃ朝夕（あさゆ）酒盛（さかむ）やい、歌（うた）や三線（さんしん）ぬ絶（た）ゆる間（ま）や無（ね）らん、昔物語（んかしむぬがたい）引（ふぃ）ち出（ぃん）ぢゃち色々（いるいる）に異見（いきん）御宣（うんにゅ）きたん、忠言（ちゅうぎん）耳（みみ）に逆（さか）てぃ、位（くれえ）剥（は）ぢ取（とぅ）らり遣（や）り居（うぅ）りば、其（う）りからや日々（ふぃび）に御万人（うまんちゅ）や背（すむ）ち、弓（ゆみ）引（ふぃ）かんてぃ為（しゅ）すぃや露（つぃゆ）程（ふどぅ）ん知（し）らん、昨日（ちぬう）暁（あかつぃち）や首里軍（しゅいいくさ）押（う）し寄（ゆ）してぃ、攻（し）み囲（かく）でぃ居（うく）りば出（ぃん）ぢてぃ戦（たたか）ゆる者（むぬ）や一人（ちゅい）ん又（また）居（うぅ）らん、按司（あじ）や切腹（しっぷく）ゆ召（み）しょち女按司（うなぢゃら）とぅ思（う）み子（ぐぁ）や。与座（ゆざ）ぬ子（し）が引（ふぃ）ち連（つぃ）りてぃ逃（に）ぢ忍（しぬ）でぃ、与座（ゆざ）近（ちか）く行（い）ちゅる内（うち）流（なが）り矢（や）に当（あ）たてぃ、女按司（うなぢゃら）とぅ与座（ゆざ）ぬ子（し）や道柴（みちしば）ぬ露（つぃゆ）とぅ消（ち）い果（は）てぃ、哀（あわ）り若按司（わかあじ）とぅ思姉（うみない）が行（い）く先（さち）や知（し）る人（ふぃとぅ）や居（うぅ）らん、ああ、高嶺（たかみに）ぬ体（かんだ）搦（から）み出（じゃ）す者（むぬ）有（あ）らば、按司（あじ）に成（な）ち島知行（しまちぎゅ）ん呉（くぃ）ゆん、又（また）一夜（いちや）迚（とぅてぃ）ん隠（かく）し置（う）く者（むぬ）有（あ）らば、一門（いちむん）や実（だに）ゆ引（ふぃ）ち同胞（はろじ）迄（までぃ）ん、殺（くる）し尽（つぃく）さ為（しゅ）んてぃやり道々（みちみち）に高札（たかふだ）ぬ有（あ）りば、上（あ）がり太陽（てぃだ）拝（うぅが）む人心（ふぃとぅぐくる）有（や）りば、御万人（うまんちゅ）や敵（てぃち）とぅ成（な）てぃ弓（ゆみ）引（ふぃ）ちゅる世（ゆ）ぬ中（なか）ゆ有（や）りば、軈（やが）てぃ生（い）ち捕（とぅ）らり搦（から）み出（ぃん）じゃさらとぅ思（み）ば、ああ、至極（しぐく）気（き）ぬ毒（どぅく）どぅ有（や）ゆる、片時（かたとぅち）ん急（いす）ぢ、御行方（うゆくい）尋（たずぃ）にやい拝（うぅが）ま、此（く）ぬ仕度（したく）為（し）ちや他所（ゆす）ぬ疑（うたげ）えん立（た）ちゅら、ああ、今（なま）どぅ思（う）み付（つぃ）ちゃる小間物人形売（くまむんにんぎょおう）いに窶（やつぃ）りやい出（ぃん）ぢ立（た）ちゅん。

　歌

　姉上（うみない）とぅ我身（わみ）や　親（うや）に捨（すぃ）てぃらりてぃ

　　　　　　　互（たげ）に泣（な）ち暮（く）らち　居（うぅ）るが心気（しんち）

若按司

我身（わみ）や高嶺（たかみに）ぬ若按司（わかあじ）どぅ有（や）ゆる、首里軍（しゅいいくさ）押（う）し寄（ゆ）してぃ父母（ちちふぁふぁ）や殺（くる）さりてぃ姉上（うみない）とぅ我身（わみ）や、只（ただ）足（あし）に任（まか）ち、忍（しぬ）び出（ぃん）ぢたしが、行（い）く先（さち）や知（し）らん、与座岳（ゆざだき）に登（ぬぶ）てぃ高瀬（たかすぃい）ぬ下（しちゃ）に、夜（ゆう）や泣（な）ち明（あ）かち今（なま）迄（までぃ）や居（うぅ）すぃが、食（く）ゆる物（むん）離（はな）ち今日（ちゅう）や三日（みっか）成（な）ゆん、やあ、姉上（うみない）ゆ、新垣（あらかち）ぬ輩（ひゃあ）や母方（ふぁふぁかた）ぬ祖父（すふ）有（や）りば、夜（ゆ）ん暮（く）りてぃ居（うぅ）りば見（み）る人（ふぃとぅ）や居（うぅ）らん、立（た）ち寄（ゆ）やい頼（たゆ）てぃ隠（かく）りやい居（うぅ）らに。

思なり

とおとお、山道（やまみち）ゆ有（や）りば急（いす）ぢ出（ぃん）ぢてぃ。

若按司

やあやあ。新垣（あらかち）ぬ輩（ひゃあ）ゆ、輩（ひゃあ）ゆ。

新垣

やあ、思（う）みん子（ぐぁ）。

若按司

やあ、新垣（あらかち）ぬ輩（ひゃあ）、頼（たぬ）む方（かた）無（ね）らん尋（とぅ）め尋（とぅ）めゆ来（ちゃ）むぬ、頼（たぬ）でぃ情（なさ）き有（あ）てぃ隠（かく）ち置（う）ち給（たぼ）り。

新垣

やあ、思（う）みん子（ぐぁ）、隠（かく）し置（う）ち欲（ぶ）しゃや、浜（はま）ぬ真砂（まさぐ）程（ふどぅ）有（あ）すぃが、一夜（いちや）迚（とぅてぃ）ん体（かんだ）隠（かく）し置（う）く者（むぬ）有（あ）らば、一門（いちむん）や実（だに）ゆ引（ふぃ）ち同胞（はろじ）迄（までぃ）ん、殺（くる）し尽（つぃく）さ為（しゅ）んてぃやり道々（みちみち）に高札（たかふだ）ぬ有（あ）りば、肝（ちむ）苦（ぐり）しゃ有（あ）てぃん我（わ）が命（いぬち）とぅ替（けえ）てぃ迄（までぃ）ん肝（ちむ）入（い）りや成（な）らん、とおとお、遠（とぅう）く山原（やんばる）に御下（うう）りゆ召（み）しょおち、他所（ゆす）知（し）らぬ事（ぐとぅ）に隠（かく）りやい行参（いも）り。

若按司

やあ、新垣（あらかち）ぬ輩（ひゃあ）、飛（とぅ）ぶ鳥（とぅい）ん懐（ふちゅくる）に入（い）りば狩人（かりゅうどぅ）ん助（たすぃ）きゆん與呼（てぃやい）聞（ち）ちゅん、雪霜（ゆちしむ）や降（ふ）ゆい行（い）く先（さち）や知（し）らん、慈悲（じふぃ）ゆ情（なさ）き有（あ）てぃ、一夜（ちゅや）借（か）らち給（たぼ）り。

新垣

いやいや、思（う）み子（ぐぁ）助（たすぃ）きやい我（わ）が命（いぬち）取（とぅ）ゆみ、とおとお、此処（くま）からや急（いす）ぢ出（ぃん）ぢてぃ給（たぼ）り。

若按司

やあやあ、新垣（あらかち）ぬ輩（ひゃあ）、

新垣

いや、成（な）らん成（な）らん。

思なり

やあ、弟君（うみきい）ゆ、按司添（あじすい）が恩義（うんぢ）忘（わすぃ）てぃ今（なま）ぬ如（ぐとぅ）有（や）りば、此処（くま）居（うぅ）てぃや済（すぃ）まん急（いす）ぢ戻（むどぅ）ら。

若按司

御気張（うちば）りゆ召（み）しょり急（いす）ぢ戻（むどぅ）ら。

　歌

頼（た）る掛（が）きる山（やま）に雪霜（ゆちしむ）や降（ふ）りば、石原（いしばる）山道（やまみち）足元（あしむとぅ）ん傷（や）みば、歩（あゆ）でぃ歩（あゆ）まらん暗闇（くらやみ）ゆ有（や）りば、行（い）く先（さち）や迷（まゆ）てぃ彼（あ）ぬ岩（いわ）に縋（すぃが）い此（く）ぬ崖（きし）に登（ぬぶ）てぃ、互（たげ）に泣（な）ち明（あ）かち鳥（とうぃ）ん鳴（な）ち初（す）みてぃ、夜（ゆ）や明（あ）きてぃ居（うぅ）りば、此（く）ぬ山（やま）に隠（かく）り今日（ちゅう）や暮（く）らさ。

崎本

是（くり）や高良（たから）ぬ村頭（むらがしら）、上原（ぅうぃいばる）んかい耕作（くうさく）見回（みまわ）いに行（い）ちゅん、やあやあ、斯如（かにゃ）る山中（やまなか）に童（わらび）貴無（あてぃな）しぬ、如何（いちゃ）る事（くとぅ）有（あ）とぅてぃ二人（ふたい）居（い）ちゅが。

若按司

旅（たび）ぬ者（むぬ）有（や）すぃが長道（ながみち）ぬ疲（つぃか）り、足元（あしむとぅ）ん傷（や）みば、歩（あゆ）でぃ歩（あゆ）まらん、暫（しば）し休（やすぃ）まちゃい此処（くま）に居（い）ゆる、でぃゆでぃゆ、急（いす）ぢ先（さち）に通（とぅう）ら。

崎本

やあやあ、尽（つぃ）く尽（づぃ）くとぅ御様子（ぐよすぃ）拝（うぅが）でぃ見有侍（にやび）りば、確（たし）か高嶺（たかみに）ぬ思（う）みん子（ぐぁ）どぅ有（や）ゆる、御気遣（うきづぃけ）ゆ召（み）しょな、我身（わみ）や高良（たから）ぬ村頭（むらがしら）崎本（さちむとぅ）どぅ有（や）や侍（び）る、ああ、拝（うぅが）でぃ懐（なつぃ）かしや袖（すでぃ）ぬ涙（なみだ）。

若按司

やあ、崎本（さちむとぅ）ぬ子（しい）、二所（たとぅくる）ぬ親（うや）に捨（すぃ）てぃらりてぃ二人（ふたい）、頼（たゆ）る方（かた）無（ね）らん宿（やどぅ）る方（かた）無（ね）らん、彼（あ）ぬ谷（たに）に隠（かく）り此（く）ぬ山（やま）に宿（やどぅ）てぃ、軈（やが）てぃ消（ち）い果（は）てぃる露（つぃゆ）ぬ身（み）どぅ有（や）すぃが、今日（ちゅう）迄（までぃ）や死（し）なん此処（くま）に居（うぅ）ゆる。

崎本

やあ、思（う）みん子（ぐぁ）、やあ、姉君（うみない）ぬ前（めえ）、此（く）ぬ山（やま）に我（わ）が屋取（やどぅ）いぬ有（あ）や侍（びい）ん、山深（やまふか）さ有（あ）りば見（み）る人（ふぃとぅ）や居（うぅ）らん、忍（しぬ）び隠（かく）りとぅてぃ時節（じしつぃ）待（ま）ち召（み）しょり、とおとお、他所目（ゆすみ）無（ね）ん内（うち）に御気張（うちば）りゆ召（み）しょり。

若按司

慈悲（じふぃ）ゆ情（なさ）き有（あ）てぃ助（たすぃ）きやい給（たぼ）り。

崎本

御急（ういす）ぢゆ召（み）しょり御供（うとぅむ）為侍（しゃび）ら、然（さ）り、我（わ）が屋取（やどぅ）いや此（く）りどぅで侍（び）る、内（うち）に御遣（うんつぃけ）え為侍（しゃべい）ら。

国吉

是（くり）や国吉（くにし）ぬ子（し）、急（いす）ぢ小間物人形売（くまむんにんぎょおう）いに出（ぃん）ぢ立（た）ちゅん。

　歌

一度（ふぃとぅたび）栄（さけ）えば一度（ふぃとぅたび）衰（うとぅる）う世（ゆ）ぬ中（なか）ぬ習（なれ）え、思（うむ）い知（し）る身（み）ぬ哀（あわ）り果敢（はか）なや、裾（すす）わ結（むす）んでぃ肩（かた）に打（う）ち掛（か）き、窶（やつぃ）り出（ぃん）ぢたる姿（すぃがた）言葉（くとぅば）ん、今（なま）に引（ふぃ）ち換（け）え、島（しま）ぬ島々（しまじま）里（さとぅ）ぬ里々（さとぅざとぅ）巡（みぐ）い巡（みぐ）てぃ、人形（にんぎょお）買（こお）いん為居（しょお）り、仏（ふとぅき）買（こお）いん為居（しょお）り、人形（にんぎょ）ぬ数々（かずぃかずぃ）起（う）ち上（あ）がり小法師（くぶし）に若衆人形（わかしゅにんぎょ）、馬乗（うまぬ）い仏（ぶとぅき）此（く）り見（ん）でぃ童（わらび）、鳴子（ないく）鼓（つづぃみ）や、ほろろんほろろん、ほろほろほっとぅ。

国吉

やあ、童（わらび）、友（どぅし）呼（ゆ）びやい集（あつぃ）みりゆ此（く）ぬ仏（ふとぅき）幾（いく）らに。

わらべ

やあ、友（どぅし）ぬ達（ちゃあ）、仏（ふとぅき）呉（くぃ）ゆんてぃやい言（ぃゆ）る人（ふぃとぅ）ぬ居（うぅ）むぬ、とおとお、急（いす）ぢ出（ぃん）ぢり。

わらべ

仏（ふとぅき）呉（くぃ）ゆんてぃやらば、急（いす）ぢ出（ぃん）ぢら。

国吉

やあ、童（わらび）ぬ達（ちゃあ）、仏（ふとぅき）や望（ぬず）み次第（しでえ）呉（くぃ）ゆん、とおとお、選（いぃ）らでぃ取（とぅ）りゆ。

わらべ

吾（わん）や此（く）ぬ馬乗（うまぬ）い仏（ふとぅき）取（とぅ）らに。

わらべ

吾（わん）や起上（うち）り小法師（くぶし）取（とぅ）らに。

わらべ

吾（わん）や鳴（な）り子（く）取（とぅ）らに。

わらべ

吾（わん）や此（く）ぬ若衆人形（わかしゅにんぎょ）取（とぅ）らに。

国吉

此（く）り見（ん）ちゃか見（ん）ちゃか、やあ、童（わらび）ぬ達（ちゃあ）、此（く）ぬ村（むら）に知（し）らん童（わらび）ぬ隠（かく）りてぃや居（うぅ）らに、直（すぃ）ぐに言（ぃゆ）らば此（く）ぬ仏（ふとぅき）取（とぅ）らさ。

わらべ

近方（きいぽお）ぬ村々（むらむら）に知（し）らん童（わらび）や居（うぅ）や侍（び）らん、やあ、友（どぅし）ぬ達（ちゃあ）、でぃゆでぃゆ、急（いす）ぢ屋戸（やどぅ）に戻（むどぅ）ら。

わらべ

やあやあ、此（く）ぬ頃（ぐる）上原（ぃうぃいばら）ぬ山宿（やまやどぅ）い中（なか）い、知（し）らん童（わらび）ぬ二人（たい）宿（やどぅ）借（か）やい居（うぅ）や侍（び）たん。

国吉

やあやあ、童（わらび）、其（う）ぬ宿（やどぅ）に連（つぃ）りてぃ行（い）き此（く）ぬ仏（ふとぅき）取（とぅ）らさ。

わらべ

とおとお、連（つぃ）りてぃ行（い）かな、此処（くま）どぅ有（や）る。

国吉

やあ、童（わらび）、約束（やくすく）ぬ如（ぐとぅ）此（く）ぬ仏（ふとぅき）呉（くぃ）ゆん、とおとお、急（いす）ぢ村（むら）に行（い）きゆ、此（く）り此（く）り。

やあ、思（う）みん子（ぐぁ）、御気遣（うきづぃけ）ゆ召（み）しょな細（みすぃ）く御目（うみ）掛（か）きり、我身（わみ）や元（むとぅ）ぬ国吉（くにし）ぬ輩（ひゃあ）どぅ有（や）や侍（び）る、やあ、思（う）みん子（ぐぁ）、如何（いちゃ）る頼（たゆ）り有（あ）てぃ此処（くま）に隠（かく）りやい居参（いめ）が。、

若按司

世界（しけ）や敵仇（てぃちかたち）宿（やどぅ）る方（かた）無（ね）らん、此（く）ぬ山（やま）ぬ麓（ふむとぅ）に隠（かく）りとぅすぃ、高良（たから）ぬ村頭（むらかしら）崎本（さちむとぅ）ぬ子（しい）に行会（いちゃ）てぃ、彼（あ）ぬ蔭（かぢ）に此（く）ぬ宿取（やどぅ）いに隠（かく）りやい居（うぅ）ゆる。

国吉

やあ、思（う）みん子（ぐぁ）、此（く）ぬ近方（きんぷう）や心許無（くくるむとぅな）さゆ有（あ）りば、遠（とぅう）く逃（に）ぢ潜（ふぃす）でぃ時節（じしつぃ）待（ま）ち受（う）きてぃ、敵仇（てぃちかたち）打（う）ちゅる計（はか）れ事（ぐとぅ）為侍（しゃび）ら。

若按司

やあ、国吉（くにし）ぬ輩（ひゃあ）、親（うや）に捨（すぃ）てぃらりてぃ此（く）ぬ態（なり）ゆ有（や）りば、生（い）ち而居（ちょ）てぃん要（い）らん片時（かたとぅち）ん急（いす）ぢ、父母（ちちふぁふぁ）ゆ尋（とぅ）めてぃ行（い）ち欲（ぶ）しゃや有（あ）むぬ、連（つぃ）り立（た）ちゅる事（くとぅ）や許（ゆる）ち給（たぼ）り。

国吉

ああ、親愛（うやがな）し敵仇（てぃちかたち）討（う）ち取（とぅ）らな徒（いたずぃ）らに、肝（ちむ）触（ふ）りてぃ居参（いめ）み今（なま）ぬ如（ぐとぅ）召（み）しょる、とおとお、尽（つぃく）尽（づぃく）とぅ、此（く）ぬ事（くとぅ）や御思案（ぐしあん）ゆ召（み）しょり。

若按司

やあ、国吉（くにし）ぬ輩（ひゃ）、明日（あちゃ）が日（ふぃ）ん知（し）らん敵（てぃち）に取（とぅ）らり哀（あわ）り様々（さまざま）ぬ憂（う）ち目（み）見（ん）だんゆりか、少（いふぃ）ん片時（かたとぅち）ん急（いす）ぢ欲（ぶ）しゃ有（あ）むぬ、是非（じふぃ）共（とぅむ）に此（く）ぬ事（くろぅ）や許（ゆる）ち給（たぼ）り。

国吉

ああ、此（く）ぬ二年（たとぅ）ぬ一周忌（いっしゅうき）成（な）る迄（までぃ）ん、眠（にぶ）る目（み）ん寝（に）らん、小間物人形売（くまむんにんぎょおう）いに姿（すぃがた）引（ふぃ）ち窶（やつぃ）ち、村々（むらむら）ゆ巡（みぐ）てぃ尋（とぅ）めてぃ着（つぃ）ちゃる心（くくる）入（い）り、徒（あだ）に成（な）ち此（く）ぬ身（み）長（なが）れえてぃ居（うぅ）らゆりか、迚（とぅてぃ）ん御前（うめ）居（うぅ）とぅてぃ我身（わみ）や計（はか）や侍（び）ら。

若按司

やあ、国吉（くにし）ぬ輩（ひゃあ）、試（くくる）みどぅ有（や）たる今（なま）ぬ云言葉（いくとぅば）や許（ゆる）ち給（たぼ）り、実（まく）とぅに今（なま）ぬ如（ぐとぅ）有（や）りば、誇（ふく）らしゃどぅ有（あ）ゆる、やあ、姉上（うみない）ゆ、国吉（くにし）ぬ輩（ひゃ）どぅ有（や）ゆる、出（ぃん）ぢてぃ御目（うみ）掛（か）きり。

思なり

やあ、国吉（くにし）ぬ輩（ひゃあ）、弟君（うみきい）とぅ我身（わみ）や、親（うや）に捨（すぃ）てぃらりてぃ、頼（たゆ）る方（かた）居（うぅ）らん掛（か）かる方（かた）無（ね）らん、哀（あわ）り此（ぬ）ぬ態（なり）に成（な）やい又（また）居（うぅ）むぬ、慈悲（じふぃ）ゆ情（なさ）き有（あ）てぃ助（たすぃ）きやい給（たぼ）り。

国吉

ああ、拝（うぅが）でぃ懐（なつぃ）かしや袖（すでぃ）ぬ涙（なみだ）、やあ、姉上（うみない）ぬ前（めえ）、此（く）ぬ世（ゆ）ぬ中（なか）に此（く）ぬ国吉（くにし）が生（い）ちち居（うぅ）る間（えだ）や御気遣（うきづぃけ）ゆ召（み）しょな。

思なり

今（なま）ぬ如（ぐとぅ）有（や）りば誇（ふく）らしゃどぅ有（あ）ゆる、此（く）りからや朝夕（あさゆ）親（うや）とぅ頼（たぬ）みゅむぬ、万事（ばんじ）如何程（いかふどぅ）ん計（はか）りやい給（たぼ）り。

国吉

拝（うぅが）ん留（とぅ）み有侍（やび）てぃ、やあ、思（う）みん子（ぐぁ）、やあ、姉君（うみない）ぬ前（めえ）、識名村（しきなむら）花城（はなぐすぃく）ぬ輩（ひゃあ）どぅ義理立（ぢりだ）てぃぬ萎（しゅら）しゃ兄弟（ちょおでえ）ぬ契（ちぎ）り結（むす）でぃ有（あ）や侍（び）むぬ、彼（あ）ぬ宿（やどぅ）に引（ふぃ）ち越（く）しゃい隠（かく）りやい居（うぅ）や侍（び）らに。

若按司

やあ、崎本（さちむとぅ）ぬ子（しい）、国吉（くにし）ぬ輩（ひゃあ）どぅ有（や）ゆる出（ぃん）ぢてぃ居参（いも）り。

崎本

国吉（くにし）ぬ輩（ひゃあ）、久（ひさ）しゅう拝（うぅが）み有侍（やび）てぃ。

国吉

やあ、崎本（さちむとぅ）ぬ子（しい）、思（う）み子（ぐぁ）二所（たとぅくる）ぬ消（ち）い果（は）てぃる命（いぬち）、百情（むむなさ）き故（ゆい）に助（たすぃ）きやい給（たぼ）ち、ああ、至極（しぐく）心（くくる）入（い）り感（かん）じてぃどぅ居（うぅ）ゆる、やあ、崎本（さちむとぅ）、此（く）ぬ近方（きんぽお）や心許無（くくるむとぅな）さゆ有（あ）りば、識名村（しきなむら）花城（はなぐすぃく）ぬ輩（ひゃ）宿（やどぅ）に御遣（うんつぃけ）え拝（うぅが）でぃ、忍（しぬ）でぃ隠（かく）りとぅてぃ節（しつぃ）待（ま）たん為（しゅ）むぬ、仇討（かたちう）ち召（み）しぇる時節（じしつぃ）とぅん成（な）らば、共（とぅむ）に肝（ちむ）揃（する）てぃ働（はたら）ちゃい給（たぼ）り。

崎本

ああ、今（なま）ぬ如（ぐとぅ）有（や）りば誇（ふく）らしゃどぅ有（あ）ゆる、此（く）ぬ年（とぅし）に成（な）てぃ居（うぅ）てぃん、御主人（ぐしゅじん）ぬ御為（うたみ）、命（いぬち）振（ふ）い捨（すぃ）てぃてぃ御腰立（うくしだ）てぃ為（さ）ん為（しゅ）むぬ、万事（ばんじ）如何事（いかくとぅ）や計（はか）れやい給（たぼ）り。

国吉

やあ、思（う）みん子（ぐぁ）、やあ、姉君（うみない）ぬ前（めえ）。夜（ゆ）ん暮（く）りてぃ居（うぃ）りば、他所目（ゆすみ）無（ね）ぬ有（あ）むぬ、とおとお、急（いす）ぢ御立（うた）ち召（み）しょり。

　歌

　何時（いつぃ）し忘（わすぃ）りゆが　身（み）に余（あま）る情（なさ）き

　　　　　袖（すでぃ）に貫（ぬ）ち留（とぅ）みてぃ　別（わか）り苦（ぐり）しゃ

国吉

然（さ）り、花城（はなぐすぃく）ぬ輩（ひゃあ）、宿（やどぅ）や此（く）りで侍（び）る、とおとお、内（うち）に御遣（うつぃけ）為侍（しゃび）ら。

是（くり）や国吉（くにし）ぬ子（し）、ああ、此（く）ぬ二年（たとぅ）ぬ一周忌（いっしゅうき）成（な）る迄（までぃ）ん、仇（かたち）討（う）たんちゃい眠（にぶ）る目（み）ん寝（に）らん、心（くくる）尽（つぃく）しゅすぃが、助（たすぃ）き部（び）や居（うぅ）らん、先（ま）ずぃ謀（はか）い事（ぐとぅ）有（あ）むぬ、思（う）み子（ぐぁ）御宣（うんにゅ）きてぃ急（いす）ぢ火攻（ふぃじ）み為（しゅ）る計（はか）れえゆ為（すぃ）らに、やあ、思（う）みん子（ぐぁ）、やあ、姉君（うみない）ぬ前（めえ）ゆ。ああ、此（く）ぬ二年（たとぅ）ぬ一周忌（いっしゅうき）成（な）る迄（までぃ）ん、敵（てぃち）討（う）たんてぃやい眠（にぶ）る目（み）ん寝（に）らん、心（くくる）尽（つぃく）しゅすぃが、助（たすぃ）き部（び）や居（うぅ）らん長（なが）れえてぃ居（うぅ）りば、何時（いつぃ）ん斯（か）に然（さ）らん、謀（はか）り事（ぐとぅ）有（あ）むぬ先（ま）ずぃ御宣（うんにゅ）き有侍（やび）ら、今日（ちゅう）や北風（きたかぢ）ん立（た）ちゅい、火攻（ふぃじ）みどぅん為（すぃ）らば、火（ふぃ）ぬ騒（さわ）じにや、敵（てぃち）ぬ首（くび）取（とぅ）ゆすぃ疑（うたげ）えや無（ね）らん、急（いす）ぢ其（う）ぬ用意（よおい）為侍（しゃば）ら。

若按司

やあ、国吉（くにし）ぬ輩（ひゃあ）、火攻（ふぃじ）み為（しゅ）ん有（や）りば、勝（か）ちん為（しゅ）ら有（や）すぃが、一人（ふぃちゅい）ぬ働（はたら）ち、気遣（きづぃけ）えどぅ有（や）ゆる。

国吉

召（み）しぇる如（ぐとぅ）年月（とぅしつぃち）ぬ行（い）かば、謀（はか）り事（ぐとぅ）ん有（あ）ゆら徒（いたずぃ）らに月日（つぃちふぃ）重（かさ）ならば、耳（みみ）や無（ね）ん壁（かび）ぬ物（むぬ）播（ま）ちゅる世（ゆ）ぬ中（なか）ゆ有（や）りば、若（む）しか他所（ゆす）知（し）りてぃ搦（から）み出（ぃん）ぢゃさら従（ゆり）や、急（いす）ぢ火攻（ふぃじ）み謀（はか）い事（ぐとぅ）や思（う）み立（た）ちゃ侍（び）たん。

思なり

やあ、国吉（くにし）ぬ輩（ひゃあ）、若（む）しか仕損（しすん）じてぃ荒（あ）らし声（ぐぃ）ぬ有（あ）らば、弟君（うみきい）とぅ我身（わみ）や如何（いちゃ）が成（な）ゆら。

国吉

やあ、姉君（うみない）ぬ前（めえ）ゆ、此（く）ぬ国吉（くにし）が年（とぅし）や寄（ゆ）てぃ行（い）ちゅい、敵（てぃち）ぬ首（くび）取（とぅ）らな此（く）ぬ体（から）に死（し）なば、彼（あ）ぬ時（とぅち）や又（また）如何（いちゃ）が召（み）しぇら。

若按司

やあ、国吉（くにし）ぬ輩（ひゃあ）、とおとお、我身（わみ）ん連（つぃ）りてぃ行（い）かに、急（いす）ぢ火攻（ふぃじ）み為（しゅ）る用意（よおい）為（さ）り。

国吉

いやいや、石垣（いしがち）ゆ越（くぃい）てぃ忍（しぬ）び入（い）る事（くとぅ）有（や）りば、思（う）み子（ぐぁ）御供（うとぅむ）勤（がらみ）きや働（はたら）ちや成（な）らん、必（かなら）ずぃ此処（くま）に御待（うま）ち召（み）しょり、敵（てぃち）ぬ首（くび）取（とぅ）やい軈（やが）てぃ来（ちゅ）ん為（しゅ）むぬ。

思なり

やあ、国吉（くにし）ぬ輩（ひゃあ）、武士（ぶし）ぬ義理（ぎり）有（や）りば別（わか）りてぃや居参（いめ）え、油断（ゆだん）為（さ）ぬ如（ぐとぅ）に物思（むぬみ）詰（つぃ）みてぃ。

　歌

　思（う）み切（ち）やい居（うぅ）てぃん　此（く）り迄（までぃ）ゆとぅ思（み）ば

　　　　　出（ぃん）ぢ立（た）ちゅる際（ちわ）や　袖（すでぃ）ぬ涙（なみだ）

夜回り

今日（ちゅう）や北風（にしかぢ）ん轟轟（ごおごお）立（た）ちゅい、夜回（ゆまわ）い念入（にんい）りゆてぃやい、按司（あじ）ぬ御美宣（みゅん）ち事（ぐとぅ）有（や）りば、恐（うとぅる）しゃや有（あ）てぃん急（いす）ぢ通（とぅう）ら、起（う）きてぃ居（い）ちょり、うふううん、ああ、何（ぬう）ん有（あ）らん斯然（まあ）有（や）さみ。

国吉

是（くり）や国吉（くにし）ぬ子（しい）、夜（ゆ）ん更（ふ）きてぃ居（うぅ）むぬ、急（いす）ぢ火攻（ふぃじ）みに出（ぃん）ぢ立（た）ちゅん。

　歌

門（むん）に立（た）ち寄（ゆ）り覗（うかが）いば、用心（よおじん）厳（きび）しく夜回（ゆまわ）りぬ、拍子木（ひょおしぎ）繁（しぢ）く音（うとぅ）為（すぃ）りば、忍（しぬ）ぶ思（うむ）いん如何（いか）成（な）らん、南無（なむ）や八幡大菩薩（はちまんだいぶさつぃ）、力（ちから）合（あ）わしてぃ食（た）び給（たま）い、北風（きたかぢ）激（はぎ）しく吹（ふ）く音（うとぅ）に、紛（まぢ）りてぃ石垣（いしがち）飛（とぅ）び越（くぃ）いてぃ、人目（ふぃとぅみ）ん今（いま）わ絶（て）え間（ま）有（あ）る、軒端（ぬきば）ぬ下（しちゃ）に寄（ゆ）り掛（か）かてぃ、突然（すわ）や火（ふぃ）うぅ掛（か）き火炎（かうぃん）立（た）つ。

供

火事（かじ）ゆ火事（かじ）ゆ、然（さ）り然（さ）り、按司愛（あじがな）しい、火使（ふぃづぃけ）えぬ盗人（ぬすどぅ）搦（から）み捕（とぅ）や侍（び）たん。

鮫川の按司

ああ、出来（でぃき）た出来（でぃき）た。

供

盗人（ぬすどぅ）や是（くり）でえ侍（び）る。

按司

是（くり）や他（ゆ）ぬ旨（し）有（あ）る者（むぬ）どぅ有（や）ゆる、やあ、供（とぅむ）ぬ達（ちゃあ）、細（みすぃ）く尋（たずぃ）にやい聞（ち）き。

供

拝（うぅが）ん留（とぅ）み有侍（やび）てぃ、やあ、盗人（ぬすどぅ）、如何（いちゃ）為（し）ちゃる者（むぬ）が。

国吉

我身（わみ）や銭金（じんかに）ぬ盗人（ぬすどぅ）や有（あ）らん、鮫川（さみかあ）ぬ按司（あじ）ぬ首（くび）ゆ欲（ふ）しゃに、城（ぐすぃく）焼（や）き尽（つぃく）さてぃやい為（し）ちゃん。

按司

やあ、供（とぅむ）ぬ達（ちゃあ）、此（く）ぬ世（ゆ）ぬ中（なか）に国吉（くにし）ぬ輩（ひゃ）外（ふか）に、今（なま）ぬ如（ぐとぅ）大口（うふぐち）に物（むぬ）言（ぃゆ）すぃや一人（ふぃちゅい）ん居（うぅ）らん、是（くり）や別（びっ）してぃ国吉（くにし）ぬ輩（ひゃ）どぅ有（や）ゆる、とおとお、急（いす）ぢ此（く）りに出（ぃん）ぢゃし、火使（ふぃづぃけ）えぬ所存（しゅずん）直（ただ）ちに尋（たずぃ）にゆん。

供

拝（うぅが）ん留（とぅ）み有侍（やび）てぃ、さあ、御前（うめえ）に出様（でぃよお）り。

按司

やあ、国吉（くにし）ぬ輩（ひゃあ）、火事（くぁじ）ぬ騒（さわ）ぢに我身（わみ）討（う）たんてぃやい為（しゃ）すぃや、蛍火（ふたるび）ぬ須弥山（しゅみせん）焼（や）き尽（つぃく）さてぃやい為（しゅ）る心（くくる）、流石（さすぃが）武士（ぶし）ぬ身（み）ぬ習（なれ）や其（う）ぬ筈（はじ）どぅ有（や）ゆる、主人（しゅじん）ぬ恩義（うんぢ）忘（わすぃ）りらん忠節（ちゅうしつぃ）ぬ心（くくる）入（い）り、ああ、感（かん）じてぃどぅ居（うぅ）ゆる。

国吉

ああ、頼（たぬ）む方（かた）無（ね）らん、助（たすぃ）き部（び）ん居（うぅ）らん、一人（ちゅい）ぬ働（はたら）ちに城（ぐすぃく）焼（や）き崩（くじ）ち按司（あじ）ぬ首（くび）取（とぅ）やい冥土（みいどぅ）ぬ土産（みやぎ）為（さ）んとぅ思（む）てぃ、今（なま）ぬ企（くわだ）てぃどぅ有（や）たる、ああ、武運（ぶうん）ぬ強（ちゅう）さ、御果報（うがふ）どぅ有（や）ゆる。

按司

やあ、国吉（くにし）ぬ輩（ひゃあ）、高嶺（たかみに）ぬ按司（あじ）どぅ気任（ちまか）しに暮（く）らち、酒（さき）とぅ色好（いるぐぬ）み驕（うぐ）い日（ふぃ）に増（ま）さてぃ、百姓（ひゃくしょ）ぬ苦（くる）しみ諸臣下（しゅしんか）ぬ難儀（なんぢ）、挙（あ）ぎてぃ数（かずぃ）知（し）らん罪科（つぃみとぅが）ぬ有（あ）とぅてぃ、島国（しまぐに）ぬ為（たみ）に討（う）ち果（は）たち有（あ）りば、我身（わがみ）しち招（まに）ちゃる災（わざわ）いどぅ有（や）ゆる、やあ、高嶺（たかみに）ぬ生（な）し子（ぐぁ）搦（から）み出（じゃ）してぃやい、島々（しまじま）に堅（かた）く言（い）い渡（わた）ち有（あ）すぃが、此（く）ぬ二年（たとぅ）ぬ一周忌（いっしゅうち）成（な）る迄（までぃ）ん音連（うとぅづぃ）りん聞（ち）かん、今（なま）に尽々（つぃくづぃく）とぅ考（かんげ）えてぃ見（ん）りば、罪科（つぃみとぅが）や犯（うか）ちある本人（ふんにん）に有（あ）てぃん、妻子（とぅじくぁ）迄（までぃ）罪科（つぃみとぅが）に行（うく）なゆる事（くとぅ）や、道（みち）成（な）らん有（あ）むぬ忍（しぬ）ばらん事（くとぅ）、隠（かく）し置（う）ち有（あ）らば助（たすぃ）きやい取（とぅ）らさ。

国吉

ああ、乱軍（らんぐん）ぬ内（うち）居（うぅ）とぅてぃ殺（くる）さりが為（し）ちゃら、若按司（わかあじ）ぬ行方（ゆくい）夢（いみ）程（ふどぅ）ん知（し）らん。

按司

やあ、国吉（くにし）ぬ輩（ひゃあ）、静（しずぃ）かに心（くくる）入（い）り、語（かた）れ欲（ぶ）しゃ有（あ）むぬ、とおとお、先（ま）ずぃ縄（なわ）ゆ解（とぅ）ち許（ゆる）さ、やあやあ、篤（とぅく）とぅ肝（ちむ）居（いぃ）すぃてぃ言（い）やば聞（ち）ち留（とぅ）みり、己（うが）や島尻（しまじり）ぬ一本柱（いっぷんばしら）、智勇（ちゆう）兼（か）に揃（する）てぃ居（うぅ）る武士（ぶし）ぬ事（くとぅ）有（や）りば、殺（くる）しゅすぃや忍（しぬ）ばらん助（たすぃ）き欲（ぶ）しゃ有（あ）むぬ、我（わ）が所存（しゅずん）取（とぅ）い受（う）きてぃ奉公（ふうくう）ゆ為（すい）りゆ。

国吉

ああ、今（なま）ぬ仰（うう）し事（ぐとぅ）や美拝（にふぇ）どぅ有（や）や侍（び）すぃが、再（ふたた）び奉公（ふうくう）ぬ望（ぬず）みや有（あ）や侍（び）らん、とおとお、急（いす）ぢ其（う）ぬ支配（しはい）仰（うう）し召（み）しょおり。

按司

いやいや、耳（みみ）ぬ根（に）ゆ開（あ）きてぃ実（だに）ゆ聞（ち）ち留（とぅ）みり、真（まく）とぅ若按司（わかあじ）に忠節（ちゅうしつぃ）ゆ有（や）らば、主人（しゅじん）行（ゆ）く末（すぃい）ぬ善悪（じんあく）ぬ事（くとぅ）や、身（み）ぬ上（ぅうぃい）に引（ふぃ）ち受（う）きてぃ思（うむ）らにば成（な）らん、要（い）らん義理（ぢり）立（た）てぃてぃ殺（くる）さりゆ為（すぃ）らば、縦令（たとぅい）若按司（わかあじ）ぬ生（い）ち残（ぬく）てぃ居（うぅ）てぃん、誰（たる）頼（たゆ）てぃ世界（しけ）に長（なが）れえてぃ居（うぅ）い成（な）ゆが、やあ、国吉（くにし）ぬ輩（ひゃあ）、物（むぬ）や一方（ふぃとぅかた）に準（なじれ）えてぃ語（かた）てぃ済（すぃ）まん、事（くとぅ）ぬ重（うむ）さ後（あとぅ）欠（か）かん事（くとぅ）為（しゅ）すぃどぅ、変（ふぃん）に応（うう）じゆる謀（はかれ）えや有（あ）らに、とおとお、尽々（つぃくづぃく）とぅ思（うむ）い分（わ）かち真実（まくとぅ）語（かた）り、若按司（わかあじ）ん汝（ぃやあ）ん共（とぅむ）に助（たすぃ）きゆん、神仏（かみふとぅき）掛（か）きてぃ偽（いつぃわ）いや有（あ）らん。

国吉

ああ、美宣（みゅん）ち事（ぐとぅ）拝（うぅが）でぃ、袖（すでぃ）どぅ濡（ぬ）ら為侍（しゃび）る、先（ま）ずぃ我願事（わにげぐとぅ）ぬ立（た）ちゅんどぅん有（や）らば、天（てぃん）に飛（とぅ）び昇（ぬぶ）い地（ち）ぬ底（すく）に潜（くぐ）てぃ、若按司（わかあじ）ぬ行方（ゆくい）尋（たずぃ）にやい来（ちゃ）侍（び）ら。

按司

とおとお、急（いす）ぢ願事（にげぐとぅ）ゆ語（かた）り聞（ち）ちゅん。

国吉

先（ま）ずぃ若按司（わかあじ）に一間切（ちゅまぢり）ぬ地頭按司（じとぅうあじ）ぬ位（くれえ）添（すぃ）いてぃ、高嶺（たかみに）ぬ按司（あじ）ぬ跡目（あとぅみ）立（た）てぃ、四季（しち）ぬ祭礼（さいれえ）執（とぅ）い行（うく）なゆん有（や）らば、国家再興（くっかさいこお）ぬ為（たみ）有（や）りば、武士（ぶし）ぬ義理（ぢり）曲（ま）ぎてぃ拝（うぅが）ん留（とぅ）み有侍（やび）ら。

按司

ああ、此（く）ぬ願事（にげぐとぅ）ん否（んば）や又（また）成（な）らん、とおとお、望（ぬず）みに任（まか）さ。

国吉

ああ、尊（とお）とぅ、段々（だんだん）ぬ御慈悲（ぐじふぃ）今（なま）ぬ如（ぐとぅ）有（や）りば、心（くくる）打（う）ち晴（は）りてぃ実（じつぃ）に美御宣（みゅんにゅ）きら、識名村（しきなむら）なかい隠（かく）りやい居参（いめ）ん。

按司

やあ、国吉（くにし）ぬ輩（ひゃあ）、急（いす）ぢ識名村（しきなむら）行（い）ちゃい細（みすぃ）く言（い）聞（ち）かち、兄弟（ちょおでえ）落（う）ち着（つぃ）かち添（そお）てぃ来（ちょお）り。

国吉

拝（うぅが）ん留（とぅ）み有侍（やび）てぃ。

按司

とおとお、急（いす）ぢ急（いす）ぢ。

国吉

御供（うとぅむ）勤（がらみ）ちゃい来（ちゃ）あ侍（び）たん。

按司

とおとお、急（いす）ぢ呼（ゆ）びゆ呼（ゆ）びゆ、やあ、若按司（わかあじ）ゆ、国吉（くにし）ぬ輩（ひゃあ）が願事（にげぐとぅ）ゆ聞（ち）きば、理（くとぅわい）ゆ有（や）りば、肝苦（ちむぐり）しゃ有（あ）むぬ、按司（あじ）に成（な）ち島知行（しまちぎゅう）ん呉（くぃ）ゆん、とおとお、今日（ちゅう）からや三人（みっちゃい）心（くくる）安々（やすぃやすぃ）とぅ居（うく）りゆ。

若按司

ああ、尊（とお）とぅ、此（く）ぬ御恩（ぐうん）尊（とぅう）とぅさや何時（いつぃ）し忘（わすぃ）りゆが、やあ、国吉（くにし）ぬ輩（ひゃあ）、此（く）ぬ御恩（ぐうん）一期（いちぐ）頂（つぃじ）に担（かみ）ら。

国吉

ああ、此（く）ぬ御恩（ぐうん）尊（とぅう）とぅさや石（いし）な子（ぐ）ぬ石（いし）ぬ、大石（ううし）成（な）る迄（までぃ）ん御掛（うか）き栄（ふせ）召（み）しょり。

按司

とおとお、今日（ちゅう）ぬ誇（ふく）らしゃや、押（う）し連（つぃ）りてぃ互（たげ）に踊（うどぅ）てぃ戻（むどぅ）ら。

若按司

押（う）し連（つぃ）りてぃ互（たげ）に踊（うどぅ）てぃ戻（むどぅ）有侍（やび）ら。

　歌

　今日（きう）ぬ誇（ふく）らしゃや　何（な）うぅ似（に）じゃな譬（たてぃ）る

　莟（つぃぶ）でぃ居（うぅ）る花（はな）ぬ　露（つぃゆ）来合（ちゃ）た如（ぐとぅ）

　九重（くくぬい）ぬ内（うち）に　莟（つぃぶ）でぃ露（つぃゆ）待（ま）ちゅすぃ

　　　　　嬉（うり）し事（ぐとぅ）菊（ちく）ぬ　花（はな）どぅ有（や）ゆる